Gola të rrallë, kthesa të pabesueshme në rezultat, fitore të vulosura në çastet e fundit dhe rezultate që pak kush mund t’i kishte parashikuar kanë shoqëruar deri tani Kupën e Botës 2026.

Tani që turneu po hyn në fazën e çerekfinaleve, po forcohet gjithnjë e më shumë diskutimi nëse ky është Botërori më i mirë i zhvilluar ndonjëherë.

Ky është edicioni i parë me 48 përfaqësuese dhe zhvillohet në Shtetet e Bashkuara të Amerikës, Kanada dhe Meksikë. Përmasat e tij kanë vendosur rekord, por edhe shifrat në fushë tregojnë se mund të kemi të bëjmë me një nga turnetë më tërheqës të historisë.

Shumë gola dhe ritëm sulmues

Në 96 nga 104 ndeshjet e planifikuara janë realizuar 280 gola, që do të thotë një mesatare prej 2.92 golash për takim.

Kjo përbën mesataren më të lartë në një Kupë Bote që prej Botërorit të vitit 1970 në Meksikë, i cili kishte 2.97 gola për ndeshje.

Krahasuar me edicionet e fundit, shifrat janë këto:

Katar 2022 – 2.69 gola për ndeshje

Rusia 2018 – 2.64

Brazili 2014 – 2.67

Afrika e Jugut 2010 – 2.27

Ndeshja që ka prodhuar më shumë gola deri tani është triumfi 7-1 i Gjermanisë ndaj Curaçaos. Përveç saj, shtatë sfida të tjera kanë nxjerrë nga gjashtë gola, ndërsa 13 përballje janë mbyllur me pesë gola.

Një tjetër element që nxjerr në pah lojën sulmuese është fakti se 74.6% e golave kanë ardhur nga aksioni i hapur. Vetëm 5% janë shënuar nga pika e bardhë, përqindja më e ulët ndonjëherë në historinë e Kupës së Botës.

Vendime në fund dhe përmbysje të mëdha

As ndeshjet me eliminim direkt nuk kanë munguar në dramë. Nga 24 duelet e kësaj faze, tetë janë zgjidhur me gol pas minutës së 85-të, ndërsa katër përballje kanë shkuar deri te penalltitë.

Goli i fitores që Enzo Fernandez shënoi ndaj Egjiptit ishte edhe goli i 10-të vendimtar i realizuar pas minutës së 90-të, një shifër rekord për një Kupë Bote.

Vetëm gjatë muajit korrik janë luajtur disa takime që tashmë po konsiderohen klasike.

Belgjika ktheu gjithçka ndaj Senegalit dhe fitoi 3-2.

Argjentina përmbysi Egjiptin dhe e mbylli ndeshjen me sukses 3-2.

Anglia mundi Meksikën 3-2, ndonëse luajti rreth 40 minuta me një lojtar më pak pas përjashtimit të Jarell Quansah.

Në veçanti, Belgjika dhe Argjentina arritën të rikuperonin një disavantazh prej dy golash, diçka që nuk kishte ndodhur më shumë se një herë në të njëjtin Botëror që nga viti 1970.

Edhe 0-0 kanë peshën e tyre

Turneu ka sjellë edhe tetë barazime pa gola, një rekord i ri në historinë e Kupës së Botës.

Megjithatë, shumë analistë nuk e lexojnë këtë si mungesë emocionesh, por si provë të balancës më të madhe mes ekipeve kombëtare.

Tribuna të mbushura dhe rivalitet i fortë mes yjeve

Edhe pse ka pasur kritika të vazhdueshme për çmimet e larta të biletave dhe shpenzimet e udhëtimit, stadiumet janë mbushur nga tifozët.

Sipas FIFA-s, janë zënë 99.7% e vendeve të disponueshme. Deri tani, turneu ka tërhequr mbi 6.2 milionë spektatorë, me një mesatare prej më shumë se 65 mijë tifozësh për ndeshje.

