Enzo Maresca pritet të takohet me futbollistët e Manchester Cityt të enjten, kur ekipi do të rifillojë stërvitjet pas mbylljes së angazhimeve të lojtarëve me kombëtaret, raportoi “Daily Mail”.

Shumica e futbollistëve të Cityt kanë qenë pjesë e përfaqësueseve të tyre gjatë pushimit ndërkombëtar dhe tani pritet të kthehen në Manchester përpara ndeshjes së së dielës kundër Liverpoolit në Ligën Premier.

Trajneri do të ketë një periudhë të shkurtër për të përgatitur skuadrën për këtë sfidë, pasi ajo zhvillohet menjëherë pas rikthimit të lojtarëve nga detyrat ndërkombëtare.

Takimi mes Marescas dhe futbollistëve vjen në një periudhë të rëndësishme për klubin, i cili është shpallur fajtor për 114 prej 115 akuzave të ngritura ndaj tij në Ligën Premier.

Manchester City e ka apeluar vendimin, kështu që çështja nuk ka marrë ende një përfundim përfundimtar.

Ndërkohë, në aspektin sportiv, skuadra e Marescas e mbylli këtë periudhë në krye të renditjes së Ligës Premier, pasi fitoi të pesë ndeshjet e para të sezonit.

The post Maresca do të flasë me lojtarët e Manchester Cityt pas vendimit për 114 akuzat appeared first on Albeu.com.

Katër fitore në po aq ndeshje të Premier Ligës i kanë siguruar Enzo Marescës një fillim të përsosur në aventurën e tij në “Etihad”.

Trajneri italian po jep përshtypjen se zëvendësimi i Pep Guardiolës në stolin e Manchester Cityt, një nga detyrat më të vështira në futboll, është më i lehtë nga sa ishte parashikuar.

Ndër rezultatet më domethënëse të Cityt ishte triumfi 1-0 kundër Manchester Unitedit në “Old Trafford”, i arritur edhe pse skuadra luajti me një futbollist më pak gjatë një pjese të madhe të ndeshjes.

Qetësia është tipari që ka spikatur më së shumti te Maresca. Ndërsa Guardiola shfaqej shpesh energjik dhe emocional pranë vijës anësore, italiani sillet me më shumë përmbajtje dhe përcjell besim të plotë në strategjinë e tij.

Sipas kapitenit Ruben Dias, ndryshimet nuk i kanë prekur shumë prej parimeve themelore mbi të cilat mbështetet loja e Cityt.

Edhe pse krahasimi me Guardiolën ka qenë i pashmangshëm, Maresca ka këmbëngulur se kjo nuk e vendos nën presion.

Italiani e ka pranuar se trashëgimia e trajnerit spanjoll do të vazhdojë të ndihet, por synimi i tij është t’i japë skuadrës një identitet të vetin.

Pas ndryshimeve të shumta që përfshinë skuadrën gjatë verës, sinjalet e para nga Maresca tregojnë se ai mund ta kalojë me sukses një nga sprovat më të mëdha të futbollit modern.

The post Maresca e nis bindshëm misionin për të pasuar Guardiolën te Manchester City appeared first on Albeu.com.

Erling Haaland ka nisur të mendojë për largimin nga futbolli anglez në përfundim të sezonit 2026/27, sipas raportimeve që flasin për pakënaqësi të tij me drejtimin aktual të Manchester Cityt nën Enzo Marescan.

Në këtë skenar, klubi anglez rrezikon të përballet me një tronditje të madhe në merkato.

Burime nga The Sun bëjnë me dije se përfaqësuesit e sulmuesit norvegjez kanë pasur tashmë kontakte jozyrtare në Londër dhe Paris me drejtues të Barcelonës, e cila po vlerëson mundësinë për të paguar klauzolën e lirimit prej 175 milionë eurosh që parashikohet në kontratën e lojtarit.

26-vjeçari po kalon sezonin e tij të pestë në Premier League me Manchester Cityn, ku pas ardhjes nga Borussia Dortmundi ka fituar të gjitha trofetë zyrtarë të ligës angleze.

Sidoqoftë, sulmuesi duket se nuk është i kënaqur me ecurinë e fundit të klubit. Një nga arsyet kryesore të pakënaqësisë lidhet me ardhjen e Enzo Marescas në vend të Pep Guardiolës në krye të stolit të Manchester Cityt.

