Ajo është përsëritur ndër vite, pasi varësia e prodhimit vendas të energjisë nga reshjet dhe prurjet hidrike mbetet e lartë. Këtë herë po ndodh ndërsa kërkesa për energji po rritet nga temperaturat e larta dhe fluksi turistik.

Në të njëjtën kohë, stuhitë dhe breshëri kanë dëmtuar prodhimin bujqësor, ndërsa çmimet e perimeve u rritën me 8.5% në qershor, pikërisht në kulmin e sezonit vendas.

“El Niño ndikon në klimën globale, por ndikimi i tij në Mesdhe dhe në Shqipëri nuk është i drejtpërdrejtë”, thotë Anira Gjoni, eksperte në Departamentin e Meteorologjisë në Institutin e Gjeoshkencave.

Sipas saj, kushtet meteorologjike në vend përcaktohen kryesisht nga sistemet atmosferike që zhvillohen mbi Atlantik, Mesdhe dhe Europë, si dhe nga qarkullimi rajonal i masave ajrore.

Këto sisteme mund ta përforcojnë, ta ndryshojnë ose ta zbusin sinjalin e lidhur me El Niño-n.

Kjo e bën të vështirë ndarjen e efektit të fenomenit nga prirja më afatgjatë e ndryshimeve klimatike. Megjithatë, ndikimi ekonomik i temperaturave mbi normalen dhe i reshjeve gjithnjë e më të çrregullta po bëhet më i matshëm.

Konsumi rekord ndryshon bilancin e energjisë

 Gjatë disa javëve të qershorit, temperaturat në Shqipëri ishin 3 deri në 6 gradë Celsius mbi mesataren shumëvjeçare. Vendi ndodhej në periferi të valës së të nxehtit që goditi më fort Europën Perëndimore dhe Qendrore, por anomalitë ishin të mjaftueshme për të shtuar presionin mbi sistemin energjetik.

“Rritja e temperaturave në vendin tonë ishte 3–6 gradë mbi mesataren shumëvjeçare gjatë javëve përkatëse të qershorit”, thotë Gjoni.

Ajo shpjegon se episodet me temperatura të larta u favorizuan nga depërtimi i masave shumë të ngrohta me origjinë subtropikale nga Afrika e Veriut. Sipas saj, këto kushte lidhen kryesisht me konfigurimin atmosferik mbi Mesdhe dhe jo me një ndikim të drejtpërdrejtë të El Niño-s.

Konsumi ditor i energjisë arriti kulmin në rreth 25 mijë megavat-orë gjatë qershorit, sipas Operatorit të Sistemit të Shpërndarjes. Krahasuar me të njëjtin muaj të vitit të kaluar, rritja ishte 13.9%.

Në gjashtë muajt e parë të vitit 2026, konsumi arriti në 4.4 milionë megavat-orë, nga 4.1 milionë një vit më parë, me një rritje prej rreth 10%.

Temperaturat e larta dhe shtimi i aktivitetit turistik po rrisin përdorimin e kondicionimit dhe ngarkesën në rrjet. Mbi 1 mijë punonjës janë vendosur në gatishmëri për sezonin veror, ndërsa 136 grupe janë shpërndarë në terren për t’iu përgjigjur defekteve dhe për të shmangur ndërprerjet.

Por kostoja kryesore nuk qëndron vetëm te mirëmbajtja e rrjetit. Korporata Elektroenergjetike Shqiptare ka kontraktuar 331,200 megavat-orë energji për periudhën nga 1 korriku deri më 30 shtator. Çmimi mesatar i ponderuar ishte 125.47 euro për megavat-orë, ndërsa vlera e përgjithshme e kontratës arriti në rreth 41.5 milionë euro.

Vetëm pak muaj më parë, situata ishte e kundërt. Prurjet e larta në kaskadën e Drinit i mundësuan KESH-it të prodhonte më shumë energji sesa kërkonte tregu vendas. Nga janari deri në prill, kompania shiti 456,945 megavat-orë, duke arkëtuar rreth 33.15 milionë euro, përfshirë TVSH-në.

