Ngjarja ndodhi pas përfundimit të ndeshjes mes Elbasanit dhe Vllaznisë, teksa Spahiu po shkonte drejt tunelit që të çon në dhomat e zhveshjes. Në atë moment, ai u përball me numrin “një” të klubit shkodran, i cili e goditi, ndërsa siguria ndërhyri menjëherë për të ndalur përshkallëzimin.

Reagimi i Xhaferit duket se e ka zënë të papërgatitur asistentin e arbitrit. Sapo ndodhi goditja, garda e sigurisë veproi për ta mbrojtur Spahiun dhe për të qetësuar situatën.

Tashmë pritet vendimi i Komisionit të Disiplinës pranë Federatës Shqiptare të Futbollit për këtë skandal të paprecedentë. Masa të rënda ndëshkuese rrezikojnë edhe Xhaferin, edhe trajnerin Edi Martini, për gjestin e bërë në fushë, ku formoi me duar shenjën e VAR-it.

The post VIDEO/ Pamjet e incidentit, presidenti Alban Xhaferi godet asistentin e arbitrit Ergys Spahiu appeared first on Albeu.com.

Shoqata Bashkimi i Arbitrave Shqiptarë të Futbollit ka reaguar zyrtarisht pas incidentit të raportuar në përballjen Elbasani–Vllaznia, ku pretendohet se presidenti i Vllaznisë, Alban Xhaferi, goditi me grusht asistentin Ergys Spahiu.

Përmes deklaratës së saj, BASHF thekson se dhuna, kërcënimet dhe presioni ndaj zyrtarëve të ndeshjes nuk mund të arsyetohen në asnjë rrethanë, pavarësisht nëse vendimi i arbitrit ka qenë i drejtë apo i gabuar. Shoqata shprehu gjithashtu mbështetje të plotë për trupën e arbitrimit që drejtoi sfidën mes Elbasanit dhe Vllaznisë.

DEKLARATA:

Shoqata Bashkimi i Arbitrave Shqiptarë të Futbollit dënon ashpër çdo akt dhune ndaj arbitrave të ndeshjes Elbasani–Vllaznia. Asnjë vendim i marrë nga arbitri, qoftë i saktë apo i gabuar, nuk mund të përdoret si justifikim për dhunë, kërcënime ose presion ndaj zyrtarëve të takimit.

Shoqata Bashkimi i Arbitrave Shqiptarë të Futbollit shpreh solidaritetin dhe përkrahjen e saj të plotë për trupën e arbitrimit, në veçanti për asistentin dhe zyrtarët e ndeshjes që u përfshinë në këtë incident.

Dhuna nuk ka vend në futboll. Presioni nuk i përket arbitrimit. Të respektosh arbitrin do të thotë të respektosh vetë lojën.

Ngjarje të tilla cenojnë cilësinë e gjykimit, pasi e vendosin trupën e arbitrimit nën presion. Shoqata vijon punën për rritjen e performancës së arbitrave dhe e konsideron të papranueshme çdo situatë të këtij lloji.

Shoqata Bashkimi i Arbitrave Shqiptarë të Futbollit deklaron se do të vijojë të mbrojë me vendosmëri integritetin, dinjitetin dhe sigurinë e çdo arbitri shqiptar, në çdo kategori dhe në çdo stadium.

The post Shoqata e Arbitrave dënon dhunën pas incidentit me Alban Xhaferin: Asnjë vendim nuk e justifikon sulmin ndaj gjyqtarëve appeared first on Albeu.com.