Ndërkohë, Joan Laporta dhe Deco janë në kërkim të një sulmuesi elitar, pasi përpjekja për të siguruar Julian Alvarez dështoi për shkak të refuzimit të Atletico Madridit për të hyrë në bisedime.

Haaland i përshtatet profilit që kërkon Barcelona, dhe klauzola e tij prej 175 milionë eurosh do të hyjë në fuqi në vitin 2027 — një vlerë e ngjashme me atë që ishte diskutuar fillimisht për sulmuesin argjentinas.

Megjithë zërat për një kalim të mundshëm te rivali historik i Barcelonës, Haaland e ka hedhur poshtë idenë e transferimit te Real Madridi.

Sipas tij, prania e njëkohshme e Kylian Mbappe, Vinicius Junior, Jude Bellingham dhe Yan Diomande do të krijonte tensione në shpërndarjen e roleve brenda skuadrës së Real Madridit.

The post Vendimi i papritur i Haaland për të ardhmen e tij në Manchester City appeared first on Albeu.com.

Tifozët mendojnë se Enzo Maresca ka marrë një vendim të prerë për të ardhmen e Rayan Ait-Nourit, pas suksesit 2-0 ndaj Portos të martën në mbrëmje.

Manchester City siguroi fitoren në “Estadio do Dragao”, në një mbrëmje me shi, ndërsa Erling Haaland shënoi golin e tij të parë në Ligën e Kampionëve këtë sezon.

Duke pasur në mendje derbin e ardhshëm të Manchesterit, Maresca ndryshoi disa nga zgjedhjet në formacion. Megjithatë, Ait-Nouri e nisi takimin në stol dhe qëndroi jashtë fushës për pjesën më të madhe të ndeshjes.

Josko Gvardiol, i rreshtuar në krahun e majtë të mbrojtjes, u ndëshkua me karton të verdhë në pjesën e parë dhe u zëvendësua pak minuta pas rikthimit nga pushimi.

Edhe pse Ait-Nouri konsiderohet alternativa e natyrshme për atë rol, trajneri nuk zgjodhi ta aktivizonte. Në vend të tij, ai hodhi në fushë Abdukodir Khusanovin, duke e vendosur në një pozicion që zakonisht nuk është pjesë e detyrave të tij.

Kjo nuk ishte hera e parë që mbrojtësi algjerian mbeti jashtë planeve kryesore, ndaj tifozët arritën në përfundimin se Maresca nuk ka besim tek ai.

Ait-Nouri u aktivizua vetëm në minutat e fundit, por jo në mbrojtje. Ai luajti në krahun e majtë të sulmit, duke forcuar përshtypjen se Maresca nuk është i gatshëm t’i japë një hapësirë më të gjatë në fushë.

“Khusanov po luan si mbrojtës i majtë përpara Ait-Nourit. Enzo Maresca e urren absolutisht, apo jo?”, shkroi një tifoz në X.

Një tjetër reagoi: “Maresca zgjedh Khusanovin si mbrojtës të majtë përpara Ait-Nourit. Kjo është poshtëruese”.

“Më vjen keq për Ait-Nourin. Maresca thjesht nuk e vlerëson”, shkroi një tjetër tifoz.

Edhe vendi në formacionin titullar duket larg për Ait-Nourin. Në fitoren e qetë ndaj Crystal Palace, Maresca i dha debutimin Kayden Braithëaite në “Selhurst Park”, në vend që të aktivizonte futbollistin algjerian.

The post Maresca lë sërish jashtë yllin e Manchester Cityt në Champions League, tifozët besojnë se nuk e duron appeared first on Albeu.com.

Enzo Maresca pranon se presioni për të luftuar për trofe është pjesë e detyrës te Manchester City, por thekson se objektivi i menjëhershëm mbetet zhvillimi i skuadrës nga një ndeshje në tjetrën.

Tekniku italian e ka nisur në mënyrë pozitive aventurën në “Etihad”, ku City ka marrë fitore në dy takimet e para të Ligës Premier.

Hapi i radhës për skuadrën do të jetë përballja me Coventry Cityn sot, të shtunën, ndërsa më pas ekipi do të udhëtojë drejt Portos për debutimin e sezonit në Ligën e Kampionëve.

