Ivan Barton, arbitri nga El Salvadori që drejtoi gjysmëfinalen e Kupës së Botës mes Francës dhe Spanjës, ka reaguar ndaj deklaratave të Didier Deschamps. Pas disfatës 2-0, trajneri i atëhershëm i Francës kishte ngritur publikisht pikëpyetje mbi cilësinë dhe përgatitjen e Barton për një përballje të një rëndësie të tillë.

Në gjysmëfinalen e zhvilluar në Dallas, Spanja triumfoi 2-0 ndaj Francës. Mikel Oyarzabal zhbllokoi rezultatin nga pika e penalltisë në minutën e 22-të, ndërsa Pedro Porro realizoi golin përfundimtar në minutën e 58-të. Ky sukses e kualifikoi Spanjën në finale, kurse Franca kaloi në ndeshjen eliminatore për vendin e tretë.

Pas takimit, Deschamps pranoi se përfaqësuesja e tij nuk kishte qenë në lartësinë e duhur as teknikisht dhe as fizikisht. Megjithatë, më pas ai u përqendrua te arbitrimi. Pasi vlerësoi pjesëtarët e tjerë të ekipit të gjyqtarëve, trajneri francez pyeti: “A mendoni se gjyqtari ishte në nivelin e kërkuar?”.

Pakënaqësia kryesore e Deschamps lidhej me penalltinë e dhënë pas ndërhyrjes së Lucas Digne ndaj Lamine Yamal. I pyetur nga gazetarët nëse kishte edhe vendime të tjera që i konsideronte të gabuara, ai nuk pranoi t’i konkretizonte ato.

Duke folur për komentet e Deschamps mbi Jorge Ramos dhe Bandën, Barton deklaroi se kritikat nuk e shqetësonin. Sipas tij, ai dhe skuadra e arbitrave janë plotësisht të vetëdijshëm për rrugën që kanë përshkuar për të mbërritur në skenën më të madhe të futbollit.

“Ne e dimë për çfarë luftuam, si e merituam dhe pse jemi këtu. Asnjë koment nuk do të na bëjë të dyshojmë për këtë”, u shpreh gjyqtari 35-vjeçar.

Për Barton, përfaqësimi i El Salvadorit në Kupën e Botës ka një domethënie të veçantë, pasi bëhet fjalë për një shtet që nuk ka një traditë të madhe në futboll. Ai mendon se paraqitjet e tij kanë dëshmuar se prejardhja nuk duhet të ndikojë në vlerësimin e futbollistëve, trajnerëve apo gjyqtarëve.

Arbitri salvadorian shtoi se arritja e tij mund të shërbejë si shtysë edhe për gjyqtarët e tjerë nga Amerika Qendrore. Disa prej tyre mund të besojnë se vendi nga vijnë ua bën të paarritshme drejtimin e ndeshjeve më të mëdha, por Barton vlerëson se shembulli i tij ka treguar se barriera të tilla mund të kapërcehen.

Në mbrojtje të tij doli edhe Pierluigi Collina, drejtuesi i departamentit të arbitrimit në FIFA. Pas kritikave të Deschamps, Collina mbështeti aftësitë e Barton dhe deklaroi se gjyqtarët e zgjedhur për Kupën e Botës i përkisnin nivelit më të lartë në botë. Barton e cilësoi vlerësimin e Collinës si një nga kënaqësitë më të mëdha që mori nga turneu.

Barton mban statusin e gjyqtarit ndërkombëtar të FIFA-s që prej vitit 2018, ndërsa kishte marrë pjesë edhe në Kupën e Botës 2022 në Katar. Para gjysmëfinales Francë-Spanjë, ai kishte arbitruar tri ndeshje të tjera në turneun e vitit 2026. Kështu, sfida në Dallas ishte paraqitja e tij e katërt në atë turne dhe njëkohësisht angazhimi më i rëndësishëm i karrierës së tij deri në atë moment.

Pas Kupës së Botës, Deschamps mbylli periudhën e tij të gjatë në krye të Francës. Ndërkohë, Barton u rikthye nga SHBA-ja me një arritje historike për arbitrimin salvadorian, por edhe nën hijen e polemikave që pasuan ndeshjen më të rëndësishme të drejtuar ndonjëherë prej tij.

