Në një deklaratë të rrallë, Presdenti Biden vuri në pikëpyetje përparësitë e republikanëve të Dhomës së Përfaqësuesve në hapjen e procesit për të përcaktuar nëse ka baza për ngritje akuzash ndaj presidentit dhe familjes së tij.

“Në vend që të bëjnë gjithçka për të ndihmuar në përmirësimin e jetës së amerikanëve, ata janë të përqendruar të më sulmojnë me gënjeshtra”, tha presidenti pas votimit. “Në vend që të bëjnë detyrën e tyre për punën urgjente që duhet bërë, ata po zgjedhin të humbin kohë në këtë manovër politike pabaza që madje republikanët në Kongres e pranojë se nuk mbështetet nga faktet”.

Të gjithë republikanët votuan në mbështetje të procesit me ngarkesa politike, pavarësisht shqetësimeve të vazhdueshme nga disa ligjvënës se hetimi ende nuk ka nxjerrë prova për veprime të paligjshme nga ana e presidentit.

Hetimi i tyre ka ngritur shqetësime etike, por nuk ka ofruar asnjë provë për përfshirjen e zotit Biden në korrupsion ose marrje ryshfeti në rolin e tij aktual ose kur shërbente në postin e nënpresidentit.

Kryetari i Dhomës së Përfaqësuesve, republikani Mike Johnson dhe ekipi i tij udhëheqës janë përballur me trysni në rritje për të treguar përparim në një hetim gati njëvjeçar të përqendruar tek marrëdhëniet e biznesit të anëtarëve të familjes Biden.

Votimi përgjatë linjave partiake 221-212 tregon mbështetjen e të gjithë republikanëve të Dhomës së Përfaqësuesve për hapjen e procesit që mund të çojë në shkarkimin e presidentit nëse gjendet fajtor në një gjyq të Senatit.

“Ne nuk e marrim lehtë këtë përgjegjësi dhe nuk do ta paragjykojmë rezultatin e hetimit”, thanë në një deklaratë të përbashkët pas votimit Kryetari i Dhomës së Përfaqësuesve Mike Johnson dhe ekipi i tij drejtues. “Por është e pamundur që provat të injorohen.”

Votimi për autorizimin e hapjes së procesit nënkupton që hetimi do të vazhdojë gjatë vitit zgjedhor 2024, ndërsa Presidenti Biden ka gjasa të përballet me ish Presidentin Donald Trump, ndaj të cilit u ngritën dy herë hetime gjatë kohës që shërbente në Shtëpinë e Bardhë.

Zoti Trump u ka kërkuar aleatëve të tij në Kongres që të veprojnë me shpejtësi për të hapur procesin për hetimin e Presidentit Biden, si pjesë e thirrjeve të tij më të gjera për hakmarrje dhe shpagim ndaj armiqve të tij politikë.

Vendimi për votimin erdhi ndërsa Kryetari i Dhomës së Përfaqësuesve, Mike Johnson, dhe ekipi i tij drejtues u përballen me një trysni në rritje për të demonstruar përparim në një hetim gati njëvjeçar të përqendruar tek marrëdhëniet e biznesit të anëtarëve të familjes Biden.

Në një deklaratë të fundit, Shtëpia e Bardhë e quajti të gjithë procesin një “ekspeditë hetimi të pabazë” që republikanët po e çojnë përpara “pavarësisht nga fakti që anëtarët e partisë së tyre kanë pranuar se nuk ka prova për të mbështetur hapjen e hetimeve ndaj Presidentit Biden”.

Të gjithë demokratët e Dhomës së Përfaqësuesve votuan kundër hapjes së procedurave.

“E gjithë kjo është një taktikë politike ekstreme. Nuk ka kredibilitet, legjitimitet dhe integritet. Është një shfaqje e dorës së dytë”, tha gjatë debatit ligjvënësi Jim McGovern, demokrat nga shteti Masaçusets.

Disa republikanë të Dhomës së Përfaqësuesve, kryesisht ata nga distrikte të ndara mes dy forcave politike, patën hezituar të shprehen pro votimit për procesin kundër zotit Biden, nga frika e një kostoje të konsiderueshme politike.

