Ekonomia shqiptare pritet të zgjerohet me 3.7 për qind në 2025, nga 3.8 që parashikohej në raportin e mëparshëm (shkurt 2025).

Vendet e Ballkanit Perëndimor pritet të zgjerojnë ekonomitë me një mesatare prej 3% në 2025 dhe 3.6% në 2026, ndërsa Turqia parashikohet të rritet me 3.5% në 2025 dhe 4% në 2026.

“Këto të dhëna konfirmojnë qëndrueshmërinë strukturore të rajonit përballë goditjeve të jashtme dhe nënvizojnë rëndësinë e forcimit të kërkesës së brendshme si amortizator ndaj zhvillimeve gjeopolitike dhe ekonomike ndërkombëtare”.

Ekonomitë e Europës Lindore i rezistojnë tarifave të Trump dhe ngadalësimit të Gjermanisë

Pavarësisht tensioneve globale tregtare dhe ngadalësimit industrial në Gjermani, ekonomitë e Europës Qendrore dhe Lindore po tregojnë një qëndrueshmëri të jashtëzakonshme, me projeksione të rritjes që tejkalojnë ndjeshëm ato të eurozonës.

Sipas parashikimit pranveror tarifat e reja tregtare të shpallura nga Donald Trump mund të tronditin tregjet globale, por vendet e Europës Lindore pritet të përballojnë këto goditje më lehtë.

Raporti që mbulon 23 vende nga Europa Qendrore, Lindore dhe Juglindore thekson se shumica e ekonomive të rajonit – përfshirë edhe ato anëtare të BE-së – do të ruajnë një rritje të qëndrueshme gjatë vitit 2025, edhe pse eurozona përballet me sfida të mëdha.

“Volumi i drejtpërdrejtë i tregtisë ndërmjet këtyre vendeve dhe SHBA-ve është gjithsesi i ulët, dhe dëmi dytësor i lidhur me varësinë e tyre nga industria gjermane, e cila varet shumë nga eksporti, pritet të mbetet i menaxhueshëm”, tha Richard Grieveson, zëvendësdrejtor i wiiw dhe autor kryesor i raportit.

Sipas tij, ashtu si në të kaluarën kur rajoni është goditur nga tronditje të jashtme, vendet me tregje të brendshme më të mëdha – siç është Polonia, do të jenë më të afta për të përthithur ndikimin negativ dhe për të ruajtur qëndrueshmërinë ekonomike.

Përkundër tarifave të reja tregtare të shpallura nga ish-presidenti amerikan Donald Trump dhe rënies së industrisë në Gjermani, ekonomitë e Europës Lindore, pritet të ruajnë ritme të larta rritjeje në vitin 2025, sipas raportit të fundit pranveror të Institutit të Vjenës për Studime Ekonomike Ndërkombëtare (wiiw).

Për vendet anëtare të BE-së në këtë rajon, analistët parashikojnë një rritje mesatare prej 2.5% për vitin 2025, një ulje e lehtë prej 0.3 pikë përqindje nga parashikimi i dimrit. Në vitin 2026, pritet një përmirësim i lehtë në 2.8%.

“Efektet negative të tarifave të Trump do të zbuten në masë të madhe vitin e ardhshëm falë kthesës së politikës fiskale gjermane dhe paketës prej 500 miliardë euro për mbrojtjen, infrastrukturën dhe klimën”, shpjegon Richard Grieveson, zëvendësdrejtor i wiiw.

Polonia mbetet performuesja më e fortë mes vendeve lindore anëtare të BE-së, me një rritje të pritshme prej 3.5% për 2025 dhe 2026. Pas saj renditet Kroacia me 2.8%.

Rajoni i lindjes do të ecë përpara eurozonës

Kjo qëndrueshmëri i vendos vendet lindore të BE-së përpara eurozonës, ku rritja në 2025 pritet të jetë vetëm 0.7%, ndërsa në 2026 vetëm 1.4%.

Me fjalë të tjera, vendet e BE-së në Europën Lindore do të rriten rreth tre herë më shpejt se eurozona në 2025 dhe dyfish më shpejt në 2026.

Pavarësisht sfidave të industrisë gjermane, vendet me integrim të fortë në zinxhirët industrialë të saj, si Çekia, Sllovakia, Hungaria dhe Rumania, do të ruajnë rritjen përmes një konsumi të brendshëm të fuqishëm, i ndihmuar nga rritjet reale të pagave në vitet e fundit.

E ardhmja ekonomike e Ukrainës e pasigurt dhe e varur nga ndihma e jashtme; Perspektiva ruse përmirësohet

Sipas parashikimeve të wiiw, ekonomia e Ukrainës pritet të rritet me 3% në vitin 2025 dhe 4% në 2026, por këto skenarë varen ngushtë nga mbështetja e vazhdueshme ushtarake dhe financiare nga jashtë.

Kjo mbështetje është në rrezik nëse Donald Trump rikthehet në pushtet, për shkak të qëndrimit të tij të ashpër ndaj Ukrainës.

Ndryshe nga Ukraina, Rusia po përfiton nga përmirësimi i marrëdhënieve me SHBA-në. Edhe pse rritja ekonomike pritet të përgjysmohet në 2% në 2025, kjo është një përmirësim me 0.2 pikë përqindje nga parashikimi i mëparshëm i wiiw.

Për vitin 2026, rritja parashikohet të arrijë 2.5%, një rritje e konsiderueshme prej 0.9 pikë përqindje. Rritja ekonomike, më parë e mbështetur në pagat dhe kompensimet e larta për ushtarët, mund të kompensohet nga rifillimi i marrëdhënieve me Perëndimin.

Rreziqet kryesore: Lufta tregtare dhe pasiguria

Parashikimi përballet me rreziqe të konsiderueshme në kahun negativ, të cilat burojnë nga pasiguria mes konsumatorëve dhe bizneseve, e ushqyer nga politikat tregtare të paparashikueshme të Trump dhe mundësia e përshkallëzimit të konfliktit me Kinën.

“Po përjetojmë një luftë tregtare në shkallë të plotë mes SHBA-së dhe Kinës, e cila do të ketë ndikim negativ në të gjithë ekonominë globale. Luhatshmëria e lartë në tregjet financiare mund të përshkallëzohet në një krizë financiare, e cila më pas mund të përhapet në ekonominë reale”, paralajmëron Grieveson.

