Dinamo ka bërë publik në rrjetet sociale transferimin e mbrojtësit të majtë Erion Hoxhallari. Pas përfundimit të kontratës me Pol. Warsaë në Poloni, 30-vjeçari ka zgjedhur të kthehet në Shqipëri për t’u bashkuar me “blutë” e kryeqytetit.

Mbrojtësi është produkt i akademisë së Tiranës dhe me bardheblutë ka fituar gjithçka, duke triumfuar në Superiore, Kupën e Shqipërisë dhe Superkupën e Shqipërisë. Për disa sezone ai ka qenë edhe shok skuadre me Ernest Muçin.

“Erion Hoxhallari është lojtari më i ri i FC Dinamo

Klubi blu mirëpret një mbrojtës me përvojë në futbollin shqiptar dhe atë ndërkombëtar. Me eksperiencën e fituar në Superligë dhe në kampionatin polak së fundi, Hoxhallari i bashkohet Dinamos për të sjellë siguri dhe cilësi në repartin difensiv.

Firma me mbrojtësin e njohur, i grumbulluar më parë edhe nga Kombëtarja kuqezi, është lëvizja e radhës e rëndësishme nga presidenti Adrian Bardhi për një skuadër gjithmonë e më të fortë.

Hoxhallari ka firmosur kontratën me 18 herë kampionët e vendit dhe i është bashkuar në stërvitje skuadrës sonë, duke u vënë nën urdhrat e trajnerit Ilir Daja. Mirë se erdhe, Erion”, shkruan klubi i Dinamos.

The post ZYRTARE/ Dinamo afron Erion Hoxhallarin, ish-mbrojtësin e Tiranës që ka luajtur edhe përkrah Ernest Muçit appeared first on Albeu.com.