The post “E dimë pse ndodhemi këtu”, Barton i kundërpërgjigjet Deschamps pas kritikave për gjysmëfinalen e Botërorit appeared first on Albeu.com.

Pas 14 vitesh në drejtimin e kombëtares franceze, Didier Deschamps do të largohet nga posti, ndërsa Zinedine Zidane është gati ta pasojë atë si trajner.

Nën drejtimin e Deschamps, Franca u eliminua nga Spanja në gjysmëfinalen e Kupës së Botës 2026 dhe më pas u mposht nga Anglia në përballjen për vendin e tretë.

Në prag të këtij ndryshimi, e përditshmja franceze L’Equipe ka risjellë në vëmendje marrëdhënien e komplikuar dhe afatgjatë mes dy ish-shokëve të skuadrës që fituan Kupën e Botës më 1998.

Sipas gazetës, krisja më e madhe mes tyre daton në vitin 2012, kur Deschamps mori detyrën duke zëvendësuar ish-trajnerin Laurent Blanc.

Zidane dhe disa pjesëtarë të tjerë të ekipit të vitit 1998 dyshohet se e konsideruan të tradhtuar Blanc, me pretendimin se Deschamps kishte nisur para kohe bisedimet me federatën. Ky i fundit e ka mohuar akuzën.

Për shkak të këtij raporti të tensionuar, mes trajnerit të ardhshëm dhe atij që po largohet nuk parashikohet të organizohet një ceremoni zyrtare për dorëzimin e detyrës.

The post Zbardhet shkaku i raportit të tensionuar prej vitesh mes Zidane dhe Deschamps appeared first on Albeu.com.

Edicioni i Kupës së Botës i zhvilluar në SHBA, Kanada dhe Meksikë është mbyllur, por ngjarjet dhe emocionet e tij pritet të kujtohen gjatë nga futbolldashësit. Turneu më i madh i organizuar deri tani solli një rritje të numrit të skuadrave dhe ndeshjeve, ndërsa prodhoi edhe shumë rekorde.

Në mesin e arritjeve kryesore të këtij Botërori spikat rekordi i Kylian Mbappes. Sulmuesi i Francës është ngjitur në krye të renditjes historike të golashënuesve të Kupës së Botës, duke arritur në 22 gola.

Para këtij edicioni, vendin e parë e mbante gjermani Miroslav Klose me 16 realizime. Tashmë Mbappe udhëheq me 22 gola në po aq ndeshje, përpara Lionel Messit, i cili numëron 21 gola në 34 paraqitje, dhe Kloses me 16 gola në 24 takime.

Edhe Lionel Messi ka shtuar rekorde të tjera në historinë e kompeticionit. Futbollisti argjentinas është lojtari me numrin më të madh të fitoreve në Kupën e Botës, me gjithsej 23 triumfe.

Messi ka vendosur gjithashtu rekordin prej nëntë ndeshjesh radhazi me të paktën një gol, si dhe atë për numrin më të lartë të realizimeve nga jashtë zonës së rreptësisë, me shtatë të tillë.

Një tjetër moment historik i përket Cristiano Ronaldos. Kapiteni portugez mbetet i vetmi futbollist që ka gjetur rrugën e rrjetës në gjashtë edicione të ndryshme të Kupës së Botës.

Didier Deschamps, ndërkohë, është bërë trajneri me më shumë ndeshje të drejtuara në historinë e Kampionateve Botërore. Francezi e ka çuar në 26 numrin e paraqitjeve si trajner, duke lënë pas Helmut Schönin e Gjermanisë Perëndimore, i cili mbante rekordin e mëparshëm me 25 ndeshje.

Rekord është shënuar edhe në pankinën e Curaçaos. Dick Advocaat, në moshën 78 vjeç e 271 ditë, u bë trajneri më i vjetër që ka udhëhequr një ekip në një takim të Kupës së Botës. Këtë arritje ai e regjistroi në ndeshjen e fundit të skuadrës së tij kundër Bregut të Fildishtë.

Jude Bellingham dhe Harry Kane, së bashku me francezët Ousmane Dembele dhe Kylian Mbappe, kanë hyrë gjithashtu në histori. Ata janë bashkëlojtarët e parë që shënojnë secili nga gjashtë ose më shumë gola brenda të njëjtit edicion të Kupës së Botës.

