Në kuadër të shënimit të 20-vjetorit të krijimit të saj, Agjencia për Parandalimin e Korrupsionit (APK) do të bëjë të enjten lansimin e modulit elektronik të trajnimit për konfliktin e interesit dhe etikën.

Moduli është hartuar përmes bashkëpunimit të APK-së me Institutin e Kosovës për Administratë Publike (IKAP), me përkrahjen e partnerëve ndërkombëtarë. Ai ka për qëllim forcimin e njohurive dhe kapaciteteve të zyrtarëve publikë lidhur me konfliktin e interesit dhe etikën.

Pas prezantimit të modulit, do të organizohet një panel diskutimi ku do të marrin pjesë përfaqësues të institucioneve publike, shoqërisë civile dhe partnerëve. Në fokus të diskutimit do të jenë edukimi i vazhdueshëm, zhvillimi i kapaciteteve profesionale dhe përforcimi i kulturës së integritetit në administratën publike.

Aktiviteti është pjesë e ngjarjeve kryesore të “Javës së Agjencisë”, e cila organizohet për të shënuar 20-vjetorin e themelimit të Agjencisë për Parandalimin e Korrupsionit.

The post APK prezanton të enjten modulin online për etikën dhe konfliktin e interesit appeared first on Albeu.com.

Administrata Tatimore e Kosovës (ATK) ka bërë publik versionin e ri të Sistemit Elektronik “EDI”, në kuadër të të cilit është shtuar edhe një shërbim i ri elektronik me emrin “Kërkesë për Fiskalizim”, i qasshëm përmes lidhjes: https://www.atk-ks.org/njoftim-per-tatimpagues-publikohet-versioni-i-ri-i-sistemit-elektronik-edi/

Sipas ATK-së, ky funksionalitet i ri është vënë në zbatim në përputhje me Udhëzimin Administrativ (MF) Nr. 01/2026 për Shfrytëzimin e Pajisjeve Elektronike Fiskale, Sistemeve Fiskale dhe Softuerëve Elektronikë Fiskalë, me synimin që tatimpaguesit të pajisen me Kodin Unik për Fiskalizim, i cili kërkohet për përdorimin e Softuerit Elektronik Fiskal (SEF).

Nëpërmjet këtij shërbimi mund të paraqesin kërkesë tatimpaguesit që do të nisin përdorimin e SEF-it, por edhe ata që ndodhen në fazën e kalimit nga Pajisjet Elektronike Fiskale (PEF) në Softuerin Elektronik Fiskal.

Në njoftimin drejtuar bizneseve thuhet: “Përmes shërbimit “Kërkesë për Fiskalizim” mund të aplikojnë: tatimpaguesit që do të fillojnë përdorimin e Softuerit Elektronik Fiskal (SEF); tatimpaguesit që janë në proces të kalimit nga Pajisjet Elektronike Fiskale (PEF) në Softuerin Elektronik Fiskal (SEF)”.

Ky shërbim mund të gjendet në Sistemin Elektronik EDI, te menyja “Fiskalizimi”, duke zgjedhur opsionin “Kërkesë për Fiskalizim”.

ATK ka sqaruar se tatimpaguesve që tashmë janë pajisur me Kodin Unik për Fiskalizim, ky kod do t’u shfaqet në sistem, ndërsa ata që ende nuk e posedojnë do të kenë mundësi ta paraqesin kërkesën elektronikisht përmes shërbimit të saposhtuar.

Administrata Tatimore u ka bërë thirrje të gjithë tatimpaguesve që planifikojnë të përdorin Softuerin Elektronik Fiskal, si edhe atyre që po kalojnë nga PEF në SEF, që të kontrollojnë statusin e tyre në Sistemin Elektronik EDI dhe, kur të jetë e nevojshme, të aplikojnë për pajisjen me Kodin Unik për Fiskalizim.

Sipas ATK-së, hedhja në përdorim e këtij versioni të ri të EDI-së është pjesë e përpjekjeve për digjitalizimin e proceseve tatimore dhe për ofrimin e shërbimeve më moderne, më efikase dhe më të qasshme për tatimpaguesit.

The post ATK nxjerr versionin e përditësuar të EDI-së, aktivizohet shërbimi “Kërkesë për Fiskalizim” appeared first on Albeu.com.

Sipas të dhënave të siguruara, në qendrën e votimit nr. 1558, ZAZ 27, janë regjistruar 1,000 zgjedhës, ndërsa kanë votuar 138 qytetarë, çka përbën një pjesëmarrje prej 13.8%. Nuk është regjistruar asnjë votë e pavlefshme.

