Këshilli Gjyqësor i Kosovës (KGJK) nuk arriti të shqyrtojë dorëheqjet e gjyqtarëve serbë, pasi mbledhja e parashikuar dështoi për shkak të mungesës së kuorumit.

Tre anëtarë e bojkotuan takimin pas mosmarrëveshjeve për rendin e ditës, në të cilin ishte përfshirë edhe krijimi i komisioneve të përhershme të Këshillit.

Çështja buron nga largimi i përbashkët i rreth 130 gjyqtarëve, prokurorëve dhe punonjësve administrativë serbë prej institucioneve të Kosovës në nëntor të vitit 2022.

Ekspertët juridikë theksojnë se gjyqtarët dhe prokurorët që dhanë dorëheqje nuk mund të rikthehen vetvetiu në detyrë. Sipas tyre, ky akt sjell pasoja juridike, ndaj çdo hap duhet të ndërmerret duke zbatuar procedurat e përcaktuara me ligj.

Ata vlerësojnë se një rikthim i mundshëm mund të shqyrtohet vetëm përmes procedurave të rregullta, përfshirë konkursin. Çdo vendim, sipas ekspertëve, duhet të ketë mbështetje ligjore dhe të garantojë sigurinë juridike e funksionimin e shtetit të së drejtës.

Halilaj: Dështimi i mbledhjes dëshmon probleme serioze institucionale

Avokati Gazmend Halilaj ka thënë për “Bota sot” se pamundësia për ta zhvilluar mbledhjen e KGJK-së përbën një shenjë shqetësuese për mënyrën se si po funksionon sistemi i drejtësisë.

Sipas tij, kjo situatë dëshmon se drejtësia po përballet me sfida të rënda institucionale, të cilat duhet të kapërcehen me përgjegjësi dhe në përputhje me ligjin. Halilaj ka nënvizuar se KGJK-ja është e detyruar, si nga Kushtetuta ashtu edhe nga ligji, të funksionojë pa pengesa dhe t’i marrë vendimet në kohë, sidomos kur bëhet fjalë për çështje që ndikojnë në funksionimin normal të gjyqësorit.

Duke iu referuar dorëheqjeve të gjyqtarëve dhe stafit të komunitetit serb, ai ka vlerësuar se vonesa e gjatë në trajtimin e tyre ka krijuar pikëpyetje të rëndësishme juridike dhe institucionale.

Halilaj ka shpjeguar se dorëheqja, si një veprim individual, në parim sjell pasoja juridike. Megjithatë, sipas tij, mungesa e reagimit për një kohë të gjatë nga organi përgjegjës prodhon pasiguri juridike dhe dëmton parimin e administrimit të mirë të drejtësisë.

Ai ka shtuar se, nëse vërtetohet se gjyqtarët e kanë lënë detyrën dhe nuk e kanë ushtruar funksionin për një periudhë të gjatë, KGJK-ja mund të shqyrtojë masa disiplinore ose shkarkimin e tyre, nëse përmbushen kriteret ligjore. Një veprim i tillë, sipas tij, duhet të ndërmerret në pajtim me legjislacionin në fuqi dhe vetëm pasi të jenë zbatuar të gjitha procedurat përkatëse.

Avokati ka theksuar se vendimmarrja duhet të bazohet në ligj, të sigurojë të drejtën për procedurë të rregullt dhe të respektojë standardet kushtetuese. Vetëm në këtë mënyrë, sipas tij, vendimi mund të mbetet i qëndrueshëm dhe të mbrohet përballë çdo kundërshtimi të mundshëm.

Në përfundim, Halilaj ka deklaruar për “Bota sot” se shteti i së drejtës kërkon që institucionet të mos lejojnë krijimin e vakuumeve të gjata institucionale. Ai ka kërkuar që çështjet të trajtohen në kohë dhe me profesionalizëm, pasi vetëm kështu mund të ruhet besimi i qytetarëve te drejtësia dhe të garantohet funksionimi efikas i institucioneve të Republikës së Kosovës.

Burjani: Rikthimi nuk mund të bëhet pa konkurs të ri

Njohësi i çështjeve juridike, Blerim Burjani, ka deklaruar për “Bota sot” se gjyqtarët dhe prokurorët e dorëhequr nuk mund të kthehen në sistemin e drejtësisë pa iu nënshtruar procedurave që parashikon ligji.

