Ermal Krasniqi është optimist se Kosova mund ta mposhtë Austrinë në përballjen e sontme, e cila nis në orën 18:00 në stadiumin “Fadil Vokrri”. Sipas tij, një rezultat i tillë do t’ia mundësonte Kosovës të synonte edhe vendin e parë në Grupin B3 të Ligës së Kombeve.

Sulmuesi kosovar e ka cilësuar këtë takim si një nga sfidat më të rëndësishme të këtij edicioni dhe ka bërë të ditur se skuadra është përgatitur në nivelin maksimal.

“Mund të luftojmë lirisht për vendin e parë. Jemi përgatitur maksimalisht për këtë ndeshje dhe besoj se nuk do t’i përsërisim gabimet e sfidës së parë me Austrinë. Shpresoj që këtë herë t’i qasemi më mirë takimit dhe të marrim një rezultat pozitiv”.

Në një prononcim për “Klan Kosova”, Krasniqi veçoi repartin defensiv si një nga aspektet ku përfaqësuesja duhet të bëjë përmirësime, me qëllim që të mos përsëriten gabimet e ndeshjeve të kaluara.

“Duhet t’i korrigjojmë gabimet e bëra në ndeshjet e kaluara. E dimë se kemi kualitet dhe se mund ta fitojmë edhe këtë përballje. Do të luajmë në stadiumin tonë, para tifozëve tanë, ndaj përkrahja e tyre mund të na ndihmojë të triumfojmë”.

Futbollisti pranoi se Austria ishte parë si favorite për të përfunduar në krye të grupit që në nisje të garës, megjithatë ai beson se një fitore në “Fadil Vokrri” mund ta ndryshojë këtë panoramë.

“Në fillim të gjithë kemi thënë se Austria ishte favorite. Unë besoj te ekipi ynë, pasi në grup kemi shumë kualitet. Besoj se mund ta sigurojmë edhe vendin e parë”, përfundoi Krasniqi./

The post Ermal Krasniqi beson te fitorja ndaj Austrisë: Kemi mundësi të synojmë kreun e grupit appeared first on Albeu.com.

Kosova do ta presë sonte Austrinë në stadiumin “Fadil Vokrri”, në ndeshjen e vlefshme për raundin e katërt të Ligës së Kombeve.

Sipas parashikimit të Telegrafit, përzgjedhësi Franco Foda pritet të përdorë sërish skemën 3-5-2, ndonëse në formacion mund të ketë disa ndryshime krahasuar me sfidën e fundit ndaj Izraelit.

Aro Muric pritet të rikthehet në portë, pasi mungoi në përballjen me Izraelin për shkak të lëndimit të pësuar në ndeshjen e mëparshme kundër Austrisë.

Në repartin defensiv, Mërgim Vojvoda, Lumbardh Dellova dhe Ilir Krasniqi pritet të formojnë sërish vijën e mbrojtjes.

Ermal Krasniqi dhe Dion Gallapeni parashikohet të aktivizohen në krahët e mesfushës, ndërsa Valmir Matoshi, Leon Avdullahu dhe Veldin Hoxha do të pozicionohen në qendër.

Vedat Muriqi pritet të rikthehet në sulm pas mungesës ndaj Izraelit për shkak të lëndimit. Në repartin ofensiv ai pritet të luajë së bashku me Fisnik Asllanin.

Formacioni i mundshëm i Kosovës: Aro Muric, Mërgim Vojvoda, Lumbardh Dellova, Ilir Krasniqi, Ermal Krasniqi, Dion Gallapeni, Valmir Matoshi, Leon Avdullahu, Veldin Hoxha, Vedat Muriqi, Fisnik Asllani.

Takimi Kosovë–Austri do të zhvillohet në orën 18:00, në stadiumin “Fadil Vokrri”.

The post Ky pritet të jetë formacioni i Kosovës përballë Austrisë në stadiumin “Fadil Vokrri appeared first on Albeu.com.