Johan Manzambi i Zvicrës vendosi një tjetër rekord, duke u bërë zëvendësuesi më i ri që realizon dy herë në një ndeshje të këtij kompeticioni. Ai ishte 20 vjeç e 247 ditë kur e shënoi këtë arritje.

Në kategorinë e asistimeve, standardi i ri u vendos nga Michael Olise. Lojtari i Francës e përfundoi turneun me shtatë asistime, më shumë se çdo futbollist tjetër në një edicion të vetëm të Botërorit.

Rekordi i mëparshëm i përkiste legjendës braziliane Pele, i cili kishte dhënë gjashtë asistime në Kupën e Botës të vitit 1970. Pesë nga shtatë asistimet e Olises shkuan për Kylian Mbappen, duke krijuar një rekord të ri për bashkëpunimin mes dy lojtarëve gjatë një edicioni të turneut.

Një rekord tjetër u regjistrua nga Rodri në repartin e mesfushës. Spanjolli realizoi 790 pasime të sakta, shifra më e lartë e arritur ndonjëherë nga një lojtar në një edicion të Kupës së Botës.

Edhe rekordi i mëparshëm mbahej nga vetë Rodri, pas 638 pasimeve të kompletuara në Botërorin e Katarit. Para tij, Xavi kishte regjistruar 599 pasime të sakta në edicionin e vitit 2010.

Portieri i Curaçaos, Eloy Room, barazoi shifrën më të lartë të pritjeve në një ndeshje të Kupës së Botës, pasi ndërhyri me sukses 16 herë përballë Ekuadorit.

Tim Howard i SHBA-së kishte realizuar po 16 pritje në vitin 2014, por portieri amerikan e kishte arritur këtë total në një takim që përfshiu edhe dy vazhdime me nga 15 minuta.

Në portën e Spanjës, Unai Simon vendosi rekordin për numrin më të madh të ndeshjeve pa pësuar gol në Kupën e Botës. Ai e ruajti portën të paprekur në shtatë takime.

Kupa e Botës në Amerikën e Veriut dhuroi jo vetëm një shfaqje të madhe futbollistike, por hapi edhe një faqe të re në historinë e rekordeve të kompeticionit.

The post Historia rishkruhet në Kupën e Botës: rekordet e Mbappes, Messit, Deschampsit dhe yjeve të tjerë appeared first on Albeu.com.

Rayan Cherki e pësoi një debutim të shkurtër si titullar me Francën, duke u tërhequr nga fusha që në fund të pjesës së parë në humbjen për medaljen e bronztë ndaj Anglisë në Kupën e Botës 2026.

Trajneri Didier Deschamps mori vendimin për ta zëvendësuar mesfushorin sulmues në pushim, dhe burime nga mediat franceze tregojnë se arsyet shkuan përtej paraqitjes së tij në ato 45 minuta.

Gazetari Romain Molina bën të ditur se qëndrimi i lojtarit të Manchester Cityt gjatë gjithë kompeticionit nuk i përmbushi standardet e vendosura nga stafi drejtues i ekipit.

Sipas raportimeve, Cherki kishte përjetuar gjithashtu vështirësi me gjumin pas një fluturimi të gjatë, ndërsa mungesa e minutave si titullar në ndeshjet paraprake kishte ndikuar në gjendjen e tij mendore.

Mirëpo, momenti që duket se e acaroi më shumë Deschamps ndodhi gjatë një pauze për hidratim.

Siç shkruan L’Equipe, trajneri i kërkoi 22-vjeçarit të rriste ritmin e qarkullimit të topit, por Cherki thuhet se i injoroi këto udhëzime.

Për më tepër, Deschamps shprehu pakënaqësi edhe për zgjedhjet e tij në zonën e sulmit, si dhe për angazhimin e vakët në fazën e tërheqjes.

Ky episod i ri shton më tej paqartësitë mbi të ardhmen e Cherkit në kombëtaren franceze, pas një turneu në të cilin ai nuk la gjurmën që pritej.

The post Cherki injoron urdhrat e Deschamps në debutimin si titullar, zëvendësohet pas 45 minutash appeared first on Albeu.com.

Sipas L’Equipe, Didier Deschamps ka hedhur poshtë kërkesën e futbollistëve të Francës për një mbrëmje të lirë pas mbërritjes së ekipit në Miami, në prag të ndeshjes për vendin e tretë të Kupës së Botës kundër Anglisë.