Në fushë, protagonistë kanë qenë edhe emrat më të mëdhenj të futbollit botëror.

Gara për Këpucën e Artë po konsiderohet një nga më të fortat që është parë ndonjëherë:

Lionel Messi – 8 gola

Kylian Mbappe – 7 gola

Erling Haaland – 7 gola

Harry Kane – 6 gola

Për herë të parë në historinë e Botërorit, tre lojtarë kanë arritur të shënojnë të paktën shtatë gola në të njëjtin turne.

Kombëtaret modeste kanë lënë gjurmë

Zgjerimi në 48 skuadra kishte ngritur dyshime se do të prodhonte shumë ndeshje të pabalancuara, por disa nga rrëfimet më të bukura të këtij edicioni kanë ardhur pikërisht nga ekipet më të vogla.

Curaçao, shteti më i vogël që është kualifikuar ndonjëherë në një Kupë Bote, reagoi pas humbjes 7-1 ndaj Gjermanisë duke marrë një barazim kundër Ekuadorit.

Katari, edhe pse u mund 6-0 nga Kanadaja, arriti të ndalte Zvicrën me një barazim 1-1.

Nga surprizat më të mëdha të turneut ka qenë edhe Kepi i Gjelbër.

Me portierin 40-vjeçar Vozinha, përfaqësuesja afrikane barazoi me Spanjën, Uruguain dhe Arabinë Saudite për të kaluar fazën e grupeve. Më pas, në 1/16 e finales, i hapi shumë punë Argjentinës dhe u eliminua vetëm pas kohës shtesë me rezultatin 3-2.

Jo pa polemika

Pavarësisht ecurisë së suksesshme në aspektin sportiv, turneu është shoqëruar edhe me debate. Tifozët kanë renditur si kritikat kryesore çmimet e larta të biletave, hoteleve dhe transportit.

Në disa stadiume janë kundërshtuar edhe ndërprerjet për hidratim, sidomos në rastet kur ndeshjet janë zhvilluar në ambiente me çati të mbyllur ose me ajër të kondicionuar.

Po ashtu, janë ngritur shqetësime për ngarkesën fizike të futbollistëve, duke pasur parasysh se sezoni i ri i Ligës Premier nis vetëm një muaj pas finales së Botërorit.

Çështja Balogun hapi debat të madh

Një nga episodet që ka shkaktuar më shumë diskutime ka qenë ai i sulmuesit amerikan Folarin Balogun.

Pasi u ndëshkua me karton të kuq ndaj Bosnje dhe Hercegovinës, Balogun mori leje të luante në takimin e radhës kundër Belgjikës, sepse FIFA pezulloi dënimin duke u mbështetur në nenin 27 të Kodit Disiplinor.

Ky vendim u sulmua ashpër nga UEFA, Belgjika dhe trajneri i Anglisë, Thomas Tuchel. Ndërkohë, mediat raportuan se presidenti amerikan Donald Trump kishte zhvilluar një bisedë telefonike me presidentin e FIFA-s, Gianni Infantino, për këtë çështje.

Pavarësisht polemikave, për FIFA-n ky mund të konsiderohet një nga Botërorët më të suksesshëm të organizuar ndonjëherë.

Spektakli në fushë, stadiumet e mbushura, atmosfera elektrizuese dhe prania e yjeve më të mëdhenj të futbollit kanë krijuar një turne që tashmë po krahasohet me edicionet më të mira në histori.

Me Argjentinën, Spanjën, Francën dhe Anglinë ende në garë dhe të vendosura në çerekfinale të ndryshme, pjesa përmbyllëse e turneut premton edhe më shumë emocione.

Nëse ndeshjet që kanë mbetur do të ruajnë të njëjtin nivel spektakli, Botërori 2026 mund të mbetet përgjithmonë në histori si edicioni më i mirë i zhvilluar ndonjëherë.

The post Botërori 2026 thyen rekorde, sjell surpriza dhe ndez debatin: a po shohim edicionin më spektakolar ndonjëherë? appeared first on Albeu.com.