“Për më tepër, ende nuk është e mundur të parashikohet realisht se si kjo pasiguri e përgjithshme do të ndikojë në konsum apo investime, edhe pse rajoni ka treguar vazhdimisht qëndrueshmëri ndaj goditjeve të jashtme”.

Politika e SHBA-së ndaj Ukrainës krijon një tjetër burim pasigurie, me pasoja të mundshme ekonomike në rast të dështimit të përpjekjeve për paqe. “Aktualisht, nuk duket se Trump do të mund të bindë presidentin rus Putin për t’i dhënë fund luftës së agresionit kundër Ukrainës. Nëse Trump më pas tërhiqet i zhgënjyer dhe e lë Ukrainën në mëshirë të fatit, kjo mund të tronditë sërish ekonominë e Europës Qendrore dhe Lindore”, paralajmëron Grieveson./Monitor

The post Instituti i Vjenës: Ekonomia shqiptare do të rritet me 3.7% në 2025 appeared first on Albeu.com.

“Sot, 95% e qytetarëve paguajnë taksa, por marrin më pak shërbime. Ndërkohë, një pakicë e privilegjuar përfiton përjashtime fiskale, koncesione dhe kontrata publike. Ky është një sistem që duhet të ndryshojë,” deklaroi Tabaku në rubrikën e saj javore.

Ajo vuri në dukje se Shqipëria ka normën më të lartë të TVSH-së në rajon (20%), ndërkohë që vendet fqinje si Serbia, Maqedonia e Veriut, Kosova dhe Mali i Zi aplikojnë norma më të ulëta dhe përjashtime për shumicën e qytetarëve, jo për një pakicë të lidhur me qeverinë.

Tabaku theksoi se ekonomia shqiptare është në rënie të vazhdueshme, me një pagë minimale prej vetëm 2.27 euro për orë dhe një tkurrje të sektorëve kryesorë si industria dhe bujqësia.

“Sektori industrial u tkurr me 30% vitin e shkuar, ndërsa eksportet bujqësore ranë me 28-29%. Kjo është një ekonomi që po vdes. Biznesi nuk investon dot, pagat nuk rriten sepse qeveria e ka shkatërruar konkurrencën me taksa të larta dhe përjashtime klienteliste,” u shpreh Tabaku.

Sipas Tabakut, Partia Demokratike ka një plan të qartë për të rikthyer drejtësinë ekonomike dhe për të vendosur qytetarët dhe shumicën në qendër të zhvillimit.

Ky plan përfshin:

* ⁠• Taksa të ulëta dhe të drejta: PD propozon një sistem të ri fiskal me një taksë të sheshtë 10% për të nxitur investimet, rritjen e pagave dhe formalizimin e ekonomisë. Kjo do të krijojë më shumë vende pune dhe do të lehtësojë barrën mbi bizneset dhe qytetarët.

TVSH më të ulët për produktet bazë: Për të ndihmuar konsumatorët dhe për të nxitur blerjet, produktet e shportës, energjia dhe shërbimet bazë do të kenë një normë më të ulët të TVSH-së, ashtu siç ndodh në vendet e rajonit.
Mbështetje për sektorët prodhues: Bujqësia dhe industria, të cilat sot po pësojnë rënie të madhe, do të mbështeten me politika fiskale të favorshme, ulje taksash dhe eliminim të burokracive që pengojnë zhvillimin e tyre.
Luftë kundër ekonomisë informale: Sot, një pjesë e madhe e ekonomisë shqiptare është e zezë për shkak të nivelit të lartë të taksave dhe përjashtimeve selektive. PD do të thjeshtojë sistemin fiskal dhe do të eliminojë përjashtimet klienteliste, duke krijuar një treg më të ndershëm dhe më konkurrues.
Frenimi i oligarkisë dhe monopolizimit të ekonomisë: Koncesionet dhe përjashtimet fiskale për një grup të vogël biznesesh pranë qeverisë do të eliminohen, duke rikthyer barazinë dhe duke hapur tregun për sipërmarrjet e vogla dhe të mesme.
Tabaku e përmbylli mesazhin e saj me një thirrje të qartë për ndryshim:

“Kjo qeveri ka ndërtuar një ekonomi që prodhon vetëm për pakicën dhe shkatërron shumicën. Ne do ta ndryshojmë këtë realitet me politika të drejta dhe të qarta që vendosin në qendër qytetarin dhe shumicën e ndershme të shqiptarëve. Vetëm përmes një sistemi të drejtë ekonomik, me taksa të ulëta dhe një klimë të favorshme për biznesin, mund të sjellim zhvillim dhe mirëqenie për të gjithë.”

Nuk ka shqetësim më të madh për qytetarët shqiptarë sesa ekonomia. Nuk ka problem më të rëndësishëm për këdo – familje, shtresën e mesme, pensionistët apo të rinjtë – sesa gjendja financiare dhe paratë që mbeten në fund të ditës në xhepin e çdo qytetari.

Si zgjidhet kjo? Zgjidhja është e thjeshtë, por dua të ndalem për dy minuta te problemet kryesore. Cilat janë sfidat që ka sot ekonomia shqiptare dhe pse kemi arritur në një pikë ku 95% e qytetarëve paguajnë taksa, marrin më pak shërbime dhe mbajnë mbi supe barrën e rëndë të një sistemi fiskal të padrejtë?

Sot Shqipëria ka një sistem fiskal më të lartë dhe më të padrejtë se gjithë vendet e rajonit. Taksa mbi punën është 23%, tatimi mbi fitimin 15%, taksa mbi kapitalin 8%, TVSH-ja 20%, ndërsa bujqësia gjithashtu paguan 20% TVSH. Këto janë normat më të larta në rajon! Në Serbi, Mal të Zi, Maqedoninë e Veriut dhe Kosovë, të gjitha këto taksa janë më të ulëta. Disa vende kanë dhe dy nivele të TVSH-së, ku përjashtimet nuk vlejnë vetëm për një pakicë, si në

Shqipëri, por për shumicën e popullsisë – për produktet bazë, për energjinë elektrike dhe ushqimet. Këto duhet të kishin një normë më të ulët të TVSH-së për të nxitur konsumatorët dhe për të mbështetur sektorët kyç të ekonomisë, si bujqësia, e cila është në rënie të lirë.

