Si kamuflohej Dritan Gjika?

Ai ruante profilin e një biznesmeni që merrej me eksportin e produkteve bujqësore dhe ndërtimit ndërsa ka futur në tregjet europiane tonelata kokaine. Për herë të parë shkeli në Ekuador në vitin 2009 dhe në vitin 2013 regjistroi kartën e identitetit ekuadoriane në qytetin Guayaquil, që prej atëherë konsiderohet edhe si vendbanimi i tij zyrtar.

Gjika krijoi disa kompani për t’i shfrytëzuar më pas për trafikun e drogës. Në vitin 2014 bleu aksione në kompaninë “Cresmark”, eksportuese e produkteve bujqësore, ku kishte ortak edhe shqiptari tjetër, Erjon Spahiu.

Këtu nisi gjithçka. Fillimi i një operacioni që do të përfshinte një sërë kompanish me emra të ndryshëm por me të vetmin qëllim, pastrimin e parave dhe fshehjen e drogës në ngarkesat e produkteve.

Në vitin 2021, ai themeloi tetë kompani në bashkëpunim me Rubén Cherres, një biznesmen ekuadorian me lidhje të forta politike, i cili më vonë u vra në mënyrë brutale në vitin 2023 në Santa Elena.

Sipas autoriteteve ekuadoriane dhe spanjolle, Gjika kishte ndërtuar një strukturë kriminale që niste kokainë nga laboratorët kolumbianë drejt Ekuadorit, ku ruhej në sasi të mëdha në provincat Cotopaxi, Los Ríos dhe Guayas.

Droga futej në ngarkesat e bananeve dhe eksportohej drejt vendeve si Spanja, Belgjika, Holanda, Turqia dhe Shqipëria.

Vetëm në Shqipëri, në vitin 2021, janë kapur ngarkesa me kokainë në kontejnerët që vinin nga Amerika e Jugut, përfshirë 10 kilogramë në portin e Durrësit, me porositës firmën “Alba Exotic Fruit”, e përmendur edhe në hetime të mëparshme në Greqi për një rast të ngjashëm me 137 kg kokainë.

Ndërkohë, në media qarkullonin regjistrime audio ku dëgjoheshin biseda të Gjikës me njerëz të afërt të pushtetit. Në një raport të Prokurorisë ekuadoriane, emri i tij lidhej drejtpërdrejt me dosjen “León de Troya”, një hetim për trafik droge dhe korrupsion që përfshinte edhe Danilo Carreran, kunatin e ish-presidentit Lasso.

Megjithatë, në janar të vitit 2022, Prokuroria kërkoi mbylljen e hetimit, duke deklaruar se mungonin elementët penalë. Kjo lejoi Gjikën të vazhdonte aktivitetin e tij të paligjshëm pa ndërhyrje.

Rifillimi i hetimeve

Hetimi që e përfshinte atë u rifillua pas vrasjes së partnerit të tij Cherres, dhe kulmoi me operacionet policore “La Pampa” dhe “Gran Fénix XIII”, të zhvilluara në bashkëpunim mes autoriteteve ekuadoriane dhe spanjolle. Operacioni final, i zhvilluar më 6 shkurt 2024, identifikoi Dritan Gjikën si drejtuesin e organizatës kriminale, por ai nuk u arrestua në atë moment. U zbulua se përmes kompanive të tij dhe njerëzve të përfshirë, ai kishte pastruar mbi 30 milionë dollarë në sistemin financiar ekuadorian.

The post Ndërtoi ‘perandori’ droge në Ekuador, kush është Dritan Gjika, ‘biznesmeni’ që furnizoi Europën me kokainë appeared first on Albeu.com.

Lajmin e ka bërë të ditur ministria e Brendshme e Ekuadorit, e cila me anë të një postimi në X thotë se arrestimi i Gjikës u bë gjatë një operacioni ndërkombëtar të zhvilluar sot (26 maj).

Ai ishte në kërkim ndërkombëtar nga Interpol për trafik droge, pastrim parash dhe krim të organizuar.