Sipas Burjanit, nuk ekziston bazë ligjore për rikthimin e tyre. Ai ka shpjeguar se dorëheqja konsiderohet largim vullnetar dhe se kontrata e ndërprerë nuk mund të ripërtërihet automatikisht.

Ai ka vlerësuar se do të ishte e paligjshme që kthimi të realizohej sikur dorëheqja të mos kishte ndodhur. Sipas tij, kjo çështje nuk duhet parë nga këndvështrimi politik, por duhet trajtuar në aspektin ligjor dhe kontraktues.

Burjani ka theksuar se rikthimi nuk mund të ndodhë pa një konkurs të ri. Vetëm pas aplikimit, sipas tij, mund të vlerësohet nëse ish-gjyqtarët dhe ish-prokurorët duhet të pranohen sërish apo nëse duhen përzgjedhur gjyqtarë dhe prokurorë të rinj serbë nga komuniteti serb.

Ai ka kritikuar gjithashtu reagimin e Bashkimit Evropian për këtë rast, duke e cilësuar të çuditshëm, të pakuptimtë dhe të papajtueshëm me parimet ligjore.

Burjani ka thënë se rendi dhe ligji nuk lidhen me politikën. Sipas tij, nëse persona do të jepnin dorëheqje në gjykatat e vendeve të BE-së, ata nuk do të riktheheshin automatikisht dhe, në asnjë variant, as përmes konkursit.

Në përmbyllje të prononcimit për “Bota sot”, ai ka theksuar se ndërprerja vullnetare e kontratës sjell pasoja shumë serioze juridike, pavarësisht motiveve që kanë çuar në një vendim të tillë.

The post Dorëheqjet e gjyqtarëve serbë mbeten pa vendim, ekspertët kërkojnë respektimin e procedurave ligjore appeared first on Albeu.com.

Seanca e Këshillit Gjyqësor të Kosovës (KGJK) nuk u mbajt për mungesë kuorumi, duke pezulluar kështu shqyrtimin e dorëheqjeve të gjyqtarëve serbë.

Tre anëtarë të këtij organi bojkotuan mbledhjen, pasi pati përplasje rreth pikave të rendit të ditës, ku bënte pjesë edhe themelimi i komisioneve të përhershme.

Këto dorëheqje janë pjesë e një vale të gjerë largimesh nga institucionet e Kosovës, që ndodhi në nëntor të vitit 2022, kur rreth 130 gjyqtarë, prokurorë dhe punonjës administrativë të komunitetit serb braktisën detyrat e tyre.

Njohësit e fushës juridike vënë në dukje se këta profesionistë nuk mund të riintegrohen në mënyrë automatike. Dorëheqja, si një veprim i njëanshëm, krijon efekte juridike konkrete dhe imponon zbatimin e rregullave të përcaktuara me ligj.

Sipas tyre, çdo vendimmarrje duhet të ketë bazë të fortë ligjore dhe një kthim i mundshëm mund të konsiderohet vetëm duke ndjekur rrugët formale, siç është procesi i konkurrimit, me qëllim që të ruhet siguria juridike dhe të forcohet sundimi i ligjit.

Avokati Gazmend Halilaj e cilësoi dështimin e mbledhjes si një sinjal alarmant për gjendjen e sistemit të drejtësisë. Ai theksoi se KGJK-ja ka përgjegjësi kushtetuese dhe ligjore për të vepruar pa pengesa dhe për të marrë vendime në kohën e duhur, sidomos në çështje që ndikojnë në funksionimin normal të gjyqësorit.

Duke komentuar zvarritjen e trajtimit të dorëheqjeve, Halilaj tha se kjo situatë ngre pikëpyetje të mëdha për sigurinë juridike dhe administrimin e mirë të drejtësisë. Ai shtoi se nëse vërtetohet se gjyqtarët kanë braktisur detyrën për një kohë të gjatë, Këshilli, duke respektuar procedurat ligjore, mund të shqyrtojë edhe nisjen e masave disiplinore apo shkarkimin, por gjithnjë duke garantuar një proces të drejtë dhe standarde kushtetuese.

Në përfundim, ai theksoi se është thelbësore që institucionet të shmangin boshllëqet e zgjatura dhe të menaxhojnë situatat me profesionalizëm, në mënyrë që të ruhet besimi qytetar në drejtësi.