Pas triumfit dramatik 3-2 ndaj Egjiptit në raundin e 16-të të Kupës së Botës 2026, mesfushori i Argjentinës, Enzo Fernandez, nuk arriti t’i përmbante emocionet.

Argjentina vulosi kalimin në çerekfinale pas një përmbysjeje spektakolare përballë Egjiptit, ndërsa sfida e radhës do të jetë ndaj Zvicrës së Granit Xhakës për një vend në gjysmëfinale.

Në prononcimin e dhënë pas ndeshjes, futbollisti i Chelseat vuri në pah rolin e kapitenit Lionel Messi, duke theksuar lidershipin dhe mentalitetin e tij të rrallë. Sipas Enzos, mënyra si paraqitet dhe karakteri i yllit argjentinas shërbejnë si burim frymëzimi për të gjithë ekipin.

Teksa fliste për Messin, Enzo u prek dhe tha: “Kur sheh Leon, i cili në fund të fundit është shembulli ynë më i madh… më falni, po bëhem emocional këtu… mënyra se si nuk dorëzohet kurrë dhe si gjithmonë ecën përpara”, deklaroi Enzo duke qarë.

Mesfushori argjentinas nënvizoi më tej se Messi mbetet një model i vërtetë për të gjithë futbollistët e Kombëtares.

“Ai është një shembull i vërtetë për ne. Edhe në momentet e vështira, ai gjithmonë tregon se është e mundur të vazhdosh përpara dhe sot është një shpërblim i madh për këtë”, u shpreh ai.

Enzo theksoi gjithashtu se skuadra e Argjentinës ishte e vetëdijshme se nuk ishte koha për t’u dorëzuar dhe se do të vazhdojë betejën deri në fund në Kupën e Botës.

“E dinim që ishte shumë herët për të shkuar në shtëpi dhe do të vazhdojmë të luftojmë deri në fund”, përfundoi mesfushori i kampionëve në fuqi të botës.

The post Enzo Fernandez emocionohet teksa flet për Messin: Është modeli ynë më i madh appeared first on Albeu.com.

Real Madridi ka vendosur përfundimisht të mos ndjekë transferimin e Enzo Fernandezit. Përmes një deklarate zyrtare, klubi nga Madridi ka hedhur poshtë në mënyrë kategorike çdo pretendim për negociata lidhur me mesfushorin argjentinas.

Kjo dalje publike nuk po lexohet thjesht si një përgënjeshtrim i zërave të merkatos, por edhe si një sinjal i drejtpërdrejtë që vjen nga brenda klubit.

Duke qenë se Real Madridi rrallë del publikisht për të mohuar raportimet për transferime, përveç rasteve specifike, kjo deklaratë ka shkaktuar reagime të shumta dhe po interpretohet si tregues i qartë se Fernandezi nuk hyn në planet e klubit.

Sipas gazetarit Ramo Alvarez, në drejtimin e klubit mbizotëron bindja se profili i mesfushorit argjentinas nuk përputhet me ndërtimin aktual të skuadrës, ku Federico Valverde dhe Jude Bellingham shihen si elementë thelbësorë të projektit sportiv.

Në aspektin taktik, Fernandez dallohet si një mesfushor me kontroll të mirë të topit, me dinamizëm në lojë dhe me aftësi për të dhënë kontribut edhe në repartin ofensiv.

Megjithatë, në vlerësimin e bërë në Madrid, tiparet e tij nuk harmonizohen në mënyrën më të përshtatshme me funksionet që aktualisht kanë Valverde dhe Bellingham.

25-vjeçari është i lidhur me Chelsean me kontratë deri në vitin 2032, ndërsa vlera e tij në treg llogaritet rreth 90 milionë euro.

Chelsea shpenzoi plot 121 milionë euro për ta marrë nga Benfica në janar të vitit 2023, një lëvizje e kushtueshme që e bën edhe më të vështirë çdo negociatë të mundshme.