Pas përfundimit të afatit kalimtar të verës, Maresca e di se do ta ketë këtë grup lojtarësh në dispozicion të paktën deri në janar. Pavarësisht kësaj, ai nuk dëshiron që skuadra të mendojë shumë për muajt e ardhshëm, por të përqendrohet te zbatimi i ideve të tij dhe te rritja e nivelit të paraqitjeve.

“Kur je Manchester City, duhet të garosh dhe të luftosh për të fituar tituj. Ne do të përpiqemi të japim maksimumin tonë”, deklaroi fillimisht trajneri i Cityt.

Ai shtoi se vëmendja duhet të jetë te ndeshja e radhës, jo te pozita që ekipi mund të ketë në muajt mars apo prill.

“Prioriteti kryesor është të shohim përmirësimin e ekipit ndeshje pas ndeshjeje. Për mua, tani nuk ka rëndësi se ku mund të jemi në mars ose prill. Rëndësi ka si mund ta fitojmë ndeshjen e nesërme dhe si mund të paraqitemi më mirë”, u shpreh Maresca.

“Çdo trajner ka mënyrën e vet të të menduarit. Gjithçka lidhet me fitimin e ndeshjeve, ndërsa mua më pëlqen që ato t’i fitoj duke luajtur në mënyrën që duam. Kjo është e rëndësishme si kur e kemi topin, ashtu edhe kur jemi pa të”, përfundoi ai.

The post Maresca: Manchester City duhet të synojë trofetë çdo sezon appeared first on Albeu.com.

Enzo Maresca ka bërë të ditur se Manchester City mund të ndërmarrë të tjera lëvizje gjatë ditëve të fundit të afatit kalimtar, me objektivin për të sjellë në skuadër më shumë përvojë dhe futbollistë me profil drejtues.

Klubi anglez është dobësuar ndjeshëm në aspektin e eksperiencës këtë verë, pasi Bernardo Silva, John Stones, Nathan Ake dhe Rodri janë larguar nga Manchester City.

Edhe në ndeshjen e parë të sezonit, ku City fitoi 2-1 ndaj Bournemouthit, u vu re rinia e skuadrës. Maresca aktivizoi formacionin titullar më të ri të klubit në një hapje sezoni që nga viti 2008.

Pikërisht për këtë arsye, trajneri italian po kërkon të rrisë nivelin e përvojës dhe të lidershipit brenda grupit.

ESPN raporton se Manchester City pritet të paraqesë një ofertë për mesfushorin e Chelseat, Enzo Fernandez, përpara përfundimit të afatit kalimtar më 1 shtator. Reprezentuesi i Argjentinës mbajti shiritin e kapitenit të Chelseat sezonin e kaluar.

“Kemi lojtarë me përvojë dhe, në fund të fundit, kemi edhe liderë”, u shpreh Maresca.

“Na duhet të presim edhe katër ose pesë ditë, deri në mbylljen e afatit, për të kuptuar nëse do të kemi mundësi të shtojmë një ose dy kapitenë të tjerë, përkrah Ruben Dias dhe Erling Haaland, që janë aktualisht dy kapitenët”.

“Ky është afati kalimtar dhe çdo gjë mund të ndodhë. Do të shohim. Kanë mbetur edhe katër ose pesë ditë”, përfundoi trajneri i Manchester Cityt.

Si rrjedhojë, periudha e fundit para mbylljes së merkatos mund të jetë përcaktuese për Cityn, që kërkon të rikthejë përvojën dhe autoritetin drejtues në një skuadër të ndryshuar ndjeshëm gjatë kësaj vere.

The post Manchester City shqyrton përforcime të reja, Maresca synon të shtojë liderë para mbylljes së merkatos appeared first on Albeu.com.

Enzo Maresca shprehet optimist se Manchester City do të arrijë të gjejë një zëvendësues afatgjatë për Rodrin, i cili është transferuar te Barcelona pas shtatë vitesh në “Etihad”.

Mesfushori spanjoll u largua pasi u kthye në një prej lojtarëve më të spikatur në botë dhe fitoi edhe “Topin e Artë” në vitin 2024.

Sipas Marescës, historia e klubit tregon se City ka ditur të reagojë sa herë ka humbur futbollistë të rëndësishëm. Rodri ishte afruar fillimisht për të marrë vendin e Fernandinhos, por me kalimin e kohës u bë një nga shtyllat e suksesit të skuadrës.