Ndërsa, eksperti tjetër juridik, Blerim Burjani, ishte i prerë në qëndrimin se gjyqtarët dhe prokurorët që dhanë dorëheqje nuk kanë asnjë shans për t’u kthyer në sistem pa u përballur me një proces të ri konkurrimi. Ai shpjegoi se dorëheqja, duke u konsideruar si ndërprerje vullnetare e kontratës, nuk mund të anulohet në mënyrë automatike, pasi kjo do të ishte e paligjshme dhe do të shpërfillte pasojat kontraktuale.

Burjani kritikoi gjithashtu qëndrimin e Bashkimit Evropian për këtë çështje, duke e quajtur atë të pakuptimtë dhe jo në frymën e parimeve ligjore. Ai u shpreh se në asnjë vend të BE-së nuk do të lejohej një kthim i tillë, madje as pas një konkursi, e lëre më në mënyrë automatike, duke nënvizuar se ndërprerja vullnetare e marrëdhënies së punës mbart pasoja të rënda ligjore, pavarësisht nga motivet.

The post Mbledhja e KGJK-së dështon, ekspertët: Rikthimi i gjyqtarëve serbë kërkon procedura ligjore appeared first on Albeu.com.

Pas zgjedhjeve të fundit, brenda LDK-së janë shtuar kërkesat për lëvizje në krye të partisë.

Burime nga LDK-ja bëjnë të ditur se ka nisur grumbullimi i nënshkrimeve për thirrjen e një Kuvendi të Jashtëzakonshëm, në të cilin pritet të shtrohet edhe çështja e besimit ndaj kryetarit Lumir Abdixhiku. Sipas të njëjtave burime, kjo nismë është iniciuar nga Gazmend Muhaxheri.

Analisti politik Vesel Makolli vlerëson se zhvillimet në LDK imponojnë një reflektim të thellë politik, duke theksuar se tri humbje të njëpasnjëshme në zgjedhje tregojnë humbjen e besimit të qytetarëve.

Sipas tij, pakënaqësitë në parti tashmë nuk janë më thjesht perceptim, por një realitet politik, ndërsa kërkesat për përgjegjësi dhe ndryshim po marrin çdo ditë më shumë mbështetje në degë dhe struktura të LDK-së.

“Situata në LDK kërkon një analizë të qetë politike. Rezultatet zgjedhore nuk janë vetëm shifra; ato janë verdikti i qytetarëve. Kur nji parti eminente në historinë politike të Kosovës siç është LDK, nuk arrin me e rikthye besimin e elektoratit në tri palë zgjedhje radhazi, përgjegjësia politike nuk mund të relativizohet – duhet të vijë sa më parë.

LDK-ja po kalon njanën prej periudhave ma të vështira në historinë e saj. Pakënaqësia e anëtarësisë nuk është më çështje perceptimi, por realitet politik. Zani që kërkon përgjegjësi dhe ndryshim po dëgjohet çdo ditë e ma shumë në degë, në nëndegë dhe në mesin e veprimtarëve të saj”, tha ai.

Makolli thotë se një nga veprimet më të gabuara të Lumir Abdixhikut ka qenë rikthimi i Vjosa Osmanit dhe vendosja e saj në krye të listës zgjedhore të LDK-së, duke shtuar se kjo ka prodhuar pakënaqësi të madhe në parti.

Ai vlerëson gjithashtu se LDK-ja duhet të rindërtojë unitetin e saj të brendshëm dhe të rikthejë figurat që, sipas tij, janë lënë jashtë strukturave për shkak të kundërshtimit të tyre ndaj Vjosa Osmanit. Si shembull, ai përmend ish-kryetarin e Degës së Podujevës, Agim Veliu.

“Kthimi i Vjosa Osmanit, e cila me veprimet e saj politike e kishte dëmtuar ndjeshëm partinë, dhe vendosja e saj në krye të listës zgjedhore të LDK-së – është gabimi më i madh që ka mundur ta bëjë Kryetari Abdixhiku. Ky veprim ka krijuar pakënaqësi dhe kundërshti si në mesin e kuadrove të partisë, ashtu edhe te anëtarësia në përgjithësi.