The post Real Madridi mbyll derën për Enzo Fernandez, Valverde dhe Bellingham në qendër të vendimit appeared first on Albeu.com.

Gjatë javëve të fundit, emri i Enzo Fernandez është përfolur për një lëvizje të mundshme nga Chelsea drejt Real Madrid.

Këto aludime u shtuan edhe më shumë pas deklaratave të agjentit të mesfushorit argjentinas, i cili e paraqiti këtë transferim si një çështje thuajse të mbyllur.

Sipas menaxherit të lojtarit, si vetë futbollisti ashtu edhe klubi madrilen kishin pëlqim reciprok, duke e konsideruar operacionin të përfunduar. Megjithatë, reagimi ka ardhur nga vetë Real Madrid, që përmes rrjeteve sociale ka përgënjeshtruar ekzistencën e negociatave për një lëvizje të tillë.

“Në lidhje informacionet dhe deklaratat që kanë dalë ditët e fundit në lidhje me një interes të supozuar nga Real Madrid C. F. për lojtarin Enzo Fernandez, klubi dëshiron të deklarojë se nuk ka bërë asnjë përpjekje, qoftë drejtpërdrejt apo tërthorazi, që synon nënshkrimin e lojtarit të lartpërmendur dhe, për më tepër, nuk ka ndërmend të ndjekë një operacion të tillë.

Real Madrid dëshiron të shprehë respektin e tij maksimal për Enzo Fernandez, një futbollist të shkëlqyer, karriera dhe cilësia e të cilit njihen gjerësisht, si dhe për Chelsea FC, një klub me të cilin mban një marrëdhënie të shkëlqyer institucionale”, shkruan ndër të tjera klubi i LaLiga-s spanjolle.

The post Real Madrid hedh poshtë zërat për Enzo Fernandez, klubi spanjoll sqaron qëndrimin për mesfushorin e Chelsea-t appeared first on Albeu.com.

Enzo Fernandez mund të jetë një nga emrat që do të mbajë vëmendjen gjatë afatit kalimtar të verës, pasi përfaqësuesi i tij ka bërë të ditur se po shqyrtohen alternativa për një largim nga Chelsea.

Këto deklarata kanë shtuar menjëherë zërat në media dhe kanë rikthyer diskutimet mbi atë se çfarë mund të ndodhë me të ardhmen e mesfushorit argjentinas në Londër.

Në një prononcim për Marca, Javier Pastore shpjegoi se si lojtari, ashtu edhe klubi, po analizojnë situatën aktuale, por saktësoi se deri në këtë moment nuk ekziston asgjë konkrete dhe as bisedime të avancuara me ndonjë ekip tjetër.

Ai nënvizoi se gjithçka mbetet ende në nivel diskutimesh fillestare dhe se një vendim përfundimtar është ende larg.

“Po shqyrtojmë mundësitë që ai të largohet nga Chelsea, por nuk ka asgjë të sigurt ose të konfirmuar me ndonjë klub”, tha Pastore për Marca.

I transferuar te Chelsea nga Benfica për një shumë rekord, Fernandez ka luajtur rol të rëndësishëm në repartin e mesfushës, duke e konsoliduar gradualisht vendin e tij në formacionin bazë.

Edhe pse në periudha të caktuara ka kaluar momente me paraqitje të paqëndrueshme, ai vazhdon të konsiderohet si një nga futbollistët me potencialin më të madh në projektin e klubit.

Nëse do të ndodhte një largim i tij, kjo do të përbënte një goditje të fortë për mesfushën e Chelseat, në një kohë kur skuadra synon më shumë stabilitet dhe vazhdimësi përpara nisjes së sezonit të ri.

Në javët e ardhshme pritet të ketë zhvillime të tjera, teksa merkatoja verore vazhdon të mbajë të hapur pasiguritë për një nga emrat më të rëndësishëm të ekipit londinez.

The post E ardhmja e Enzo Fernandez te Chelsea në dyshim, agjenti pranon kontakte për një transferim të mundshëm appeared first on Albeu.com.

