Pesë zyrtarë të Listës Serbe pritet të kalojnë javën e ardhshme nga angazhimet politike dhe institucionet lokale në bankën e të pandehurve. Të enjten, më 13 gusht, Igor Simiq, Ivan Zaporosaq, Ivan Todosijeviq, Zoran Todiq dhe Vasilije Tomaseviq do të paraqiten si të pandehur para Prokurorisë Themelore në Mitrovicën e Veriut.

Të pestë kanë ushtruar ndër vite funksione politike në vend, ndërsa tani janë nën hetim për veprën penale “Falsifikim i dokumenteve”.

Zyrtarisht nuk janë bërë të ditura hollësi të tjera, përveç faktit se atyre u janë dërguar ftesa në cilësinë e të pandehurve. Megjithatë, RTK mëson se procedurat penale lidhen me funksionimin e komunave paralele serbe dhe dokumentet e lëshuara prej tyre, institucione që autoritetet e Kosovës i mbyllën përfundimisht gjatë aksioneve policore.

Pjesë e hetimeve është gjithashtu kundërshtimi i mëhershëm i këtyre zyrtarëve për t’i dorëzuar zyrat e katër komunave në veri.

Rasti ka marrë peshë të veçantë institucionale për shkak të Igor Simiqit, i cili aktualisht është deputet aktiv në Kuvendin e Kosovës dhe ndodhet në qendër të vëmendjes së këtij procesi.

“Fatkeqësisht në politikën kosovare, njerëzit që janë nën hetime ose aktakuza nuk japin dorëheqje së paku për arsye morale ose etike. Një gjë e tillë do të duhej të bëhej edhe nga ky deputet…”, tha Naim Jakaj, hulumtues i lartë në IKD.

Lista Serbe, si forca kryesore politike e serbëve në Kosovë, ka gëzuar prej vitesh mbështetje të fuqishme nga Beogradi zyrtar. Për këtë arsye, çështja shkon përtej pozitës juridike të zyrtarëve dhe përfshin edhe ndikimin që kjo parti mund të ushtrojë mbi zhvillimet politike dhe të sigurisë në Kosovë.

Përballja e tanishme me drejtësinë pason një periudhë të gjatë tensionesh dhe përplasjesh. Veprimet e Listës Serbe kanë qenë vazhdimisht në fokus, veçanërisht gjatë situatave të tensionuara në veri të vendit.

Sipas njohësve të sigurisë, kjo parti vijon të veprojë jashtë kuadrit kushtetues të Kosovës, duke ndjekur udhëzime të drejtpërdrejta nga Beogradi zyrtar dhe duke ruajtur një qasje destruktive.

“Serbia është 100% e fokusuar në Listën Serbe si patericë direkte. Duhej të ishte krejt e kundërta sepse janë shtetas të republikës dhe deputetë dhe duhej ti përfaqësonin interesat e Kosovës. Ata nuk i plotësojnë interesat e Kosovës dhe qasja e tyre në vitin 2026 është ende destruktive”, tha Arben Dashevci, njohës i sigurisë.

Në etapa të ndryshme, pozicionet e Listës Serbe kanë ndikuar në rrjedhat politike të vendit, veçanërisht përmes bojkotimit të institucioneve vendore. Përtej retorikës politike, ky proces shihet si një provë e rëndësishme për aftësinë e sistemit të drejtësisë që ta shtrijë ligjshmërinë në mënyrë të plotë.

The post Pesë zyrtarë të Listës Serbe përballen me hetime, rasti merr vëmendje politike dhe të sigurisë appeared first on Albeu.com.

Ish-deputeti Halil Geci ka dalë hapur në krah të ministres në detyrë të Drejtësisë, Donika Gërvalla, duke theksuar se sektori i drejtësisë në Kosovë po kalon në një kapitull të ri nën udhëheqjen e saj.

Sipas tij, tashmë janë krijuar premisa konkrete për të konsoliduar sundimin e ligjit dhe për të ndriçuar çështje që prej vitesh kanë ngelur në terr.