Situatën e ka elektrizue edhe qëndrimi i Abdixhikut karshi dy inicuesve të shkarkimit të tij, gjegjësisht dy kryetarëve të dy komunave të suksesshme, Pejës dhe Lipjanit. Në vend që kërkesa e tyre të trajtohej si një sinjal serioz i pakënaqësisë brenda partisë dhe si një mundësi për reflektim, reagimi i kryetarit ka lanë përshtypjen e një përballjeje me zërat kritikë. Kjo vetëm sa e ka thellue ndarjen ndërmjet lidershipit dhe një pjese të anëtarësisë, duke e rënduar edhe ma shumë klimën e brendshme në LDK.

LDK-ja, si parti e djathtë dhe me traditën më të madhe institucionale, ka nevojë për një homogjenitet të brendshëm, i cili duhet të arrihet me vepra e jo vetëm me fjalë.

Ai arrihet kur u hapet dera dhe rehabilitohen të gjithë atyre që e kundërshtuan Vjosa Osmanin në kohën kur ajo i ndihmoi VV-së në bllokimin e marrëveshjeve ndërkombëtare të kërkuara nga aleatët tanë dhe NATO; të cilët më pas, në mënyra të ndryshme dhe përmes insinuatave, u larguan apo u anashkaluan nga degët ose nga kryesia qendrore e LDK-së dhe nga lista zgjedhore. Si shembull eklatant është ish kryetari i degës së Podujevës Agim Veliu, fitues bindës i të gjitha zgjedhjeve komunale dhe nji ndër ata anëtarë të LDK-ës që kanë plagë të plumbave në trup”, shprehet Makolli për “Bota sot”.

Në fund, Makolli deklaron se nëse informacionet për mbledhjen e 200 nënshkrimeve dalin të vërteta, atëherë dorëheqja e Lumir Abdixhikut do të ishte opsioni më i mirë për LDK-në. Sipas tij, kjo do të hapte rrugë për reforma, për një garë demokratike në parti dhe për zbutjen e tensioneve të brendshme.

“Mbrëmë u raportua se të pakënaqurit brenda LDK-së i kanë mbledhë 200 nënshkrime, nga gjithsej 355 anëtarë sa i ka Kuvendi i partisë, që do të thotë rreth 57% të përbërjes së tij. Sipas informatave që po qarkullojnë, mbledhja e nënshkrimeve po vazhdon dhe numri i atyne që i përkrahin ndryshimet e nevojshme në udhëheqjen e partisë po vjen duke u rritë.

Nëse këto informata rezultojnë të sakta, zgjidhja ma e mirë, si për të ardhmen e LDK-së, ashtu edhe për vetë kryetarin Lumir Abdixhiku, do të ishte që ai sa ma parë të hapte rrugë për reforma të mirëfillta në parti. Një dorëheqje e tij do t’i krijonte mundësi organeve të LDK-së që, në përputhje me Statutin, ta caktojnë një kryetar të përkohshëm, i cili do ta udhëhiqte partinë deri në mbajtjen e Kuvendit Zgjedhor.

Një veprim i tillë do të ndihmonte në uljen e tensioneve të brendshme, do të krijonte kushte për një garë demokratike e të barabartë për udhëheqjen e partisë dhe do t’i jepte LDK-së mundësinë të dalë nga kjo krizë më e bashkuar dhe me e përgatitur për sfidat politike që e presin partinë dhe në veçanti Kosovën” – përfundon ai për gazetën.

The post “Gabimi më i madh ishte rikthimi i Vjosa Osmanit” – analisti përmend Agim Veliun dhe kritikon Abdixhikun appeared first on Albeu.com.

Gjatë kësaj jave, kërkesat publike për dorëheqjen e kryetarit Lumir Abdixhiku u artikuluan nga emra të rëndësishëm të partisë, mes tyre kryetari i Degës së LDK-së në Lipjan, Imri Ahmeti, dhe kryetari i Degës së LDK-së në Pejë, Gazmend Muhaxhiri.

Sipas tyre, Abdixhiku duhet të mbajë përgjegjësi për rezultatin zgjedhor dhe për mungesën e një rritjeje të dukshme elektorale të LDK-së.

Nga ana e tij, Abdixhiku iu kundërpërgjigj këtyre kritikave duke u bërë thirrje vetë kritikëve që të japin dorëheqje, çka e ka ashpërsuar edhe më shumë debatin e brendshëm për të ardhmen e partisë.