Pas suksesit 1-0 ndaj Irlandës, sulmuesi i Kosovës, Ermal Krasniqi, analizoi paraqitjen e “Dardanëve” dhe foli për ndeshjen e ardhshme kundër Austrisë në një prononcim për faqen zyrtare të FFK-së.

Sipas Krasniqit, Kosova hasi vështirësi për të gjetur rrugën drejt rrjetës gjatë pjesës së parë, pasi Irlanda u pozicionua kryesisht në mbrojtje. Megjithatë, ai vlerësoi se ekipi krijoi mundësi të mjaftueshme dhe e meritoi triumfin.

Ai shpjegoi se kundërshtari ishte tërhequr prapa dhe se loja e Kosovës u orientua shpesh te pasimet e gjata, çka e bëri të vështirë shënimin. Pavarësisht kësaj, “Dardanët” zhvilluan një paraqitje pozitive, krijuan raste dhe, sipas tij, goli ishte vetëm çështje kohe. Në fund, Kosova e gjeti golin dhe mori fitoren e merituar.

Futbollisti kosovar nënvizoi gjithashtu rëndësinë e lojtarëve që aktivizohen gjatë ndeshjes. Ai tha se çdo futbollist në stol duhet të jetë i përgatitur për të ndihmuar skuadrën, pasi zëvendësimet mund të ndryshojnë rrjedhën e lojës.

Krasniqi u shpreh i kënaqur që pati rol në aksionin e golit, duke theksuar se objektivi kryesor ishte marrja e tri pikëve.

Për sfidën e radhës, ai e cilësoi Austrinë si favorite të grupit, por beson se Kosova ka mundësi të marrë rezultat pozitiv edhe në atë transfertë.

“Dardanët”, sipas Krasniqit, duhet të paraqiten si një grup i bashkuar dhe të luajnë me të njëjtin përkushtim si ndaj Irlandës. Nëse e bëjnë këtë, ai nuk e përjashton mundësinë që Kosova të fitojë edhe në Austri.

The post Krasniqi beson te fitorja e Kosovës edhe në transfertën ndaj Austrisë appeared first on Albeu.com.

Kombëtarja e Kosovës do të luajë me një skemë të re taktike në sfidën ndaj Republikës së Irlandës, ku trajneri Franco Foda pritet të aplikojë modulin 3-5-2. Ky ndryshim do të sjellë një qasje më të ekuilibruar në të dyja fazat e lojës.

Sipas burimeve të Telegrafit, formacioni i mundshëm i “Dardanëve” përbëhet nga: Arijanet Muric në portë; treshe e mbrojtjes e përbërë nga Albian Hajdari, Lumbardh Dellova dhe Mërgim Vojvoda; në mesfushë do të jenë Dion Gallapeni, Valmir Matoshi, Leon Avdullahu, Veldin Hoxha dhe Ermal Krasniqi; ndërsa dyshja e sulmit do të jetë Vedat Muriqi dhe Albion Rrahmani.

Me këtë sistem, Kosova do të ketë tre qendërmbrojtës, pesë faktorë në mesfushë dhe dy bomberë. Kur skuadra nuk ka topin, formacioni mund të transformohet në një 5-3-2, me Gallapenin dhe Krasniqin që do të jenë të detyruar të ulen më shumë për të mbyllur krahët. Në momentin kur topi është në zotërimin e Kosovës, dy lojtarët e krahut do të kenë lirinë të avancojnë dhe ta kthejnë sistemin në një 3-5-2 më ofensiv.

Në mbrojtje, një rëndësi të veçantë do të ketë uniteti i treshes Hajdari, Dellova dhe Vojvoda. Albian Hajdari është konsideruar si një nga qendërmbrojtësit me perspektivë të skuadrës, ndërsa Lumbardh Dellova ka qenë një zgjedhje e rregullt në grumbullimet e fundit. Mërgim Vojvoda, nga ana tjetër, ka më shumë përvojë dhe do të jetë një element kyç në ndërtimin e lojës nga fundi i mbrojtjes.