Pas disfatës ndaj Spanjës në gjysmëfinale, lojtarët francezë kishin dëshirë të çlodheshin, por trajneri ka kërkuar që vëmendja e skuadrës të mbetet tërësisht te përballja e ardhshme.

Raportimi thekson se Deschamps nuk dëshiron ta përfundojë ciklin e tij 14-vjeçar në krye të përfaqësueses franceze me dy humbje radhazi.

Ai u ka kërkuar lojtarëve të përgatiten me seriozitetin më të madh për ndeshjen me Anglinë, duke u kujtuar se mbrojtja e ngjyrave të Francës dhe përgjegjësia ndaj tifozëve mbeten të rëndësishme edhe në një takim për vendin e tretë.

Ndeshja e së shtunës do të jetë e 185-ta, si edhe e fundit, për Didier Deschamps në rolin e përzgjedhësit të Francës. Ai pritet të largohet nga posti sapo të përfundojë Kupa e Botës.

Franca kërkon ta mbyllë rrugëtimin e saj në Botëror me një fitore, përpara nisjes së një periudhe të re që pritet të drejtohet nga Zinedine Zidane.

The post Deschamps nuk pranoi t’u japë pushim lojtarëve të Francës para duelimit me Anglinë appeared first on Albeu.com.

Pas humbjes 2-0 të Francës kundër Spanjës në gjysmëfinalen e Kupës së Botës, trajneri Didier Deschamps hodhi dyshime mbi performancën e gjyqtarit Ivan Barton, duke vënë në pikëpyetje nëse arbitri nga Salvadori ishte i aftë për një sfidë të tillë. Tani, Institucioni më i lartë i futbollit botëror i ka dalë në mbrojtje gjyqtarit përmes zërit më autoritar të komisionit të arbitrimit.

Pierluigi Collina, që drejton Komitetin e Gjyqtarëve pranë FIFA-s, iu përgjigj pa mëdyshje vërejtjeve të përzgjedhësit francez. Ish-arbitri i njohur italian nuk la vend për paqartësi kur konfirmoi se Barton ishte absolutisht në lartësinë e duhur për të gjykuar takimin vendimtar.

Menjëherë pas ndeshjes që i dha fund rrugëtimit të “Gjelave” në turne, Deschamps e kishte shprehur pakënaqësinë e tij, ndonëse përpiqej të mos dukej se po kërkonte alibi për disfatën. Ai e pranoi se fitorja i takonte Spanjës, por ngriti pyetjen nëse zyrtari i takimit e kishte nivelin e nevojshëm për një gjysmëfinale botërore.

“Nuk po flas për shkak të humbjes, por a e kishim gjyqtarin e duhur për këtë nivel? Kjo është thjesht një pyetje që duhet shtruar. Unë nuk do të futem në hollësira, por gjithë ndeshja duhet parë me kujdes, jo vetëm rasti i penalltisë,” u shpreh ai pas takimit.

Këto deklarata nxitën një reagim të menjëhershëm nga ana e FIFA-s. Collina deklaroi hapur se qëndrimi i organizatës botërore ishte i prerë dhe se Barton e meritonte plotësisht atë emërim. Ai shtoi se procesi i seleksionimit të arbitrave për një Kupë Bote bazohet në standarde strikte, dhe ata që arrijnë të jenë pjesë e saj janë gati për çdo provë.

“Jemi këtu për t’iu përgjigjur komenteve të zotit Deschamps, i cili vuri në diskutim nivelin e gjyqtarit. Përgjigja jonë është e thjeshtë: po, ai ishte në nivelin e nevojshëm, pa asnjë diskutim,” u shpreh kreu i gjyqtarëve të FIFA-s.

Për të mbyllur çështjen, Collina vlerësoi se arbitrat e pranishëm në kompeticion janë elita botërore dhe rikonfirmoi besimin e palëkundur të FIFA-s te Ivan Barton dhe skuadra e tij, pavarësisht bujës së krijuar pas ndeshjes Francë-Spanjë.

The post FIFA i kundërpërgjigjet Deschamps pas akuzave ndaj gjyqtarit të gjysmëfinales appeared first on Albeu.com.

Luis de la Fuente, trajneri i Spanjës, ka reaguar ndaj deklaratave të homologut të tij francez, Didier Deschamps, i cili shprehu pakënaqësi për drejtësinë e ndeshjes gjysmëfinale të Kupës së Botës 2026.