Një goditje e dyfishtë për bujqësinë

Në bujqësi, rreziku nuk lidhet vetëm me thatësirën. Ai vjen edhe nga kalimi i shpejtë prej periudhave pa reshje në stuhi të shkurtra dhe intensive.

“Periudhat më të gjata të thata, të ndërprera nga episode të shkurtra me reshje intensive, janë një nga skenarët më të mundshëm”, thotë znj. Gjoni.

Sipas saj, në kushtet e temperaturave më të larta, atmosfera ka aftësi të mbajë më shumë avull uji. Kjo mund të favorizojë reshje të përqendruara në intervale të shkurtra, duke rritur rrezikun e vërshimeve të shpejta dhe të përmbytjeve urbane.

Për muajt korrik dhe gusht, parashikimet nuk tregojnë një prirje të fortë që reshjet të jenë dukshëm mbi ose nën normalen klimatike. Ato pritet të mbeten të pabarabarta në kohë dhe hapësirë, me intervale të thata të ndërprera nga episode lokale.

“Besueshmëria e parashikimeve sezonale është më e lartë për temperaturën sesa për reshjet”, thotë Gjoni.

Ky kombinim është veçanërisht i kushtueshëm për fermerët. Periudhat e nxehta rrisin nevojën për ujitje dhe kostot e prodhimit.

Stuhitë mund ta dëmtojnë prodhimin brenda pak minutash, shpesh në prag të korrjes. Në fillim të korrikut, breshëri goditi parcelat me grurë, elb dhe qepë në fushën e Maliqit.

Fermerët raportuan humbje të konsiderueshme dhe, në disa raste, dëmtimin e më shumë se gjysmës së prodhimit. Në zonat e Elbasanit u dëmtuan pemë frutore, vreshta dhe kultura të tjera.

Në Zavalinë, raportimet nga terreni flisnin për dëme të rënda në prodhimin e mollëve, kumbullave dhe rrushit.

Në Kolonjë u prekën vreshtat. Stuhitë sollën humbje edhe në blegtori. Një rrufe vrau 150 krerë bagëti në një fermë në Delvinë, ndërsa në zonën e Maliqit një tjetër goditje vrau rreth 30 dele dhe dhi.

Nuk ka ende një bilanc të plotë financiar për këto ngjarje. Megjithatë, për fermat e vogla, humbja e një prodhimi sezonal ose e një tufe bagëtish mund të zhdukë të ardhurat e të gjithë vitit.

Rreziku është më i lartë sepse prodhimi nuk është i siguruar dhe kostoja mbetet te fermeri ose zhvendoset te buxheti publik përmes kërkesave për kompensim në ato raste kur gjykohet e arsyeshme.

Çmimet rriten në kulmin e ofertës

Goditjet mbi prodhimin po ndodhin në një periudhë kur çmimet e perimeve tashmë po shfaqin rritje të fortë. Sipas INSTAT-it, grupi “Perime, zarzavate dhe bishtajore” u shtrenjtua me 8.5% në qershor krahasuar me një vit më parë. Norma ishte pothuajse trefishi i inflacionit mesatar të ushqimeve, prej 3%.

Rritja është e pazakontë për një muaj që përkon me kulmin e prodhimit të shumë kulturave vendase. Në kushte normale, shtimi i ofertës sezonale do të duhej të ulte çmimet. Këtë herë ndodhi e kundërta. Moti nuk është faktori i vetëm.

Eksportet, kostot e transportit, mungesa e fuqisë punëtore, struktura e tregtimit dhe marzhet e ndërmjetësve ndikojnë gjithashtu te çmimi final. Gjithsesi temperaturat e larta, nevoja për më shumë ujitje dhe dëmet nga breshëri krijojnë presion shtesë mbi prodhimin.