Geci nënvizon se organet e drejtësisë duhet të ushtrojnë funksionin e tyre pa u ndikuar nga politika dhe pa asnjë lloj favorizimi, raporton “Bota sot”.

Në një shkrim të tij, ai thekson se në asnjë vend me demokraci të konsoliduar nuk tolerohet që dikush të kërcënojë hapur një kryeministër, një funksionar publik apo çdo qytetar tjetër dhe të mendojë se qëndron përtej ligjit. Autoritetet gjyqësore, shton ai, kanë për detyrë të hetojnë mbi bazën e ligjeve, provave dhe fakteve, pa asnjë përjashtim.

Me fuqizimin e mekanizmave të drejtësisë, qytetarët ushqejnë shpresën se çdo dyshim për shkelje ligjore do të shqyrtohet duke u mbështetur në prova konkrete dhe në përgjegjësinë personale, pa marrë parasysh pozitën a biografinë e askujt.

Ardhja e Donika Gërvallës në krye të Ministrisë së Drejtësisë ka ngjallur te shumë njerëz një ndjesë të re optimizmi për forcimin e rendit ligjor dhe për një qasje më të vendosur ndaj dosjeve që për një kohë të gjatë kanë mbetur të pazbardhura.

Për vite me radhë, në perceptimin publik ka dominuar ideja se disa çështje të rënda nuk janë trajtuar me seriozitetin e duhur për shkak të trysnive politike dhe drojës nga personalitete me influencë. Sot, kërkesa qendrore e shoqërisë është që gjykatat të veprojnë lirisht, të udhëhequra vetëm nga normat ligjore dhe materialet provuese.

Askush nuk duhet të gëzojë imunitet faktik përballë ligjit, pavarësisht merituarit, funksionit apo së kaluarës së tij. Përpjekja për liri dhe flijimi i shumë vetëve nuk mund të shndërrohen në justifikim për t’iu shmangur çfarëdo llogaridhënieje të mundshme para drejtësisë.

Kosova ka nevojë urgjente për institucione të qëndrueshme që sigurojnë një sistem të paanshëm, mbrojnë të drejtat e qytetarëve dhe rivendosin besimin se çdo e padrejtë mund të ndeshet përmes kanaleve ligjore.

The post Geci: Me Gërvallën nis një etapë e re për drejtësinë, askush s’mund të jetë mbi ligjin appeared first on Albeu.com.

Përfaqësuesi diplomatik gjerman në Prishtinë, Rainer Rudolph, ka ritheksuar se Berlini kërkon llogaridhënie nga përgjegjësit e sulmit të armatosur të shtatorit 2023 në Banjskë.

Gjatë një deklarate për Milan Radoiçiqin, organizatorin e kësaj ngjarjeje, Rudolph theksoi se Gjermania e ka dënuar rastin me gjuhën më të fortë dhe nuk heq dorë nga kërkesa që fajtorët të nxirren para organeve të drejtësisë.

“Ne e kemi dënuar sulmin me termat më të rëndë dhe qëndrojmë pas kësaj. Kemi insistuar që autorët të përballen me pasojat. Jam në dijeni se Kosova ka aktivizuar një fletarrestim ndërkombëtar. Kjo duhet të zbatohet”, u shpreh ambasadori.

Në pyetjen nëse Radoiçiq do të ekstradohej drejt Kosovës në rast se do të hynte në tokën gjermane, Rudolph konfirmoi se ai do të vihej në pranga. “Natyrisht që do të ndalohej”, u përgjigj ai gjatë një interviste televizive.

Pavarësisht se ka marrë mbi vete përgjegjësinë për operacionin në Banjskë, ku humbi jetën rreshteri policor Afrim Bunjaku dhe u plagosën dy kolegë të tij, Radoiçiq vijon të lëvizë lirshëm në Serbi, duke pasur adresë zyrtare në Beograd. Autoritetet serbe ende nuk kanë iniciuar asnjë procedim penal ndaj tij.