Sipas autoriteteve ekuadoriane, 47-vjeçari shqiptar drejtonte një organizatë kriminale që vepronte në Ekuador dhe Spanjë, duke dërguar sasi të mëdha droge në Amerikën Qendrore dhe Evropë.

Ministria e Brendshme tha në një deklaratë se “Dritan Gjika është bërë një nga burrat më të kërkuar në vend” për trafikimin e drogës, pastrimin e parave dhe operacionet e krimit të organizuar.

Në shkurt të vitit 2024, Zyra e Prokurorit të Përgjithshëm të Ekuadorit e quajti atë udhëheqësin e operacioneve të mafias shqiptare në vend, por ai nuk mundi të gjykohej sepse ishte i arratisur.

Në janar të këtij viti, një gjykatë ekuadoriane kundër korrupsionit dënoi tetë persona me afërsisht 17 vjet burg. Ata ishin pjesë e një organizate kriminale të lidhur me mafian shqiptare.

The post Arrestohet në Abu Dhabi Dritan Gjika, kreu i mafies shqiptare në Ekuador! Në kërkim nga Interpol për trafik droge, pastrim parash e krim të organizuar appeared first on Albeu.com.

Më 6 shkurt, operacioni “Pampa”, ose “Gran Fenix 13”, mes disa shteteve lejoi kapjen e 32 anëtarëve të dyshuar yë organizatës kriminale, e cila drejtohej nga shqiptari Dritan Gjika, bashkëpunëtor i Ruben Cherres.

18 persona u kapën në Ekuador, 13 në Spanjë dhe 1 në Mbretërinë e Bashkuar. Këtë të premte, Policia spanjolle ka nxjerrë detaje të reja nga hetimi, i cili mbetet i hapur. Nga viti 2019 kësaj organizate i janë sekuestruar 3.4 ton kokainë, e dërguar në vende si Belgjika, Rusia, Rumania, Shqipëria, Holanda dhe Spanja.

Droga u transportua ng Ekuadori me kontejnerë frutash në portet evropiane në bazë të “një kontratë me furnitorët e saj kolumbianë për të marrë 4000 kilogramë kokainë në muaj “, tha Policia.

Hetimet kanë bërë të mundur zbulimin e aseteve të pastruara me vlerë 36 milionë dollarë në Ekuador dhe 12 milionë euro në Spanjë. Përveç kësaj ata zbuluan se disa nga të hetuarit do të pastronin fitimet e tyre të paligjshme përmes blerjes së aseteve kripto .

Katër vite kërkime

Organizata kriminale përdori një “rrjet kompleks biznesi” për të pastruar paratë, detajoi Policia spanjolle në një deklaratë.

Hetimi filloi në vitin 2020, kur “një biznesmen me origjinë argjentinase” u zbulua në Spanjë, me qendër në qytetin e Marbella, i cili kontrollonte një gamë të gjerë kompanish.

-Kompani të përkushtuara për eksportin e bananeve nga Ekuadori në Spanjë

-Qendra sportive në Marbella

-Qendrat tregtare në Granada

-Bizneset e mikpritjes dhe jetës së natës

Lidhur me këto kompani, autoritetet spanjolle zbuluan shenja financimi të fshehura. Ky zbulim bëri që autoritetet spanjolle të hetonin origjinën e parave. Kështu ata konstatuan ekzistencën e lidhjeve mes biznesmenit dhe trafikut detar të drogës.

Ishte një hetim kaq i ndërlikuar sa që kërkoi katër vjet punë dhe bashkëpunimin e Europolit, ministrave të Brendshëm të Spanjës në Ekuador dhe Rusisë dhe Atashetë e Brendshëm në Shqipëri, Belgjikë, Holandë dhe Turqi.

Një “ekspert” për pastrim parash

Policia e Ekuadorit kishte bërë të ditur tashmë se shqiptari Dritan Gjika drejtonte organizatën kriminale dhe detyra e tij ishte futja e drogës nga Kolumbia në Ekuador, për ta dërguar në portet evropiane.

