Emir Sahiti do ta vijojë karrierën te Hannover 96, pasi është larguar nga Hamburger SV për t’iu bashkuar ekipit që militon në Bundesliga 2. Sulmuesi anësor i Kombëtares së Kosovës ka gjetur kështu destinacionin e tij të ri.

Transferimi i 27-vjeçarit te Hannover 96 u konfirmua gjatë ditës së sotme. Sahiti është larguar nga HSV një vit para skadimit të kontratës.

Futbollisti kosovar iu bashkua klubit nga Hamburgu në vitin 2024, pas transferimit nga Hajduk Split. Në radhët e skuadrës gjermane ai regjistroi 26 paraqitje, me tre gola dhe dy asistime.

Në pjesën e dytë të sezonit të kaluar, Sahiti luajti si i huazuar te Maccabi Tel Aviv. Pas rikthimit në Hamburg, të dyja palët vendosën që ai të niste një eksperiencë të re.

Gjatë periudhës së tij te Hajduk Split, para kalimit në Gjermani, Sahiti grumbulloi 121 ndeshje në të gjitha kompeticionet. Në këto takime, ai shënoi 18 gola dhe dha 16 asistime.

Me transferimin te Hannover 96, 27-vjeçari mbetet pjesë e futbollit gjerman dhe synon të fitojë një rol të rëndësishëm në ekipin e tij të ri.

The post Zyrtare: Emir Sahiti bëhet lojtar i Hannover 96 appeared first on Albeu.com.