La Roja triumfoi me një fitore të pastër 2-0 përballë Francës në gjysmëfinalen e parë, duke vulosur kështu biletën për në finalen e madhe. Tani skuadra spanjolle pret të mësojë kundërshtarin nga përballja mes Anglisë dhe Argjentinës.

Pas ndeshjes, trajneri i “Gjelave” nuk i kurseu fjalët për performancën e gjyqtarëve, por De la Fuente e sheh këtë qëndrim si një tendencë të zakonshme të atyre që dalin të mundur.

“Është e natyrshme që pas një humbjeje, secili prej nesh mundohet të gjejë justifikime. Edhe ne jemi ndjerë të dëmtuar në disa raste nga vendimet e arbitrave. Na solli në mendje ndeshjen që zhvilluam kundër Uruguait”, deklaroi fillimisht strategu spanjoll.

“Kishte momente specifike ku u ndjemë të trajtuar padrejtësisht. Mungesa e ashpërsisë së gjyqtarit… Ajo që unë kërkoj është që të gjithë aktorët të synojnë progresin: si arbitri kryesor, ashtu edhe sistemi VAR…”, shtoi De la Fuente në fund të reagimit të tij.

Spanja e nisi rrugëtimin në këtë turne me një barazim pa gola ndaj Kepit të Gjelbër, për të vazhduar më pas me pesë fitore të njëpasnjëshme. Në grupe, ekipi i De la Fuentes mposhti bindshëm Arabinë Saudite (4-0) dhe Uruguain me rezultatin minimal 1-0. Në fazën me eliminim direkt, spanjollët treguan forcën e tyre duke eliminuar Austrinë (3-0), Portugalinë (1-0) dhe Belgjikën me shifrat 2-1.

The post “Të gjithë gjejmë arsye kur pësojmë disfatë”, De la Fuente i përgjigjet kritikave të Deschamps për arbitrat appeared first on Albeu.com.

Didier Deschamps, trajneri i kombëtares franceze, shprehu hapur pakënaqësinë pas disfatës 2-0 përballë Spanjës në gjysmëfinalen e Kupës së Botës 2026. Tekniku pranoi se ekipi i tij u mposht nga një kundërshtar më i mirë, por nuk ngurroi të hedhë dyshime edhe mbi performancën e gjyqtarit Ivan Barton gjatë takimit.

Golat e shënuar nga Mikel Oyarzabal dhe Pedro Porro vulosën eliminimin e Francës. Në analizën e tij, Deschamps e cilësoi paraqitjen e lojtarëve të tij si larg standardeve të kërkuara. “Futbollistët janë të dërrmuar, por duhet ta pranojmë realitetin: na mungoi cilësia teknike. Përgjegjësia bie mbi ne. Megjithatë, kam një pyetje: a e kishte gjyqtari nivelin e duhur për të arbitruar një ndeshje të kësaj peshe? Nuk do ta jap vetë përgjigjen. Pati mjaft episode të paqarta. Sidoqoftë, shkaku kryesor mbetet fakti që luajtëm nën nivelin tonë, me gabime në teknikë dhe pasime të gabuara që mund të na kishin kushtuar me raste shënimi,” deklaroi ai.

Pavarësisht zhgënjimit të thellë, trajneri francez insistoi se nuk synon të minimizojë arritjet e skuadrës gjatë këtij kompeticioni. “Kjo është sfida më e lartë, edhe pse tani dhemb. Na pret ndeshja për medaljen e bronztë. S’dua të zhvlerësoj gjithçka që kemi ndërtuar, por në këtë përballje Spanja demonstroi diçka shtesë,” shtoi ai.

Deschamps rezervoi fjalë vlerësuese për kundërshtarët, duke njohur dominimin e tyre në fushë. “Na mungoi saktësia në veprime dhe energjia e nevojshme. Spanjollët janë mjeshtër në parashikimin e aksioneve dhe në ndërprerjen e sulmeve tona me pasime të zgjuara. Do të donim t’i vinim në vështirësi më shumë në repartin ofensiv,” analizoi timonieri i “Les Bleus”.