I nxehti ndez edhe faturën e zjarreve

Në korrik, AKMC raportoi operacione për përballimin e 16 vatrave të zjarrit të shpërndara në disa qarqe të vendit. Në Shëngjin, më 13 korrik, flakët kërkuan angazhimin e shtatë mjeteve zjarrfikëse, Forcave të Armatosura dhe ndërhyrjen e një helikopteri ushtarak.

Agjencia raportoi edhe operacione në zona të tjera, përfshirë fshatin Klos, duke treguar se rreziku nuk ishte i kufizuar në një vatër të vetme. Nxehtësia e zgjatur dhe tharja e bimësisë e bëjnë zjarrin më të shpejtë, më të kushtueshëm dhe më të vështirë për t’u izoluar.

Në zona turistik kostoja shkon përtej sipërfaqeve të djegura. Ajo prek bizneset, sezonin turistik dhe financat publike, pasi çdo operacion kërkon personel, mjete, karburant dhe, në rastet më të rënda, mbështetje nga ajri dhe kjo është parë qartazi viteve të fundit kur sipërfaqe të mëdha në breg të detit janë përfshirë nga zjarret.

Shkaku fillestar mund të jetë njerëzor, por temperaturat më të larta shumëfishojnë pasojat. Sa më gjatë të zgjasë i nxehti, aq më shumë zjarret kalojnë nga episode sezonale në një rrezik ekonomik të përsëritur ccdo vit.

El Niño nuk është i vetmi shkaktar

“El Niño dhe ndryshimet klimatike janë dy procese të ndryshme që veprojnë njëkohësisht”, thotë Gjoni. El Niño është një fenomen natyror, ciklik dhe i përkohshëm, i cili ndikon te variabiliteti i klimës nga një vit në tjetrin. Ndryshimet klimatike përfaqësojnë një prirje afatgjatë të rritjes së temperaturave, të lidhur kryesisht me shtimin e gazeve serrë në atmosferë.

“Temperaturat e larta që po regjistrohen nuk mund t’i atribuohen vetëm El Niño-s”, thotë ekspertja.

“Ai mund ta përforcojë përkohësisht ngrohjen, por vepron mbi një klimë që tashmë po ngrohet”.

Edhe parashikimet janë më të sigurta për temperaturat sesa për reshjet. Temperaturat pritet të mbeten mbi mesataret shumëvjeçare gjatë muajve në vijim, ndërsa për reshjet nuk ka një sinjal të qartë nëse do të jenë mbi apo nën normalen. Ato mund të mbeten të pabarabarta në kohë dhe territor.

Kjo pasiguri ka koston e vet. Kompanitë energjetike duhet të sigurojnë importe përpara se të dinë me saktësi si do të ndryshojnë prurjet. Fermerët duhet të investojnë në ujitje, edhe pse prodhimi mund të goditet më pas nga breshëri. Bashkitë duhet të përgatiten njëkohësisht për mungesë uji, zjarre dhe përmbytje të shpejta.

El Niño mund të kalojë. Ekspozimi ekonomik i vendit ndaj nxehtësisë dhe motit ekstrem do të mbetet. Në fund, fatura nuk matet vetëm me gradë Celsius. Ajo shfaqet në milionë euro importe energjie, në prodhimin e humbur në ara dhe në perimet që kushtojnë më shumë në treg.

Çfarë është El Niño

El Niño është një fenomen natyror që ndodh kur ujërat e Paqësorit tropikal ngrohen më shumë se zakonisht. Kjo ngrohje ndryshon erërat dhe reshjet, duke ndikuar motin në shumë pjesë të botës.

Në disa vende mund të sjellë thatësirë dhe temperatura më të larta, ndërsa në të tjera reshje të forta dhe përmbytje. Në Shqipëri, ndikimi i tij është zakonisht indirekt dhe ndërthuret me kushtet atmosferike të Mesdheut dhe Europës./Monitor

The post Nga energjia te bujqësia e çmimet e larta, kostoja ekonomike e “El Niño-s”! Si e prek Shqipërinë appeared first on Albeu.com.