Organizata Ndërkombëtare e Policisë Kriminale (INTERPOL) ka shpërndarë një urdhër-arrest ndërkombëtar për të, me nismën e Kosovës dhe nëpërmjet Misionit të Kombeve të Bashkuara në Kosovë (UNMIK).

Prokuroria Speciale e Republikës së Kosovës ka ngritur aktakuzë për ngjarjen e Banjskës, duke përfshirë mes 45 personave edhe Milan Radoiçiqin, i cili cilësohet si “kreu i formacionit terrorist”.

Në këtë kuadër, Gjykata Themelore në Prishtinë ka shpallur këtë vit dënimet për tre individë: dy prej tyre janë dënuar me burgim të përhershëm, ndërsa një tjetër me 30 vite heqje lirie.

Të pandehurit e mbetur ndodhen në arrati, dhe institucionet kosovare kanë lëshuar urdhra për kapjen e tyre nëpërmjet INTERPOL-it. Prishtina i është drejtuar disa herë Beogradit me kërkesën për ekstradimin e Radoiçiqit, në mënyrë që ai të dalë para gjykatës. Në momentin e sulmit, Radoiçiq mbante postin e nënkryetarit të Listës Serbe, formacionit kryesor politik të serbëve të Kosovës, i cili gëzon mbështetjen e Beogradit.

Shtetet e Bashkuara të Amerikës dhe Bashkimi Evropian vijojnë t’i bëjnë presion Serbisë që të ndjekë penalisht të gjithë personat e implikuar në sulmin e Banjskës.

The post Berlini paralajmëron qëndrim të ashpër për Radoiçiqin: Do të arrestohet nëse shkel në Gjermani appeared first on Albeu.com.

Kryeprokurori i Prokurorisë Speciale, Blerim Isufaj, deklaroi sot se çdo veprim kundër grupeve kriminale në Kosovë përbën investim për sigurinë e qytetarëve dhe për zhvillimin ekonomik të vendit.

Këto deklarata ai i bëri në një konferencë për media, ku foli për aksionet e fundit të ndërmarra nga kjo Prokurori. Sipas informacioneve të bëra publike, në kuadër të një rrjeti të pastrimit të parave të siguruara nga trafikimi i drogës, janë sekuestruar pasuri në vlerë prej 1 milion euro.

Isufaj: Prokuroria Speciale do të veprojë me vendosmëri kur shkelet ligji

“Ne kemi zhvilluar edhe një takim të rëndësishëm, pikërisht me 30 qershor, me përfaqësuesit e autoriteteve të Spanjës, Francës, Italisë, Gjermanisë, Shqipërisë, Britanisë së Madhe dhe Europolit. Ata janë ndarë të kënaqur me punën e prokurorisë dhe jemi pajtuar që të vazhdojmë punën e përbashkët në luftën ndaj krimit të organizuar.. Operacioni i realizuar me 30 qershor të këtij viti tregon një mesazh të qartë se Prokuroria Speciale do të veprojë me vendosmëri, në një mënyrë të koordinuar dhe të qëndrueshme me autoritetet e tjera të zbatimit të ligjit. Çdo goditje ndaj grupeve kriminale është një investim në sigurinë e qytetarëve, zhvillimin ekonomik të vendit, si dhe ngritjen e besimit ndaj institucioneve të drejtësisë”, tha Isufaj.

Isufaj njoftoi se ky operacion është zhvilluar në bashkëpunim me autoritetet italiane dhe franceze, nën koordinimin e Europolit dhe Eurojust-it. Ai sqaroi se, në kuadër të këtij rasti, në shtator të vitit 2025 janë arrestuar dy persona, të dyshuar për pjesëmarrje apo organizim të grupit kriminal të organizuar dhe për shpëlarje parash.

