Garancia financiare prej 50,000 eurosh nuk e ka bindur gjyqtarin e vetëm të procesit të dytë ndaj Hashim Thaçit dhe të tjerëve për tentim pengimi të drejtësisë që ta lirojë atë me kusht, sipas 14 kushteve të propozuara nga mbrojtja në korrik të këtij viti, raporton Klan Kosova.

Gjyqtari Gosnell ka urdhëruar vazhdimin e paraburgimit të Thaçit edhe për dy muaj të tjerë. Në vendimin e tij, ai e ka vlerësuar pozitivisht garancinë financiare të paraqitur nga vëllai dhe dy miq të Thaçit.

“Siguria financiare prej 50,000€ e ofruar nga familja dhe miqtë, subjekt i sekuestrimit në rast të dështimit të pjesëmarrjes në seanca, e minon edhe më një rrezik të tillë (rrezikun e arratisjes)”.

Gosnell ka konstatuar se Zyra e Prokurorit të Specializuar nuk ka arritur ta argumentojë ekzistencën e një mundësie reale për arratisje, ndaj e ka rrëzuar këtë si arsye për zgjatjen e paraburgimit.

Megjithatë, sipas arsyetimit të gjyqtarit, Thaçi mund të ndikojë në proceset gjyqësore që po zhvillohen në Dhomat e Specializuara ose të kryejë vepra të tjera të ngjashme. Për këtë arsye, ai do të mbetet në paraburgim së paku deri në tetor 2026.

Hashim Thaçi është i vetmi i akuzuar në këtë çështje që ende mbahet në Qendrën e Paraburgimit në Shevningen. Ndërkohë, Bashkim Smakaj, Fadil Fazliu dhe Isni Kilaj janë liruar me kusht, nën 14 kushte ku përfshihet edhe dorëzania, ndërsa Hajredin Kuqi ka qenë i lirë për t’u mbrojtur që prej nisjes së procesit.

The post Thaçit i refuzohet lirimi me kusht pas garancisë prej 50 mijë eurosh, paraburgimi zgjatet appeared first on Albeu.com.