Të dhënat zyrtare të raportuara nga kompanitë publike të sektorit të energjisë dhe të publikuara nga Enti Rregullator i Energjisë, tregojnë se shuma totale e kamatëvonesave deri në fund të gushtit ishte 652 milionë lekë apo rreth 6.5 milionë euro.

Muaji me nivelin më të lartë të kamatëvonesave ishte gushti me 122 milionë lekë, apo rreth 1.22 milionë euro dhe pas saj vjen korriku me 850 mijë euro dhe janari me mbi 830 mijë euro.

Sa i takon numrit të faturave mujore mbi të cilat janë paguar kamatëvonesa, ato luhaten mes 300 mijë që është muaji me nivelin më të ulët që përkon me shkurtin dhe mbi 464 mijë që është muaji gusht.

Kamatëvonesat lindin në një faturë në momentin kur fatura e muajit nuk paguhet brenda afatit 30 ditor të muajit pasardhës. Pra nëse fatura është lëshuar për muajin shtator ajo mund të paguhet pa kamatë deri në fund të tetorit.

Përpos këtyre, OSHEE vijon prej vitesh që të arkëtojë edhe detyrimet e prapambetura nga konsumatorët që kanë lidhur aktmarrëveshje për shkak të borxhit të akumuluar ndër vite.

Këto aktmarrëveshje, u lidhën prej disa vitesh si për klientët familjarë dhe për biznesin dhe parashikonin shlyerjen me këste.

Deri në fund të gushtit arkëtimet totale të Furnizuesit të Shërbimit Universal që është pjesë e OSHEE Group ishin 50.7 miliardë lekë apo rreth 507 milionë euro. Pagesat e faturave brenda afatit ka rezultuar në nivelin 97.8 për qind për 8-mujorin.

Numri i konsumatorëve të lidhur në rrjetin e shpërndarjes së energjisë elektrike sipas statistikave periodike të OSHEE rezulton në 1.36 milionë ndërkohë që faturat në total me lexim konsumi në 8 muajt të këtij viti ishin 8.5 milionë./ N.Maho, Monitor

The post Energjia/ Shqiptarët paguan 6.5 mln euro si kamatëvonesa për faturat jashtë afatit appeared first on Albeu.com.

OST dhe OSSH, po ndërveprojnë ngushtësisht për të eleminuar sa më shpejtë pasojat që sjell rritja e konsumit dhe regjjimi i sforcuar i funksionimit të pajisjeve elektrike.

Konkretisht:

Linja 110kV Elbasan – Kusath u stakua për shkak të dëmtimit të transformatorit të rrymës, problem që u zgjidh menjëherë nga grupet e OST, duke zëvendësuar në kohë rekord pajisjen.

Në Bistricë, nënstacioni 110/35kV pati problem me transformarorin, duke sjellë stakim të energjisë elektrike deri në 15 minuta për dy nënstacionet e Sarandës dhe atë të Gjirokastrës.

Brigadat e OST dhe OSSH morën masa të menjëhershme për zëvendesimin e pajisjes së dëmtuar në pronësi të Kurum, dhe rikthyen në funksion të plotë sistemin e transmetimit.

Po këto ditë, konkretisht dje, pati një zjarr tek transformatori i fuqisë 110/10kV, në nënstacionin e Ibes, Tiranë. Përmes skemës unazë iu dha energji elektrike brenda një kohe të shkurtër pjesës më të madhe të zonave të prekura.

Brigadat e OSSH dhe OST kanë punuar pa ndërprerje për rivënien në punë dhe zëvendësimin e pjesëve elektrike të dëmtuara në nënstacionin e Ibës. Ky nënstacion është kycur dhe rivendosur në regjim pune sot rreth orës 11.00 të ditës së shtunë.

