Me humor fin, batuta të befta e jo rrallë të hidhura, autori ka bërë një skaner origjinal të shqiptarit tipik të ditëve të sotme.

Me një stil të drejtpërdrejtë dhe plot energji, Edi Oga arrin të sjellë në skenë realitetin shqiptar përmes humorit, duke e bërë publikun të reflektojë dhe të qeshë njëkohësisht. /albeu.com/

The post Stand up komedia e Edi Ogës “O sa mirë me qen Shqiptar”, të premten në Cineplexx appeared first on Albeu.com.

Lexoj në rrjet postime personash të irrituar nga mosprezenca e Dua Lipas në koncertin-biznes të kompanisë së babait të saj dhe Bashkisë së Tiranës. Më e bukura është se ata që janë të nxehur nga ky fakt, përfshirë edhe mua, nuk kanë qenë fare në atë koncert, pra nuk kanë paguar 100 a më tepër Euro për të parë e dëgjuar dikë që nuk erdhi.

Përse ne që nuk kemi qenë nxehemi, ndërsa ata që nuk panë atë për të cilën paguan, nuk reagojnë? Sepse ne kuptojmë se sa tregues i keq është toleranca dhe pranimi i kësaj që ka ndodhur. Disa miq ekonomistë e kanë shpjeguar këtë model të njohur biznesi dhe paralajmërojnë një dështim të vazhdimësisë së tij, por unë nuk bindem.

Në edicionin e radhës, do vijnë artistë edhe më modestë dhe do të ketë akoma më tepër publik. Sepse një pjesë e madhe e njerzve sot, janë më fallco se një paruke. Ata nuk paguajnë për t’u zbavitur me atë për të cilën kanë paguar, por për t’u bërë pjesë e komunitetit ‘a ishe edhe ti në festival?’

Të rinjtë sot mund të marrin borxhe e kredi, për të blerë akses në evente të rankimit të statusit. Të dish të hiqesh për më lart se ç’je, për fat të keq, është ‘virtyti’ në majë të sistemit aktual të vlerave dhe si i tillë, kushton!

The post Dasma pa “nusen”! appeared first on Albeu.com.

Sot, qytetari “mesatar” është më i vjedhur se kurrë më parë!

E vjedh Putini dhe të gjithë ata që nxjerrin përfitime nga lufta e tij! Prej kësaj lufte, ka pakësim të produkteve me rëndësi jetike, si rrjedhim shtrenjtim të tyre.

E vjedhin tregëtarët-spekulantë të produkteve të mësipërme.

E vjedh shteti me ligje dhe borde, me pretekst luftën.

E vjedhin ofruesit e çdo produkti tjetër, me pretekstin “është rritur nafta”.

E vjedhin ofruesit e çdo shërbimi me pretekstin “janë rritur të gjitha”.

E vjedhin kudo që është i detyruar të paguajë. Kudo paguan më tepër se më parë. Prandaj qytetari “mesatar” këtë verë bëri më pak pushime se vitin që kaloi ose nuk bëri fare!

Të fundit fare, po i vjedhin edhe shpresën. Teksa sheh në televizor ish-kriminelë shtetërorë që e shtyjnë qytetarin “mesatar” të mësyjë për të rrëzuar kriminelët shtetërorë të pushtetit aktual!

The post OPINION: Vuajtjet e qytetarit “mesatar”! appeared first on Albeu.com.

Njeriu modern është një skllav i dënuar me punë të detyrueshme, të cilit pas një viti mundimesh të përjavshme, i japin disa ditë të njëpasnjëshme leje, me qëllim që të “resetojë” trupin dhe mendjen dhe të jetë i gatshëm për një tjetër vit pune skllavëruese.