Nga sistemi i taksave e deri te mënyra se si shpërdorohen paratë publike dhe si shpërndahen të ardhurat, të gjitha këto faktorë kanë çuar në një ekonomi që nuk prodhon dhe nuk shpërndan të ardhurat në mënyrë të drejtë. Sot 95% e qytetarëve paguajnë taksa, ndërsa vetëm 5% përfitojnë prej tyre – përmes koncesioneve, kontratave publike dhe përjashtimeve fiskale që krijojnë një ekonomi privilegjesh për pakicën. Kjo ka sjellë sot pagën më të ulët në rajon: vetëm 2.27 euro për orë për ata që punojnë, ndërsa pjesa më e madhe e qytetarëve janë të papunë ose në sektorin informal.

Sektori i industrisë ra me 30% vitin e shkuar. Eksportet u ulën ndjeshëm – jo vetëm në energji, me një rënie prej 32%, por edhe në produktet bujqësore, mesatarisht me 28-29%. Kjo ekonomi e pakicës, e bazuar në përjashtime dhe favorizime, duhet të ndryshojë.

Si zgjidhet kjo?

E para, duhet një sistem fiskal i drejtë, ku përjashtimet nuk bëhen sipas interesave të qeverisë, por janë të përcaktuara qartë dhe të bazuara në kontributin dhe investimin e qytetarëve dhe bizneseve.

E dyta, një sistem taksash i ndershëm, ku taksa mbi punën dhe tatimi mbi fitimin janë në nivelin 10%. Kjo do të nxisë punësimin, do të rrisë investimet dhe do t’i japë mundësi biznesit të paguajë paga më të larta. Sot sektori privat nuk mund të rrisë pagat sepse qeveria po e falimenton me taksa të larta.

E treta, duhet formalizimi i ekonomisë. Sot sektorët kryesorë – turizmi, bujqësia, fasoneria – po vuajnë nga një ekonomi e zezë e stimuluar nga taksat e larta dhe përjashtimet klienteliste. Shqipëria ka 6 nivele taksimi, të cilat favorizojnë informalitetin dhe dëmtojnë konkurrencën e ndershme.

Së fundmi, ekonomia shqiptare nuk mund të mbështetet vetëm te ndërtimi dhe pastrimi i parave. Sot 30% e këtij sektori është i paligjshëm dhe po nxjerr nga tregu operatorët e ndershëm. Kjo po sjell zhvlerësimin e euros dhe rrënimin e biznesit të ndershëm.

Partia Demokratike do ta ndryshojë këtë sistem. Për këtë duhen vendime politike të qarta, vullnet politik dhe një ofertë konkrete që vendos në qendër të zhvillimit ekonomik qytetarin, shumicën dhe jo pakicën.

The post Jorida Tabaku: Ekonomia shqiptare e rrënuar nga taksat e larta dhe privilegjet për pakicën appeared first on Albeu.com.

Sipas të dhënave nga Organizata Botërore e Shëndetësisë (OBSH), të përditësuara së fundmi, në vitin 2021 një shqiptar ka shpenzuar mesatarisht për shëndetin 465 dollarë. Kjo shumë në masën 59.7% (277 USD) është përballuar nga xhepi dhe pjesa tjetër 39.7% nga shpenzimet e qeverisë nga buxheti i shtetit.

Siç shihet nga të dhënat e OBSH-së, shpenzimet e shqiptarëve nga xhepi për shëndetësinë kanë shënuar rritje të ndjeshme pas pandemisë. Në vitin 2015, ky tregues ishte 57.3% dhe që atëherë ka shënuar rritje me 2.5 pikë %.

Qeveria i ka rritur kapacitetet buxhetore, por shpenzimet nga xhepi për shëndetësinë kanë ardhur në rritje gjatë dekadave të tranzicionit në vend të ulen. Siç shihet nga të dhënat e OBSH-së në vitin 2005 shqiptarët paguan nga xhepi 49.3% të kostos së shpenzimeve shëndetësore, teksa më 2021, ky tregues arriti në 59.7%.

OBSH përllogarit se ndërmjet 2015 – 2021 shpenzimet e shqiptarëve për shëndetësinë u rritën me 82%. Gjatë kësaj periudhe, pandemia Covid-19 duket se ka dhënë një ndikim jo të zakontë.

Në krahasim me gjithë vendet e tjera të Europës (pa përfshirë ish shtetet e bashkimit Sovjetik), Shqipëria mban rekord për shpenzimet nga xhepi.

E dyta pas nesh është Maqedonia e Veriut, me 41.7%, e ndjekur nga Mali i Zi (38.1%), Serbia (35.8). Treguesi më i ulët në rajon është në Bosnjë-Hercegovinë (30.7%), ndërsa të dhënat për Kosovën mungojnë.

Në vendet me të ardhura të larta, ky tregues është më i ulët sesa 20% (shih grafikun në fund).

Shpenzimet u rritën në pandemi

Në 2020-n, shpenzimet për shëndet për familjet shqiptare arritën rekordin e 5.6% të totalit të shpenzimeve, nga 4.9% vitin e mëparshëm, në një tregues se kurimi i Covid-19 u përballua nga xhepi (sipas INSTAT, pesha e shpenzimeve për shëndet mbeti e pandryshuar dhe në 2021).

Ndërsa familjet europiane e kishin këtë tregues 4.5% në 2020-n, nga 4.4% një vit më parë, teksa shërbimi shëndetësor më i mirë u garantoi atyre kujdesin e duhur (kujtojmë se në 2020-n, Shqipëria ishte një nga vendet me vdekshmërinë më të lartë shtesë në Europë nga pandemia).

Ekonomia dhe kapacitetet buxhetore janë shtuar gjatë dekadës së fundit, por financimet për shërbimet themelore shëndetësore, të tilla si rimbursimi i barnave dhe kujdesi parësor kanë mbetur në vendnumëro, në një kohë që nevojat për produkte farmaceutike dhe shërbime shëndetësore në një popullsi në plakje po rriten.

Treguesit zyrtare referojnë se brenda buxhetit të shëndetësie ka shpërndarje të padrejtë të fondeve. Gati për një dekadë, buxheti i rimbursimit të barnave ka mbetur thuajse në vendnumëro në një kohë që të ardhurat buxhetore janë dyfishuar dhe burimet financiare të Fondit të Sigurimit të Detyrueshëm Shëndetësor (FDSKSH) janë rritur.

Nga viti 2013 me 2022 importet e produkteve farmaceutike në vlerë u rriten me 11,3 miliardë lekë, ndërsa fondet për rimbursimin e medikamenteve u rritën me 3 miliardë lekë, sipas të dhënave zyrtare.