Por javët e fundit, udhëheqësit republikanë kanë deklaruar se votimi është vetëm një hap i procesit, jo një vendim për ta shpallur fajtor presidentin Biden. Ky mesazh duket se i bindur skeptikët.

The post Dhoma e Përfaqësuesve autorizon hapjen e procesit për të përcaktuar nëse ka baza për akuza ndaj Presidentit Biden appeared first on Albeu.com.

The post Republikani Mike Johnson zgjidhet kryetar i Dhomës së Përfaqësuesve appeared first on Albeu.com.

Në votimin privat të mbajtur në Kongres më 11 tetor, në garë për nominim ishin Jim Jordan dhe Scalise. Ky i fundit fitoi nominimin me një rezultat të ngushtë.

“Ne kemi shumë punë për të bërë”, tha Scalise pas votimit.

Votimi për zgjedhjen e tij mund të mbahet më së afërmi pasditen e së mërkures.

Javën e kaluar, McCarthy u bë udhëheqësi i parë i Dhomës së Përfaqësuesve në historinë amerikane që u shkarkua gjatë një votimi. Ende është e paqartë nëse ligjvënësit republikanë, mbështetës të ish-presidentit Dinald Trump, të cilët votuan për shkarkimin e McCarthyt, do të votojnë për zgjedhjen e Scalise.

Demokratët pritet të kundërshtojnë nominimin e republikanëve.

Që Scalise të zgjidhet në krye të Dhomës së Përfaqësuesve, duhet që për të votojnë shumica e institucionit prej 435 ulësesh.

“Nuk e di se si do të arrijmë 2018 vota”, tha përfaqësuesi republikan në Dhomë, Troy Nehls. “Do të jetë një javë e gjatë”.

Politikanët e linjës së ashpër votuan për largimin e McCarthyt, pasi ai arriti një marrëveshje me demokratët e Senatit për t’i financuar agjencitë qeveritare.

Zgjedhja e kryetarit të ri vjen në një moment të një krize politike në Dhomën e Përfaqësuesve, vetëm dhjetë muaj pasi Republikanët fituan shumicën në këtë institucion.

Që Scalise të bëhet kryetari i ri i Dhomës, atij i duhet të marrë pothuajse të gjitha votat e republikanëve. Zakonisht kërkohen 218 vota, por aktualisht në Dhomë janë dy ulëse të zbrazëta, duke bërë që pragu për t’u zgjedhur kryetari i ri të ulet në 217.

The post Republikanët nominojnë Steve Scalise për kryetar të Dhomës së Përfaqësuesve appeared first on Albeu.com.

216 nga anëtarët e Dhomës së Përfaqësuesve votuan pro shkarkimit të tij dhe 210 kundër.

Mocioni për shkarkimin e tij ishte paraqitur nga ligjvënësi Matt Gaetz, nga radhët e Partisë Republikane të zotit McCarthy.

Zoti Gaetz, një republikan i vijës së ashpër, e kishte akuzuar zotin McCarthy se nuk kishte bërë sa ç’duhej për të shkurtuar shpenzimet federale.
Për shkak të epërsisë së lehtë republikane ndaj demokratëve në Dhomën e Përfaqësuesve, mjaftonte vota kundër e vetëm një numri të vogël republikanësh, së bashku me ato të demokratëve për të shkarkuar zotin McCarthy.

Shumica e republikanëve votuan për të mbajtur McCarthy në detyrë.

“Mendohuni mirë përpara se të na zhytni në kaos, sepse ai do të jetë rezultati nëse e lëmë atë post të zbrazët”, i paralajmëroi ligjvënësi Tom Cole kolegët e tij republikanë në debatin në sallën e Kongresit të martën.

Zoti Gaetz u kundërpërgjigj:

“Unë nuk mendoj se votimi kundër Kevin McCarthy-t është kaos. Mendoj se 33 trilionë dollarë borxh është kaos. Mendoj se përballja me një deficit vjetor prej 2.2 trilion dollarësh është kaos”.

