Pas të moshuarve në azilet e pleqve, edhe një çoban me lopë në Greqi rezulton si pronari i kompanisë që ka përfituar 30 milionë euro. Vezir Brahaj ka folur për “SYRI TV”, duke pohuar se prej 18 vitesh jeton në Greqi ku punon si çoban.

Por ndërkohë, qeveria “Rama” ka disbursuar në kompaninë e tij, të lidhur me inceneratorët plot 30 milionë euro.

Z. Vezir, sa vjeç jeni dhe ku jetoni?

Unë jetoj në Greqi te çupa e vogël.

Prej sa vitesh?

Unë jetoj në Greqi që nga viti 2008 deri më sot. Kam ardhur nja 3-4 herë, herën e fundit kam ardhur në 2019 në 25 janar më vdiq djali i vetëm. Ndenja 3 muaj deri në maj dhe u ktheva në Greqi se isha vetëm. Gruaja më vdiq në 2008, ngela vetëm.

Z. Brahaj, prej ditësh emri juaj është përmendur se ju jeni pronar i dy kompanive të lidhura me inceneratorët që kanë qarkulluar rreth 30 milionë euro, si qëndron e vërteta z. Vezir, a jeni ju pas këtyre transaksioneve?

Unë nuk e di kush i ka hedhur.. nuk e di.

Z. Vezir, në emrin tuaj rezultojnë 2 kompani, “Elvis 03” dhe “Elvis COO”. A i keni blerë ju këto kompani?

Jo, jo, jo, nuk kam blerë unë kompani, nuk di gjë për atë punë.

A jeni marrë ndonjëherë me biznes z. Vezir?

Jo, vetëm në Greqi, çoban me lopë. 300 euro në muaj.

The post Çobani në Greqi me 30 milion euro në Shqipëri, Vezir Brahaj: Nuk di gjë, fiton 300 euro në muaj appeared first on Albeu.com.

Një ditë pasi 90-vjeçarja Haxhire Gurakuqi deklaroi publikisht se pranë saj ishin paraqitur persona për t’i kërkuar firmën, e cila më pas ishte përdorur për t’i ngarkuar tre kompani që kishin realizuar rreth 30 milionë dollarë xhiro vjetore, ABC kontaktoi me familjarët e Thanas Çanit, pensionistit tjetër të përfshirë në skemën e kompanive që pasi kryenin evazion fiskal shisnin kompanitë e tyre.

Në një komunikim me ABC, Ardjan Çani deklaron se familja e tij dhe babai i tij Thanas Çani e mësuan vetëm nga media faktin se babai i tyre ishte i përfshirë në një skemë ku ndonëse qarkullonin miliona dollarë nuk ka përfituar asnjë qindarkë.

“Kjo që ka ndodhur jo vetëm është si skenar filmash, por është e ngjashme me episode humoristike. Nuk na ka njoftuar as krim ekonomik dhe askush. Ne e kemi marrë vesh vetëm kur gjetëm emrin e babait dhe foton e tij nëpër portale. S’ka ardhur asnjë letër që të na njoftoi as tek unë dhe as tek babai im. Nuk jemi njoftuar për asgjë nga këto që kanë ndodhur gjithë këto vite”.

Djali i pensionistit që u përfshi në skemën e kompanive që bashkëpunonin me inceneratorin e Tiranës thotë se do të ndjek të gjithë rrugën ligjore për zbardhjen e ngjarjes.

“Unë do ta ndjek çështjen ligjërisht. Këto janë çështje të cilat ne si familje po i konsultojmë. Ana morale, i takon të gjithëve të bëjnë pjesën e tyre. Ju si media bëjeni pjesën tuaj të tregoni se çfarë ndodh në këtë vend”.

Emrat e pensionistëve 90 vjeçar pa lidhje mes tyre, Haxhire Gurakuqi dhe Thanas Çanit u denoncuan nga LSI, si persona që kishin marrë në zotërim 3 kompani që kishin qarkulluar rreth 30 milionë dollarë, por që siç ka rezultuar nuk kanë përfituar asgjë dhe shkresat për ta janë falsifikuar. /abcnews.al

The post U denoncua si milioner, flet djali i Thanas Çanit: E morëm vesh nga mediat, do ta ndjek ligjërisht çështjen appeared first on Albeu.com.