Gjatë kësaj kohe që varion nga disa ditë në pak javë, njeriu duhet të kryejë aktivitetin më të shtrenjtë dhe më të lodhshëm të vitit, që quhet “pushime”! Aq shumë është konformuar njeriu modern, sa përgjigja e pyetjes “Ku i kalove pushimet?” është gati-gati identitare; nëse nuk i ke kaluar pushimet në X vend ku shpenzohen Y para për Z ditë, rrezikon të humbasësh besueshmërinë si individ, madje edhe rangun social.

Kësisoj, “pushimet” janë shndërruar në një problem të madh për shumëkënd, për disa të tjerë janë bërë hall, stres, madje makth! Ka nga ata që nuk kanë mundur të kursejnë për pushime të shtrenjta, por nuk mund të bëjnë pa to, ndaj i futen kredive dhe fajdeve!

Askush nuk mund të gjykohet për dëshirën dhe mënyrën sesi ai pushon, por mendoj se duhet hequr dorë nga imponimi kinsumerist i pushimeve.

Nëse keni menduar të shpenzoni një shifër të madhe për 3 netë/4 ditë plazh diku ku shkohet me avion, mendojeni edhe njëherë. Me ato para mund të bëni një javë plazh dhe një javë mal diku më pranë, pa shpenzuar për avionë dhe luks të papërdorur. Nëse fotot për instagram ju duhen më tepër sesa çlodhja dhe relaksi, injorojeni këtë këshillë.

Pushime të mbara të gjithëve!

The post Të shtrenjtat pushime! appeared first on Albeu.com.

Të gjithë e dimë se Shqipëria e sotme BE-së i duhet shumë pak, aq pak sa mendon se nuk ia vlen që pas disa vitesh të pendohet përse na i hapi derën sot, prandaj sajon gjithfarë marifetesh për të na mbajtur tek pragu, me dirën tek çekiçi i trokitjes. Grupimi me Maqedoninë e Veriut është një truk që po verifikohet perfid.

A mendon kush që kopilat burokratë të Evropës nuk e dinin që

Bullgaria do të bllokonte Maqedoninë e Veriut me veto?! Me anë të këtyre trukeve të shpifura, nëpërmjet këtij iluzioni për pranim, të zgjatur si djathë pice, Baskimi Evropian ka vetëm këto dy qëllime në politikën e tij në Shqipëri:

1. Të mënjanojë/pakësojë influencën në territorin tonë e fuqive “të vështira”, lexo Rusi, Turqi, Kinë.
2. Të përftojë falas të vetmin “eksport” të vlefshëm që Shqipëria ofron, skllevërit modernë të punës.

Bashkimi Evropian e di mirë se nëse Shqipëria bëhet pjesë e familjes evropiane, në këtë vend mund të bëhet shtet dhe njerëzit mund të duan të qëndrojnë, të punojnë e të jetojnë në vendin e tyre.

E përse të dojë BE-ja prosperitetin e racës sonë kur ne nuk mësuam kurrë që të duam njeri-tjetrin.

Nga ana tjetër, meqë me këtë punë merren pushtetarët e politikës, as vetë ata nuk kanë asnjë interes që pranimi të ndodhë, sepse në BE nuk i lë kush të vjedhin si më parë!

Në këto 30 vjet, nga liritë që fituam, përdorëm për mirë vetëm lirinë individuale për të ikur nga sytë këmbët!

E mesa duket, këtë po na detyrojnë të bëjmë edhe në 30 vitet në vazhdim. Më pas, nipërve e mbesave do t’ua tregojmë Shqipërinë me ‘Google Earth’ dhe me ato pak foto që mund të kemi ruajtur!

The post Evropa, ashtu siç e këndoi Fishta! appeared first on Albeu.com.

Praktikisht, në demokracinë tonë të papjekur dhe të brishtë, ky parim zbatohet gjithnjë e më pak. Mjerisht, ka tendencë që të “zerohet” edhe teorikisht.