Situatë që kërkonte kujdes të shtuar ishte edhe stakimi i rrjetit 400kV Zemblak-Kardia, për shkak të zjarrit që ra në pjesën greke, në afërsi të nënstacionit Kardia.
Probleme pati edhe në linjën 150kV Bistricë – Mourtos.

Problemet me dy linjat e transmetimit nuk sollën stakime për konsumatorët pasi u u furnizuan nga linjat paralele.

Stafi i OST është në koordinim me OST greke për koordinimin e veprimeve të rikycjes së këtyre linjave.

Në tërësi, falë masava të mara nga OSSH dhe OST, situata aktuale e furnizimit me energji elektrike paraqitet stabël.

Kërkohet mirëkuptim në zona ku prania e zjarreve e bën të domosdoshme stakimin e energjisë elektrike për arsye sigurie.

The post Temperaturat e larta shkaktojnë probleme në sektorin e energjisë, ndërpriten dritat në disa zona të vendit appeared first on Albeu.com.

Ky incident na sjell në mendje atë që ndodhi në qershorin e vitit të shkuar në rajonin tonë, kur për 4 orë Shqipëria, Mali i Zi, Kroacia dhe Bosnja përjetuan të njëjtën gjë, edhe pse në një shkallë më të vogël.

Pak javë më parë, ka dalë raporti teknik i ngjarjes në fjalë, të cilin e konsultoi Skyweb.al.

Sipas raportit të organizatës europiane ENTSO-E, linja e Shqipërisë me Greqinë (Zemblak–Kardia), pësoi defekt për shkak të kontaktit me pemët, që ndodh kur nuk pastrohet vegjetacioni rreth linjave të tensionit të lartë.

Kjo, e kombinuar me temperaturat mbi 40°C dhe ngarkesën e madhe në rrjet nga përdorimi i kondicionerëve, çoi në një zinxhir problemesh.

Në Shqipëri, defekti çoi në shkëputjen nga rrjeti rajonal dhe në ndërprerje të energjisë në shumë zona, përfshirë edhe humbjen e një pjese të prodhimit vendas.

Pjesë të mëdha të vendit mbetën pa energji për gati 4 orë.

Skyweb.al sjell një përmbledhje të raportit:

Çfarë ndodhi saktësisht?

Në orën 12:09:16 ndodhi një avari në linjën 400 kV Podgorica 2 – Ribarevinë (në Malin e Zi).

Pas pak minutash, në orën 12:21:30, u shkaktua një defekt i ngjashëm në linjën 400 kV Zemblak – Kardia (në kufirin Shqipëri-Greqi).

Këto dy defekte çuan në një reaksion zinxhir me ndërprerje të tjera në linja të tensionit të mesëm dhe të lartë në rajon, duke shkaktuar rënien e tensionit dhe humbje të menjëhershme të ngarkesës dhe prodhimit në disa vende.

U humbën rreth 2,214 MW kapacitet prodhimi brenda pak minutash.

Pse ndodhi?

Temperaturat ekstreme (mbi 40°C) rritën ndjeshëm përdorimin e kondicionerëve, duke çuar në rritje të ngarkesës elektrike.

Linjat ishin të mbingarkuara dhe mungonte mbështetja e duhur për tensionin.

Sistemet automatike të mbrojtjes nuk funksionuan në mënyrë të koordinuar dhe u shkaktuan ndërprerje të tjera.

Kishte mungesë të vëzhgueshmërisë në kohë reale në disa pjesë të rrjetit.

Si u veprua?

Brenda pak minutash, TSO-të (Operatorët e Sistemit të Transmetimit) në rajon nisën procesin e rivendosjes.

OST (Shqipëri) nisi rikthimin e energjisë duke u lidhur me rrjetet fqinje (Greqi, Kosovë, Mal i Zi).