Në krahun e djathtë, Dion Gallapeni do të ketë një rol mjaft kërkues. Duke qenë anësor i majtë, ai do të duhet të kontribuojë si në mbrojtje ashtu edhe me avancime të shpeshta për të siguruar epërsi numerike në atë pjesë të fushës.

Në anën e kundërt, po ashtu, Ermal Krasniqi do të ketë detyra të ngjashme. Ai duhet të jetë gati të zbresë për të mbështetur mbrojtjen, por njëkohësisht të shfrytëzojë hapësirat e krijuara kur Kosova fiton zotërimin e topit.

Në qendër të mesfushës, do të jetë Leon Avdullahu ai që siguron ekuilibrin, veçanërisht nëse Foda vendos t’u japë më shumë lëvizje përpara Valmir Matoshit dhe Veldin Hoxhës.

Në repartin ofensiv, Vedat Muriqi dhe Albion Rrahmani do të përbëjnë çiftin e sulmit. Muriqi do të angazhohet në duele fizike dhe në lojën me shpinë nga porta, ndërsa Rrahmani do të mundohet të shfrytëzojë hapësirat që krijohen rreth tij.

The post Sistemi i ri 3-5-2 dhe surprizat e Fodës – ja si pritet të luajë Kosova kundër Irlandës appeared first on Albeu.com.

Disa prej futbollistëve të Kombëtares së Kosovës kanë arritur në Prishtinë gjatë mëngjesit, në prag të katër përballjeve të Ligës së Kombeve.

Përzgjedhësi Franco Foda do ta drejtojë seancën e parë stërvitore, ndërsa Kosovës i nevojitet të paktën pozita e dytë në grup.

Mes lojtarëve të grumbulluar që kanë mbërritur janë Vedat Muriqi, Lumbardh Dellova, Milot Rashica, Ermal Krasniqi dhe prurja e re Dion Kacuri.

Futbollistët janë pritur nga i pari i FFK-së, Agim Ademi. Pas akomodimit në hotel, ata do të shkojnë në stadiumin “Fadil Vokrri”, ku do ta zhvillojnë stërvitjen e parë nga ora 17:00.

Kosova do ta zhvillojë të enjten ndeshjen e parë ndaj Irlandës.

The post Pjesëtarët e Kosovës mbërrijnë në Prishtinë, FFK-ja publikon pamjet appeared first on Albeu.com.

Lumbardh Dellova dhe Ermal Krasniqi janë ftuar nga Kosova për ndeshjet e radhës në Ligën e Kombeve, lajm që është konfirmuar nga klubi i tyre turk, Amedspor.

Në listën e publikuar me futbollistët e grumbulluar nga përfaqësueset përkatëse, Amedspor ka përfshirë edhe dy reprezentuesit kosovarë.

“Urojmë suksese për lojtarët tanë të ftuar në përfaqësueset kombëtare”, shkroi Amedspor në njoftimin e tij.

Dellova dhe Krasniqi do të vihen në dispozicion të përzgjedhësit Franco Foda për katër takime të Ligës së Kombeve, të cilat “Dardanët” do t’i luajnë brenda një periudhe prej vetëm 10 ditësh.

Ky cikël do të fillojë më 24 shtator në Prishtinë, me Kosovën që do të jetë nikoqire e Irlandës. Më 27 shtator, tri ditë pas ndeshjes së parë, ekipi i Franco Fodës do të udhëtojë drejt Austrisë për duelin me përfaqësuesen vendase.

Më pas, Kosova do të takohet me Izraelin më 1 tetor në Hungari. Cikli i parë do të përfundojë më 4 tetor në Prishtinë, ku “Dardanët” do të luajnë sërish kundër Austrisë.

Për këto katër përballje të rëndësishme, Foda do të mund të llogarisë te Dellova dhe Krasniqi, ndërsa Kosova synon ta nisë në mënyrën më të mirë edicionin e ri të Ligës së Kombeve.