Pushtetet e njohura vepruese në Shqipëri janë Ekzekutivi, Legjislativi, Gjyqësori dhe Presidenciali. Dy të parët kontrollohen nga partia që fiton shumicën në zgjedhje. Ekzekutivi totalisht, Legjislativi diçka më pak, në varësi të çmimit që kanë deputetët e opozitës që blihen kur duhen. Gjyqësori gjithmonë ndikohet nga ekzekutivi, me tendencë të kontrollohet.

Edhe presidenti, i cili zgjidhet vetëm me 3/5 e votave, vjen si produkt pazaresh. Për të pasur garanci që ai nuk do ‘lajthisë’ dhe do t’i prishë punë ekzekutivit, në vite atë e kanë zhveshur nga pushteti. Presidencën e kanë shndërruar në OJQ. Presidentin e kanë reduktuar në një zyrtar ceremonish me një buxhet të tkurrur. Një dekorues dhe shpërndarës titujsh e çmimesh. Dekretet presidenciale kanë peshën dhe vlerën e një letre bakalli.

Me fjalë të tjera, president ‘legen’!

The post President “legen”! appeared first on Albeu.com.

Alqin nuk e njoh fare, por e kuptoj mirë.

Alqi është futur në politikë për të fituar shumë para dhe sa më shpejt.

Politika është si krimi ordiner. Në politikë dhe në krim bëhen para të shpejta, por rreziku është i madh. Mund të të vrasin ose të të fusin në burg. Për larje hesapesh, për konkurencë, për mosbindje. Politika është pak më e sigurt se krimi ordiner. Krimi ordiner të vret, krimi politik, maksimalisht të fut në burg!

Armiku (teorik) më i madh i të dy krimeve, është shteti, prandaj të dy llojet e krimeve përpiqen të kapin shtetin. Krimi ordiner, me anë të korrupsionit, kërcënimeve dhe shantazheve arrin të kapë disa individë të shtetit, kurse politika ka më tepër kontroll mbi shtetin, sepse e ‘prodhon’ vetë atë. E ndërton sipas nevojave të saj.

Alqi dhe “alqët” e partive politike do të bëjnë disa vite burg dhe do të dalin. Do ta bëjnë për vete dhe për bosët e tyre, sepse bosët nuk mund të bëjnë burg! Nuk ka kuptim!

Nëse do të ishin pjesë e krimit ordiner, për kaq para sa kanë vjedhur, ‘alqët’ edhe mund edhe të ishin vrarë.

Zgjedhje e zguar, Alqi!

Je në anën e duhur të krimit.

P.S. Uroj që Alqi të ketë një gjykim të drejtë dhe të shpallet i pafajshëm, nëse është i tillë.

The post Zgjedhje e zgjuar, Alqi! appeared first on Albeu.com.

Po po, duket si paradoks, por nëse protestat do të vazhdojnë, qeveria do të punojë më mirë në angazhimin e saj për të menaxhuar krizën e radhës. Po shpjegohem:

Protestuesit duan të sigurohen se qeveria do të shkurtojë shpenzimet e luksit, shpërdorimet dhe pagesat për partnerët privatë të punëve të saj, në mënyrë që të kursehen fonde për ata ushqehen nga paratë publike.

Protestuesit duan të sigurohen se qeveria e kupton që duhet të kontrollojë çmimet dhe të parandalojë spekulimet.

Protestuesit duan të sigurohen që qeveria të bëjë zgjedhjet dhe zgjidhjet e duhura për të siguruar vazhdimësinë e pranisë së ushqimeve bazike në treg, duke sakrifikuar preferencat e saj monopolistike.

Nga ana tjetër, qeveria duhet të jetë e qetë. Pavarësisht se nga fundi i protestave mund të dëgjohet ndonjë ‘Rama ik’ spontane dhe e ndrojtur, subjekti në fjalë të mos frikësohet; për momentin shqiptarët nuk kanë ndërmend ndonjë alternativë për të.

Këto protesta nuk janë të dhunshme. Protestat e dhunshme i organizojnë opozitat. Vetëm këto lloj protestash prodhojnë dëme, dhunë madje edhe të vrarë në rrugë.