Në vitin 2022, importet e produkteve farmaceutike arritën në 28 miliardë lekë, rreth 270 milionë euro, ndërsa fondi shtetëror i rimbursimit ishte 11,4 miliardë lekë. Të dhënat tregojnë se pacientët shqiptarë financuan nga xhepi për blerjen e medikamenteve ose 61% të vlerës së produkteve farmaceutike të importuara më 2022. /Revista Monitor

The post Rekord në Europë! Shqiptarët paguajnë nga xhepi 60% të shpenzimeve për shëndetësinë appeared first on Albeu.com.

“Ndërsa vendi është në rrugën e anëtarësimit në BE, autoritetet po përballen me disa pengesa që ndikojnë produktivitetin dhe arritjen e standardeve më të larta të jetesës.

Këto përfshijnë informalitetin e përhapur, dobësitë në qeverisje dhe sundim të ligjit, boshllëqe të konsiderueshme gjinore në pjesëmarrjen në fuqinë punëtore, pasivitetin e lartë të të rinjve dhe hendeqet në infrastrukturë. Shkalla e lartë e emigrimit të punëtorëve dhe plakja e popullsisë përbëjnë kërcënime shtesë për rritjen ekonomike”, thotë FMN.

Përfitimet nga një sektor turizmi në rritje pritet të ndikohen nga emigracioni i vazhdueshëm dhe plakja e popullsisë, thotë FMN.

Ekonomia, sipas FMN-së përballet me disa rreziqe. Përsëritja e një krize energjetike, ndërprerja e furnizimit, dhe një shtrëngim monetar më i mprehtë se sa pritej mund të çojë në një ngadalësim të papritur global.

Shqipëria do të ndikohej nga e një kërkesë e jashtme më e ulët: Një reduktim i turizmit dhe i remitancave mund të shkaktojë një rënie të papritur dhe të mprehtë të nënçmimit të kursit të këmbimit, i cili do të përkeqësonte presionet inflacioniste.

Kushtet më të shtrënguara globale dhe financiare të brendshme do të rrisnin kostot e financimit për qeverinë. Me gjysmën e kredisë private të shprehur në euro – një pjesë e konsiderueshme e së cilës është e pambrojtur – një lek më i dobët do të ushtronte gjithashtu presion mbi huamarrësit privatë. Rreziqet e stabilitetit financiar do të përkeqësoheshin nga korrigjimet e mprehta në çmimet e pasurive të paluajtshme.

Disa nga rreziqet e tjera, sipas matricës së vlerësimit të rreziqeve të FMN-së lidhen me rritjen e mëtejshme të çmimeve të ushqimeve dhe energjisë që dëmton familjet me të ardhura të ulëta; përshkallëzimin e tensioneve gjeopolitike; një recesion të Europë që mund të ulë fluksin e turistëve dhe remitancat, si dhe mund të korrektojë çmimet e pasurive të paluajtshme; keqllogaritjet e politikës monetare që mund të ngadalësojnë rritjen; ndryshimet klimaterike, luhatjet e kursit të këmbimit.

FMN thekson në njoftimin për shtyp se ekonomia shqiptare ka treguar një qëndrueshmëri të jashtëzakonshme përballë goditjeve të njëpasnjëshme.

Falë një rikthimi të fortë në turizëm, rritja në vitin 2022 arriti në afër 5 për qind, ndërsa pozicioni i jashtëm pati një përmirësim të dukshëm. Një kombinim i konsolidimit fiskal, të ardhurave më të larta dhe mbiçmimit të lekut e riktheu raportin e borxhit publik në nivelet e para pandemisë.

Politika monetare është fokusuar me të drejtë në uljen e inflacionit, i cili ka ardhur gradualisht në rënie, pasi kishte arritur kulmin në rreth 8 për qind, në nivele më të ulëta se në vendet e tjera të rajonit. Sistemi financiar duket gjerësisht elastik, pavarësisht disa streseve bankare globale dhe rritjes së normave të interesit.

Momenti i favorshëm i rritjes vazhdoi edhe në 2023-n. PBB-ja reale u rrit me rreth 3¼ për qind me bazë vjetore në tremujorin e dytë 2023, pas rritjes së fortë në tremujorin e parë, mbështetur nga konsumi i fuqishëm privat, shërbimet dhe aktiviteti i ndërtimit.

Ardhja e turistëve dhe prodhimi i energjisë elektrike në dhjetë muajt e parë të 2023 janë më shumë se një të tretën mbi nivelet e regjistruara gjatë së njëjtës periudhë të vitit të kaluar. Të ardhurat fiskale të vitit 2023 tashmë kanë tejkaluar nivelet e buxhetuara. Banka e Shqipërisë rifilloi së fundmi rritjen e normës së interesit, mes tregjeve të shtrënguara të punës dhe rritjes së presioneve të çmimeve të brendshme.

Sipas raportit, Perspektiva ekonomike e Shqipërisë pritet të mbetet e qëndrueshme. Rritja reale e PBB-së parashikohet në 3.6 për qind në vitin 2023 dhe 3.3 për qind në 2024, e udhëhequr nga konsumi privat elastik, e ndikuar dukshëm nga aktiviteti i turizmit dhe të ndërtimit.

Inflacioni luhatet në rreth 4 për qind, në një ambient të tregut të shtrënguar të punës dhe pritet të kthehet gradualisht në objektivin prej 3 për qind deri në fillim të vitit 2025.

Tensionet e rritura gjeopolitike përfaqësojnë një faktor të konsiderueshëm që mund të veprojë kundër, edhe pse ekonomia mbetet e ndjeshme ndaj rreziqeve të goditjeve të sektorit energjetik të lidhura me motin, një përmbysje e papritur e mbiçmimit të kursit të këmbimit dhe një inflacion i vazhdueshëm i lartë.

FMN rekomandon që të ketë një konsolidim fiskal kuptimplotë, që të jetë i bazuar në rritjen e të ardhurave, duke filluar nga viti 2024, çka do të ishte thelbësore për të ndërtuar hapësirën fiskale për politikën e ardhshme kundërciklike. Masat shtesë fiskale neto kumulative prej rreth 1½ për qind të PBB-së do të çonin në një ulje më të shpejtë të borxhit dhe do të reduktonin nevojat për financim bruto.

Konsolidimi duhet të arrihet përmes një strategjie të shëndoshë të mobilizimit të të ardhurave, së bashku me përfitimet e efikasitetit dhe rialokimin e burimeve në infrastrukturë, arsim dhe përshtatje ndaj ndryshimeve klimatike.