The post Amedspor zyrtarizon grumbullimin e dy futbollistëve të Kosovës appeared first on Albeu.com.

Pas një paraqitje mbresëlënëse në fitoren e thellë të Amedsporit, talenti kosovar Ermal Krasniqi ka zënë vend në mesin e më të mirëve të xhiros së pestë në elitën e futbollit turk.

I rreshtuar në një rol aspak tipik për të, atë të mbrojtësit të krahut të djathtë, 28-vjeçari nuk u pengua aspak dhe dhuroi një recital të vërtetë në suksesin 5-0 përballë Istanbul Basaksehir.

Ylli dardan ishte arkitekti i dy golave, duke shërbyer saktësisht sulmuesin Gift Orban për realizimin e tretë dhe të katërt të skuadrës së tij. Vlerësimi me notën 9.0 nga platforma Sofascore konfirmoi nivelin e tij të lartë të lojës dhe i siguroi një vend në formacionin ideal të javës.

Përtej kontributit të Krasniqit, në këtë takim u vu re edhe paraqitja e sigurt e Lumbardh Dellovës, i cili me stabilitetin e tij në fazën mbrojtëse ishte kyç për ta mbajtur portën e Amedsporit të pathyer.

The post Me dy asiste vendimtare, Ermal Krasniqi përfshihet në formacionin më të mirë të javës në Turqi appeared first on Albeu.com.

Amedspor është shfaqur si një nga surprizat më të mëdha të pesë javëve të para të Superligës së Turqisë. Skuadra nga Diyarbakıri, e udhëhequr nga Besnik Hasi, ka marrë tri fitore, një barazim dhe vetëm një humbje, rezultat që e ka ngjitur në vendin e tretë me 13 pikë.

Për klubin nga juglindja e Turqisë, ky është një sezon historik, pasi për herë të parë po garon në elitën e futbollit turk. Megjithatë, Amedspori nuk është mjaftuar vetëm me pjesëmarrjen në këtë nivel, por që në fillim ka treguar se mund të përballet denjësisht edhe me ekipet më të mëdha të kampionatit.

Arkitekti i këtij starti është Besnik Hasi. Trajneri nga Gjakova ka një karrierë të gjatë në futbollin evropian dhe atë ndërkombëtar, gjatë së cilës ka drejtuar Anderlechtin, Legia Varshavën, Olympiacosin, Al-Raedin, Al-Ahlin dhe Mechelenin. Angazhimi te Amedspori është përvoja e tij e parë në futbollin turk.

Në këtë ecuri kanë pasur rol të rëndësishëm edhe dy futbollistë të Kombëtares së Kosovës, Lumbardh Dellova dhe Ermal Krasniqi.

Dellova dhe Krasniqi kanë qenë titullarë në të pesë takimet e luajtura deri tani, duke u bërë pjesë të rëndësishme të formacionit të ndërtuar nga Hasi.

Mbrojtësi Dellova ka grumbulluar 450 minuta dhe ka dhënë një asistim. Krasniqi, ndërkohë, ka luajtur 439 minuta, vetëm 11 minuta më pak se totali i mundshëm.

Sulmuesi kosovar ka regjistruar dy asistime, duke dëshmuar se ndikimi i tij nuk kufizohet vetëm te faza sulmuese, por shtrihet edhe në krijimin e mundësive për bashkëlojtarët.

Fitorja e fundit ndaj Başakşehirit ishte një tjetër konfirmim i formës së mirë të ekipit. Organizimi, disiplina dhe karakteri i shfaqur në fushë e kanë kthyer Amedsporin në një prej skuadrave më interesante të këtij fillimi të sezonit.

Pas triumfit, Besnik Hasi e vlerësoi lart paraqitjen e lojtarëve të tij. “Për ne është një fitore shumë e madhe. Nuk i lejuam ata të luanin. Ishte një ekip shumë i lëvizshëm, sepse ne i ndalëm. E përgëzoj ekipin tim, morëm një fitore të shkëlqyer”, deklaroi ai pas ndeshjes.