Fabrizio Romano ka sjellë një informacion të ri lidhur me të ardhmen e Enzo Fernandezit, ndërsa prej kohësh qarkullojnë spekulime që e lidhin mesfushorin e Chelseat me një kalim të mundshëm te Real Madridi.

Sipas gazetarit italian, mes Chelseat dhe Real Madridit nuk ka aktualisht asnjë negociatë në zhvillim, edhe pse raportime të shumta kanë lënë të kuptohet se kontaktet mund të nisin së shpejti.

Brenda klubit madrilen, Enzo Fernandez përmendet si një nga disa emrat që po analizohen për përforcimin e mesfushës, por deri në këtë moment nuk është regjistruar asnjë qasje zyrtare mes dy klubeve.

Romano nënvizoi se, nëse Real Madridi do të kishte vendosur të hynte në bisedime, një hap i tillë do të ishte ndërmarrë tashmë në rrugë formale.

“Nuk ka absolutisht asgjë në zhvillim mes Chelseat dhe Real Madridit për Enzo Fernandezin”, u shpreh gazetari italian.

Ndonëse reprezentuesi argjentinas vazhdon të jetë pjesë e opsioneve që po vlerësohen nga Real Madridi për repartin e mesfushës, ai nuk konsiderohet alternativa e vetme nga drejtuesit e klubit spanjoll dhe, për momentin, palët nuk po negociojnë.

Tani mbetet për t’u parë nëse kjo tablo do të ndryshojë në javët e ardhshme të afatit kalimtar veror, por aktualisht një transferim i Fernandezit në Santiago Bernabeu nuk duket pranë konkretizimit./

The post Real Madridi nuk ka nisur bisedime për Enzo Fernandezin appeared first on Albeu.com.

Jose Mourinho nuk e sheh si të përfunduar ende merkaton e Real Madridit.

Sipas trajnerit portugez, përforcimet e bëra deri tani kanë sjellë zhvillim të dukshëm në skuadër, por ai vlerëson se duhen ende ndërhyrje në tri role thelbësore: një qendërmbrojtës, një mesfushor dhe një sulmues qendre tipik “9”.

Në bazë të planit të hartuar nga stafi teknik, këto afrime mund ta çojnë faturën totale të shpenzimeve të klubit pranë 200 milionë eurove.

Një nga prioritetet kryesore të Mourinhos mbetet reparti defensiv.

Edhe pse ardhja e Ibrahima Konates ka rritur cilësinë në mbrojtje, tekniku mendon se ekipi ka nevojë edhe për një tjetër qendërmbrojtës, për shkak të problemeve fizike të hasura nga Antonio Rudiger dhe Eder Militao.

Emri që lakohet më shumë për këtë repart është Alessandro Bastoni i Interit, i konsideruar si një prej mbrojtësve më të vlerësuar në kontinent.

Megjithatë, një lëvizje për Bastonin lidhet drejtpërdrejt me largimin e Raul Asencios, pasi ai nuk konsiderohet pjesë e planeve kryesore të trajnerit.

Nëse Asencio mbetet në skuadër, klubi nuk pritet të bëjë hap për Bastonin, për të shmangur mbipopullimin në qendër të mbrojtjes.

Sa i takon mesfushës, objektivi numër një i Mourinhos është Enzo Fernandez i Chelseat.

Mesfushori argjentinas konsiderohet profili i duhur për mënyrën e lojës që kërkon portugezi, falë intensitetit, menaxhimit të ritmit dhe aftësisë për të ndërtuar aksione në ndeshje të mëdha.

Një transferim i tillë do të kushtëzohej nga largimi i një mesfushori aktual.

Si alternativa të mundshme për dalje përmenden Eduardo Camavinga dhe Aurelien Tchouameni, edhe pse asnjëri prej tyre nuk ka shprehur vullnet për t’u larguar.

Kërkesa e tretë e trajnerit është afrimi i një sulmuesi klasik qendre.