Autoritetet duhet gjithashtu të vazhdojnë të zgjasin maturimet e borxhit dhe të zvogëlojnë varësinë nga borxhi me normë të ndryshueshme. Përparimet konkrete në reformat fiskale që përmirësojnë qeverisjen dhe mbikëqyrjen e ndërmarrjeve shtetërore, duke përfshirë sektorin e energjisë, dhe PPP-të, janë çelësi për ruajtjen e qëndrueshmërisë fiskale, rekomandon FMN.

FMN përsëriti qëndrimin se kthimi i inflacionit në objektiv ka të ngjarë të kërkojë disa rritje të mëtejshme në normën bazë. BSH-ja rifilloi në mënyrë të përshtatshme shtrëngimin monetar në nëntor 2023, pasi presionet e brendshme inflacioniste vazhdojnë në kushtet e tregjeve të punës të shtrënguara.

Një rritje graduale e normës së politikës drejt një qëndrimi gjerësisht neutral – e vlerësuar në rreth 4½ për qind – duhet të ndihmojë në kthimin e inflacionit në objektiv deri në fillim të vitit 2025. Pasiguria rreth tendencës së inflacionit mbetet e lartë dhe është e rëndësishme që të ketë një qasje fleksibël pas çdo mbledhjeje për përcaktimin e normës.

FMN rekomandon që një kurs këmbimi fleksibël duhet të mbetet linja e parë e mbrojtjes kundër goditjeve të jashtme. Pozicioni i jashtëm i Shqipërisë në vitin 2022 ishte mesatarisht më i dobët se niveli i nënkuptuar nga bazat dhe politikat e dëshirueshme.

Një monedhë e luhatshme i ka shërbyer mirë Shqipërisë, por nevojitet vigjilencë duke pasur parasysh potencialin e një ndryshimi të papritur, i cili mund të dëmtojë stabilitetin financiar. Kjo kërkon politika makroprudenciale parandaluese të zgjeruara, duke përfshirë kërkesat LTV (loan to value) dhe DTI (debt to income) për kreditë e brendshme dhe ato në valutë.

Përpjekjet e mëtejshme për deeuroizimin, të mbështetura nga veprimet e qeverisë për të nxitur përdorimin e monedhës vendase si mjet ligjor, do të rrisnin efektivitetin e regjimit të inflacionit të shënjestruar, rekomandon FMN.

Sistemi bankar në përgjithësi duket më elastik, por ekzistojnë disa xhepa dobësish. Ka hapësirë për të forcuar pozicionet e kapitalit të disa bankave, përveç provigjonimit të kujdesshëm dhe rishikimeve të fokusuara të cilësisë së aktiveve.

Shqipëria duhet të shfrytëzojë mundësitë e ofruara nga vrulli në rritje i zgjerimit të BE-së për të trajtuar sfidat strukturore afatgjatë. Reformat në drejtësi duhet të plotësohen me rritjen e efikasitetit për të adresuar çështjet e prapambetura.

Autoritetet duhet të shfrytëzojnë daljen nga lista e vendeve të FATF-së nën monitorim të shtuar, duke siguruar angazhim të qëndrueshëm dhe të fortë ndaj reformave dhe praktikave më të mira kundër pastrimit të parave.

Adresimi i boshllëqeve në pjesëmarrjen e të rinjve dhe femrave në fuqinë punëtore do të ndihmojë në shfrytëzimin më të mirë të potencialit të rritjes. Janë të nevojshme burime të përshtatshme buxhetore dhe mekanizma monitorues për të siguruar që përpjekjet për reforma të përkthehen në rezultate më të mira, thotë FMN.

FMN thotë se autoritetet duhet të ofrojnë më së shumti mbështetje fiskale të targetuar dhe të përkohshme për të pambrojturit. Për këtë qëllim, ritmi i rregullimit fiskal mund të rikalibrohet me një plan afatmesëm të konsolidimit në një bazë të besueshme të të ardhurave.

Nëse është e nevojshme, autoritetet duhet të kërkojnë financime zyrtare shtesë. BSH do të duhet të frenojë inflacionin përmes politikave shtrënguese vendimtare monetar dhe komunikimit të qartë për të mbajtur pritjet inflacioniste të ankoruara mirë.

Përpjekjet strukturore fiskale për të rritur efikasitetin dhe transparencën fiskale duhet të vazhdojnë për të ruajtur besueshmërinë fiskale. Është thelbësor një monitorim nga afër i cilësisë portofolit të kredisë dhe identifikim në kohë dhe menaxhimi i aseteve problematike.

The post FMN: Shkalla e lartë e emigrimit, kërcënim për rritjen ekonomike; Ekonomia do zgjerohet 3.3% në 2024-n appeared first on Albeu.com.

Të dhënat e Bankës së Shqipërisë tregojnë se të ardhurat neto të ekonomisë shqiptare nga fasoneria arritën në 198 milionë euro, niveli më i lartë i regjistruar ndonjëherë për një tremujor të vetëm. Të ardhurat nga këto shërbime janë rritur me 9% krahasuar me të njëjtën periudhë të vitit të kaluar.

Edhe vlerat progresive të 6-mujorit të parë përfaqësojnë nivelet më të larta historike të të ardhurave nga fasoneria. Për gjashtë muaj, të ardhurat neto nga shërbimet për përpunim të inputeve fizike të zotëruara nga të tjerët arritën në 394 milionë euro, në rritje me 16% krahasuar me të njëjtën periudhë të një viti më parë.

Shifrat e Bilancit të Pagesave tregojnë se të ardhurat e sektorëve të lidhur me fasonerinë janë më të larta se kurrë më parë, pavarësisht se kjo shtesë në të ardhura është gërryer ndjeshëm nga forcimi i Lekut në kursin e këmbimit valutor.

Nëse shohim shifrat paralele të INSTAT, të shprehura në Lekë, ecuria e eksporteve të sektorëve kryesorë të lidhur me fasonerinë është më e dobët, por sidoqoftë jo alarmante. Grupi “Tekstile dhe këpucë” për 7-mujorin 2023 shënoni një rënie të lehtë të eksporteve në masën 1.3% më pak krahasuar me një vit më parë.

Grupi tjetër, “Makineri, pajisje, pjesë këmbimi”, ka vijuar rritjen e eksporteve, me 8% më shuëm krahasuar me të njëjtën periudhë të vitit të kaluar.

Krahu i lirë i punës ka qenë dhe mbetet avantazhi kryesor konkurrues i eksporteve shqiptare.