Trajneri shqiptar foli gjithashtu për zhvillimin e skuadrës dhe përparimin e lojtarëve, duke veçuar sulmuesin Gift Orban. Sipas tij, Amedspori po përmirësohet nga një ndeshje në tjetrën.

Pavarësisht startit mbresëlënës dhe pozitës së tretë në renditje, Hasi kërkon që ekipi të mos përfshihet nga euforia. Ai e di se sezoni në Superligën turke është i gjatë dhe se rezultatet e para nuk duhet të krijojnë ndjenjën e rehatisë.

“Lojtarët tanë po rriten dhe po vazhdojnë të zhvillohen. Më pas e shijuam shumë këtë ndeshje. Por kjo është vetëm një ndeshje, liga sapo ka filluar. Duhet të jemi modestë, t’i mbajmë këmbët në tokë dhe të punojmë shumë”, u shpreh trajneri i Amedsporit.

Kjo qasje përmbledh edhe filozofinë e tij në këtë aventurë: sukseset duhen shijuar, por ato nuk duhet të shndërrohen në arsye për humbjen e përqendrimit.

Për legjendën e futbollit shqiptar nga Gjakova, aventura në Turqi po zhvillohet deri tani në mënyrën më të mirë të mundshme. Në krah të tij, Dellova dhe Krasniqi po luajnë role të rëndësishme në një histori që mund të bëhet edhe më e veçantë.

Nëse Amedspori e ruan këtë ritëm, skuadra nga Diyarbakıri mund të mbetet një prej rrëfimeve më interesante të sezonit në futbollin turk.

The post Amedspor befasues në elitën turke, Hasi dhe dy reprezentuesit e Kosovës po ndërtojnë një histori të veçantë appeared first on Albeu.com.

Amedspori vijon serinë e rezultateve pozitive nën drejtimin e trajnerit Besnik Hasi.

Ekipi regjistroi një fitore të thellë 5-0 përballë Basaksehirit, ku paraqitje të spikatura patën Ermal Krasniqi dhe Lumbardh Dellova.

Krasniqi kontribuoi me dy asistime për Orbanin, i cili shënoi het-trik në këtë ndeshje.

SofaScore e vlerësoi sulmuesin me notën 9.0, ndërsa Dellova, që ishte i pakalueshëm në repartin defensiv, mori vlerësimin 7.6.

Pas këtij triumfi të rëndësishëm, Amedspori ngjitet në vendin e tretë të elitës së futbollit turk, me 10 pikë.

The post Ermal Krasniqi protagonist në triumfin 5-0 të Amedsporit ndaj Basaksehirit appeared first on Albeu.com.

Vera e vitit 2026 u shoqërua me një numër të madh transferimesh për futbollistët shqiptarë dhe kosovarë. Nga rikthimi i Vedat Muriqit te Fenerbahçe dhe kalimi i Mirlind Dakut te Spartak Moska, deri te destinacionet e reja të Berat Gjimshitit, Kristjan Asllanit, Mario Mitajt e shumë të tjerëve, lojtarët shqiptarë nisën aventura të reja në kampionate të ndryshme të Evropës dhe Azisë.

Afati kalimtar veror rezultoi mjaft i ngarkuar për përfaqësuesit shqiptarë, një pjesë e të cilëve ndryshuan skuadër për të vijuar karrierën në nivele dhe ambiente të reja.

Disa prej tyre u transferuan për shuma të konsiderueshme te klube të njohura, ndërsa të tjerë zgjodhën liga të reja dhe sfida të ndryshme. Këto lëvizje konfirmojnë rritjen e pranisë së futbollistëve shqiptarë në tregun ndërkombëtar.

Një nga transferimet më të rëndësishme të kësaj vere ishte ai i Vedat Muriqit. Sulmuesi i Kosovës u largua nga Mallorca dhe u kthye te Fenerbahçe, klubit turk iu bashkua për rreth 15.5 milionë euro, duke rikthyer veten në skuadrën ku kishte spikatur edhe më parë.