Procesi i rikthimit zgjati rreth 4 orë, duke përfunduar në mbrëmje.

Përfundime dhe masa të rekomanduara:

Kontroll më rigoroz i vegjetacionit afër linjave të tensionit të lartë.

Përmirësim i vëzhgimit në kohë reale të rrjetit.

Krijimi i indikatorëve të thjeshtë për të paralajmëruar lëvizjet e tensionit (kolapsin).

Rishikim i sistemeve të mbrojtjes nga mbingarkesat dhe rregullimeve automatike të tensionit në transformatorë.

Krijimi i skenarëve emergjentë të automatizuar për kompensimin reaktiv (kontrolli i tensionit).

Ky incident u klasifikua si i shkallës së tretë (më i larti)sipas metodologjisë zyrtare të ENTSO-E, për shkak të ndikimit të gjerë rajonal dhe humbjeve të mëdha të ngarkesës. /skyweb.al 

The post DEL RAPORTI/ Pse dhe si ndodhi black out-i i energjisë elektrike që futi në errësirë Shqipërinë dhe rajonin appeared first on Albeu.com.

“Energjia është një instrument gjeopolitik dhe një mall shumë i kërkuar, sidomos në kohë krizash globale. Për të realizuar ndryshime të thella në këtë sektor, kërkohet më shumë se një mandat. Në vitin 2012, çmimi i energjisë elektrike arriti kulmin e tij, ndërsa ne nisëm një reformë që zgjati një dekadë dhe arritëm të mbajmë çmimin të pandryshuar,” tha Balluku.

Ajo iu referua premtimit të kryeministrit Edi Rama për uljen e çmimit të energjisë me 20%, duke sqaruar se kjo ishte një situatë e parë nga jashtë dhe se reformat kishin për qëllim ruajtjen e stabilitetit të çmimeve.

“Në zgjedhjet e viteve 2017 dhe 2021, ne nuk e kemi përdorur sektorin energjetik për fushatë. Kjo është një qasje që na dallon nga opozita, e cila ka nxitur pabarazi elektorale, si Sali Berisha dilte dikur dhe thoshte “mos paguani”, ndërkohë që pjesa tjetër paguante. Partia Socialiste ka treguar përgjegjësi, nuk e ka përdorur energjinë kurrë për qëllime elektorale, ne kemi ruajtur për 1 dekadë të njëjtin çmim,” përfundoi Balluku.

The post Belinda Balluku “u mbyll gojën” kritikëve: Energjinë nuk e kemi përdorur kurrë për qëllime elektorale appeared first on Albeu.com.

I ftuar në emisionin e mëngjesit eksperti i ekonomisë Fatos Çoçoli foli për kategoritë që përfitojnë, sa përfitojnë pensionistët dhe sa pritet të ulet çmimi i energjisë elektrike.

“Do jetë një ulje e përgjithshme nisur nga njoftimi i Ministrisë së Infrastrukturës dhe Energjitikës. Pra do të jetë për të gjithë familjet.

Lexo edhe : Theu rekordin Gines, ndahet nga jeta njeriu më i vjetër në botë
Uroj që nga 9.5 të shkoj në 8.5 lekë për kilovat-orë. Sipas disa përllogaritjeve kjo mund të jetë 50 milion euro në vit fitim për familjet.

Pensionistët janë përparësia numër një. Gjykoj se është mirë që për pensionistët që që prej 2015 marrin dikur te 650 lekë të reja kompensimin, të dyfishohej kjo shifër.”

Çoçoli përmendi disa arsye që çojnë në ulje të ënrgjisë në janar 2025:

Humbjet teknike dhe jo teknike ranë nga 36% në 19%;
OSHEE ka ulur tarifimin aforfe dhe shtuar arkëtimet;
KESH po mirëmenaxhon Kaskadën e Drinit;
Prodhimi i parqeve fotovoltaike të mëdha ka filluar;
Çmimi i bursave ndërkombëtare i qendrueshëm.