Për këtë arsye, industritë eksportuese janë të përqendruara kryesisht në ato sektorë që shfrytëzojnë një kosto pune më të ulët krahasuar me ekonomitë e zhvilluara. Fasoneria ka qenë e përqendruar historikisht tek prodhimi i veshjeve dhe këpucëve me porosi nga jashtë vendit, ndërsa në vitet e fundit po rritet gjithnjë e më shumë sektori i industrisë automotive, i lidhur me prodhimin e pjesëve të këmbimit për automjetet ose produkte të tjera industriale.

Fasoneria është gjithashtu një ndër kontribuesit kryesorë në ecurinë pozitive të llogarisë së shërbimeve në Bilancin e Pagesave. Ndërkohë që ka një bilanc të thellë deficitar në mallra, Shqipëria ka një bilanc pozitiv të tregtisë së jashtme në shërbime.

Bilanci i Pagesave në shërbime për 6-mujorin 2023 ishte pozitiv në vlerën e 1.36 miliardë eurove, në rritje me 35% krahasuar me një vit më parë. Pjesa më e madhe e suficitit në shërbime vjen nga turizmi dhe nga fasoneria. Për 6-mujorin 2023, kontribuoi me më shumë se 42% të vlerës së përgjithshme të suficitit të shërbimeve, i ndjekur nga fasoneria me 29%./monitor

The post Të ardhurat nga fasoneria, 394 milionë euro për 6-mujorin e parë appeared first on Albeu.com.

Stoku i borxheve të pashlyera u zgjerua në gjashtëmujor me 1,6 miliardë lekë (13.8 milionë euro) ose 12.5 për qind më shumë se ne janar të këtij viti. Në krahasim me qershorin e vitit 2021, stoku i detyrimeve është ulur me rreth 12 për qind.

Rritja e detyrimeve është krijuar nga punimet në infrastrukturë, për të cilat buxhetit i shtetit u detyrohet kompanive private me 5.1 miliardë lekë me një zgjerim 9.6 për qind nga fillimi i vitit.

Zëri “detyrime të tjera” që zakonisht përbehet nga detyrimet e pushtetit lokal dhe vendime të gjykatave të brendshme shënoi një stok detyrimesh me 9,8 miliardë duke u zgjeruan me 14 për qind në raport me fundin e vitit. Pjesa më e madhe në këtë zë e zëne janë vendimet e gjykatave të te brendshme për shkarkime të padrejta nga puna të punonjësve në administratën publike.

Raportimet e Ministrisë së Financave nuk përfshijnë vendimet e gjykatave të huaja.

Borxhet e pashlyera në kohë janë shndërruar në një zë të rregullt buxhetor edhe pse qeveria pas vitit 2014 i forcoi ligjet  për të parandaluar krijimin e tyre.

Një audit i imtësishëm   në 2014 zbuloi rreth 71 miliardë lekë detyrime të prapambetura, ku u përfshinë gjitha faturat, përfshi edhe faturat e pashlyera të energjisë të enteve publike ndaj OSHEE-së.

Për të shlyer këto detyrime qeveria rriti huamarrjen e jashtme. Por donatorët që dhanë huatë, Banka Botërore dhe Fondi Monetar Ndërkombëtar imponuan forcimin e rregullave për administrimin buxhetor në mënyrë që të parandalohej krijimi i të rejave.

Sipas të dhënave të Entit Rregullator të Energjisë vetëm borxhit që entet publike kanë ndaj OSHEE-së arriti në 4-mujorin e parë të vitit 2022 në 22,1 miliardë lekë (183 milionë euro). Që nga viti 2013 këto detyrime u zgjeruan me 149 % ose me 2.4 herë. Në vitin 2013 borxhi i shtetit për faturat e papaguara të energjisë ishte rreth 9 miliardë lekë. Këto detyrime u shlyen nga borxhi që qeveria mori për këtë qëllim. Sakaq borxhi shlyhet nga taksat e qytetareve. Gati 10 vite më vonë, në vend që të kishim mësuar nga përvojat negative, situata është përkeqësuar edhe më tej, pasi detyrimet po shkojnë drejt trefishimit./Monitor/

The post Stoku i detyrimeve të prapambetura arrin 124 mln euro në qershor, zgjerohet me 12% nga fillimi i vitit appeared first on Albeu.com.

Të dhënat e Bilancit të Pagesave së Bankës së Shqipërisë tregojnë se të ardhurat nga sektori i fasonerisë, por edhe të ardhurat nga punonjësit sezonalë apo kufitarë jashtë vendit këtë vit po regjistrojnë nivelet më të larta historike.

Për 6-mujorin e parë të vitit, të ardhurat neto në zërin e shërbimeve për përpunim të inputeve fizike të zotëruara nga të tjerët (fasoneri) arritën në 340 milionë euro, 36% më shumë krahasuar me të njëjtën periudhë të vitit të kaluar dhe vlera më e lartë historike e regjistruar ndonjëherë.

Për gjysmën e parë të këtij viti, të ardhurat nga aktivitetet e fasonerisë kanë tejkaluar madje edhe të ardhurat nga turizmi, që në terma neto, sollën një shumë lehtësisht më të ulët, 338 milionë euro. Fasoneria këtë vit është kontribuesi i dytë më i madh neto mes zërave të llogarisë korente, pas remitancave. Historikisht, fasoneria është përqendruar sidomos tek prodhimi i veshjeve dhe këpucëve me porosi nga jashtë vendit. Por, në vitet e fundit prodhimi me porosi është shtrirë edhe në sektorë të tjerë të industrisë ushqimore apo pjesëve të këmbimit për automjetet dhe produkte të tjera industriale.

Megjithë sfidat e lidhura me konkurrencën dhe me vështirësitë në rritje për të siguruar forcë pune, duket se aktivitetet e fasonerisë po japin një kontribut në rritje në ekonominë shqiptare.

Shifra rekord shënuan edhe të ardhurat nga puna jashtë vendit, zë që përfshihet në llogarinë e të ardhurave parësore dhe që nuk përfshin dërgesat e emigrantëve rezidentë jashtë vendit. Të ardhurat nga puna për gjysmën e parë të këtij viti arritën në 203 milionë euro, 75% më shumë krahasuar me të njëjtën periudhë të një viti më parë. Edhe në këtë rast bëhet fjalë për të ardhurën më të lartë historike të regjistruar nga ky zë.

Sipas Metodikës së Bilancit të Pagesave, të ardhura nga puna jashtë vendit klasifikohen kompensimi i punonjësve, që përfshin pagën, shpërblimet dhe përfitime të tjera, të fituara nga individët jorezidentë në një ekonomi, për punën e kryer për rezidentët e kësaj ekonomie.

