Vora ka bërë të ditur përbërjen e re të stafit teknik të akademisë për sezonin 2026/27. Drejtimi i ekipit U-19 i është besuar Gentian Brahimajt, me Erjol Merdinin në rolin e zëvendëstrajnerit.

Pas largimit nga futbolli i luajtur, Eni Imami do ta vazhdojë karrierën si trajner i skuadrës U-18. Ish-lojtari i Tiranës dhe Dinamos i bashkohet kështu akademisë vorake, ku Olti Gjoka do të drejtojë U-17-tën dhe Erdi Lazri do të jetë në krye të U-16-tës.

Për ekipin U-15 do të përgjigjet Mustafa Sulaj, ndërsa Nelsi Mete do të punojë me grupmoshën U-14. Skerdilajd Musteqja është emëruar trajner i U-13-tës, kurse Besim Shehi do të drejtojë të rinjtë e ekipit U-11.

Në grupmoshat më të vogla, Erjon Cepunaj është caktuar trajner i U-10-tës dhe Amarildo Murati i U-9-tës. Stafi plotësohet nga Ardit Gjikola si përgatitës atletik, Jurgen Toska si trajner i portierëve dhe Nazmi Metaliu në detyrën e doktorit.

The post Vora prezanton stafin e akademisë për sezonin 2026/27, Eni Imami nis detyrën e re pas tërheqjes appeared first on Albeu.com.

Eni Imami i ka dhënë fund futbollit të luajtur. “Newsport.al” ka mësuar se pas përfundimit të kontratës me Kukësin, qendërmbrojtësi 33-vjeçar ka vendosur të tërhiqet, edhe pse nuk i kanë munguar ofertat nga klube të tjera.

Megjithatë, largimi i tij nuk do të thotë shkëputje nga futbolli. Sipas raportimit të “Newsport.al”, ish-mbrojtësi është pajisur me licencën UEFA B dhe shumë shpejt do të nisë punën për të përmbyllur edhe kursin UEFA A, çka më pas do t’i hapë rrugën ushtrimit të profesionit të trajnerit.

Në karrierën e tij, Imami ka regjistruar një bilanc të rëndësishëm në “Abissnet Superiore”, ku ka fituar 3 tituj kampionë. Ai është shpallur kampion me Dinamon në sezonin 2009/2010, me Kukësin në sezonin 2016/2017 dhe me Tiranën në sezonin 2019/2020.

Po ashtu, 33-vjeçari ka fituar edhe 3 Kupa të Shqipërisë, respektivisht me Laçin, Kukësin dhe Vllazninë. Në sezonin 2024/2025, ai ishte një nga figurat kryesore te Vora, duke kontribuar në fitimin e titullit të Kategorisë së Parë, që solli edhe ngjitjen historike në Superiore.

Sa i përket rrugëtimit të tij në fushë, Imami e nisi te Partizani U17. Më pas, ai veshi fanellat e Dinamos, Laçit, GC Biaschesi në Zvicër, Teutës, Kukësit, Tiranës, Skënderbeut, Vllaznisë, Flamurtarit, Vorës dhe sërish Kukësit.

The post Në 33 vjeç mbyll karrierën Eni Imami, ish-mbrojtësi i Tiranës dhe Partizanit gati për hapin e parë si trajner appeared first on Albeu.com.