Kontrolli i Entit Shtetëror të Revizionit ka evidentuar disa shkelje dhe dobësi në procedurat e prokurimit publik të zbatuara nga konvikti studentor “Pelagonia” në Kisella Vodë.

Një nga rastet e evidentuara lidhet me furnizimin me bukë, për të cilën është paguar një çmim dukshëm më i lartë se ai i tregut.

Sipas ESHR-së, pas vendosjes së evidencës ditore, shpenzimet mujore gjatë vitit 2025 ranë ndjeshëm në raport me vitin 2024. Megjithatë, kontrata e re e vitit 2025 e çoi çmimin e bukës në 126 denarë për kilogram, ndërkohë që çmimi i tregut ishte rreth 70 denarë/kg. Revizioni e cilëson këtë si përdorim joekonomik të parave publike dhe si tregues të mangësive në kontrollin e prokurimeve.

E njëjta mënyrë llogaritjeje ishte përdorur edhe gjatë viteve 2024 dhe 2023. Një copë bukë trajtohej si një kilogram, pa u kryer matja e saktë e këtij produkti ushqimor.

Probleme janë gjetur edhe në procedurën e vitit 2023 për blerjen e bukës dhe miellit. Kontrata iu dha një ofertuesi, aktiviteti kryesor i të cilit nuk lidhej me artikullin e prokuruar, ndërsa dokumentacionit të revizionit i mungonte garancia bankare e kërkuar për realizimin cilësor të kontratës. Pavarësisht se çmimi i kontraktuar ishte 57,46 denarë/kg, operatori ekonomik në faturim e paraqiste një copë bukë si një kilogram. Kjo parregullsi u zbulua vetëm në fund të vitit 2024, si pasojë e kontrolleve të brendshme të pamjaftueshme.

Parregullsi janë konstatuar gjithashtu gjatë furnizimit me dyshekë për studentët. Konvikti bleu 250 dyshekë, por ato nuk u përdorën, pasi përmasat e tyre nuk përputheshin me dimensionet e shtretërve.

Revizioni thekson se dokumentacioni i tenderit të vitit 2023 për dyshekët kishte kërkesa kufizuese dhe se kontrata u nënshkrua pa garanci bankare për realizim cilësor. Në vend të 500 dyshekëve të planifikuar, u blenë 250, me vlerë të përgjithshme 1.174 mijë denarë. Produktet kishin përmasa të ndryshme nga ato të përcaktuara në specifikimet teknike, u pranuan pa dokumentacionin e nevojshëm dhe mbetën të magazinuara pa u përdorur. Sipas revizionit, më herët nga i njëjti furnizues ishin blerë edhe 450 dyshekë, ndonëse dyshekët ekzistues ishin ende në gjendje të mirë. Përmasat e mëdha të modeleve të reja ndikuan në dëmtimin e stabilitetit të shtretërve.

Dyshime për çmime jo të përshtatshme me tregun janë ngritur edhe për blerje të tjera ushqimore të konviktit.

Revizorët raportojnë mospërputhje si në planifikimin, ashtu edhe në zbatimin e prokurimeve publike. Në procedurat për mish të freskët, produkte të përpunuara të mishit dhe peshk gjatë viteve 2023 dhe 2024, si dhe për produkte bujqësore në vitin 2023, zakonisht ishte paraqitur vetëm një ofertë. Kontratat ishin lidhur në vlerën e planifikuar, por pa përcaktuar paraprakisht sasitë. Për artikujt që bliheshin rregullisht, çmimet e ofertave ishin mbi nivelin e tregut, ndërsa për produktet që nuk prokuroheshin ishin vendosur çmime jorealisht të ulëta, pa iu kërkuar operatorëve ekonomikë shpjegime shtesë. Në disa raste, vlerat e kontraktuara ishin tejkaluar. Sipas revizorëve, këto gjetje dëshmojnë për kontroll të dobët dhe për përdorim joekonomik të mjeteve publike.

The post Revizioni zbulon parregullsi në prokurimet e konviktit studentor “Pelagonia appeared first on Albeu.com.

Enti Shtetëror i Revizionit ka dhënë një vlerësim negativ për aktivitetin e NP “Higjiena Komunale – Shkup” gjatë vitit 2024, duke evidentuar një sërë shkeljesh në aspektin financiar dhe administrativ.

Raporti i revizorëve tregon se kompania përballet me një barrë borxhi prej gati 12 milionë eurosh, ndërsa mbi 2 milionë euro përfaqësojnë kërkesa me arkëtim të pasigurt. Gjithashtu, janë gjetur pasuri të paevidentuara, vlera e të cilave arrin rreth 472 mijë euro.

Një situatë kritike paraqitet edhe në gjendjen e flotës së automjeteve. Prej 189 mjeteve që zotëron ndërmarrja, vetëm 76 janë funksionale, çka do të thotë se afërsisht 60 për qind e tyre janë jashtë përdorimit. Po ashtu, gjatë vitit të kaluar, përmes agjencive private u angazhuan 354 punëtorë me një kosto mbi 3 milionë euro.

Ndër problematikat e tjera të theksuara janë edhe humbjet financiare, likuiditeti i ulët dhe çrregullimet në sistemin e llogaritjes së pagave. Sipas vlerësimit të revizorëve, kjo situatë vë në rrezik cilësinë e shërbimeve ndaj qytetarëve dhe kërkon masa urgjente për konsolidimin financiar si dhe modernizimin e ndërmarrjes.

The post Raporti i ESHR-së: Gjendje alarmante në “Higjienën Komunale” të Shkupit, borxhe 12 milionë euro dhe mbi gjysma e automjeteve jashtë funksionit appeared first on Albeu.com.