Disa republikanë kishin shprehur gjithashtu pakënaqësinë në lidhje me një marrëveshje që zoti McCarthy kishte arritur me Presidentin Joe Biden në fillim të këtij viti për të kufizuar nivelet e shpenzimeve në këmbim të rritjes së tavanit të borxhit.

“Shumë prej nesh i ishin lutur në mënyrë të përsëritur kryetarit, që të përdorte kërkesën për ngritjen e tavanit të borxhit për të nxitur shkurtimet e shpenzimeve dhe reformat. Përkundrazi, ai negocioi një rritje të pakufizuar të tavanit të borxhit,” tha ligjvënësi republikan Bob Good në sallën e Dhomës së Përfaqësuesve të martën, duke u kërkuar kolegëve të tij të votonin për shkarkimin e zotit McCarthy.

Është hera e parë në Shtetet e Bashkuara që një kryetar i Dhomës së Përfaqësuesve shkarkohet nga posti.

“Po të numëroja se sa herë dikush ka dashur të më shkarkojë, do isha larguar shumë kohë më parë”, u tha zoti McCarthy gazetarëve të martën në mëngjes.

Ashtu si në negociatat e fundit për shmangien e një mbylljeje të qeverisë federale, epërsia e lehtë republikane në Dhomën e Përfaqësuesve nënkuptonte se demokratët i kishin numrat për të ndikuar në votën për zotin McCarthy.

Në një letër drejtuar demokratëve të Dhomës së Përfaqësuesve të martën në mëngjes, udhëheqësi i demokratëve Hakeem Jeffries i kërkoi grupit të tij të votonte për të hequr McCarthy nga detyra.

“Demokratët e Dhomës mbeten të gatshëm të gjejnë gjuhën e përbashkët. Fatkeqësisht, kolegët tanë ekstremë republikanë nuk kanë treguar gatishmëri për të bërë të njëjtën gjë. Tani është përgjegjësi e anëtarëve Partisë Republikane që t’i japin fund Luftës Civile mes republikanëve në Dhomës së Përfaqësuesve,” shprehej zoti Jeffries.

Vota për shkarkimin e zotit McCarthy kërkonte një shumicë të thjeshtë në Dhomën e Përfaqësuesve prej 435 anëtarësh. Republikanët kontrollojnë dhomën me një shumicë 221-212 ndaj demokratëve të opozitës.

Shkarkimi i zotit McCarthy nga posti i kryetarit në thelb paralizon aktivitetin legjislativ në Dhomën e Përfaqësuesve, ndërsa ajo përballet me një tjetër afat për mbylljen e qeverisë më 17 nëntor nëse Kongresi nuk voton për zgjatjet e afatit.

Shtëpia e Bardhë tha se shpreson që Dhoma të lëvizë me shpejtësi për të zgjedhur kryetarin e ri, në një post që është i dyti në radhë në hierarkinë politike në Shtetet e Bashkuara pas atij të presidentit dhe nënpresidentit.

The post Dhoma e Përfaqësuesve në SHBA voton pro shkarkimit të kryetarit Kevin McCarthy appeared first on Albeu.com.

Presidenti Joe Biden dhe Kryetari i Dhomës së Përfaqësuesve Kevin McCarthy u angazhuan me intensitet të lartë për të siguruar mbështetje për miratimin e ligjit për rritjen e tavanit të borxhit, që përfshin edhe shkurtimet buxhetore të kërkuara nga republikanët.

Sekretarja e Thesarit Janet Yellen paralajmëroi javën e kaluar se Kongresi duhet të rrisë kufirin e borxhit deri më 5 qershor, ose përndryshe qeveria nuk do të jetë në gjendje të përmbushë detyrimet e saj financiare. Ajo tha se edhe pritja deri në minutën e fundit mund të dëmtojë seriozisht besimin e biznesit dhe të konsumatorëve dhe të ndikojë negativisht në vlerësimin e kreditit të vendit.

Ligji përfshin heqjen e kufirit ekzistues të huamarrjes deri në janar të vitit 2025 dhe një marrëveshje buxhetore dyvjeçare, që i mban shpenzimet federale të pandryshuara në vitin 2024 dhe i rrit ato me 1% në vitin 2025.