Në këtë kategori punonjësish, përfshihen punonjësit sezonalë apo ata që punësohen për një periudhë afatshkurtër, më pak se një vit, si dhe punëtorët kufitarë të cilët e kanë qendrën e interesit të tyre ekonomik në vendin e tyre të origjinës. Në analizat e institucioneve, shpesh, të ardhurat nga puna jashtë vendit i bashkangjiten dërgesave të emigrantëve dhe klasifikohen si pjesë e të ardhurave totale të remitancave në ekonomi. Nëse përfshijmë edhe të ardhurat nga puna, vlera totale e remitancave në ekonominë për gjysmën e parë të këtij viti do të llogaritej në 579 milionë euro./ monitor

The post Fasoneria dhe puna jashtë vendit po sjellin të ardhura rekord për ekonominë shqiptare appeared first on Albeu.com.

Komentet Ibrahimaj i bëri gjatë një konference për shtyp, teksa foli për të dhënat e tre mujorit të parë. Ibrabimaj tha se inflacioni në muajin korrik ishte 7.5% dhe sipas saj është më i ulët se në vendet e tjera të rajonit.

Një nga faktorët që kanë ndikuar në këto rezultate pozitive për ekonominë sipas ministres janë edhe ngritja e bordeve. Ibrahimaj u shpreh se bordet e mbajtën çmimet nën kontroll.

“Gjatë tre mujorit të parë ekonomia shqiptare performoi mirë. Paketat e qeverisë, por edhe ngritja e bordeve të ndryshme, e ndërthurur me politikën e subvencionit, për çmimin e energjisë, nga njëra anë, por edhe nga ana tjetër duke ndikuar indirekt në inflacion. Ndërthurja e këtyre politikave, sëbashku me mbështetjen për çmimet e karburanteve ka sjellë që deri më tani ekonomia shqiptare të ketë një performancë pozitive. Inflacioni është më i kontrolluar me vendet e tjera të rajonit.

Inflacioni në vendin tonë është ndjeshëm më i ulët. Shqipëria me një inflacion 7.5% në korrik është më ndjeshëm se Maqedonia, Kosova. Ndërsa mesatarja e BE është 8.9%.

Elementi që ka ndikuar më shumë në rritjen e çmimeve janë ushqimet dhe pijet. Që nga fillimi i vitit ne kemi pasur një stabilizim të çmimeve. Ecuria ndikohet më së shumti edhe nga kërkesat.

Të dhënat më të fundit tregtojnë për një stabilitet të ekonomisë. Një përgjigje pozitive të biznesit shqiptar. Ne kemi një ecuri të ekomomisë shumë më të mirë se një vit më parë”, deklaroi ministrja./albeu.com/

The post Ministrja Ibrahimaj: Me bordet që ngritëm i mbajtëm çmimet nën kontroll, ekonomia shqiptare ka performuar mirë appeared first on Albeu.com.

PBB-ja e rajonit që u zgjerua me 4.7% në vit, krahasuar me 6.3% në tremujorin e mëparshëm. Ngadalësimi u shkaktua kryesisht nga Serbia dhe Bosnjë dhe Hercegovina, sipas raportit të Komisionit Europian për vendet kandidate për tremujorin e dytë 2022.

Për Shqipërinë, raporti thotë se rimëkëmbja e aktivitetit ekonomik vijoi në tremujorin e parë 2022, me PBB-në reale që u zgjerua me 6% me bazë vjetore, pas një rritjeje prej 5.5% në tremujorin e mëparshëm. Zgjerimi u mbështet kryesisht nga rritja e fortë e investimeve dhe e konsumit privat.

Sipas raportit, ndërtimi (1.95 pikë përqindje) aktivitetet e pasurive të paluajtshme (1.5 pp.) dhe tregtia dhe (0.9 pp.) mbeten kontribuuesit më të mëdhenj në rritjen e PBB-së. Edhe sektori i prodhimit dhe shërbimet financiare e profesionale kanë ecur mirë, duke regjistruar ritme rritjeje dyshifrore.

Tregu i punës vijoi të shfaqte një tendencë të kundërt. Ndërsa punësimi i grup moshës 15-64 vjeç u rrit me 0,7% me bazë vjetore, punësimi i të rinjve (mosha 15-29 vjeç) ra 2,2% me bazë vjetore.

Rritja e punësimit reflektoi kryesisht mobilizimin e popullsisë joaktive, pasi shkalla e pasivitetit ra dukshëm si në krahasim me tremujorin (me 2.5 pikë përqindje) ashtu edhe në atë vjetor (me 4.5 pikë përqindje), duke zbritur në 28% në TM1-22, historikisht norma më e ulët deri tani, sipas raportit.

Norma tashmë e lartë e inflacionit u rrit më tej në mars me pothuajse 2 pikë përqindjeje në 5.7% dhe u përshpejtua në 6.7% në maj dhe 7.4% në qershor 2022, nxitur nga rritja e çmimeve të importit për ushqime, energji dhe transport. Ky përshpejtim reflektoi kryesisht ndikimin e pushtimit rus të Ukrainës në çmimet ndërkombëtare të mallrave, i cili gjithashtu ngriti rritjen e indeksit të çmimeve të importit në 10% në vit në tremujorin e parë 2022 (nga 4.9% në TM4-21).

Pas rritjes së parë në muajin mars, Banka e Shqipërisë (BSH) e mbajti normën bazë të interesit në 1.0% deri në fillim të korrikut, kur ajo u rrit më tej me 0.25 pikë përqindjeje. në 1.25% për shkak të përshpejtimit të inflacionit dhe shtrëngimit të kushteve financiare.

Ballkani do ndikohet negativisht nga lufta dhe inflacioni i lartë

Rritja vjetore e prodhimit në Ballkanin Perëndimor vazhdoi duke përfituar nga kërkesa e qëndrueshme e brendshme dhe e jashtme, si pasojë e heqjes graduale të masave të kontrollit të lidhura me COVID-19, si dhe efekteve bazë në disa vende.

Krijimi i vendeve të punës vazhdoi, megjithëse me një ritëm më të ngadaltë se në tre muajt e mëparshëm, dhe normat e papunësisë ranë ndërsa pjesëmarrja në fuqinë punëtore u rrit në shumicën e vendeve.

