Këshilli i Ambasadorëve Shqiptarë (KASH) ka deklaruar se e ka pritur me shqetësim të thellë aktgjykimin e shkallës së parë, të shpallur nga Dhomat e Specializuara të Kosovës me seli në Hagë ndaj ish-drejtuesve të Ushtrisë Çlirimtare të Kosovës.

KASH thekson se respekton shtetin e së drejtës, pavarësinë e organeve gjyqësore dhe të drejtën e çdo viktime për të kërkuar drejtësi, por shprehet thellësisht i zhgënjyer nga ky vendim. Sipas tij, pikëpyetje të mëdha ngrihen edhe për zgjatjen e pazakontë të procesit, mbajtjen shumëvjeçare të të akuzuarve në paraburgim, përpjesëtueshmërinë e dënimeve dhe standardet e përdorura gjatë gjykimit.

Në qëndrimin e tij, Këshilli rikujton se Ushtria Çlirimtare e Kosovës zhvilloi një luftë të drejtë çlirimtare përballë shtypjes, spastrimit etnik dhe dhunës së organizuar nga regjimi i Slobodan Millosheviçit. Përpjekja e UÇK-së kishte mbështetjen e botës demokratike, ndërsa ndërhyrja e NATO-s ndali një tragjedi humanitare që kishte detyruar rreth një milion shqiptarë të Kosovës të braktisnin shtëpitë e tyre.

KASH nënvizon se aparati shtetëror, ushtarak dhe policor i regjimit të Millosheviçit, bashkë me drejtues të lartë të tij, është gjykuar dhe dënuar nga Tribunali Penal Ndërkombëtar për ish-Jugosllavinë për krimet e kryera në Kosovë dhe në zona të tjera të ish-Jugosllavisë. Vrasjet, masakrat, dëbimet e dhunshme dhe përndjekja sistematike e civilëve, të dokumentuara si krime të këtij regjimi, nuk mund të minimizohen dhe as të vendosen në të njëjtin plan me luftën për liri të popullit të Kosovës dhe të udhëheqësve të tij.

Sipas Këshillit, vendimi ndaj katër ish-drejtuesve të UÇK-së nuk përbën dhe nuk duhet të lexohet si dënim i popullit të Kosovës, i Ushtrisë Çlirimtare të Kosovës apo i përpjekjes së saj për liri dhe pavarësi. Asnjë aktgjykim nuk mund të cenojë sakrificën e mijëra dëshmorëve dhe viktimave, të mohojë të drejtën historike të Kosovës për të qenë e lirë apo të zhbëjë dallimin thelbësor mes agresorit dhe viktimës. Karakteri çlirimtar i luftës dhe historia e Kosovës nuk mund të ndryshohen.

Këshilli i Ambasadorëve Shqiptarë vëren se reagimet e para nga faktori ndërkombëtar kanë vënë sërish në dukje rëndësinë e drejtësisë dhe të përgjegjshmërisë. Ndërkohë, aktgjykimi ka nxitur kundërshtime dhe shqetësime të forta si në Kosovë, ashtu edhe në diasporë.

Në këto rrethana, KASH u kërkon partnerëve ndërkombëtarë të Kosovës të shfaqin një pozicion të qartë dhe të ekuilibruar. Respekti për procedurat gjyqësore, sipas tij, nuk duhet të përdoret për të relativizuar agresionin serb, për të krijuar barazi morale mes palëve apo për të riformuluar historinë e luftës çlirimtare të Kosovës.

KASH pret që gjatë apelimit të analizohen me paanshmëri dhe rigorozitet të plotë provat, konkluzionet juridike, mënyra se si është përcaktuar përgjegjësia dhe proporcionaliteti i dënimeve. Në të njëjtën kohë, duhet të garantohen të gjitha të drejtat e të dënuarve për një proces të drejtë. Këshilli kujton se aktgjykimi është vetëm i shkallës së parë dhe se mundësitë ligjore ende nuk janë konsumuar.

Po ashtu, Këshilli i Ambasadorëve Shqiptarë i kërkon bashkësisë ndërkombëtare që standardet e njëjta të drejtësisë të zbatohen edhe për krimet masive të kryera në Kosovë nga forcat shtetërore serbe. Drejtësia nuk mund të konsiderohet e plotë, e barabartë dhe e besueshme ndërsa një numër i madh personash përgjegjës për masakra, dëbime, dhunë seksuale, shkatërrime dhe zhdukje me forcë vazhdojnë të mos ndëshkohen.

Në përfundim, KASH shpreh solidaritet me popullin e Kosovës dhe familjet e të dënuarve, ndërsa apelon për qetësi, bashkim, dinjitet dhe besim te mjetet juridike që parashikon ligji.

The post Këshilli i Ambasadorëve Shqiptarë ngre shqetësime serioze për aktgjykimin e Dhomave të Specializuara në Hagë appeared first on Albeu.com.