Isufaj: Paratë e fituara nga droga po pastroheshin në mënyrë transnacionale

“Më 30 qershor, Policia e Kosovës, nën udhëheqjen e Prokurorisë Speciale të Republikës së Kosovës, ka kryer disa bastisje në kuadër të një operacioni kundër krimit të organizuar. Ky operacion është realizuar në kuadër të një hetimi mbi pastrimin transnacional të parave, të nxjerra nga trafikimi i drogës, nga autoritetet italiane dhe franceze, të koordinuar nga Europoli dhe Eurojust-i, e në bashkëpunim të plotë me Prokurorinë Speciale të Kosovës. Në kuadër të këtij rasti, janë arrestuar dy persona në shtator të vitit 2025, nën dyshimin për kryerjen e veprave penale: pjesëmarrja apo organizimi i grupit kriminal të organizuar dhe shpëlarja e parave”, tha Isufaj.

Kryeprokurori foli edhe për disa operacione të tjera me rëndësi, për të cilat tha se janë realizuar nga ky institucion.

Isufaj: Prokuroria Speciale ishte pjesë e operacionit ndërkombëtar “Switch off”

“Operacioni Mega në qershor, u arrestuan tre persona për dyshimin e veprës penale të financimit të terrorizimit, furnizimin me armë dhe shpërndarjen e narkotikëve. Operacion tjetër me 1 korrik, janë arrestuar nëntë persona të cilët dyshohej për vepra penale: shpërlaje parave, kontrabandim i mallrave në bashkëkryerja pjesëmarrje në grup kriminal, dokumente të rrejshme të shpalljes së tatimit.. 7:21 Përveç të tjerash, Prokuroria Speciale ishte pjesë e operacionit ndërkombëtar “Switch off”, në janar të këtij viti duke treguar kështu përkushtim në luftën kundër krimit financiar. Operacioni njëkohësisht është zhvilluar edhe në Mbretërinë e Bashkuar, Spanjë, Itali dhe Rumani, i cili mundësoi eliminimin e një infrastrukture informatike, e cila shërbente në mënyrë të paligjshme për miliona përdorues në nivel kombëtar dhe ndërkombëtar përmes një sistemi të sofistikuar informativ, IPTV”, tha Isufaj.

I pyetur lidhur me ngritjen e aktakuzës ndaj përgjegjësve për masakrën kundër familjes Jashari në Prekaz, Isufaj tha se hetimet janë drejt përfundimit dhe se, pasi të sigurohen provat, do të pasohet me aktakuzë ndaj të dyshuarve.

Isufaj: Hetimet për masakrën ndaj familjes Jashari janë në përfundim, pritet aktakuza

“Hetimet do të përfundojnë shumë shpejt. Nëse ne kemi siguruar provat mjaftueshëm atëherë do të ketë aktakuzë. Është shumë sensitiv dhe kërkon maturi, nuk mund të themi asgjë më tepër, veçse hetimet janë në përfundim”, shtoi ai.

The post Isufaj: Goditja e grupeve kriminale forcon sigurinë e qytetarëve dhe ekonominë e vendit appeared first on Albeu.com.

Ajo e ka vlerësuar lart rolin e Medica Mondiale, duke e cilësuar këtë organizatë si një ndër zërat më të fuqishëm në botë në mbrojtje të grave dhe të mbijetuarve të dhunës seksuale të përdorur si armë lufte.

Në një postim në Facebook, Gërvalla ka bërë të ditur se së bashku me Dr. Hauser dhe znj. Mirlinda Sada nga Medica Gjakova kanë diskutuar për domosdoshmërinë e luftimit të stigmës dhe ri-traumatizimit të të mbijetuarve, për rëndësinë e një qasjeje të ndjeshme ndaj traumës në sistemin e drejtësisë, si dhe për forcimin e mekanizmave institucionalë në mbështetje të tyre.

Më tej, Gërvalla ka theksuar se drejtësia tranzicionale nuk mund të konsiderohet e plotë pa trajtimin e traumës, pa njohjen e dinjitetit të të mbijetuarve, pa krijimin e hapësirave të sigurta për dëshmitë e tyre dhe pa dënimin e autorëve të krimeve.