Në mbyllje të prononcimit të tij, ai iu rikthye sërish figurës së arbitrit Ivan Barton, por pa e akuzuar në mënyrë eksplicite. “Gjyqtari? Nëse flas, do të dukem si një fëmijë që ankohet për humbjen. Por po ju pyes përsëri: a është ai i aftë për detyrën në një gjysmëfinale? Kishte atë rastin e penalltisë, por nuk bëhet fjalë vetëm për atë, është diçka që shkon përtej. S’kam asgjë personale me arbitrin e sotëm, megjithatë bëjeni vetes këtë pyetje,” përfundoi Deschamps.

The post Deschamps pranon epërsinë e Spanjës, por vë në dyshim aftësitë e gjyqtarit për gjysmëfinalen appeared first on Albeu.com.

Pas triumfit 2-0 kundër Marokut në Boston, i cili i siguroi Francës një vend në gjysmëfinalen e tretë rresht të Kupës së Botës, Kylian Mbappe u përball me një pyetje domethënëse: a përfaqëson ky grup lojtarësh ekipin më të fortë francez në të cilin ka luajtur ndonjëherë?

Kapiteni i “Les Bleus” shmangu një përgjigje kategorike. Duke evokuar kujtimet e titujve të fituar dhe finaleve të arritura me breza që tashmë e kanë provuar vlerën e tyre përmes trofeve, Mbappe theksoi se ky ekip ende nuk ka arritur atë status. Megjithatë, ajo çfarë ai pranoi pa asnjë rezervë ishte potenciali i jashtëzakonshëm që përshkon këtë skuadër, një formacion që ushqen ëndrrat e të gjithëve për atë që mund të realizojë.

Fjalët e tij nuk ishin thjesht një shprehje modestie. Mbappe bëri një ndarje të qartë mes dy modeleve të skuadrave franceze në epokën e Didier Deschamps: ato që triumfuan duke u mbështetur në shkëlqimet individuale dhe ky version i ri, një makineri që prodhon futbollin më fluid, më ofensiv dhe më dominues ndër kombëtaret e mbetura në garë.

Pyetja thelbësore mbetet: pa e fituar ende trofeun, a mund të vlerësohet kjo Francë si një formacion më superior se ai i vitit 2018 që u ngjit në majën e botës?

Brendi më i pasur me talent i Francës?

Duke lënë pas çdo reference historike dhe duke u fokusuar ekskluzivisht në ecurinë aktuale në këtë Botëror, shifrat janë elokuente. Skuadra e Deschamps e kaloi fazën e grupeve me autoritet, duke mundur Senegalin 3-1 dhe Norvegjinë 4-1 pa u vënë kurrë nën presion të vërtetë. Rrugëtimi vazhdoi me eliminimin e Suedisë 3-0 në raundin e 32-të, një fitore minimale 1-0 ndaj Paraguajit dhe suksesin e pastër 2-0 në çerekfinale kundër Marokut, një takim ku linja e prapme franceze mbeti praktikisht e paprekur.

Arritja e pesë fitoreve radhazi në fazat me eliminim direkt përbën një moment historik që ky brez nuk e kishte prekur më parë.

Në epiqendër të këtij mekanizmi qëndron padiskutim Kylian Mbappe. Me tetë gola në këtë turne, ai ka grumbulluar 20 realizime në tri edicione të Kupës së Botës, duke u pozicionuar vetëm një larg rekordit absolut të Lionel Messit. Për më tepër, ai është shndërruar në golashënuesin historik të Francës, duke e kaluar Olivier Giroud.

Sidoqoftë, transformimi thelbësor në këtë edicion qëndron diku tjetër: Mbappe nuk po e mban më peshën i vetëm.

Michael Olise është profilizuar si krijuesi më i spikatur i kompeticionit, duke regjistruar pesë asistime, shifra më e lartë e dokumentuar për një lojtar në një Botëror që prej vitit 1994. Ousmane Dembele, mbajtësi aktual i “Topit të Artë”, ka kontribuar me pesë gola, përfshirë dhe atë të dytin në rrjetën e Marokut. Ndërkohë, nga banka, Bradley Barcola dhe Desire Doue i ofrojnë Deschamps dy alternativa me fuqi të tillë shpërthyese saqë do të ishin protagoniste absolute në shumicën e skuadrave të tjera.

