Deri në vitin 2030, energjia elektrike e gjelbër duhet të përfaqësojë 42.5% të konsumit të energjisë, krahasuar me 32% deri tani.

Parlamentarët e mbledhur në Strasburg ranë dakord që deri në vitin 2030, pjesa e energjive të ripërtëritshme të përfaqësojë 42.5 për qind të konsumit të përgjithshëm. Sipas ligjit të ri, centralet me panele diellore ose me turbinat me erë duhet të autorizohen shumë më shpejt.

Në të ashtuquajturat zona prioritare, autoritetet duhet të autorizojnë instalime të reja brenda një viti. Jashtë këtyre zonave, procedurat nuk mund të zgjasin më shumë se 24 muaj. Në mungesë të një përgjigjeje nga autoritetet, një investim në energjinë e gjelbër në një zonë prioritare do të konsiderohet drejtpërdrejt i miratuar.

“Direktiva e Energjisë së Ripërtëritshme tregon se Brukseli mund të jetë gjithashtu pragmatik dhe jo burokratik,” tha raportuesi Markus Pieper (PPE), përgjegjës për ligjin në Parlament. Zëdhënësi i klimës i të Gjelbërve në Parlamentin Evropian, Michael Bloss, foli për një “revolucion”. “Ne po çlirojmë kështu energjitë e ripërtëritshme nga zinxhirët e burokracisë.”

Deri tani, objektivi i BE-së për pjesën e energjisë së ripërtëritshme deri në vitin 2030 ishte 32 për qind. Aktualisht, pjesa e energjisë së ripërtëritshme në konsumin e energjisë së Bashkimit Evropian është rreth 22 për qind. Në Gjermani, kjo përqindje ishte 20.4% vitin e kaluar, sipas të dhënave të Zyrës Federale për Mjedisin.

Në Parlamentin Evropian, 470 eurodeputetë votuan pro rritjes së zhvillimit deri në vitin 2030, me 120 vota kundër dhe 40 abstenime. Vendet anëtare të BE ende duhet ta miratojnë projektin. Por kjo konsiderohet si një formalitet.

Ndryshimi i ligjit është pjesë e paketës së BE për mbrojtjen e klimës, e cila synon të reduktojë emetimet e gazeve serrë me të paktën 55 për qind deri në vitin 2030 krahasuar me 1990.

The post PE voton për përdorimin e shpejtë të energjive të ripërtëritshme appeared first on Albeu.com.

Kjo marrëveshje e përkohshme politike synon ta rrisë përqindjen e burimeve së ripërtëritshme të energjisë, si era dhe dielli, në 42.5 për qind, nga 22 për qind që është aktualisht.

Marrëveshja u bë e ditur përmes një deklarate të Këshillit të BE-së, e cila përfaqëson qeveritë kombëtare të bllokut.

Më herët, BE-ja kishte synuar që deri në vitin 2030 të mbulonte 32 për qind të konsumit të përgjithshëm të energjisë përmes burimeve të ripërtëritshme.

BE-ja ka vendosur këtë synim ambicioz pasi mësyn të bëhet një ekonomi “neutrale klimatike” deri në vitin 2050, përmes uljes së emetimeve neto të gazrave serrë në zero.

Aktualisht ka dallime të mëdha mes vendeve anëtare të BE-së në nivelin e përdorimit të burimeve të ripërtëritshme të energjisë. Suedia kryeson 26 vendet anëtare me 63 për qind të konsumit të mbuluar nga burimet e ripërtëritshme. Ndërsa, në Luksemburg, Maltë, Holandë dhe Irlandë, burimet e ripërtëritshme mbulojnë vetëm më pak se 13 për qind të konsumit.

Kjo marrëveshje vjen gjithashtu pasi BE-ja ka tentuar të ulë varësinë e saj nga karburantet fosile ruse pasi Moska ndërpreu furnizimet me gaz vitin e kaluar dhe blloku vendosi kufizime për naftën e papërpunuar dhe produktet e tjera të naftës nga Rusia.

Për t’i arritur këto synime, BE-ja do të duhet të bëjë investime të mëdha në prodhimin e energjisë nga era dhe dielli, si dhe të shtojë prodhimin e gazrave të rinovueshme dhe ta përforcojë rrjetin e energjisë në Evropë.

Komisioni Evropian ka thënë se deri në vitin 2030 do të nevojiten investime shtesë prej 113 miliardë eurosh në energjinë e ripërtëritshme dhe infrastrukturën e hidrogjenit, nëse vendet e BE-së duan t’i japin fund varësisë së tyre nga karburantet fosile ruse.

Marrëveshja duhet të miratohet nga Parlamenti i BE-së dhe vendet e BE-së për t’u bërë ligj, por kjo procedure është zakonisht një formalitet.

The post BE-ja arrin marrëveshje ambicioze për energji të ripërtëritshme appeared first on Albeu.com.