Pjesë të tjera përfshijnë një pakësim të numrit të agjentëve të rinj që do të punësojë agjencia e grumbullimit të taksave, një kërkesë që shtetet të kthejnë 30 miliardë dollarë ndihma të pashpenzuara të marra për pandeminë e koronavirusit nga qeveria federale dhe rritjen nga 50 në 54 vjeç, për grupmoshat që duhet të punojnë, që të kualifikohen për ndihma ushqimore.

Udhëheqësit e Senatit kanë paralajmëruar se do ta marrin për shqyrtim ligjin e miratuar nga Dhoma e Përfaqësuesve për rritjen e tavanit të borxhit të premten.

The post Dhoma e Përfaqësuesve miraton ligjin për rritjen e tavanit të borxhit appeared first on Albeu.com.

Republikanët nuk siguruan votat e mjaftueshme për të përjashtuar edhe ligjvënësen tjetër demokrate, Gloria Johnson.

Votimi 72-25 për përjashtimin e ligjvënësit demokrat Justin Jones ishte një veprim i jashtëzakonshëm që Dhoma e Përfaqësuesve në këtë shtet e ka përdorur vetëm disa herë që nga përfundimi i Luftës Civile Amerikane në vitin 1865. Në një votim tjetër, ligjënësit republikan e përjashtuan me shumicë votash edhe ligjvënësin demokrat Justin Pearson.

Dhoma e Përfaqësuesve votoi për përjashtimin e dy ligjvënësve demokratë, një javë pasi ata, së bashku me ligjvënësen tjetër demokrate, Gloria Johnson, gjatë një debati për armëmbajtjen u bashkuan me thirrjet e protestuesve në korridorin e ndërtesës për më shumë kontroll të armëve.

“Ne po e humbasim demokracinë tonë. Kjo nuk është normale. Kjo nuk është në rregull”, u tha Pearson gazetarëve. Tre ligjvënësit “thyen një rregull të Dhomës sepse ne po luftojmë për fëmijët që po vdesin nga dhuna me armë dhe njerëzit në komunitetet tona që duan të t’i japin fundi përhapjes së armëve në komunitetet tona. Dhe kjo çon në përjashtimin tonë? Kjo nuk është demokraci.”

Mijëra njerëz u dyndën drejt Kapitolit në Nashville për të mbështetur demokratët, duke brohoritur jashtë sallës së Dhomës së Përfaqësuesve aq fort sa zhurma e bëri pothuaj të pamundur që të dëgjoheshin procedurat nën shqyrtim.

Dy ligjvënësit e përjashtuar mund të mos jenë largë Dhomës së Përfaqësuesve për shumë kohë. Komisionet e qarqeve në rrethet e tyre duhet të zgjedhin zëvendësuesit e tyre deri në mbajtjen e zgjedhjeve speciale.

Ligjvënësit e përjashtuar kanë të drejtë të emërohen për të shërbyer përsëri në postet e tyre. Ata gjithashtu kanë të drejtë të kandidojnë në zgjedhjet speciale. Sipas Kushtetutës së shtetit Tenesi, ligjvënësit nuk mund të përjashtohen për të njëjtën vepër dy herë./VOA

The post Dhoma e Përfaqësuesve në Tenesi përjashton dy ligjvënës demokratë appeared first on Albeu.com.

Presioni ndaj administratës së Presidentit Joe Biden për të lejuar publikimin e tyre po intensifikohet kështu.

Projektligji u miratua me 419 vota pro dhe asnjë kundër.

Senati e kishte miratuar atë, gjithashtu njëzëri, më 1 mars, që do të thotë se tani i takon Biden-it ta ratifikojë ose të vërë veton.

Shtëpia e Bardhë nuk iu përgjigj menjëherë një pyetjeje se çfarë synon të bëjë Biden.

Ky debat u rindez muajin e kaluar kur Wall Street Journal raportoi se Departamenti i Energjisë arriti në përfundimin se pandemia ka të ngjarë të fillojë sepse virusi doli nga një laborator, të cilin Pekini e mohon me forcë.

