FIFA ka caktuar trupën e arbitrave për përballjen çerekfinale të Kupës së Botës mes Francës dhe Marokut, që do të luhet nesër, të enjten, por vendimi nuk është pritur mirë nga asnjë prej dy kampeve.

Takimi i planifikuar për të enjten në mbrëmje, me fillim nga ora 22:00, do të gjykohet nga një ekip arbitrash nga Argjentina.

Facundo Tello do të jetë arbitri kryesor i ndeshjes, me Juan Pablo Belatti dhe Gabriel Chade në rolin e asistentëve. Detyrën e arbitrit të katërt do ta mbajë Dario Herrera, ndërsa Cristian Navarro është caktuar si ndihmës arbitër rezervë. Ndërkohë, emrat e arbitrave të VAR-it mbeten ende pa u konfirmuar.

Te Franca ka shqetësim për faktin se ndeshja do të drejtohet nga një arbitër që vjen nga një shtet që vazhdon të jetë në garë dhe mund të jetë kundërshtari i tyre në finale. Një situatë e ngjashme ishte shfaqur edhe te argjentinasit, të cilët kishin shprehur rezerva sepse ndeshja e tyre e djeshme u arbitrua nga francezi Francois Letexier.

Edhe marokenët nuk e kanë pritur qetësisht këtë emërim, pasi kujtimet e tyre me Tellon nuk janë pozitive. Ai kishte arbitrur kombëtaren e tyre në çerekfinalet e Kupës së Botës së fundit ndaj Portugalisë, ndeshje që u mbyll 1-0, ku përjashtoi sulmuesin maroken Ëalid Cheddira pasi i dha dy kartonë të verdhë brenda pak sekondash nga njëri-tjetri.

Ky do të jetë rasti i tretë që 44-vjeçari Tello gjykon në këtë Kupë Bote. Mes këtyre ndeshjeve, ai ka vendosur drejtësi edhe në sfidën mes Kanadasë dhe Bosnje dhe Hercegovinës.

The post Delegimi i FIFA-s për arbitrat ngjall pakënaqësi te Franca dhe Maroku appeared first on Albeu.com.