Meta tha gjatë konferencës se Autoriteti i Dosjeve ka kryer të paktën 6 vepra penale, ndërsa ka nisur ndaj tij një sulm në favor të kryeministrit Edi Rama.

“Siç kisha paralajmëruar, sot kam depozituar kallëzim penal ndaj Autoritetit të Dosjeve lidhur me shkeljet flagrante të ligjit nga ana e tyre në shërbim të Edi Ramës kundër meje.

Anëtarët e këtij autoriteti kanë konsumuar të paktën 6 vepra penale të cilat janë: Shpërdorim detyre; Falsifikim i dokumenteve shtetërorë; Falsifikim kompjuterik; Falsifikim i vulave, stampave, formularëve; Përhapja e informatave të rreme që ngjallin panik dhe zbulimi i akteve ose të dhënave sekrete të kryera në bashkëpunim.

Autoriteti i Dosjeve ka shkelur parimet e funksionimit të tyre. Parimin kushtetues, të sigurisë juridike. Pas asnjë kërkesë nga një institucion kushtetues, nis procesin e verifikimet për një figurë publike, ish-presidenti i republikës dhe nxjerr konkluzione shteruese pa asnjë provë. Në rastin konkret, Ilir Rexhep Metaj ishte hetuar nga dy komisione”, tha Meta duke shtuar se ai ishte qelibar dhe me një të shkuar të bardhë si dëbora.

“Është një sulm i hapur kundër pluralizmit politik. Mua më bëjnë nder se e kaluara ime është dëborë e bardhë. Kur këta falsifikojnë dokumentet e atyre viteve mendoni ç’bëjnë me firmën e tyre.”, u shpreh Meta.

The post Meta: E shkuara ime është e bardhë si bora appeared first on Albeu.com.