Në raportin e saj konfidencial, megjithatë, ministria shkruan se nuk është absolutisht e sigurt për korrektësinë e përfundimit të saj. Katër agjenci të tjera amerikane ende besojnë se Covid-19 ka të ngjarë të jetë rezultat i transmetimit natyror të virusit, ndërsa dy janë të pavendosur.

Zyrtarët e administratës Biden thonë se origjina e pandemisë mund të mos dihet kurrë. Kina thotë se pretendimet se ishte shkaktuar nga një rrjedhje në një laborator nuk janë të besueshme.

Deputeti demokrat Jim Himes e quajti projektligjin një “hap të parë të rëndësishëm”.

“Shpresoj që të pastrojë disa nga spekulimet, disa nga thashethemet që janë atje,” komentoi ai.

The post Dhoma e Përfaqësuesve miraton një ligj për të zbuluar origjinën e koronavirusit appeared first on Albeu.com.

Në votimet që u mbajtën të mërkurën McCarthy nuk hoqi dorë nga gara, por dështoi që të zgjidhej në rundin e katërt, të pestë dhe të gjashtë. Republikanët dhe demokratët nuk arritën as të pajtoheshin që të shtynin votimin për një natë tjetër, duke shkaktuar konfuzion.

Po ashtu, as të martën republikanët nuk arritën që në tri rundet e para të zgjidhnin kryetarin e ri, edhe pse ata kanë shumicën në Dhomën e Përfaqësuesve.

“Ende nuk ka marrëveshje”, tha McCarthy teksa u largua nga një takim me republikanët. “Por, ka shumë përparim”, shtoi ai.

Megjithatë, gjatë votimeve nuk u panë shenja të përparimit. Gjatë rundeve të votimit, rezultati ishte pothuajse i njëjtë, me 20 ligjvënës konservatorë që refuzuan ta mbështesin McCarthyn. Atij i duhen 2018 vota për t’u zgjedhur në krye të Dhomës së Përfaqësuesve.

Gjatë votimeve të mërkurën mbrëma, mbështetja për McCarthyn ra në 201 vota, pasi disa republikanë zgjodhën që të mos votonin për të.

Duke parë se nuk kanë marrëveshje, republikanët votuan që ta shtynin sërish për disa orë votimin teksa po tentojnë që të arrijnë ujdi për t’i dhënë fund kaosit të shkaktuar në Dhomën e Përfaqësuesve. Ata dëshironin që të ktheheshin sërish për të votuar, por McCarthy kërkoi pushim deri të enjten.

“Mendoj se njerëzit duhet të punojnë edhe më pak. Nuk mendoj se votimet sonte do të bëjnë ndonjë dallim. Por, votimet në të ardhmen munden”, tha ai.

McCarthy, republikan nga Kalifornia, luftoi që të siguronte mbështetjen përmes takimeve të mbyllura me ligjvënësit republikanë.

Zgjedhja e kryetarit të ri të Dhomës së Përfaqësuesve është kyçe, pasi pa u zgjedhur ai nuk mund të betohen anëtarët e rinj të Dhomës, të formohen komitete, të çohen përpara ligje e as të hetohet administrata e presidentit amerikan, Joe Biden.

Për zgjedhjen e kryetarit të ri duhen 218 vota nga 435 ligjvënës sa ka Dhoma.

McCarthy u bë kandidati i parë në 100 vjet që nuk arriti të zgjidhet kryetar i Dhomës në votimin e parë, pavarësisht se partia e tij ka shumicën.

Gjatë zgjedhjeve të mesmandatit, republikanët fituan një shumicë të ngushtë në Dhomë, 222-212.

Presidenti amerikan, Joe Biden, teksa po nisej për një ngjarje në Kentuki, tha se “e gjithë bota po shikon” se çfarë po ndodh në Dhomën e Përfaqësuesve.

“Mendoj se është e turpshme që po zgjat kaq shumë”, tha Biden. “Nuk e kam idenë” se kush do të fitojë, shtoi presidenti amerikan.

McCarthy për dy muaj të tërë ka negociuar me disa përfaqësues republikanë për të marrë mbështetjen e tyre. Ata i kanë paraqitur kërkesat e tyre në këmbim të votave, por McCarthy i ka refuzuar ato.