Partia Socialiste është renditur e para, me 98 vota të marra. Kandidati më i votuar i PS në këtë zonë është Blendi Gonxhja me 53 vota.

Koalicioni “Aleanca për Shqipërinë Madhështore” ka siguruar 31 vota.

Partia Mundësia ka marrë 4 vota. Ndërkohë, Lëvizja Bashkë, ka marrë vetëm 1 votë, dhe “Nisma Shqipëria Bëhet”, ka marrë tre vota.

Ndërkohë që procesi i numërimit në Vorë ka vijuar me kutinë e dytë të hapur, në qendrën e votimit 2037/1 në Domje.

Sipas të dhënave zyrtare, në këtë qendër PD-ASHm ka marrë 42 vota, ndërsa Partia Socialiste është renditur e para me 124 vota, me Blendi Gonxhen që kryeson me 75 vota.

Nisma Shqipëria Bëhet ka marrë 1 votë, Partia Mundësia 4 vota, Partia Aleanca Kombëtare Shqiptare 2 vota dhe PSD 5 vota.

The post Numërimi elektronik në Vorë, ja si janë rezultatet e kutive të para appeared first on Albeu.com.

Partia Demokratike thekson se votimi dhe numërimi elektronik është një projekt i propozuar fillimisht prej saj që në vitin 2012. Sipas dokumentit, kjo nismë, edhe pse pati miratim të gjerë në Komisionin e Reformës Zgjedhore të asaj kohe, u pengua nga Partia Socialiste, e cila atëherë ishte në opozitë. PD thekson se në platformën e saj të vitit 2016, për zgjedhje të lira dhe të ndershme, vendosi përsëri prioritet votimin elektronik, duke e konsideruar si një hap të rëndësishëm për përmirësimin e procesit zgjedhor dhe arritjen e standardeve ndërkombëtare.

Megjithatë, përpjekjet për zbatimin e plotë të votimit elektronik nuk u realizuan as në zgjedhjet e vitit 2021 dhe as në ato të vitit 2023, ku teknologjia u përdor vetëm në disa njësi administrative si Njësia Nr. 10 në Tiranë, si dhe në Bashkitë Elbasan dhe Kamëz. PD argumenton se, ndonëse votimi elektronik solli disa avantazhe, ai po ashtu u shoqërua me një sërë problematikash që cenonin rëndë integritetin e procesit.

Sipas dokumentit të publikuar nga PD, një nga problemet më të mëdha të votimit elektronik ishte manipulimi i procesit nga operatorët e sistemit. Në disa raste, operatorët e makinerive të votimit kanë votuar në emër të qytetarëve që nuk ishin fizikisht të pranishëm, duke shkelur ligjin dhe duke kryer veprime të dënueshme sipas Kodit Zgjedhor. Pamjet filmike që dëshmojnë këto shkelje, sipas PD, ende nuk janë hetuar nga KQZ-ja apo organet e drejtësisë, duke lënë të paadresuara shqetësimet mbi këtë çështje të rëndësishme.

Një tjetër problem i rëndësishëm i evidentuar nga PD është mungesa e garancive për verifikimin dhe anulimin e votës nga zgjedhësit. Mekanizmat për të garantuar transparencë dhe verifikim të thelluar të votës kanë qenë të pamjaftueshëm, duke minuar kështu besimin e publikut dhe partive politike në këtë proces.

Në përgjigjen e saj zyrtare, PD argumenton se votimi elektronik nuk duhet të shtrihet në zgjedhjet e vitit 2025, duke përmendur si arsye kryesore mungesën e transparencës për çështjet e pazgjidhura të zgjedhjeve të mëparshme dhe kohën e pamjaftueshme për të përmirësuar sistemin. Partia Demokratike thekson se pa një adresim të plotë dhe të drejtë të problematikave të identifikuara, zbatimi i votimit elektronik rrezikon të minojë më tej besimin e publikut në zgjedhje

“Ende nuk është bërë një transparencë e plotë lidhur me problematikat që kanë karakterizuar këtë proces në dy zgjedhjet e mëparshme,” thuhet në dokument, duke shtuar se mekanizmat efikasë për adresimin e problemeve mungojnë, ndërsa presioni i kohës për zgjedhjet e vitit 2025 është i madh.

Për këtë arsye, PD shpreh mosdakordësinë e saj për propozimin e KQZ-së për implementimin e votimit elektronik në zgjedhjet e ardhshme parlamentare.

The post DOKUMENTI/ PD: Ja përse votimi elektronik mund të rrezikojë integritetin e zgjedhjeve appeared first on Albeu.com.