Me një gol dhe një asistim, Arbër Zeneli ishte vendimtar në triumfin 1-2 të Elfsborgut ndaj Malmos.

Reprezentuesi i Kosovës kishte qëndruar në stol në dy ndeshjet e mëparshme, por sapo iu dha mundësia tregoi cilësitë e tij, duke realizuar një supergol dhe duke dhënë një asistim.

Pas kësaj paraqitjeje, Zeneli tha se çdo lojtar mërzitet kur nuk aktivizohet. Megjithatë, ai nënvizoi se, si profesionist, synon të përgjigjet me kontributin e tij në fushë dhe jo përmes ankesave.

“Është normale që të gjithë futbollistët të nervozohen kur nuk luajnë. Unë përpiqem të sillem si profesionist dhe ta ndihmoj ekipin sa herë që futem në lojë. Këtë herë e mora mundësinë dhe shpresoj t’i tregoj Bjorn Hambergut se meritoj të vazhdoj të luaj”, u shpreh Zeneli.

Ai e vlerësoi pozitivisht edhe faktin që trajneri e kishte komplimentuar, ndërsa theksoi se ajo që bën gjatë ndeshjeve mbetet mënyra më e mirë për të dëshmuar vlerën.

“Sigurisht që është kënaqësi të dëgjosh vlerësime prej tij. Kur më jepet rasti, nuk mund të rri duke u ankuar për faktin se jam në stol. Kështu veproja kur isha më i ri. Tani kam arritur në një moshë kur duhet ta pranoj situatën dhe të përpiqem t’i tregoj trajnerit, në fushë, se e kundërta është e vërtetë”, deklaroi ai.

Zeneli konfirmoi se ka zhvilluar biseda me trajnerin, por bëri të qartë se e respekton pa rezerva vendimin e tij për përzgjedhjen e formacionit.

“A kemi folur? Natyrisht që po. Por ka raste kur fjalët nuk janë të nevojshme. Trajneri vendos për formacionin titullar që e konsideron më të mirin dhe lojtarit i mbetet ta pranojë zgjedhjen. Nuk mund të ankohem vazhdimisht apo t’i tregoj ekipit se jam i zemëruar vetëm sepse nuk luaj”, përfundoi futbollisti i Kosovës.

Kontributi me gol dhe asistim përballë Malmos mund të shënojë një kthesë për Zenelin, i cili shpreson që përmes paraqitjeve bindëse të sigurojë më shumë minuta gjatë pjesës së mbetur të sezonit.

The post Arbër Zeneli pas shkëlqimit kundër Malmos: Stolin duhet ta pranoj, jo të ankohem appeared first on Albeu.com.

IF Elfsborg triumfoi 2:1 në transfertë ndaj Malmö FF të dielën pasdite, me futbollistin kosovar Arbër Zeneli që mori rolin kryesor në këtë fitore.

Në takimin e vlefshëm për xhiron e 14-të të elitës së futbollit suedez, reprezentuesi i Kosovës kontribuoi me një gol dhe një asistim.

Zeneli e zhbllokoi rezultatin që në minutën e pestë, kur realizoi për epërsinë 1:0 të Elfsborgut dhe i dha skuadrës së tij avantazhin e hershëm.

Kontributi i tij vazhdoi edhe në minutën e 34-t, kur përgatiti golin që vulosi fitoren 2:1 të ekipit suedez.

Sulmuesi anësor qëndroi në fushë deri në minutën e 76-të. Për performancën e treguar, “SofaScore” e vlerësoi me notën 7.9, duke e renditur mes futbollistëve më të mirë të ndeshjes.

Dion Krasniqi, futbollisti tjetër kosovar në radhët e Elfsborgut, e përcolli të gjithë takimin nga stoli i rezervistëve.

Pas këtij rezultati, Elfsborgu numëron 21 pikë në 15 ndeshje dhe gjendet aktualisht në vendin e gjashtë të tabelës së Allsvenskan.

Zeneli ka zhvilluar deri tani një sezon pozitiv në kampionatin suedez, ku ka grumbulluar katër gola dhe dy asistime, duke u shndërruar në një prej lojtarëve kyç të skuadrës.

The post Arbër Zeneli vendimtar kundër Malmos, shënon dhe asiston në triumfin e Elfsborgut appeared first on Albeu.com.