Ajo ka shtuar se puna dhe përkushtimi jetësor i Dr. Monika Hauser mbetet një dëshmi e përhershme se dinjiteti i të mbijetuarve, e vërteta dhe drejtësia nuk janë vetëm çështje politike apo juridike, por para së gjithash obligime njerëzore dhe morale.

The post Gërvalla: Drejtësia për të mbijetuarit e dhunës mbetet një detyrim njerëzor appeared first on Albeu.com.

Ajo bëri të ditur se çmimi “Sali Çekaj” u kushtohet personaliteteve që kanë dhënë një kontribut të veçantë në fushën e drejtësisë në Republikën e Kosovës.

Në një postim në rrjete sociale, Gërvalla e cilësoi Sali Çekajn si një nga figurat më të spikatura të historisë së Kosovës, duke vënë në pah rolin e tij si “komandant i UÇK-së, politikan vizionar dhe jurist i dalluar”.

Sipas saj, përkushtimi i tij për lirinë e vendit, bashkë me angazhimin profesional, e shndërrojnë Çekajn në një figurë që frymëzon breza juristësh në Kosovë.

“Figura e Sali Çekajt, krahas figurës së komandantit të UÇK-së dhe politikanit vizionar, me përkushtim të parezervë për lirinë e vendit deri në flijim në ballë të frontit, rrezaton edhe si figurë e një juristi të rrallë, të guximshëm, mendjemprehtë e të vendosur. Figurë që frymëzon breza e breza juristësh në vendin tonë”, ka deklaruar Gërvalla.

Ajo theksoi gjithashtu se ky çmim, që bart emrin e Heroit Sali Çekaj, është menduar të vlerësojë individët me kontribut të veçantë në drejtësi, ndërsa njëkohësisht nderon veprën dhe trashëgiminë e tij.

Komandant Sali Çekaj, i vrarë më 19 prill 1999 në krye të detyrës, në Koshare, si komandant i Brigadës 134, vlerësohet si një ndër strategët më të shquar të luftës së Kosovës.

Veprimtaria e tij atdhetare kishte filluar shumë më herët, si në Kosovë, ashtu edhe në ekzil, prej nga më vonë ishte kthyer për të veshur uniformën dhe për t’iu bashkuar luftës për liri.

The post Gërvalla formalizon çmimin “Sali Çekaj” për kontribut në drejtësi appeared first on Albeu.com.

Në këtë marsh që kërkon drejtësi për ish-krerët e UÇK-së që po gjykohen në Hagë kanë marrë pjesë mijëra qytetarë.

E pranishme ka qenë edhe presidentja e vendit, Vjosa Osmani, e cila është parë në këtë tubim afër djalit të ish-presidentit Hashim Thaçi, Endrit Thaçit dhe kreut të Grupit Parlamentar të Partisë Socialiste, Taulant Balla.

Qytetarët që kanë marrë pjesë në marsh në duar kanë mbajtur pankartat si “Liria ka Emër”, “Historia nuk mund të rishkruhet”, “Liri në emër të popullit”.

Themeluesi i platformës “Liria ka Emër”, Ismajl Tasholli në fjalën e tij para qytetarëve ka thënë se pavarësisht proceseve gjyqësore, lufta e UÇK-së ishte çlirimtare dhe nuk mund të relativizohet.

The post Mijëra të pranishëm në përkrahje të ish-krerëve të UÇK-së në Hagë, mbyllet marshi “Drejtësi, jo politikë” appeared first on Albeu.com.

Ai e ka quajtur Këshillin e Lartë Gjyqësor (KLGJ), “simbolin e dështimit” të reformës në drejtësi, duke e akuzuar për vonesa të pajustifikueshme dhe për pengimin e funksionimit normal të gjykatave.

Maliqi deklaron se reforma e nisur 9 vite më parë ka larguar qindra gjyqtarë dhe prokurorë, duke lënë pas një sistem të paralizuar që prodhon vetëm “vonesa, padrejtësi dhe pasiguri”.