Detyra tjetër e rëndësishme, pra pastrimi i parave nga trafiku i drogës, ishte në ngarkim të “një eksperti pastrimi”, bëri të ditur Policia spanjolle, duke iu referuar biznesmenit argjentinas, me qendër në Marbella, emri i të cilit nuk bëhet i ditur.

Rrjeti kompleks financiar ishte “dizenjuar dhe menaxhuar” nga ai, i cili ishte subjekt i një Urdhri Hetimi Evropian nga autoritetet e Holandës.

Gjatë hetimit agjentët zbuluan dërgesa parash në Barcelonë. Autoritetet spanjolle kanë sekuestruar prona me vlerë rreth 12 milionë euro, kanë bllokuar 88 llogari bankare dhe kanë ndërhyrë juridikisht në katë kompani.

The post “Kishin një ekspert të përkushtuar”, si vepronte mafia shqiptare për të pastruar paratë nga trafiku i drogës në Ekuador dhe Spanjë appeared first on Albeu.com.

Dritan Gjika, sipas të dhënave të vendit të tij, ka mbaruar shkollën e mesme. Megjithatë, në Ekuador financat e tij u dalluan në pandemi.

Mes viteve 2015 dhe 2018, shqiptari nuk ka paguar tatimin mbi të ardhurat, sipas Shërbimit të të Ardhurave të Brendshme (SRI). Në vitin 2019 dhe 2020, vlera që u tatua i kaloi 500 dollarët, në secilin prej atyre viteve. Por në vitin 2021, ai pagoi 15,342 dollarë tatimin mbi të ardhurat, ndërsa taksa e daljes së monedhës atë vit i kaloi 3,700 dollarët. Në vitin 2022 nuk ka paguar tatimin mbi të ardhurat; por kontribuoi me 1,805 dollarë për dalje të valutës së huaj.

Cili ishte aktiviteti fitimprurës i Gjikës në Ekuador? Gjika inkorporoi një duzinë kompanish në të njëjtën ditë, më 17 qershor 2021, së bashku me Rubén Cherres. Gjëja e dyshimtë e kompanive të krijuara njëkohësisht është se ato kanë një gamë të gjerë objektesh sociale, duke filluar nga prodhimi i mishit, përmes turizmit dhe promovimit të shfaqjeve, sipas dokumenteve që dalin në hetimin e kryer nga zyra e asambleistit Ricardo Vanegas.

Cherres, në dosjen e tij të identitetit, figuron si invalid dhe përmend “cisternën e naftës” si profesionin e tij, pa shpjegime të mëtejshme.

Sipas policisë së shtetit shqiptar, Gjika nuk ka precedentë penalë dhe nuk është arrestuar nga policia shqiptare.

Megjithatë, në shtator 2021, policia italiane e dëboi atë nga Treviso, Itali, pasi nuk kishte mbledhur dokumentacionin e nevojshëm për të hyrë në atë vend.

Të dhënat tregojnë se ai ka udhëtuar mes Shqipërisë dhe Dubait. Për hetuesit e specializuar, Dubai, një nga shtatë emiratet arabe, është një destinacion kryesor për pastrimin e parave. Kështu shpjegohet nga kryeqyteti shqiptar, Tirana, nga gazetarja Fatjona Medjini, nga Iniciativa Globale kundër Krimit të Organizuar.

Më 7 janar të këtij viti, në prag të shpërndarjes së audiove të para që zbardhën rastin, shqiptari Gjika u nis drejt Turqisë. Që atëherë nuk dihet vendndodhja e tij. Mungesa e vazhdimësisë në hetimin e policisë ekuadoriane e lejoi atë të zhdukej.

Skandali për akte të mundshme korrupsioni (shpërblime me ndikim dhe ryshfet) të strukturës së Cherres krijoi një hetim në Legjislaturë.

Por tronditja që shkaktoi ankesën ndaj Qeverisë kaloi në një pauzë të detyruar, për shkak të gabimeve në thelb dhe formë që Kuvendi bëri në përpjekjen e deritanishme të pasuksesshme për ta çuar Presidentin Lasso në shkarkim. /albeu.com

The post Historia e Dritan Gjikës: Shqiptari misterioz që u pasurua në Ekuador appeared first on Albeu.com.