Sipas Bankës së Shqipërisë, në fund të muajit korrik vlera e mjeteve të rezervës arriti në 5.009 miliardë Euro, në rritje me 27.1% krahasuar me të njëjtën periudhë të një viti më parë. Vlera e muajit korrik është shumë afër rekordit historik të rezervës, që ishte regjistruar në shkurt të këtij viti, në vlerën e 5.015 miliardë Eurove.

Banka e Shqipërisë po adopton një strategji të zgjerimit gradual të rezervës nëpërmjet blerjes së valutës dhe sidomos të Euros në tregun e brendshëm valutor. Bazuar në vendimin e Komitetit të Zbatimit dhe Këshillimit të Politikës Monetare në Bankën e Shqipërisë, parashikohet që këtë vit të blihet në tregun e brendshëm valutor një shumë në intervalin midis 140 dhe 200 milionë Eurove.

Një rezervë e lartë valutore vlerësohet nga ekspertët si instrument i rëndësishëm për të amortizuar goditje të mundshme, të lidhura si me deficitin e llogarisë korrente, ashtu edhe me nivelin e lartë të Euroizimit të sektorit financiar në vend.

Duke qenë një ekonomi me pozicion të jashtëm negativ, sidomos në mallra, Shqipëria është e ekspozuar ndaj situatave kur sigurimi i valutës së nevojshme mund të jetë i vështirë. Për këtë arsye, rezerva valutore mund të shërbejë si instrument për të financuar sigurimin e importeve, për të mbështetur me likuiditet në valutë sektorin financiar apo për të stabilizuar goditje në kursin e këmbimit valuor.

Një nga parametrat bazë për të përcaktuar madhësinë e rezervës valutore është aftësia për të mbuluar të paktën katër muaj importe, ndërsa aktualisht rezerva valutore e vendit mbulon pothuajse tetë muaj importe, duke qenë dukshëm sipër objektivave të saj minimale.

Rezerva valutore këtë vit po orientohet gjithnjë e më shumë drejt investimit në tituj. Vlera e këtyre instrumenteve në fund të korrikut arriti në 3.61 miliardë Euro, pothuajse dy herë më shumë krahasuar me një vit më parë. Pesha e portofolit të titujve kundrejt vlerës totale të mjeteve të rezervës valutore ka arritur në pothuajse 72%, nga 46% që ishte në të njëjtën periudhë të një viti më parë.

Zhvendosja e ndjeshme drejt investimeve në tituj mund të shpjegohet me rritjen e ndjeshme të yield-eve të instrumenteve financiarë në pjesën e parë të këtij viti dhe synimin për të rritur kthimin nga rezerva valutore.

Këshilli Mbikëqyrës i Bankës së Shqipërisë miraton parimet dhe kriteret cilësore për zhvillimin e aktivitetit të administrimit të rezervës valutore. Në zbatim të këtyre kritereve, Komiteti i Investimit miraton treguesit sasiorë dhe ndjek përmes raportimeve periodike vënien në zbatim të politikës së investimit, përveçse miraton edhe emrat e lejuar (emetuesit) në të cilët investohet rezerva valutore.

Këto emra përfshijnë qeveritë e SHBA-së, Japonisë, Britanisë së Madhe, Kanadasë, Australisë dhe Eurozonës, të cilat përgjithësisht janë të renditura të paktën A-, ndërsa për qeveritë e Eurozonës renditja minimale e pranuar është BBB-. Në emrat e lejuar për investim përfshihen dhe agjenci apo institucione të lidhura me qeveritë, institucione shumëpalëshe apo të tjera subjekte të renditura të paktën AA- (për banka/institucione të tjera financiare renditja minimale e pranuar është A-). /Monitor

The post Rezerva valutore kalon sërish pragun e pesë miliardë Eurove, qëndron pranë nivelit më të lartë historik appeared first on Albeu.com.

Në një deklaratë, Këshilli Evropian tha se miratoi tre aktet përfundimtare ligjore që kërkohen për t’i mundësuar Kroacisë futjen e euros.

Një nga aktet përcaktonte normën e konvertimit për hyrje në një euro në 7,53450 kuna kroate.

Zbynek Stanjura, ministri i financave i Çekisë, e cila mban presidencën aktuale gjashtëmujore të radhës të BE-së, uroi homologun e tij kroat. Miratimi i euros nuk është një garë, por një vendim i përgjegjshëm politik”, tha ai. “Kroacia ka plotësuar me sukses të gjitha kriteret e kërkuara ekonomike dhe do të paguajnë në euro që nga 1 janari 2023.”

Kroacia shpalli pavarësinë nga Jugosllavia në 1991. Sllovenia fqinje, gjithashtu një ish-republikë jugosllave dhe tani pjesë e BE-së, miratoi euron në 2007./albeu.com

The post KE i jep dritën jeshile, Kroacia bëhet pjesë e eurozonës appeared first on Albeu.com.