Këto zhvillime kanë hapur diskutime për situatën aktuale në LDK, mënyrën se si po menaxhohen sfidat paszgjedhore dhe drejtimin politik të saj në vijim. Në këtë kuadër, po shtrohen pyetje për ndikimin që këto përplasje mund të kenë në unitetin e partisë, rrezikun e thellimit të ndasive dhe hapat që mund të ndërmerren në ditët dhe javët e ardhshme.

Mjaki: Lumiri nuk është ai që e bashkon LDK-në

Për këto zhvillime foli fillimisht për “Bota sot” veprimtari i LDK-së në Zvicër, Ismet Mjaki, i cili u shpreh i pakënaqur me drejtimin aktual të partisë.

Sipas Mjakit, Abdixhiku ka vepruar sipas vullnetit të tij, duke zgjedhur ta afrojë Osmanin, por pa përfshirë në parti figura të rëndësishme të LDK-së, si Bisimi dhe Murtezaj.

“Po e përcjellim nga larg atë që po ndodh në LDK pas zgjedhjeve. Pra, Lumiri kishte kërkuar votëbesim nga Kuvendi dhe atë e ka marrë nga 55% e delegatëve, që në demokraci është në rregull. Por, si lider, pa asnjë kundërkandidat, me dalë kundër 45% është tmerr me vazhdu. Megjithatë, Lumiri bëri si të dojë vetë, pa e bërë as Kryesinë e LDK-së për disa kohë, që ai vetë të vendosë, bash si pasha, dhe këtë e ka bërë me cep më cep.

Lumiri e afroi Vjosën për ta shpëtuar veten, dhe Vjosa, meqë ishte e vdekur politikisht, Lumiri e shpëtoi. Unë mendoj që mirë ka bërë Lumiri që e ka sjellë Vjosën, por nuk ka afruar as Faton Bislimin, as Valon Murtezajn nga mërgata, e as plot të tjerë që ishin ADN-ja e LDK-së”, deklaroi ai.

Mjaki vlerëson gjithashtu se Abdixhiku nuk është figura që mund ta mbajë të bashkuar LDK-në, pasi, sipas tij, merr vendime të pamenduara dhe dëmton veten edhe para elektoratit.

“Lumiri i ka shfrytëzuar kompetencat e Kuvendit, edhe pse vendimi ishte që të mos angazhohen ata që kanë poste. Prapë se prapë, sekretar e ka bërë Ilir Feratin, edhe pse mban postin e kryetarit të komunës, dhe Sokol Halitin sekretar për jashtë, që s’kemi asnjë nevojë për këso filmash në mërgatë.

Lumiri nuk është ai që e bashkon LDK-në. Është idhnak i madh dhe merr vendime pa menduar, duke dalë keq para elektoratit. Një kryetar që ka problem me një kryetar komune, e merr makinën, shkon e ha një darkë dhe sqarohen, e jo me deklarata fëmijërore: “Le të ma dërgojnë dorëheqjen, ua pranoj.” Kjo tregon se ky e përçan LDK-në”.

Më tej, ai u rreshtua në mbështetje të thirrjeve për dorëheqjen e kryetarit, duke thënë se ai duhet të përgjigjet për gjendjen e krijuar në parti.

“Me statutin e LDK-së, që ky as gjallë s’ka qenë kur është bërë, anëtarët kanë të drejtë të kërkojnë përgjegjësi, dorëheqje dhe ta thërrasin Kuvendin me 1/3 e votave. Lumiri mundet me e përça, por jo me e bashku LDK-në”, përfundoi Ismet Mjaki për “Bota sot”.

Dajaku: LDK-ja ka nevojë për reformim dhe rigjallërim

Për zhvillimet e fundit në LDK dhe përplasjet që po e shoqërojnë atë, foli edhe Xhevat Dajaku, vëllai i ish-truprojës së presidentit Rugova, Besim Dajaku.

Ai theksoi fillimisht se një post drejtues në një parti politike nuk duhet parë si privilegj, por para së gjithash si përgjegjësi. Në këtë kuadër, ai vlerësoi se brenda LDK-së ka individë që partinë e konsiderojnë thjesht si mjet për interesa personale.