Edhe Mërgim Vojvoda ndryshoi ekip në Itali. Mbrojtësi kosovar u transferua përfundimisht nga Como te Udinese, ku firmosi kontratë deri në vitin 2028, me mundësi zgjatjeje edhe për një sezon. Vlera e raportuar e marrëveshjes është rreth 1.5 milion euro.

Një tjetër mbrojtës kosovar, Lumbardh Dellova, u largua nga CSKA Sofia. Kalimi i tij u realizua për afërsisht 1 milion euro, duke shënuar një tjetër hap përpara në rritjen e vlerës së tij në futbollin evropian.

Albion Rrahmani do ta vazhdojë karrierën në Itali. Sulmuesi u transferua nga Sparta Praga te Venezia, e cila pagoi rreth 8 milionë euro për kartonin e tij.

Elvis Rexhbeçaj u transferua brenda futbollit gjerman, nga Augsburgu te Wolfsburgu. Lëvizja e mesfushorit kosovar tërhoqi vëmendje, pasi skuadra e re do të luajë këtë sezon në Bundesliga 2.

Valmir Matoshi la Thunin për t’iu bashkuar Sturm Grazit. Mesfushori kosovar kaloi te klubi austriak për rreth 1 milionë euro, duke fituar mundësinë për të konkurruar në një nivel më të lartë.

Sparta Praga nuk do të jetë më skuadra e Ermal Krasniqit, i cili u transferua te Amedspor në Turqi. Sulmuesi anësor kosovar ndryshoi ambient për rreth 1 milion euro, me synimin për të pasur më shumë minuta dhe një rol më të rëndësishëm.

Pas një dekade të kaluar te Atalanta, kapiteni i Shqipërisë, Berat Gjimshiti, i dha fund qëndrimit te klubi italian. Ai do ta vijojë karrierën në Arabinë Saudite me Al Diriyah, ndërsa transferimi i tij i kushtoi klubit saudit 3 milionë euro.

Në Superligën arabe do të luajë edhe Nedim Bajrami. Mesfushori me tipare sulmuese u largua nga Rangers dhe kaloi te Al Taawoun në formën e huazimit për një vit.

Kristjan Asllani mbylli aventurën me Interin për t’iu bashkuar Al Jaziras në Emiratet e Bashkuara Arabe. Mesfushori i Shqipërisë u huazua kundrejt 2 milionë eurove, ndërsa marrëveshja përfshin edhe mundësinë e blerjes për 7 milionë euro tjera.

Mario Mitaj do të luajë këtë sezon me Genoan në Serie A. Në të kundërt, Ylber Ramadani u largua nga kampionati italian dhe Lecce për të kaluar në Superligën turke, ku do të përfaqësojë Corum FK.

Mirlind Daku realizoi gjithashtu një transferim të rëndësishëm. Sulmuesi kaloi nga Rubin Kazani te Spartak Moska, për një shumë të deklaruar mbi 10 milionë euro.

Bujar Pllana është bërë pjesë e Grasshopperit në kampionatin zviceran. Ndërkohë, portieri Simon Simoni u largua nga Eintracht Frankfurti dhe do ta vazhdojë karrierën te Luzerni.

Tashmë që afati kalimtar është mbyllur, futbollistët shqiptarë përballen me një sezon të ri, të mbushur me sfida dhe pritshmëri. Performancat e tyre në klubet e reja mund të ndikojnë jo vetëm në zhvillimin e karrierave personale, por edhe në të ardhmen e përfaqësueseve të Kosovës dhe Shqipërisë, që mbështeten te cilësia dhe përvoja e lojtarëve të tyre në arenën ndërkombëtare.

The post Muriqi rikthehet te Fenerbahçe, Daku shkon te Spartak Moska – lëvizjet e Gjimshitit, Asllanit, Vojvodës dhe yjeve të tjerë shqiptarë appeared first on Albeu.com.