Deputeti i Vetëvendosjes, Ilir Kërçeli, ka reaguar pas aktakuzës së Prokurorisë Speciale ndaj Fatmir Shehollit, i cili dyshohet për “spiunazh” dhe “shantazh”.

Ai ka ngritur pikëpyetje mbi mundësinë që Sheholli të mos ketë vepruar i vetëm, duke kërkuar të dihet se cilët persona të tjerë mund të jenë pjesë e kësaj skeme.

“Sa të tjerë kanë bashkëpunuar me Shehollin, sa prej tyre kanë përcjellë narrativa të deleguara nga ‘burimi’ Sheholli-Dimiq”, ka shkruar Kërçeli.

Pas publikimit të aktakuzës, janë bërë publike pretendime për një skemë të lidhur me BIA-n serbe, e cila dyshohet se ka synuar të ndikojë në zhvillimet politike dhe të dëmtojë figura politike në Kosovë. Sipas aktakuzës, Sheholli dyshohet se ka vepruar nën udhëzimet e një zyrtari të BIA-s.

Kërçeli ka thënë se për Shehollin dihet se ka qenë bashkëpunëtor i sigurimit të shtetit serb. Sipas tij, shumë figura publike e kanë takuar, kanë fotografi me të dhe ai ka qenë i pranishëm në ambiente të ndryshme.

Ai ka përmendur gjithashtu persona që, edhe gjatë kohës së luftës, kanë lehtësuar takime pikërisht me drejtuesin e sigurimit të shtetit serb.

Sipas Kërçelit, çështja kryesore është të zbulohet se sa persona të tjerë kanë bashkëpunuar me Shehollin dhe sa prej tyre kanë përcjellë narrativa të deleguara nga “burimi” Sheholli-Dimiq.

“Si ka funksionuar ky bashkëpunim?”

Pyetjet që kërkojnë përgjigje lidhen me vendin ku janë publikuar këto të dhëna, financuesit e tyre dhe personat që mund të jenë paguar përveç Shehollit. Kërçeli kërkon gjithashtu të sqarohet nëse ka edhe të tjerë të përfshirë.

The post Kush është paguar, përveç Shehollit?” – Kërçeli kërkon sqarime për skemën e dyshuar appeared first on Albeu.com.

Egzon Reshani do të qëndrojë në paraburgim për një muaj, deri më 3 shtator 2026, pasi Departamenti për Krime të Rënda i Gjykatës Themelore në Prizren miratoi kërkesën e Prokurorisë së Shtetit për caktimin e kësaj mase.

Në njoftimin e Gjykatës bëhet e ditur se Reshani dyshohet për tri vepra penale: dy raste të veprës penale “Detyrimi” në bashkëkryerje, veprën penale “Privimi i kundërligjshëm i lirisë” në bashkëkryerje dhe veprën penale “Frikësimi gjatë procedurës penale” në vazhdimësi.

Gjykata, duke u mbështetur në provat e siguruara deri në këtë etapë të hetimit, ka çmuar se ka dyshim të bazuar që i pandehuri, gjatë vitit 2025, ka vepruar në bashkëkryerje dhe në kuadër të një grupi të organizuar. Ai dyshohet se, përmes kanosjes, e ka detyruar të dëmtuarin të ndërmarrë veprime në dëm të pasurisë së vet, duke i shkaktuar humbje materiale, por edhe frikë, ankth, pasiguri e shqetësim për jetën e tij dhe të familjarëve.

Dyshimet lidhen gjithashtu me një rast gjatë vitit 2025, kur i pandehuri, bashkë me katër persona të tjerë, pretendohet se e ka mbajtur të dëmtuarin të mbyllur kundër vullnetit të tij, duke e privuar në mënyrë të kundërligjshme nga liria.

Për vitin 2026, Reshani dyshohet se, në periudha të ndryshme, ka ushtruar forcë, kanosje serioze dhe forma të tjera detyrimi ndaj të dëmtuarit, me synimin që ky i fundit të mos paraqiste deklarata dhe informacione të vërteta para Prokurorisë dhe, në këtë mënyrë, të pengohej procedura penale.

Në arsyetimin për domosdoshmërinë e paraburgimit, Gjykata ka theksuar se E.R. ndodhej në arrati që prej janarit 2026 dhe kërkohej nën dyshimin për disa vepra penale. Sipas saj, këto rrethana krijojnë rrezik të madh që ai, në rast lirimi, të largohet nga Republika e Kosovës për t’iu shmangur përgjegjësisë penale.

Gjykata ka vënë në dukje edhe faktin se hetimet vazhdojnë dhe se pritet mbledhja e provave të tjera materiale, dëgjimi i të dëmtuarit dhe i dëshmitarëve, si dhe marrja e deklaratave nga të pandehurit. Ajo ka vlerësuar se mbrojtja në liri do të krijonte mundësi që i pandehuri të ndikonte tek i dëmtuari për t’i ndryshuar deklaratat e dhëna më herët, duke cenuar rrjedhën normale të procedurës penale.

Pasi analizoi pretendimet e palëve të paraqitura në seancën dëgjimore, Gjykata arriti në përfundimin se, për shkak të peshës së veprave penale dhe rrethanave në të cilat dyshohet se ato janë kryer, vetëm paraburgimi mund të sigurojë praninë e të pandehurit dhe vijimin pa pengesa të procedurës penale.

The post Gjykata cakton një muaj paraburgim për Egzon Reshanin, i dyshuar për disa vepra penale appeared first on Albeu.com.

Akuzat për tradhti janë bërë mollë sherri mes një çifti të moshuar në Gjakovë, të cilët u përleshën pas mosmarrëveshjeve, me ç’rast bashkëshorti 91-vjeçar dyshohet se ushtroi dhunë fizike ndaj gruas së tij 78-vjeçare.

Kjo ngjarje ka ndodhur në rrugën “Nëna Terezë” në Gjakovë, në orët e mëngjesit të ditës së djeshme, kur dikush e njoftoi Policinë për këtë rast të dhunës në familje.

Burimet nga Prokuroria kanë bërë me dije se motivi i gjithë sherrit që plasi në këtë familje janë akuzat e burrit, i cili e ka rrahur bashkëshorten e tij, duke i bërë presion, se gjoja se ajo e ka tradhtuar me një person.

Kjo ka bërë që Policia të aktivizohet dhe ta arrestojë të dyshuarin, i cili është shoqëruar në stacion policor, ku ka dhënë deklaratë në lidhje me rastin. Përveç tij, para hetuesve policorë ka dëshmuar edhe viktima, e cila ka vendosur të shkojë te e bija për të jetuar, pasi aty ndihet më e sigurt.
Të dyshuarin 91-vjeçar, Prokurori i Shtetit ka vendosur që ta hetojë në procedurë të rregullt për dhunë në familje.

The post Dyshonte se e kishte tradhtuar, 91-vjeçari dhunon fizikisht bashkëshkorten e tij appeared first on Albeu.com.