“Tani duhet të përpiqemi të gjejmë Rodrin e ri. Kjo është realiteti dhe duhet ta pranojmë. Kur Rodri erdhi këtu, ai ende nuk kishte fituar Topin e Artë, Ligën e Kampionëve apo Kupën e Botës për Klube”, deklaroi Maresca.

Ai shtoi: “Pas transferimit te klubi, Rodri arriti shumë suksese të mëdha. Objektivi ynë tani është të gjejmë lojtarin që mund të bëhet Rodri i ri”.

Maresca solli në vëmendje edhe shembuj të tjerë të zëvendësimeve të suksesshme që Manchester City ka bërë pas largimit të figurave të mëdha.

“Mbrëmë po mendoja për periudhën kur David Silva luante këtu dhe të gjithë pyesnin se çfarë do të ndodhte pas tij. Më pas mbërriti Kevin De Bruyne. E njëjta situatë u përsërit me Agueron, përpara se të vinte Erlingu, si dhe me Fernandinon, pas të cilit erdhi Rodri”, tha ai.

“Këto janë pjesë e ndryshimeve që ndodhin në futboll. Kur një lojtar largohet, duhet të rekrutojmë pasuesin e tij. Është diçka normale. Duhet të ecim përpara dhe të provojmë përsëri”, përfundoi Maresca.

The post Maresca: Manchester City duhet të zbulojë pasuesin e ri të Rodrit appeared first on Albeu.com.

Manchester City ka hedhur sytë drejt Frenkie de Jong, mesfushorit 29-vjeçar të Barcelonës, për të përforcuar repartin e qendrës. Holandezi ka qenë prej kohësh një profil i admiruar në Etihad dhe tani, në këto ditë të fundit të merkatos, blerja e një mesfushori të ri është kthyer në prioritet absolut për kampionët e Anglisë.

Pas shitjes së Rodrit te Barcelona për rreth 70 milionë euro dhe të Tijjani Reijnders në Arabinë Saudite për 61 milionë euro, departamenti sportiv i Cityt ka shtuar ritmin e lëvizjeve në merkato. Këto operacione u bënë edhe më të domosdoshme pasi Bernardo Silva u largua pa kosto drejt Real Madridit dhe tashmë janë në faza të avancuara bisedimet me Newcastle për Nico Gonzalez.

Për të rindërtuar boshtin e mesfushës, drejtuesit anglezë kanë në radar emra si Ayyoub Bouaddi nga Lille, Manu Kone i Romës dhe Enzo Fernandez i Chelseat. Megjithatë, trajneri Enzo Maresca ka kërkuar në mënyrë specifike afrimin e De Jong në këtë fazë të fundit të afatit kalimtar të verës, duke e parë si zgjidhjen ideale për të zëvendësuar boshllëqet e krijuara në mesfushë.

Pozicioni i Barcelonës favorizon një lëvizje të tillë: bordi katalanas parashikon ta lirojë lojtarin përmes një formule huazimi me të drejtë blerjeje, duke marrë përsipër edhe një pjesë të pagës së tij. Interesi i Cityt për De Jong nuk është i ri — ai daton që nga epoka e Pep Guardiolës dhe tani është ringjallur nën drejtimin e Marescas, i cili e sheh si një përforcim kyç për të ardhmen e afërt.

Gjendja e De Jong në Barcelonë është ndërlikuar më tej pas mbërritjes së Rodrit dhe dëmtimit që ai pësoi në gju. Klubi i ka sugjeruar një ndërhyrje kirurgjikale, por lojtari preferon një trajtim konservativ, pa operacion, që do ta mbajë atë larg fushave për disa muaj. Kjo situatë e ka bërë të mundur një largim të tij, me Juventusin që gjithashtu ka shfaqur interes konkret.

Formula e huazimit me të drejtë blerjeje, e ngjashme me atë të përdorur për Ronald Araujon, do t’i lejonte Barcelonës të çlirojë një pjesë të faturës së lartë të pagave, duke e bërë De Jong një objektiv të arritshëm për klubet e interesuara. Në këtë kuadër, të dyja palët do të përfitonin nga një marrëveshje e strukturuar me kujdes.

