Deputeti i Partisë Demokratike, Klevis Balliu, ka komentuar postin e Kim, duke u shprehur se ish-ambasadorja amerikane Yuri Kim dhe Ministrja e Infrastrukturës, Belinda Balluku, kanë lidhje me interesa korruptive, në dy termocentralet lundruese të ExxonMobil në gjirin e Vlorës.

Sipas Balliut, Kim ka ndihmuar kompaninë të sigurojë kontratën për ndërtimin e këtyre termocentraleve, të cilatnuk punojnë dhe ndotin ambientin.

Ai e quajti këtë marrëveshje një “pakt korruptimi” mes Yuri Kim dhe Ballukut, duke hedhur akuza, se ky akt ka dëmtuar interesat e Shqipërisë dhe marrëdhëniet me SHBA-të.

DEKLARATA:

Ish-Ambasadorja Yuri Kim, ka provuar edhe njëherë se, gjatë kohës në detyrë në Shqipëri, ka përfaqësuar interesat vetjake, financiare dhe korruptive dhe jo ato të taksapaguesve amerikanë dhe aleatit strategjik të kombit shqiptar, Shteteve të Bashkuara të Amerikës.

Duke shkelur me të dyja këmbët etikën diplomatike dhe standardet e profesionale ajo ka pranuar një post ekzekutiv si shpërblim nga një kompani, të cilën e ka ndihmuar të sigurojë një kontratë me qeverinë shqiptare.

Exxon Mobil, falë Yuri Kim ka parkuar në gjirin e Vlorës dy termocentrale lundruese, të cilat nuk punojnë dhe as prodhojnë energji; e kundërta: ndotin detin dhe brigjet përreth.

Ajo që Yuri Kim quante asokohe ‘memorandum mirëkuptimi’ ishte një ‘pakt korruptimi’ mes saj dhe ‘Bukrës së Korrupsionit’, rekordmenes së ‘kilometrit 24 milion euro’, Belinda Balluku.

Yuri Kim tradhëtoi kështu, jo vetëm vendin e saj, por edhe interesat e qytetarëve shqiptarë, taksat e të cilëve paguan për dy dinosaurë industrialë të ardhur nga Azia.

Tigri 1 dhe Tigri 3 janë “dhurata” që Yuri Kim i bëri Shqipërisë. Nëpërmjet tyre ajo siguroi një vend pune pas pensionit dhe, me siguri, një bakshish të majmë.

Kjo ishte vetëm një nga pagesat që mori nga qeveria Rama për luftën e saj të paprinciptë kundër Partisë Demokratike, liderit të saj Berisha, dhe opozitës në tërësi.

Shprehja e saj famëkeqe “do të hani bar” drejtuar demokratëve, është sot kujtesa e dëmit jo vetëm financiar, por edhe moral e electoral që diplomatë të tillë i kanë bërë dhe vazhdojnë t’i bëjnë Shqipërisë.

Partia Demokratike, thekson partneritetin dhe miqësinë e pacënueshme me Shtetet e Bashkuara të Amerikës dhe me administratën e Presidentit Trump, dhe shpreh mirënjohjen për Sekretarin Rubio që e pastroi Departamentin e Shtetit nga të korruptuarit si Kim.

Sot demokratët mund të qeshin me atë që po ha barin e hidhur të turpit.

The post Yuri Kim me post tek “ExxonMobil”, Balliu: Balluku dhe ish-ambasadorja lidhën “pakt korruptimi” për termocentralet lundruese appeared first on Albeu.com.

Ajo është emëruar në një rol të lartë drejtues në ExxonMobil, kompania më e madhe amerikane në fushën e naftës dhe gazit, dhe një nga korporatat më të fuqishme në rang global.

Me seli në Teksas, ExxonMobil, është kompania e shtatë më e madhe për nga të ardhurat në SHBA, dhe e 13-ta më e madhe në botë.

Ish-ambasadorja Yuri Kim, e ka njoftuar emërimin në pozicionin e ri drejtues në llogarinë e saj në rrjetin social X.

ExxonMobil, ka një shtrirje të gjerë në disa shtete ku ushtron aktivitetin në fushën e gazit natyror.

Yuri Kim, shërbeu si Ambasadore e SHBA në Shqipëri nga viti 2020 deri në vitin 2023, duke qenë një nga zërat më të fortë në mbështetje të reformës në drejtësi, forcimit të institucioneve demokratike dhe afrim të marrëdhënieve strategjike mes dy vendeve.

Largimi i saj nga diplomacia dhe zgjedhja për t’u angazhuar në një kompani të kësaj përmase, sinjalizon një rrugëtim të ri profesional, por pa u larguar nga fushat me ndikim global.

Interesant është fakti se ExxonMobil ka prezencë edhe në Shqipëri, më konkretisht në Vlorë, teksa menaxhon TEC-in e Vlorës.

Prania e ExxonMobil në Shqipëri

ExxonMobil, është i përfshirë në rinovimin e Termocentralit (TEC) të Vlorës në Shqipëri dhe në zhvillimin e një terminali të ri importi të gazit natyror të lëngshëm (LNG) në Vlorë.

Në mars të vitit 2021, u nënshkrua një marrëveshje bashkëpunimi midis qeverisë shqiptare, ExxonMobil dhe Excelerate Energy, e cila përfshin konvertimin e TEC-it ekzistues për të funksionuar me LNG, ndërtimin e një terminali të ri LNG dhe transformimin e Vlorës në një qendër rajonale të shpërndarjes së gazit.

Termocentrali ekzistues i Vlorës nuk kishte prodhuar kurrë energji, për shkak të problemeve operacionale dhe projekti synon të ofrojë një zgjidhje të besueshme energjetike për Shqipërinë dhe rajonin e gjerë të Ballkanit, duke diversifikuar burimet e energjisë dhe duke rritur sigurinë energjetike.

Çfarë dihet për Exxon Mobil Corporation

ExxonMobil Corporation, është një korporatë amerikane shumëkombëshe e naftës dhe gazit, me seli në Spring, Teksas, një periferi e qytetit Houston.

Ajo u themelua si pasardhësja më e madhe direkte e kompanisë Standard Oil të John D. Rockefeller.

Kompania moderne u formua në vitin 1999, pas bashkimit të Exxon dhe Mobil, dy pasardhëse të drejtpërdrejta të Standard Oil, konglomeratit legjendar të themeluar nga John D. Rockefeller në fund të shekullit XIX.

Sot, ExxonMobil operon globalisht në të gjitha segmentet e industrisë së energjisë, përfshirë:

Kërkimin dhe prodhimin e naftës dhe gazit natyror.

Rafinimin dhe shpërndarjen e karburanteve dhe produkteve petrokimike.

Zhvillimin e teknologjive të qëndrueshme, përfshirë investime në energjinë e pastër dhe kapjen e karbonit.

ExxonMobil, është një nga kompanitë më të mëdha në botë për nga të ardhurat, dhe për një periudhë të gjatë ka qenë edhe ndër kompanitë publike më të vlefshme në bursë.

Ajo është e pranishme në dhjetëra vende dhe luan një rol të rëndësishëm në tregjet globale të energjisë.

Pavarësisht ndikimit të saj ekonomik dhe teknologjik, kompania ka qenë shpesh në qendër të kritikave për efektin e saj në mjedis dhe për rolin në debatin mbi ndryshimet klimatike.

The post Ish-ambasadorja e SHBA në Tiranë, Yuri Kim emërohet në krye të kompanisë amerikane, ExxonMobil appeared first on Albeu.com.