Duhet theksuar se tre nga këta lojtarë fituan Ligën e Kampionëve së bashku me PSG-në në sezonin e shkuar. Franca e sotme nuk ka më nevojë për magjinë e çastit të një të vetmi për të mbijetuar në përballjet e mëdha; ajo tashmë zotëron katër apo pesë futbollistë të aftë për të diktuar ritmin dhe për të përcaktuar mënyrën se si zhvillohet një sfidë.

Një koleksionist fitoresh në çdo skenar

Përballja me Paraguajin nxori në pah forcën e karakterit të këtij grupi. Përballë një rivali që nuk synonte të ndërtonte lojë, por të fragmentonte ritmin dhe të nxiste gabime, francezët nuk e humbën qetësinë. Ata demonstruan maturi dhe e administruan situatën pa shenja paniku.

Ndërsa dueli me Marokun ilustroi shumanshmërinë e kësaj skuadre. Në pjesën e parë, Mbappe gaboi nga pika e bardhë e penalltisë dhe për disa çaste u duk i trazuar nga konfuzioni i krijuar rreth vendimit të VAR-it — një skenar që në të shkuarën mund ta kishte destabilizuar Francën, por jo kësaj radhe. Desire Doue u shndërrua në lojtarin më të rrezikshëm për një hark të gjatë kohor dhe ishte pikërisht një prekje e tij fantastike që inicioi aksionin e golit të parë drejt Mbappes.

Olise vijoi të orkestronte tempin, duke fituar faulle dhe duke krijuar korridore edhe kur Maroku synonte të mbyllej hermetikisht. Dembele, pavarësisht se nuk ishte gjithmonë i pranishëm në lojë, gjeti instinktin për të shënuar. Ky është pikërisht sekreti i Francës së re: kontributi i njëkohshëm i shumë interpretëve në të njëjtin takim.

Legjenda e skuadrës “përherë të stërmbushur me yje”

Në prag të çdo turneu është kthyer në klishe të thuhet se Franca është “gjithmonë e mbushur me talente”. Por talenti në vetvete nuk ka qenë asnjëherë elementi unik që ka ndarë triumfin nga fiaskoja. Çdo formacion i Deschamps që nga viti 2016 ka pasur në dispozicion cilësi individuale të jashtëzakonshme. Diferencën e ka bërë fakti nëse ato talente funksiononin si një mekanizëm i mirëorganizuar apo thjesht si një amalgam yjesh në pritje të momentit të tyre.

Brezi i vitit 2018 shpesh idealizohet si një gjeneratë që prodhonte futboll spektakolar, por e vërteta ishte tjetër. Ajo Francë ishte ngritur mbi themelet e disiplinës mbrojtëse, shpejtësisë në tranzicion dhe aftësisë për të dënuar kundërshtarët që ekspozonin hapësira. Një formulë që dha rezultat perfekt, por që ekspozoi edhe limitet e veta përballë atyre që nuk i ofronin mundësitë për të goditur në kundërsulm.

Dështimet evropiane si mësime

Në Euro 2020, Franca u eliminua nga Zvicra në raundin e 16-të, pasi kishte shpërdoruar një avantazh 3-1. Kylian Mbappe dështoi nga penalltia vendimtare në seri. Ky eliminim nuk ishte thjesht një aksident rrugor; Franca ende nuk kishte gjetur formulën për të dominuar ndeshjet ku kundërshtari nuk sulmonte dhe nuk linte boshllëqe.

E njëjta çështje u rishfaq në Euro 2024. Skuadra arriti në gjysmëfinale e mbështetur mbi një mbrojtje të fortë dhe fitore minimale, por pa një identitet të qartë ofensiv. Kur u ndesh me Spanjën, e cila kishte një projekt loje të mirëpërcaktuar dhe presing intensiv, u dorëzua. Dy turne, tre vite distancë, me të njëjtin përfundim: një Francë me bollëk talenti, por pa një mekanizëm të qartë për të kontrolluar përballjet.

Nga varësia ndaj Mbappes te një ansambël i kompletuar

Botërori 2022 ishte më kompleks. Franca mbërriti në finale dhe Mbappe realizoi një prej paraqitjeve më madhështore individuale në analet e Kupës së Botës me tripletën e tij në finalen ndaj Argjentinës. Megjithatë, ajo sfidë nxori në pah një dobësi: në çastet më kritike, skuadra ishte tepër e varur nga gjenialiteti i Mbappes. Po të mos merrte ai përgjegjësinë për ta rikthyer ekipin në ndeshje, Franca me shumë gjasa nuk do të kishte arritur kurrë te penalltitë. Sot, peizazhi ka ndryshuar.