The post Energjia më e lirë për Shqiptarët nga Janari 2025, ja me sa do të ulet çmimi appeared first on Albeu.com.

“Ndërsa qytetarët e Kosovës paguajnë çmimin e energjisë 7.4 euro/kWh, qytetarët shqiptarë paguajnë 11.1 euro/kWh. Kjo është pasojë direkte e mungesës së transparencës dhe abuzimeve në procesin e shitblerjes së energjisë dhe shmangies së detyrimit për të përdorur Bursën e Energjisë, që sjellin pasoja të rënda financiare për buxhetin e shtetit, sepse energjinë e blejmë shtrenjtë dhe e shesim lirë. Kjo është kriminale dhe përgjegjësi e drejtpërdrejt e ministres Belinda Balluku”, deklaroi Bardhi.

Ai kërkoi që kjo skemë të cilën e cilëson si kriminale të zbardhet dhe ndëshkohet nga SPAK. “Çdo vonesë apo mosveprim rëndon mbi xhepat e qytetarëve të varfër shqiptarë, që u shtohet çdo ditë kosto e jetesës për shkak të babëzisë për të vjedhur çdo gjë dhe kudo”, theksoi ai.

The post Bardhi: Shqipëria me çmimin më të lartë të energjisë elektrike në rajon appeared first on Albeu.com.

“Kam ndjenjën se ky dimër do të jetë mjaft sfidues jo për shkak të temperaturave, por për shkak të situatës që po ndodh në Ukrainë ku sistemi elektrik është shkatërruar plotësisht dhe Ukraina po merr energji nga Evropa që do të thotë se do të rrisë çmimin e energjisë elektrike në bursat e Evropës dhe do ta zvogëlojë sasinë, prandaj ne duhet të jemi të gatshëm”, theksoi Mickoski, duke shtuar se pret krizë energjetike në njëfarë kuptimi në Evropë.

Mickoski siguron se puna në SHA EMV është normalizuar edhe pse kompania ka trashëguar borxh prej pesë miliardë denarë dhe paralajmëroi se shumë shpejtë do të ketë përgjegjësi për ata që e lanë kompaninë në situatë të tillë.

“Të jeni të sigurt se është normalizuar puna e kompanisë dhe do të ketë përgjegjësi për atë se çka ka ndodhur, por nga kjo nuk do të bëjmë estradë dhe teatër.

Shumë shpejt prej sot do të theksohen personat të cilët janë fajtorë për situatën në të cilën është lënë kompania”, tha Mickoski.

Sipas informacioneve të cilat i disponon, tha se borxhi për import të qymyrit është rreth një miliardë e gjysmë dhe se pas bisedimeve të bëra me kompanitë ka pasur ulje të faturave përafërsisht prej pesë milionë euro, përderisa në bazë të gërmimit të thëngjillit janë gjetur borxhe prej dy miliardë denarë.

Hidrologjia, siç theksoi, është gati e zbrazët gjegjësisht diku në 24-25 për qind, ndërsa nuk janë bërë as remontet e rregullta.

Lidhur me deklaratën e kryetares së Organizatës së Punëdhënësve të Maqedonisë, Vlladanka Trajkoska se kishin pritje të larta, por se në 100 ditët e para të punës së Qeverisë nuk është bërë asgjë, kryeministri tha se ishte i befasuar nga deklarata e tillë.

“Edhe unë u befasova dhe iu lajmërova disa biznesmenëve dhe odave dhe ata kanë qëndrim të kundërt.

Është mirë që t’i pyesni odat ekonomike të tu japin qëndrim, ndërsa është mirë të pyesni edhe pse kryetarja e OPM-së kishte qëndrim të tillë pa e konsultuar asnjërin nga punëdhënësit”, tha Mickoski.