Ai thekson se qytetarët presin deri në 4 vjet për një gjyq të shkallës së parë dhe 6–7 vjet për Apelin, ndërsa disa mbeten peng të drejtësisë për 15 vite.

Deklarata:

Pas ngjarjes tragjike ku humbi jetën gjyqtari Astrit Kalaja në sallën e gjyqit, sistemi i drejtësisë është zhveshur plotësisht nga çdo fasadë.

Kjo është fytyra e vërtetë e kaosit që ka mbjellë një reformë e kapur politikisht, që shkatërroi institucionet, largoi qindra gjyqtarë e prokurorë dhe sot prodhon vetëm vonesa, padrejtësi dhe pasiguri!

Turp që 9 vjet pas kësaj “reforme historike”, shqiptari duhet të presë 4 vjet për një gjyq të shkallës së parë dhe 6-7 vjet në Apel!

Ka njerëz që mbeten peng i drejtësisë për 15 vjet, ndërsa pushtetarët shëtisin të qeshur mes luksit dhe korrupsionit që kanë mbjellë vetë!

Dhe ndërkohë…

Janë diplomuar 45 gjyqtarë të rinj, magjistratë që kanë përfunduar trajnimin, por presin prej 4 muajsh që KLGJ t’i emërojë në gjykata!

Nga njëra anë, KLGJ e qeveria ankohen se nuk ka gjyqtarë dhe se stoku i dosjeve ka kaluar mbi 200 mijë, ndërsa nga ana tjetër mbajnë peng 45 të rinj që mund të ndihmonin menjëherë sistemin!

Ky është absurdi dhe cinizmi i një drejtësie që po mbahet peng nga vendime politike dhe interesa të ngushta!

KLGJ sot nuk është garant i drejtësisë, por pengmarrësi i saj!

Shqiptarët e kanë kuptuar: kjo nuk është reformë për drejtësi, por për pushtet!

Koha e mashtrimeve mbaroi – drejtësia duhet t’i kthehet qytetarit, jo partisë!

The post Lefter Maliqi: KLGJ, simboli i dështimit të reformës në drejtësi appeared first on Albeu.com.

Ish-deputeti u lirua pas më shumë se 9 muaj qëndrim në burgun e Fierit pa përfunduar afatin e dënimit me 1 vit burg të caktuar nga Apeli në Tiranë.
Kujtojmë se Gjykata e Fierit, vendosi më 8 korrik 2025 lirimin me kusht të Ervin Salianjit për shkak se prokurori i çështjes dha dakordësinë.
Më 26 shtator 2024, Gjykata e Apelit mori vendimin për dënimin me një vit burg për Salianjin, i cili u akuzua për “kallëzim të rremë” për denoncimin që bëri ndaj Geron Xhafës, vëllait të ish-ministrit Fatmir Xhafaj.

The post Salianji mbyll punët me drejtësinë? Shkon për herë të fundit në Shërbimin e Provës: Çështjen do e çoj në Strasburg! appeared first on Albeu.com.

Organizatore e protestës është diaspora, e mbështetur nga organizata të dala nga lufta.

Ata thonë se ish-krerët e UÇK-së, Hashim Thaçi dhe të tjerët, po mbahen padrejtësisht në Hagë për 5 vite me radhë dhe se lufta e UÇK-së ka qenë e drejtë, e pastër dhe çlirimtare.

Kjo protestë, është mbështetur edhe nga shumë parti politike dhe individë me influencë, si në Kosovë, Shqipëri, ashtu edhe në diasporë.

Autoritetet holandeze nuk kanë dhënë lejen që protesta të mbahet pranë godinës së Gjykatës, por ajo do të zhvillohet në një shesh jo shumë larg.

Të hënën, më 15 shtator, fillon procesi i nxjerrjes së dëshmitarëve të palës mbrojtëse, ku priten disa nga autoritetet e larta të kohës së luftës. Dëshmitari i parë pritet të jetë James Rubin nga Shtetet e Bashkuara.

The post Sot protestë në Hagë, kërkohet drejtësi për ish-krerët e UÇK-së appeared first on Albeu.com.