Deficiti i llogarisë korente të rajonit qëndroi në 6.5% të PBB-së në katër tremujorët deri në mars, niveli më i lartë që nga tremujori i tretë i 2020, pasi rritja e deficitit të tregtisë së mallrave tejkaloi rikthimin e fortë të eksporteve të shërbimeve dhe flukset më të larta të remitancave.

Rimëkëmbja e vazhdueshme ekonomike dhe inflacioni i lartë mbështetën rritjen e të ardhurave buxhetore dhe ngushtimin e deficiteve fiskale në të gjithë Ballkanin Perëndimor në tremujorin e parë të vitit 2022.

Raporti i borxhit publik ndaj PBB-së u ul në shumicën e vendeve në krahasim me fundin e vitit 2021. Pushtimi rus i Ukrainës në shkurt pritet të ketë një ndikim negativ në ekonomitë e Ballkanit Perëndimor përmes kanaleve të ndryshme të transmetimit.

Në veçanti, rritjet e forta të çmimeve të energjisë, ushqimeve dhe transportit po nxisin një përshpejtim të mëtejshëm të inflacionit, gjë që i shtyu bankat qendrore të rajonit me autonomi monetare të rrisin më tej normën bazë të politikës./monitor

The post Komisioni Europian: Ekonomia shqiptare u rimëkëmb nga ndërtimi e pasuritë e paluajtshme, efektet negative të inflacionit appeared first on Albeu.com.

Parashikimi është bërë nga Fondi Monetar Ndërkombëtar (FMN) në raportin e fundit të pasqyrës ekonomike globale, të publikuar së fundmi.

FMN vlerëson se inflacioni mesatar në Shqipëri, në vitin 2022 do të jetë 5.5%, nga 2% që ishte mesatarja e vitit të kaluar. Çmimet pritet të jenë të larta edhe në vitin 2023, me normën e inflacionit që vlerësohet të jetë në 3.7%. Deri në 2027-n inflacioni pritet të qëndrojë në rreth 3%, në objektivin e Bankës së Shqipërisë.

Këto janë nivelet më të larta që nga viti 2004, kur FMN raporton të dhënat. Për periudhën 2004-2013, inflacioni mesatar është luhatur në 2.7%, ndërsa nga viti 2014 deri në 2021 është luhatur midis 1.3-2%.

Në raportin e titulluar “Lufta frenon rimëkëmbjen ekonomike”, FMN vlerëson se lufta e Rusisë ndaj Ukrainës do të frenojë rëndë rimëkëmbjen globale, duke ngadalësuar rritjen dhe duke rritur inflacionin edhe më tej.

Raporti thekson se efektet ekonomike të luftës po përhapen gjerësisht – si valët sizmike që burojnë nga epiqendra e një tërmeti – kryesisht përmes tregjeve të mallrave, tregtisë dhe lidhjeve financiare. Për shkak se Rusia është një furnizues kryesor i naftës, gazit dhe metaleve, dhe, së bashku me Ukrainën, të grurit dhe misrit, rënia aktuale dhe e pritshme e ofertës së këtyre mallrave tashmë i ka rritur ndjeshëm çmimet e tyre.

Edhe para luftës, inflacioni ishte rritur në shumë ekonomi për shkak të rritjes së çmimeve të mallrave dhe çekuilibrit të kërkesë-ofertës të shkaktuar nga pandemia. Disa tregje në zhvillim dhe banka qendrore të ekonomive të zhvilluara, si Rezerva Federale e SHBA-së dhe ato në Amerikën Latine, tashmë ishin nën presion para luftës, duke përshpejtuar shtrëngimin e politikës së tyre monetare.

Mungesa e furnizimit të lidhura me luftën do t’i përforcojë shumë këto presione, veçanërisht nëpërmjet rritjes së çmimit të energjisë, metaleve dhe ushqimit.

Megjithëse pengesat pritet të lehtësohen përfundimisht pasi prodhimi do të nxitet në vende të tjera në përgjigje të çmimeve më të larta, duke shtuar njëkohësisht dhe kapacitetet, mungesat e furnizimit në disa sektorë pritet të zgjasin deri në vitin 2023. Si rezultat, FMN parashikon që inflacioni të mbetet i lartë për shumë më gjatë, si në tregjet e avancuara ashtu edhe në ato në zhvillim dhe ekonomitë në zhvillim.

FMN parashikon që rritja e çmimeve të ushqimit dhe karburantit do të dëmtojë familjet me të ardhura më të ulëta në nivel global, duke përfshirë këtu shtetet e Amerikës Jugore dhe Azisë. “Në tregjet dhe ekonomitë në zhvillim, rritja e çmimeve të ushqimeve dhe karburanteve mund të shtojë ndjeshëm rrezikun e trazirave sociale”, thuhet në raport.

Në raportin e fundit FMN ka përgjysmuar parashikimin për rritjen ekonomike të vendit në vitin 2022. FMN parashikon që ekonomia shqiptare do të rritet ketë vit me vetëm 2%, nga 4.5% që ishte parashikimi në muajin tetor. Ulja e parashikimit të FMN-së lidhet me luftën dhe ndikimin e saj në partnerët kryesorë të vendit (si Italia) si dhe situatën energjetike.

Inflacioni në vend kërceu në 5.7% në mars

Në mars inflacioni në vend arriti në 5.7%, më i larti në dy dekada (shënim i Monitor). INSTAT raportoi se inflacioni, apo Indeksi i Çmimeve të Konsumit, që mat ndryshimin e çmimeve të një shporte mallrash të caktuar, në muajin mars arriti në 5.7%. Ky është niveli më i lartë që prej vitit 2002 dhe është shumë më i lartë se objektivi i shënjestruar prej 3% i Bankës së Shqipërisë.

Kjo e fundit, që si përgjegjësi kryesore ka ruajtjen e stabilitetit të çmimeve, në një përpjekje për të frenuar inflacionin, pak ditë më parë vendosi rritjen e normës bazë për herë të parë në një dekadë, duke e çuar në 1%, nga niveli minimal historik prej 0.5% që ishte deri tani.

Rritja e ndjeshme e çmimeve pritet të përkeqësoje dukshëm situatën financiare të familjeve shqiptare. Pjesa më e madhe e tyre deklaruar si asnjëherë tjetër se presin një përkeqësim të situatës financiare të familjeve të tyre gjatë 12 muajve të ardhshëm./monitor/

The post Ekonomia e familjeve shqiptare do të përkeqësohet, FMN pret që çmimet të jenë të larta në vend për tre vitet e ardhshme appeared first on Albeu.com.