Nuk bëhet fjalë për një emër të madh, por për një futbollist me forcë fizike, efektiv në lojën në ajër dhe të aftë për të zhbllokuar ndeshje të vështira, me karakteristika të ngjashme me Joselu.

Në këtë drejtim, ndikim të drejtpërdrejtë mund të ketë e ardhmja e Gonzalo Garcias.

Nëse sulmuesi vendos të largohet për të pasur më shumë minuta, Real Madridi do të krijonte hapësirë për një afrim të ri në atë rol.

Në panoramën e përgjithshme, vihet re një diferencë mes asaj që kërkon trajneri dhe qasjes së presidencës.

Mourinho synon më shumë ekuilibër dhe alternativë në skuadër, ndërsa Florentino Perez nuk e heq nga skena mundësinë e një goditjeje të madhe në merkato për të ndezur entuziazmin e tifozëve, me emra si Michael Olise që qarkullojnë në prapaskenë.

Real Madridi vijon të mbetet aktiv në tregun e transferimeve, por çdo operacion i rëndësishëm do të varet nga shitjet.

Në “Santiago Bernabeu”, vera pritet të sjellë ende zhvillime të tjera me peshë.

The post Mourinho synon edhe tre afrime të tjera te Real Madridi, me koston që mund të shkojë në 200 milionë euro appeared first on Albeu.com.

Chelsea nuk e sheh aspak si të lehtë largimin e tij dhe i jep një vlerësim shumë të lartë futbollistit, i cili vazhdon të ruajë statusin e tij ndërkombëtar.

Në Madrid llogaritet se çmimi mund të shkojë deri në rreth 120 milionë euro, një shifër që kërkon bisedime të gjata dhe shumë të kujdesshme.

Kërkesa e Real Madridit për Enzo Fernandez lidhet me një nevojë të qartë sportive. Klubi madrilen po kërkon një mesfushor me karakter, forcë dhe aftësi për të diktuar ritmin e lojës në ndeshje me intensitet të lartë, si në Ligën e Kampionëve ashtu edhe në La Liga.

Argjentinasi i përmbush këto kërkesa në aspektin e moshës, peshës në skuadër dhe përvojës në nivele të larta. Në moshën 25-vjeçare, ai ka fituar tashmë Kupën e Botës me Argjentinën dhe ka eksperiencë në Premier League, ku mbërriti te Chelsea nga Benfica në një transferim historik.

Plani që po shqyrtohet në ‘Bernabeu’ parashikon përfshirjen e lojtarëve në lëvizje paralele. Jo domosdoshmërisht si shkëmbim i drejtpërdrejtë, por si operacione që mund ta zbusin qëndrimin e Chelseat në negociatat për Enzo Fernandez.

Në këtë skenar përmenden dy emra: Alvaro Carreras dhe Eduardo Camavinga.

Mbrojtësi i majtë ka lënë përshtypje pozitive te Xabi Alonso, i cili e ka pasur më herët nën vëzhgim dhe mund ta shohë si një alternativë të vlefshme për të përforcuar krahun e majtë.

Çështja e Camavingas është shumë më e ndërlikuar. Francezi nuk duket i gatshëm të largohet dhe vazhdon të jetë një lojtar me rëndësi të madhe sportive dhe me vlerë të lartë për të ardhmen. Megjithatë, në tregun anglez emri i tij ka peshë të madhe dhe mund të ndikojë në çdo marrëveshje mes klubeve.

Carreras konsiderohet si rruga më e lehtë në strategjinë e Real Madridit. Largimi i tij nuk do të kishte ndikimin sportiv që do të kishte ai i Camavingas dhe do t’i jepte klubit mundësinë të hapte një kanal marrëveshjeje me Londrën pa prekur shtyllat kryesore të skuadrës.

The post Real Madridi i propozon Chelseat dy futbollistë të skuadrës në këmbim të Enzo Fernandez appeared first on Albeu.com.