Këto protesta nuk do të rezultojnë as në dëme, as në të vrarë e të plagosur, sepse opozita e sotme nuk organizon dot as një ‘baby shower’, jo më protestë të dhunshme!

The post Protestat e ndihmojnë qeverinë! appeared first on Albeu.com.

Që janë kohë të vështira, kjo duhet të pranohet pa debat. Qeveritë nuk formohen që të shërbejnë vetëm në kohëra ‘të lehta’, më së shumti ato duhet të japin zgjidhjet më të mira për qytetarët e vendit të tyre, në kohë krizash dhe larg qoftë, luftërash. Lufta dhe jo vetëm, kanë sjellë një krizë energjitike të cilën qeverisë i duhet patjetër ta menaxhojë.

E para, ndjeshmëria dhe rëndësia e madhe e subjektit, mund të rrezikojë direkt pushtetin. Shkurtimet e furnizimit dhe rritjet zinxhir të çmimeve do të shkaktonin trazira sociale të pakontrollueshme.

E dyta, energjitika në përgjithësi dhe karburantet në veçanti janë “tagjia” kryesore që konsumon ekonomia jonë, qoftë ajo shtetërore, qoftë private. Paratë që qeveria siguron nga taksimi i naftës, janë më të lehtat për t’u mbledhur dhe janë një fraksion i konsiderueshme i të ardhurave buxhetore. Ndërkohë, fitimet nga shitjet e karburanteve, në pjesën më të madhe të tyre investohen në ndërtim, në sektorin që udhëheq ekonominë shqiptare në kohët e sotme.

Por a jemi të bindur që qeveria do dhe di të menaxhojë këtë krizë?!

Kjo është puna e opozitës!

Për fat të keq, sot nuk kemi opozitë partiake.

E vetmja opozitë që kemi, është protesta.

Në formën se si po ndodh sot, ajo vendos njëfarë presioni mbi qeverinë, por jo presion ‘ekzekutiv’, përsa kohë këto protesta nuk i organizojnë partitë politike.

Unë dje dola në protesë.

Do dal edhe nesër.

The post Protesta, e vetmja opozitë që kemi! appeared first on Albeu.com.

Po po, edhe sikur mbi territorin tonë të mos fluturojë asnjë avion luftarak, të mos hidhet asnjë rraketë, të mos shkelë asnjë ushtar përveç atyre të NATO-s, lufta që ka plasur 2000 kilometra larg nesh, do të “plagosë” shumicën e shqiptarëve.

Dikë më lehtë, të pasurit, dikë më rëndë, të varfrit. Mbase jo të gjithë jemi të ndërgjegjshëm se çfarë do të ndodhë me çmimet e gjithçkaje në ditët dhe muajt që vijojnë. Ato do të rriten, miq. Është e paevitueshme.

Dikush mund të thotë që do bëjmë si do bëjmë, do përshtatemi dhe do të mbijetojmë. Jam dakord. Lufta është diçka që nuk varet nga ne, nuk bëjmë dot asgjë për ta ndalur atë. E megjithatë diçka mund ta bëjmë që sot, duke mos e lodhur fare trurin; të mbajmë anën e duhur në këtë konflikt. E them këtë sepse po shohim që disa tipa, hapur apo fshehur, po mbajnë anën e “ariut rus”.

Kjo nuk është lufta e rusëve o miq, kjo është lufta e “putinëve”. Si mund të mbash anën e dikujt që me kokën e tij të çmendur ka vendosur që në rastin më të keq të të vrasë, në rastin më të mirë të të fusë dorën në xhep, duke të pakësuar bukën e fëmijëve?!

Ne jemi me NATOn!

Ne jemi me Amerikën!

Ne jemi me Bashkimin Evropian!

Ne jemi për Ukrainën e lirë!

The post Të gjithë do të “plagosemi”! appeared first on Albeu.com.