Mutacioni i madh i Deschamps

Kjo Francë ka filluar të marrë formën e saj të tanishme pas humbjes në finalen e Euro 2016. Që atëherë, Deschamps ka investuar një dekadë në ndërtimin e një skuadre më solide dhe më të plotë. Botërori 2018 u fitua në sajë të cilësisë individuale dhe një organizimi të përsosur. Liga e Kombeve në vitin 2021 dha sinjalet e para të një skuadre më kreative, ndërsa dështimet në Evropianët e fundit sinjalizuan se duhej një ndryshim. Ky ndryshim u materializua përmes lojtarëve.

Michael Olise i ka dhënë Francës një arkitekt të vërtetë, një futbollist që mund të shpërthejë mbrojtje të mbyllura jo vetëm me shpejtësi, por edhe përmes kombinimeve dhe inteligjencës. Doue dhe Barcola sjellin freski dhe kuptojnë lojën kolektive, ndërsa Rayan Cherki i jep Deschamps një tjetër armë nga stoli. Për herë të parë në këtë epokë, Franca ka më shumë se një mënyrë për të fituar.

Kërcimi final i Deschamps

Didier Deschamps ka konfirmuar se ky do të jetë Botërori i tij i fundit në krye të Francës dhe momenti duket i përkryer. Pas një dekade me skuadra jashtëzakonisht të talentuara, por jo gjithmonë spektakolare, ai ka formësuar ekipin më të bukur të epokës së tij. Në gjysmëfinale e pret Spanja — një përballje me peshë të veçantë për këtë brez francez, pas eliminimit në Euro 2024.

Spanja përbën testin më të vështirë për këtë Francë, duke synuar pikërisht ato zona ku ende nuk është sfiduar seriozisht: kontrollin e mesfushës dhe aftësinë për të triumfuar edhe kur Mbappe nuk është protagonisti kryesor. Por një gjë është e padiskutueshme: kjo skuadër nuk është më ajo e vitit 2018 që priste kundërshtarin për ta goditur në kundërsulm. Kjo Francë synon të dominojë, të kontrollojë dhe të imponojë vullnetin e saj.

Nëse Deschamps arrin ta mbyllë aventurën me një tjetër Kupë Bote, atëherë ky formacion do të vulosë trashëgiminë e tij si një ndër trajnerët më të mëdhenj në historinë e kombëtareve. Por edhe pa trofeun, ajo çfarë ai ka ndërtuar në vitin 2026 mund të konsiderohet si kryevepra e karrierës së tij.

The post A është Franca e vitit 2026 versioni më i frikshëm i epokës Deschamps? appeared first on Albeu.com.

Përzgjedhësi i Francës, Didier Deschamps, ka dhënë garanci për gjendjen fizike të Kylian Mbappe në prag të gjysmëfinales së Kupës së Botës kundër Spanjës.

Kapiteni francez u dëmtua në çerekfinalen ndaj Marokut, ndeshje në të cilën u largua nga fusha në minutën e 77-të. Ky episod krijoi dyshime mbi mundësinë që 27-vjeçari të jetë i gatshëm për duelin vendimtar me Spanjën.

Dyshimet u shtuan edhe pasi sulmuesi u pa duke u stërvitur i ndarë nga grupi për një pjesë të seancës. RMC Sport raportoi se Mbappe shfaqi shenja dhimbjeje pasi goditi drejt portës, por Deschamps hodhi poshtë çdo alarm.

“Kylian ndihet mirë. Nuk mund të jesh më shumë se 100 për qind. Po, ai është 100 për qind gati”, u shpreh trajneri i Francës.

Deschamps reagoi edhe ndaj interpretimeve për stërvitjen e pasdites, duke thënë: “A po nxirrni përfundime nga ajo që ndodhi pasdite? Ai, ashtu si të gjithë të tjerët, ka të drejtë të punojë 10 minuta në vend të 20 gjatë një ushtrimi në stërvitje”.

Sipas The Athletic, Mbappe pritet të nisë si titullar në përballjen e Francës me Spanjën.

The post Deschamps sqaron situatën e Mbappes para gjysmëfinales me Spanjën appeared first on Albeu.com.