Që në ditët e para pas rikthimit të tij në stolin e “Santiago Bernabeu” në fillim të këtij muaji, trajneri portugez ka lëvizur shpejt për t’ia bërë të qarta klubit prioritetet e tij në afatin kalimtar.

Pas rizgjedhjes së presidentit afatgjatë Florentino Perez, Real Madridi hodhi në tavolinë një ofertë prej 152 milionë eurosh për sulmuesin e Atletico Madridit, Julian Alvarez, por ajo u refuzua menjëherë.

Ndërkohë që çështja e Alvarezit pritet të mbetet e hapur gjatë verës, skuadra madrilene ka zyrtarizuar tashmë afrimet e Cucurellas nga Chelsea dhe Konates nga Liverpooli.

Sipas mediumit spanjoll Marca, Mourinho i ka kërkuar personalisht klubit që të transferojë mesfushorin e Chelseat, Enzo Fernandez, çka mund ta shtojë edhe më tej numrin e ish-lojtarëve të elitës angleze në ekip gjatë kësaj vere.

Fernandez, që është i lidhur me klubin londinez me kontratë deri në vitin 2032, vlerësohet nga Chelsea në rreth 140 milionë euro.

Mes emrave në listën e objektivave është edhe mesfushori i West Hamit, Mateus Fernandes, për të cilin interes kanë shfaqur edhe Tottenhami dhe Manchester Unitedi. Sidoqoftë, në këtë moment duket e vështirë që Real Madridi të arrijë të transferojë të dy futbollistët.

Më herët ishte raportuar se Chelsea dhe Real Madridi kishin hapur bisedime për një kalim të mundshëm të Fernandezit në Spanjë.

Megjithatë, sipas Daily Mail, burime pranë situatës kanë bërë të ditur se deri tani nuk ka pasur kontakte zyrtare mes dy klubeve.

Chelsea mbetet në pritje të një oferte nga Real Madridi, ndërsa besohet se marrëveshja për kushtet personale me lojtarin nuk do të paraqesë vështirësi.

The post Mourinho i kërkon Real Madridit afrimin e një tjetër emri të madh nga Liga Premier appeared first on Albeu.com.

Futbollisti spanjoll, i transferuar te klubi madrilen në fillim të këtij muaji si pjesë e projektit të ri të drejtuar nga trajneri Jose Mourinho, e përshkroi mesfushorin argjentinas si një mik të ngushtë dhe një lojtar me cilësi të mëdha.

“Enzo është një lojtar i shkëlqyer dhe një mik i imi. Ai më uroi për transferimin te Real Madridi. Shpresoj që kjo të ndodhë. Do të isha shumë i lumtur”, u shpreh Cucurella për Radio Marca.

Referuar raportimeve të ESPN, Real Madridi është në kërkim të përforcimeve në mesfushë dhe në qendër të mbrojtjes. Fernandez vazhdon të jetë mes emrave kryesorë në listën e klubit, ndonëse po merren në konsideratë edhe opsione të tjera.

Cucurella rikujtoi edhe periudhën pozitive që pati me argjentinasin te Chelsea, ndërsa nuk e fshehu dëshirën që të luajnë sërish në të njëjtën skuadër.

“Kemi qenë shumë të lumtur te Chelsea dhe do të ishte fantastike nëse të dy do të nënshkruanim për Real Madridin në të njëjtën verë. Shpresoj që ai të ketë fat dhe të bëhet lojtar i Real Madridit”, shtoi spanjolli.

Mbrojtësi 27-vjeçar tregoi po ashtu se në zgjedhjen e tij për t’u transferuar në “Santiago Bernabéu”, ndikim të rëndësishëm pati trajneri Jose Mourinho.

“Kur një trajner si Mourinho të telefonon, të bën të ndihesh krenar. Fillimisht më dërgoi një mesazh dhe më pas më telefonoi. Kjo ka shumë rëndësi dhe mezi pres të filloj punën me të”, tha Cucurella.

The post Cucurella shpreson ta ketë sërish pranë Enzo Fernandezin, këtë herë te Real Madridi appeared first on Albeu.com.