Gonzalez Vasquez u prezantua mëngjesin e sotëm në “Shtëpinë e Futbollit” si drejtori i ri i arbitrave në futbollin shqiptar.

Gjatë fjalës së tij, spanjolli falënderoi presidentin e Federatës Shqiptare të Futbollit, Armand Duka, për besimin dhe mundësinë për të marrë drejtimin e arbitrimit. Ai foli gjithashtu për përvojën që synon të vërë në shërbim të përmirësimit të gjykimit në vend.

“Mirëmëngjesi të gjithëve dhe faleminderit për praninë tuaj. Dua të shpreh mirënjohjen time ndaj presidentit të Federatës Shqiptare të Futbollit për detyrën që më ka besuar si drejtues i arbitrimit.

Nuk kam ardhur për të folur për veten, por për eksperiencën time në arbitrim. Askush nuk mund ta dijë se çfarë rezervon e ardhmja apo çfarë mund të ndodhë. Këtë sfidë të re e nis me shumë dëshirë dhe entuziazëm. Nuk ishte e thjeshtë të lija jetën dhe përgjegjësitë e mia në vendin tim, por vlerësimet pozitive që kam dëgjuar për këtë federatë përbënë një element vendimtar për mua.

Fillimisht dua të njihem nga afër me mënyrën se si funksionon arbitrimi. Këtu ka shumë talente dhe objektivi që propozoj është i qartë: arbitrat duhet të përmirësohen çdo ditë. Në Spanjë përdorim shprehjen se sa më shumë punoj, aq më shumë fat kam. Pikërisht te puna kemi mundësi të bëjmë më mirë. Do të jem njëri prej jush dhe së bashku do të japim maksimumin.

Nuk mund ta parashikoj të nesërmen, por e di se arbitrat mund të gabojnë, pasi janë njerëz. Për këtë arsye, kërkoj edhe bashkëpunimin e medias.

Në lojë përfshihen shumë aktorë, mes tyre futbollistët dhe trajnerët. Herë pas here harrojmë se kemi detyrimin të shërbejmë si shembull për të tjerët dhe veçanërisht për të rinjtë.

Mund të jap dy premtime: do të punoj fort dhe do të krijoj besueshmëri. Është kënaqësi të jem këtu. Ju faleminderit shumë”, deklaroi Gonzalez Vasquez.

The post Gonzalez Vasquez merr drejtimin e arbitrimit shqiptar: Vij me entuziazëm, premtoj punë dhe besueshmëri appeared first on Albeu.com.