Ragmi Mustafi, ish-kryetar i Këshillit Kombëtar Shqiptar në Luginën e Preshevës dhe këshilltar politik për Preshevën, Medvegjën e Bujanocin, ka reaguar ndaj deklaratave të drejtorit të Shërbimit të Trupit Koordinues, duke e akuzuar atë se ka konfirmuar ndikimin e drejtpërdrejtë të pasivizimit të adresave në peshën politike të shqiptarëve në Bujanoc.

Përmes një postimi në Facebook, Mustafi ka deklaruar se fjalët e zyrtarit serb kanë nxjerrë në pah, sipas tij, dy elemente të politikës së pasivizimit të adresave.

“Me këtë reagim, z. Mitrovic, ju si drejtor i Shërbimit të Trupit Koordinues zbuluat dy të vërteta që institucionet e Serbisë janë përpjekur t’i fshehin prej vitesh”, ka shkruar ai.

Sipas Mustafit, kjo praktikë nuk mund të shihet thjesht si një procedurë administrative, pasi lidhet drejtpërdrejt edhe me numrin e votuesve shqiptarë në Bujanoc.

“E para, se pasivizimi i adresave nuk ka të bëjë vetëm me ‘rregullimin’ e evidencave administrative, por me zvogëlimin e peshës elektorale të shqiptarëve në një komunë ku ata përbëjnë rreth 62% të popullsisë”, ka deklaruar ai.

Ai ka pretenduar se pasivizimi nuk ndodh në mënyrë të rastësishme, por është një proces i udhëhequr nga institucionet shtetërore të Serbisë.

“E dyta, se ky mekanizëm nuk zhvillohet rastësisht dhe as vetvetiu, por dirigjohet, gjenerohet dhe zbatohet drejtpërdrejt nga institucionet shtetërore”, ka shkruar Mustafi.

Ish-kreu i Këshillit Kombëtar Shqiptar ka vënë në dyshim përqendrimin e zyrtarit te numri i votuesve, duke e interpretuar këtë si dëshmi se problemi kryesor nuk janë adresat, por ndikimi i votës shqiptare.

“Ju folët për numrin e votuesve. Pra, e treguat vetë se halli nuk është adresa. Halli është vota shqiptare”, ka theksuar ai.

Mustafi e ka përshkruar politikën e pasivizimit si “një qasje antishqiptare dhe çnjerëzore”. Sipas tij, ajo synon të prekë regjistrat administrativë, listat e votimit dhe përfaqësimin politik të shqiptarëve në Bujanoc.

“Adresat nuk pasivizohen vetë. Procedurat i nisin institucionet. Kontrollet i kryen policia. Vendimet i nxjerr shteti. Pasojat i bartin shqiptarët”, ka thënë ai.

Në përmbyllje të reagimit, Mustafi ka kërkuar që pasivizimi i adresave të ndalet dhe të rikthehen adresat që, sipas tij, janë hequr në mënyrë të padrejtë.

“Raportet i keni lexuar: ndaleni pasivizimin dhe ktheni adresat e fshira padrejtësisht. Këtë praktikë të spastrimit administrativ e kemi denoncuar nga Washingtoni në Bruksel”, ka shkruar Mustafi.

The post Ragmi Mustafi: Pasivizimi i adresave në Bujanoc synon dobësimin politik të shqiptarëve appeared first on Albeu.com.

Punimet e Komisionit për Punë të Jashtme të Kuvendit të Shqipërisë u ndërprenë të hënën për shkak të një debati të ashpër të nxitur nga deklaratat e Snezhana Paunoviq, ministre e administratës publike në Serbi.

Paunoviq, e lindur në Pejë, kishte përmendur spastrimin etnik në Kosovë gjatë vitit 1998, duke shtyrë deputetët e opozitës, Tritan Shehu dhe Albana Vokshi, të kërkonin llogari nga kryetari i atij komisioni, Igli Hasani.

Ish-ministri i Punëve të Jashtme, tashmë në krye të Komisionit, u përball me pyetje lidhur me qëndrimin e diplomacisë shqiptare dhe mungesën e një reagimi ndaj pohimeve të zyrtarit serb.

Tensionet u përshkallëzuan me shpejtësi, duke sjellë një përplasje të fortë verbale mes Hasanit dhe Vokshit. Hasani e cilësoi absurde marrjen e leksioneve për qetësinë nga ana e saj, ndërsa Vokshi e akuzoi se po përpiqej të mbulonte heshtjen e kryeministrit përmes një sjelljeje agresive.

Në momentin më të nxehtë të debatit, Hasani e quajti deklaratën e Paunoviqit “budallake” dhe shtoi se autorja e saj ishte njëqelbësirë e çmendur. Vokshi reagoi duke thënë se ajo është ministre dhe nuk mund të cilësohet e tillë dhe i bëri thirrje Komisionit që të mbante një qëndrim zyrtar.

Megjithëse Vokshi këmbënguli se opozita nuk do ta mbyllte gojën, Hasani i kërkoi të mos merrej me të dhe atmosfera e acaruar çoi në pezullimin e seancës.

The post Seanca e Komisionit të Jashtëm ndërpritet pas deklaratave të ministres serbe për spastrimin etnik të Kosovës appeared first on Albeu.com.