Ai bëri me dije se, krahas temperaturave të larta, në pjesën e dytë të ditës do të ketë edhe vranësira dhe reshje shiu, kryesisht në zona të izoluara të vendit.

Sipas Osmanit, fillimi i javës për Shqipërinë mbetet nën ndikimin e valës së të nxehtit që ka përfshirë rajonin e Ballkanit. Për këtë arsye, temperaturat maksimale do të shkojnë në 40°C në qarqet e Elbasanit, Beratit dhe gjithashtu në Shkodër.

Vlera shumë të larta termike priten edhe në qarkun e Tiranës dhe të Gjirokastrës, ku maksimumet do të jenë mbi 38°C. Në vijën bregdetare, në këtë fillimjave, temperaturat më të larta do të luhaten nga 34 deri në 37°C, ndërsa në zonat malore maksimumet do të variojnë nga 31 deri në 34°C. Në tërësi, fillimi i javës paraqitet me temperatura ekstremisht të larta për vendin.

Pas të mërkurës, tha ai, pritet një tërheqje graduale e valës së të nxehtit, çka do të sjellë edhe ulje të temperaturave të ajrit. Kjo do të bëjë që në pjesën e dytë të javës maksimumet të zbresin rreth 34 apo 35°C.

Sipas parashikimit, gjysma e dytë e javës do të sjellë edhe rënie të temperaturave në orët e para të mëngjesit. Në qytetet e zonave malore, minimumet do të zbresin në 13-14°C, ndërsa në ultësirën perëndimore do të luhaten nga 17 deri në 22 apo 23°C në vijën bregdetare.

Për ditën e sotme, moti parashikohet i qëndrueshëm, me alternime kthjellimesh dhe me kalime të lehta vranësirash gjatë orëve të mbrëmjes. Duke nisur nga e marta e të paktën deri në fundjavë, orët e para të mëngjesit do të dominohen nga intervale të gjata me diell pothuajse në të gjithë territorin.

Në orët e pasdites, herë pas here do të ketë zhvillim të vranësirave, duke sjellë rrebeshe shiu në shtrirjen lindore dhe pjesërisht edhe në zonat qendrore. Në zona të izoluara të kryeqytetit dhe të Elbasanit pritet po ashtu që herë pas here të ketë rrebeshe afatshkurtra shiu, të cilat do të jenë të pranishme gjatë kësaj jave.

Prania e këtyre reshjeve do të ndikojë në rritjen e lagështirës në ajër. Si pasojë, edhe pse temperaturat do të pësojnë rënie të ndjeshme krahasuar me fillimjavën, ato do të ndihen një apo dy gradë më të larta se vlerat normale për shkak të lagështirës së lartë në ajër.

Në fakt, të paktën gjatë pjesës së dytë të javës, në territorin shqiptar reshjet në formën e rrebesheve do të shfaqen në zona të izoluara, kryesisht në zonat lindore, në verilindje dhe në juglindje të vendit. Rënia e menjëhershme dhe graduale e temperaturave do të sjellë edhe mundësinë që këto rrebeshe të shfaqen gradualisht në formën e breshërit.

Megjithatë, sipas Osmanit, këto fenomene pritet të kufizohen vetëm në zona të izoluara dhe nuk ka sinjale për një rënie drastike të temperaturave të ajrit. Po ashtu, nuk pritet që breshëri të jetë në ato sasi të përmendura, por në një formë më normale për sa i përket madhësisë. Ai theksoi se, në momentet kur rrebeshet me breshër paraqiten, në zonat ku bien ato mund të sjellin problematika për të mbjellat në ara dhe për frutikulturën.

Duke folur edhe për vendet e rajonit, meteorologu tha se fillimi i javës do të karakterizohet nga temperatura të larta, ndërsa në pjesën e dytë të saj pritet ulje e tyre.

Sipas tij, edhe Republika e Kosovës dhe Republika e Maqedonisë së Veriut po përjetojnë këtë fillimjave temperatura ekstremisht të larta. Në Kosovë, maksimumet arrijnë nga 36°C deri në 37°C, ndërsa në zona të izoluara të jugperëndimit të Republikës së Maqedonisë së Veriut temperaturat i afrohen 38°C.

Për pjesën e dytë të javës, ai sqaroi se pritet rënie e temperaturave të ajrit edhe në rajon, duke bërë që maksimumet në Kosovë të zbresin rreth 30°C, ndërsa në Republikën e Maqedonisë së Veriut të arrijnë deri në 31°C.

The post Java nis me vapë deri në 40°C, nga e mërkura pritet rënie graduale e temperaturave dhe reshje të izoluara appeared first on Albeu.com.

Gjatë bisedës, Hyland theksoi lidhjet e hershme historike mes Shqipërisë dhe Shteteve të Bashkuara të Amerikës. Duke folur për projektin e propozuar nga Jared Kushner, ai e përshkroi atë si një mundësi të madhe ekonomike me përmasa ndërkombëtare.

“SHBA ka një histori të gjatë me Shqipërinë. Po të mos ishte presidenti Willson, shpërbërja e Shqipërisë do të çonte në mos ekzistencën e saj.

Ne kemi pasur një grua në SHBA që donte të bëhej mbretëreshë e Shqipërisë. Mbështetësit amerikanë nuk kanë rreshtur së foluri për Shqipërinë dhe shqiptarët e radhës në administratën amerikane.

Shqipëria duhet të jetë e hapur për investimet. Sa i takon projektit të Kushner-it, ai është një projekt shumëkombësh nga SHBA, Arabia Saudite dhe investitorë që vijnë nga e gjithë bota dhe nga investimet ndërkombëtare. Shqipëria ka shumë ngjyra, si ato që përdor kryeministri juaj.

Askush nuk është më i shqetësuar për mbrojtjen e zonave të mbrojtura sa unë dhe ishulli ku do të investohet është në një farë mënyre i rrënuar dhe investitorët do të derdhin miliarda dollarë për ta ndryshuar, pra kjo është në një farë forme një lloj dhurate për Shqipërinë.

Unë kam vizituar shumë parqe kombëtare të Shqipërisë dhe në këto pika ka hotele, ka resorte dhe mbështes hipotezën që këto investime të jenë të hapura për qytetarët, në mënyrë që ata ta përjetojnë atë investim”, u shpreh ai.

Sipas Hyland, ishulli i Sazanit ndodhet aktualisht në një gjendje të degraduar dhe investimi i parashikuar me miliarda dollarë do të sillte një transformim të madh, duke i dhënë vendit, sipas tij, një pamje tërësisht të re.

Ai shtoi gjithashtu se ka vizituar shumë parqe kombëtare në Shqipëri, ku ka parë hotele dhe resorte, ndërsa mbështeti idenë që investime të tilla të jenë të aksesueshme për qytetarët, në mënyrë që edhe ata të kenë mundësi t’i përjetojnë.

The post Ish-këshilltari i Clinton: Projekti në Sazan mund t’i japë Shqipërisë një pamje krejtësisht të re appeared first on Albeu.com.