“Partitë politike janë formacione të organizuara rreth një programi dhe vizioni politik, të ndërtuar nga ekspertë dhe njerëz me ide e koncepte për të ardhmen e shoqërisë dhe të shtetit. Prandaj, marrja e një pozite udhëheqëse në një parti politike nuk është vetëm privilegj, por mbi të gjitha përgjegjësi ndaj partisë, qytetarëve dhe vendit në tërësi.

Megjithatë, shpesh ndodh që individë të caktuar ta shohin partinë si mjet për realizimin e interesave personale ose të grupeve të papërgjegjshme, duke dëmtuar interesin publik dhe duke krijuar pengesa që në shumë raste i kanë kushtuar shtrenjtë shtetit dhe shoqërisë”.

Dajaku rikujtoi edhe periudhën kur LDK-ja drejtohej nga presidenti historik Ibrahim Rugova, duke theksuar se pas vdekjes së tij, sipas tij, në vazhdimësi janë shfaqur ndarje dhe mospajtime brenda partisë.

Në këtë frymë, ai mbështeti kërkesat për dorëheqje të kryetarit, duke theksuar se ato nuk duhen parë si sulm ndaj vetë subjektit politik.

“LDK-ja ka një histori të pasur dhe të lavdishme. Gjatë rrugëtimit të saj ka ndërmarrë hapa të matur dhe vendimtarë, veçanërisht në organizimin e institucioneve paralele në rrethana jashtëzakonisht të vështira, të njohura për të gjithë ata që gjykojnë me arsye dhe objektivitet. Ajo u sulmua dhe u kritikua si nga armiqtë serbë, ashtu edhe nga shqiptarë me qëndrime të ndryshme politike. Megjithatë, vazhdoi rrugëtimin e saj deri në vdekjen e Presidentit historik, Ibrahim Rugova. Pas asaj periudhe filluan të shfaqen ndarje dhe mospajtime të brendshme, të cilat janë të njohura për opinionin publik dhe që vazhdojnë të reflektohen edhe sot.

Prandaj, kërkesat për dorëheqje apo për përgjegjësi politike nuk duhet të interpretohen si sulme apo kundërshti ndaj subjektit, por si thirrje për debat të hapur, transparent dhe demokratik brenda organeve legjitime të partisë. Në çdo subjekt politik ka individë dhe grupe me qëllime të mira, por mund të ketë edhe të tillë që udhëhiqen nga interesa të ngushta dhe dëmtuese. Pikërisht për këtë arsye nevojiten debate serioze, analiza të thelluara dhe vlerësime të bazuara në argumente, duke pranuar realitetin politik, shkaqet, rrethanat dhe pasojat e zhvillimeve të ndryshme”.

Në fund, ai tha se LDK-së i duhen reforma të thella, pasi, sipas tij, bashkëpunimet joparimore me subjekte të caktuara e kanë dëmtuar ndjeshëm.

Madje, ai paralajmëroi se në mungesë të ndryshimeve të nevojshme, ekziston rreziku që partia të vazhdojë të humbasë mbështetjen qytetare.

“LDK-ja ka nevojë për reformim dhe rigjallërim. Një pjesë e madhe e elektoratit të saj tradicional, i cili sot mbetet kryesisht i heshtur, ka qenë i lidhur me vlerat dhe politikat që dikur e karakterizonin këtë subjekt. Megjithatë, zhvillimet e brendshme, jo gjithmonë të drejta, si dhe bashkëpunimet jo parimore me subjekte ku janë përmendur elemente të dyshuara për veprimtari kriminale, kanë ndikuar që shumë votues të humbin besimin dhe të distancohen nga procesi politik, deri në abstinim.

LDK-së i nevojitet rikthimi i meritokracisë, ashtu siç ishte një nga parimet themelore në kohën e Presidentit Rugova. Pa meritokraci, pa debat të lirë dhe pa kulturën demokratike që dikur e dallonte këtë parti, jo vetëm që do të dështojnë përpjekjet aktuale për kërkim llogarie dhe reformim, por ekziston rreziku që LDK-ja të vazhdojë të humbasë mbështetjen qytetare dhe të shtyhet edhe më tej drejt margjinave të skenës politike”, përmbylli Xhevat Dajaku për “Bota sot”

The post Presioni mbi Abdixhikun rritet pas rezultatit zgjedhor, brenda LDK-së shtohen thirrjet për dorëheqje dhe paralajmërimet për krizë më të thellë appeared first on Albeu.com.