Kryetarja e OPM të martën deklaroi se kanë pritur që Qeveria të kuptojë problemet e tyre me të cilat përballen gjatë punës siç janë rritja e prodhimtarisë, mungesa e fuqisë së punës dhe infrastruktura.

“Ajo që prisnim ishin pritshmëri shumë të mëdha, por nuk morëm pothuajse asgjë. Prisnim që kjo Qeveri të kuptonte biznesin, për të gjitha ato kriza që po përballemi, por ajo që u fol në periudhën e kaluar ishte vetëm rritja e pagave të administratës publike, marrja e kredive për komunat, anashkalimi i problemeve me të cilat përballet ekonomia në fushën e produktivitetit dhe mungesës së fuqisë punëtore, që do të thotë me një fjalë asgjë”, deklaroi Trajkoska.

The post Kryeministri i RMV-së, Mickoski: Ky dimër do të jetë sfidues në planin energjetik, shkak lufta në Ukrainë appeared first on Albeu.com.

“Jemi përballur me një situatë kritike pak orë më parë sa i përket sistemit të transmetimit të energjisë elektrike në vendin tonë.

Duke nisur nga linja e interkonjeksionit midis Shqipërisë dhe Greqisë e cila pati një avari e më pas me efekt kaskadë në të gjithë vendin ka pasur shkëputje të energjisë.

Nga analiza e parë rezulton se volumet e mëdha në sistemin e transmetimit në këto moment por edhe temperaturat e larta në nivele rekord kanë krijuar këtë problematikë teknike”, deklaroi Balluku.

Nga ana tjetër, Balluku tha se ishte informuar nga operatorët e tjerë të transmetimit në rajonin tonë se e njëjta situatë ka ndodhur edhe në Malin e Zi dhe pjesërisht në Kroaci dhe në Bosnjë Hercegovinë.

“Duhet thënë se nga puna e mirë që është bërë në terren nga të gjithë specialistët, inxhinierët, teknikët e OST-së kemi arritur të rikuperojmë të gjithë shpërndarjen e energjisë elektrike përmes linjave të transmetimit në rang vendi brenda 30 minutash, ndërkohë që Tirana është rikuperuar në vetëm 17 minuta”, u shpreh ajo.

Pavarësisht se tashmë i gjithë vendi furnizohet me energji elektrike, u shpreh Balluku, duhet thënë se vazhdojmë të jemi në një zonë rrezikshmërie të lartë, pasi volumet e transmetimit në linjat e interkonjeksionit janë shumë të mëdha në këto momente dhe nga ana tjetër temperaturat do të jenë të tilla, në nivele rekord edhe në ditët në vazhdim.

“Duhet thënë se jemi në komunikim të vazhdueshëm me të gjithë operatorët e tjerë të transmetimit në rajon për të bashkërenduar punën me ta dhe sigurisht do të vazhdojmë që të bëjmë analizën e duhur teknike për të gjetur problematikën dhe për ta mbajtur rrjetin të sigurt”, u shpreh ajo.

https://fb.watch/sRhC2EiQDO/

The post Balluku: Rikthimi i energjisë në kohë rekord, ndërprerja nga ngarkesa dhe temperaturat e larta appeared first on Albeu.com.

Sipas ministrisë, shkak i shkëputjes kanë qenë volumet e larta të transmetimit dhe temperaturat ekstreme.

“Defekti ka filluar nga linja e interkoneksionit me Greqinë dhe më pas ka vazhduar me efekt kaskadë në të gjithë vendin. Është identifikuar defekt edhe në linjën e Prizrenit.

Nga kqyrja fillestare rezulton se volumet e larta të transmetimit si dhe temperaturat ekstreme kane qenë shkaktarët e shkëputjes totale të linjave të transmetimit. OST po merr masa për rikthimin e energjisë elektrike te të gjithë konsumatorëve.”, thuhet në njoftim.

The post Shqipëria pa energji elektrike, ministria: Defekti filloi nga linja e interkoneksionit me Greqinë appeared first on Albeu.com.