Sot, në mjediset e “Shtëpisë së Futbollit”, u realizua tërheqja e shortit për sezonin 2026/2027 të kategorisë “Abissnet Superiore”. Aktiviteti i thirrur nga Federata Shqiptare e Futbollit mblodhi bashkë delegatë të klubeve pjesëmarrëse dhe gazetarë të shumtë.

Menjëherë pas përcaktimit të kalendarit, reagimet erdhën nga disa prej figurave drejtuese të ekipeve. Mes tyre ishin Elton Guranjaku nga Elbasani, Xhevdet Zekaj përfaqësues i Egnatias, Bazjon Tragaj i Vorës, Luan Pinari nga Dinamo si dhe trajneri i Tiranës, Dean Klafuric, të cilët ndanë përshtypjet e tyre rreth shortit.

Trajneri i Tiranës, Dean Klafuric: Shorti ka gjithmonë një natyrë të paparashikueshme dhe është diçka jashtë kontrollit tonë. Megjithatë jemi të kënaqur. Dy takimet e para do t’i zhvillojmë si mysafirë, duke u përballur në start me Egnatian, e cila aktualisht mban titullin kampion. Sigurisht që për ne është një sfidë e vërtetë. Ne do të përgatitemi maksimalisht për fillimin e kampionatit. Egnatia, siç e përmenda, triumfoi në kampionat dhe tani po luan në raundet kualifikuese të Champions League. Të mërkurën do ta ndjekim me vëmendje. Ka një anë pozitive që mund t’i shohim në një kompeticion ndërkombëtar, përpara se të ndeshemi me ta. Jam jashtëzakonisht i lumtur që do të jem trajner i Tiranës në kampionatin shqiptar, ky është klubi më i suksesshëm në vend. Për mua është një mundësi e artë dhe mezi pres të mësoj më shumë për Shqipërinë.

Drejtori i Dinamos, Luan Pinari: Siç dihet, me formatin me 10 skuadra, përballjet me kundërshtarët vijnë shumë shpejt. Mund ta konsiderojmë një short pozitiv, pasi e hapim sezonin në fushën tonë, gjë që mund të na japë një avantazh të lehtë psikologjik në startin e garës. Dinamo do të synojë të jetë gjithmonë aty, në grupin e skuadrave që pretendojnë kreun dhe që luftojnë për objektivat më të larta. Këtë vit do të shohim një Dinamo më të pjekur, që e di shumë mirë çfarë dëshiron. Me përforcimet e bëra, Dinamo paraqitet si një rivale e denjë për të synuar kulmin e futbollit shqiptar.

Drejtori i Vorës, Bazjon Tragaj: Shpresonim ta nisnim sezonin me një ndeshje në shtëpi, por shorti rezultoi disi i vështirë. Na përballë me dy kundërshtarë shumë të fortë si Dinamo dhe Egnatia, të cilat e kanë nisur përgatitjet shumë më përpara nesh. Gjithsesi, ne jemi shumë të motivuar. E dëshmuam sezonin e kaluar që jemi gati, tani le të presim dhe shpresojmë që çdo gjë të na ecë mbarë këtë vit. Objektivi ynë fillestar është të sigurojmë qëndrimin në Superiore, ndërsa me afrimet e reja që i janë shtuar ekipit, synojmë të arrijmë diçka më shumë.

Zyrtari i Egnatias, Xhevdet Zekaj: Mbrojtja e titullit është gjithmonë më e ndërlikuar sesa fitimi i tij. Egnatia ka treguar seriozitet maksimal në çdo veprim deri tani. Pavarësisht se disa lojtarë janë larguar, elementët e rinj që kanë mbërritur janë të një niveli edhe më të lartë se ata që ikën. Kjo dëshmon qartë përkushtimin e zotit Demrozi dhe zotit Zenelaj për të krijuar një skuadër dinjitoze. Qëllimi ynë mbetet i njëjtë: të synojmë fazat e grupeve të kompeticioneve evropiane dhe titullin kampion. Nuk e mbajmë aspak të fshehtë, objektivi ynë kryesor është sërish triumfi në kampionat.

Drejtori i Elbasanit, Elton Guranjaku: Tani që shorti ra, dihet që kushtet janë të barabarta për të gjithë, pasi do të ndeshesh me çdo kundërshtar. Fillimin e kemi kundër Laçit në një transfertë që dihet se është e vështirë, një klub me histori në kampionatin shqiptar. Megjithatë, besoj se do të jetë një sezon tërheqës, me shumë sfida interesante. Ne e kemi filluar stërvitjen që në 10 qershor, pra kemi një periudhë të gjatë përgatitore. Momentalisht jemi duke luajtur në kompeticionet evropiane dhe kjo na jep një avantazh për nisjen e kampionatit, pasi do të paraqitemi më gati se rivalët tanë. Ne i vlerësojmë njëlloj të gjitha skuadrat, çdo ndeshje e marrim me radhë. Shorti është vërtet interesant. Na gëzon fakti që numri i takimeve këtë sezon ulet, por sidoqoftë i jemi gati gjithçkaje. Të gjithë kundërshtarët i shohim me respektin më të madh.

The post Reagimet e para pas shortit të Superiores: Klafuric, Pinari dhe drejtuesit e tjerë zbulojnë planet dhe ambiciet për sezonin e ri appeared first on Albeu.com.