Brenda 48 orëve të ardhshme, drejtuesit e Manchester City do të zhvillojnë një video-konferencë me agjentin e lojtarit dhe bordin e Barcelonës. Gjatë këtij takimi, klubi anglez do të vlerësojë mundësinë e ushtrimit të opsionit të blerjes së detyrueshme që përfshihet në marrëveshjen e huazimit, me synim finalizimin e transferimit të De Jong para se të mbyllet afati i verës.

The post De Jong në orbitën e Cityt, Maresca shtyn për transferimin e surprizës së verës appeared first on Albeu.com.

Enzo Maresca ka bërë të ditur se Manchester City pritet ta shfrytëzojë pjesën e mbetur të afatit kalimtar veror për të realizuar edhe një ose dy transferime.

Megjithatë, vëmendja e tij aktualisht është te përballja e së dielës ndaj Arsenalit në Community Shield, ndeshje ku takohen fituesi i kampionatit dhe ai i kupës.

“Sigurisht, ka gjëra që duhet të bëjmë. Sa, nuk e di. Mund të jetë një, mund të jenë dy. Varet edhe nëse lojtarët largohen”, deklaroi fillimisht trajneri italian.

“Tani, në këtë moment, 48 orë para një finaleje – finalja ime e parë në këtë klub – do të përpiqem të fitoj trofeun e parë”.

Maresca kishte folur gjithashtu për mundësinë që Man City të dërgonte një ofertë për Enzo Fernandez.

“Fokusi im në këtë moment nuk është te lojtarët që mund të largohen ose te lojtarët që mund të vijnë, fokusi për mua personalisht është se si mund të përgatitemi në mënyrën më të mirë për ndeshjen dhe të përpiqemi të fitojmë finalen”, përfundoi Maresca.

Ndërkohë, City ka kryer disa transferime gjatë kësaj vere. Mes tyre janë Elliot Anderson, i marrë nga Nottingham Forest për 135 milionë euro, si dhe Geronimo Rulli, i transferuar nga Marseille për 2 milionë euro.

The post Enzo Maresca paralajmëron përforcime të reja te Man City: Mund të vijë një ose dy lojtarë appeared first on Albeu.com.

Enzo Maresca, trajneri i Manchester Cityt, ka bërë të ditur se skuadra angleze nuk pritet të ndërmarrë sot ndonjë hap për transferimin e mesfushorit të Chelseat, Enzo Fernandez. “Blutë” kanë caktuar ndërkohë një afat jozyrtar për mbylljen e mundshme të marrëveshjes.

Chelsea ka njoftuar Manchester Cityn dhe klubet e tjera që kanë shfaqur interes se marrëveshja për 25-vjeçarin duhet të arrihet deri të premten në orën 17:00.

Mesfushori argjentinas mund të largohet nga Stamford Bridge, por vetëm nëse paguhet shifra prej rreth 139 milionë eurosh. Chelsea e ka përcaktuar këtë çmim pasi vetë lojtari ka shprehur dëshirën për t’u larguar.

Xabi Alonso kërkon ta mbajë Fernandezin në ekip, ndërsa burime pranë Chelseat këmbëngulin se ai do të vazhdojë të jetë pjesë e klubit në rast se transferimi nuk përfundon brenda afatit të vendosur.

Nga ana tjetër, Maresca synon të punojë sërish me Fernandezin. Trajneri italian raportohet se po drejton përpjekjet e klubit të tij të ri për ta transferuar mesfushorin.

I pyetur rreth zhvillimeve, Maresca nuk pranoi të jepte hollësi, duke theksuar se qëndrimi i tij mbetet i pandryshuar që nga dita e parë.

“Për momentin duhet t’ju jap të njëjtën përgjigje si në fillim. Ai i përket një klubi tjetër dhe nuk besoj se është e përshtatshme të diskutojmë për futbollistët e skuadrave të tjera. Nuk do të komentoj për lojtarë që nuk janë pjesë e ekipit tonë”, u shpreh ai.

Kur iu kërkua të tregonte qartë nëse Manchester City do të dorëzonte një ofertë para skadimit të afatit, përgjigjja e Marescas tërhoqi vëmendje të madhe.

Duke buzëqeshur, ai pranoi se një lëvizje e tillë nuk pritet gjatë ditës së sotme: “Jo sot, të jem i sinqertë. Nuk besoj se do të bëjmë ndonjë gjë sot”.

The post Maresca sqaron nëse Man City do të paraqesë ofertë për Enzo Fernandezin appeared first on Albeu.com.