Elbasani është në prag të sfidës së parë europiane, teksa në Conference League do të përballet me BATE Borisov. Takimi do të zhvillohet në stadiumin “Elbasan Arena”, të mërkurën në orën 20:09, në një ndeshje të rëndësishme për nënkampionët e Superiores, të cilët synojnë të nxjerrin maksimumin për një rezultat pozitiv përpara duelit të kthimit që do të luhet në Bjellorusi.

Në prag të kësaj përballjeje të veçantë, që shënon edhe kthimin e skuadrës pas 20 vitesh në arenën europiane, drejtori sportiv i verdhebluve, Elton Guranjaku, ka folur ekskluzivisht për “Newsport.al”. Ai është ndalur te objektivat e ekipit në këtë aventurë, situata brenda grupit dhe projektet për sezonin e ri në “Abissnet Superiore”.

Lidhur me gjendjen aktuale të skuadrës pas fazës përgatitore, Guranjaku theksoi se ekipi e ka përfunduar këtë mini-periudhë pune dhe është gati për ndeshjen ndaj BATE. Sipas tij, stafi ka bërë një punë të mirë, pavarësisht vështirësive që kanë ardhur nga ndryshimet e shumta në përbërje, dhe ai beson se skuadra do të jetë gati të martën në mbrëmje.

Për pritshmëritë nga kjo sfidë, drejtori sportiv u shpreh se ato janë të mëdha, pasi vetë rikthimi në Europë pas 20 vitesh për qytetin përbën një emocion të veçantë. Ai sqaroi se trajneri nuk është fokusuar vetëm te kthimi i futbollistëve në formën më të mirë fizike, por edhe te harmonizimi i grupit, që sipas tij mbetet pjesa më e vështirë në një kohë kaq të kufizuar përgatitjesh.

Sa i takon momentit jo të mirë të BATE Borisov, që vjen pas 12 ndeshjeve pa fitore, Guranjaku tha se Elbasani do të japë maksimumin në fushë. Megjithatë, ai nënvizoi se verdheblutë nuk kanë eksperiencë në këto nivele, pasi janë rikthyer në Superligë vetëm dy vite më parë, ndaj nuk e konsideron një shans të artë përballjen me një emër si BATE Borisov, pavarësisht formës së dobët të rivalit.

Guranjaku bëri të ditur gjithashtu se kundërshtari është analizuar. Ai vuri në dukje se BATE po luan javën e 14-të të kampionatit të vet dhe se stafi elbasanas ka parë ndeshjet e fundit të skuadrës bjelloruse. Sipas tij, avantazhi më i madh i kundërshtarit lidhet me ritmin dhe intensitetin e lartë, pasi ndodhet në kulmin e sezonit. Ai shtoi se fizikisht është një skuadër që vrapon shumë dhe që di si të administrojë ndeshje të tilla, por Elbasani ka marrë masat e veta dhe shpreson që ato të japin efekt në fund.

Duke u ndalur te merkatoja, ai pranoi se afrimet janë përqendruar kryesisht në repartin ofensiv, ndërsa largimet e shumta kanë sjellë edhe shqetësim te tifozët. Guranjaku u shpreh se forca e skuadrës në sezonin e kaluar ishte ruajtja e të njëjtit grup për dy vite. Sipas tij, ndryshimet e shumta nuk i bëjnë mirë ekipit, por klubi ka një buxhet të kufizuar dhe nuk mund të dalë jashtë tij. Ai shpjegoi se është e vështirë të negociohet me lojtarë që kërkojnë 3/4 herë më shumë se sa përfitonin më parë, ndërsa theksoi se në ekip kanë ardhur futbollistë që ai personalisht i vlerëson cilësorë. Problemi i vetëm, sipas tij, ka qenë koha e shkurtër në dispozicion për përgatitjen e kësaj ndeshjeje.

Në lidhje me sezonin e ri në Superiore dhe formatin e ri të kampionatit, Guranjaku u shpreh se, edhe pse forma ka ndryshuar, në fund çdo ndeshje vlen për 3 pikë. Ai tha se është kurioz të shohë se si do të funksionojë ky format, por nënvizoi se ai është i njëjtë për të gjithë dhe nuk sjell diferenca. Duke folur për objektivat, ai theksoi se të bësh më mirë se sezoni i kaluar do të thotë të shpallesh kampion, pasi Elbasani e humbi titullin vetëm për shkak të golavarazhit më të dobët. Gjithsesi, ai shtoi se fillimisht synimi është të ndërtohet edhe një herë skuadra, çka nuk është e lehtë, e më pas të shihet se si do të ecin gjërat.

Për rivalët në sezonin e ardhshëm, drejtori sportiv deklaroi se për Elbasanin të gjithë janë rivalë. Ai vlerësoi se shumë skuadra po investojnë dhe se kampionati i ardhshëm do të jetë edhe më i vështirë se ai i kaluar. Megjithatë, sipas tij, duke parë investimet, Egnatia duket një hap përpara skuadrave të tjera.

/Ermal SPAHIU/

The post Elton Guranjaku: Elbasani është gati për BATE Borisov, kemi bërë përgatitjet tona! Në Superiore, Egnatia duket një hap para appeared first on Albeu.com.