“Në dy muajt e fundit ne kemi punuar së bashku për të zhvilluar rregulla që fuqizojnë të gjithë anëtarët, por ne nuk fuqizojmë anëtarë të caktuar mbi të tjerët”, u tha McCarthy gazetarëve të martën.

The post Kaos në radhët e republikanëve, Dhoma e Përfaqësuesve sërish dështon të zgjedhë kryetarin e ri appeared first on Albeu.com.

Kjo ishte hera e parë në 100 vjet, që asnjë kandidat republikan apo demokrat nuk u zgjodh që në raundin e parë të votimit në postin e kryetarit të Dhomës së Përfaqësuesve, e cila ka 435 anëtarë.

Zoti McCarthy nuk arriti të zgjidhet kryetar pas tre raundesh votimi. 20 kolegë republikanë e kundërshtuan kandidaturën e tij në raundin e fundit. Dhoma e Përfaqësuesve pritet të vazhdojë mesditën e së mërkurës me një raund të katërt votimi, por nuk ishte e qartë nëse do të ndryshonin qëndrim disa nga kundërshtarët e zotit McCarthy, apo nëse mund të shfaqeshin edhe kandidatë të rinj.

Republikanët do të kenë një shumicë të ngushtë 222-212 në Dhomën e Përfaqësuesve, ndërsa një vend është momentalisht vakant. Për rrjedhojë, zotit McCarthy, i cili shërben prej 16 vitesh si ligjvënës nga Kalifornia, do t’i duhet të sigurojë të paktën 218 vota për t’u bërë kryetar. Sipas Kushtetutës së Shteteve të Bashkuara, ai do të bëhej edhe zyrtari i dytë në radhën e hierarkisë për marrjen e detyrës së presidentit amerikan.

Megjithatë, 19 republikanë, shumë prej të cilëve patën shprehur gjatë javëve të fundit pikëpamjen se zoti McCarthy nuk ishte mjaftueshëm konservator për të udhëhequr ligjvënësit republikanë, votuan për ligjvënës të tjerë republikanë gjatë raundit të parë të votimit, si për ligjëvënësit Andy Biggs nga Arizona dhe Jim Jordan nga Ohajo, dy kundërshtarë të zëshëm të Presidentit demokrat Joe Biden.

Në raundin e tretë të votimit, 20 disidentë republikanë votuan për zotin Jordan, megjithëse ai vetë propozoi kandidaturën e zotit McCarthy për drejtues të shumicës republikane gjatë sesionit të ri dyvjeçar të Dhomës së Përfaqësuesve.

Ligjvënësi demokrat Hakeem Jeffries nga Nju Jorku, mori votat e të gjithë 212 ligjvënësve demokratë, dhe kryesoi kështu në votime, megjithëse ai nuk ka ndonjë shans për të fituar, pasi asnjë ligjvënës republikan nuk ka në plan të votojë për të. Në votimin më të fundit, 202 republikanë votuan për zotin McCarthy, pra 16 më pak nga 218 votat që i nevojiten.

57-vjeçari McCarthy, që është vetë një konservator i vendosur, është përpjekur prej vitesh të marrë drejtimin e Dhomës së Përfaqësuesve. Gjatë javëve të fundit, ai u takua në mënyrë të përsëritur me kundërshtarët e tij republikanë, për të siguruar mbështetjen e tyre për kandidaturën e tij për kryetar.

Demokratët, të cilët ruajtën 50 me 50 balancën e përfaqësimit në Senat gjatë dy viteve të fundit, fituan avantazhin në zgjedhjet mbarëkombëtare për Kongresin dy muaj më parë, duke siguruar një shumicë 50 me 49 në Senat, megjithëse ish-Senatorja demokrate Kyrsten Sinema njoftoi se do të ishte tashmë e pavarur, por se nuk do të ndryshonte filozofinë e saj të votimit. Ajo ka votuar zakonisht sipas mënyrës së votimit të ligjvënësve demokratë dhe në mbështetje të Presidentit Biden.

Zoti McCarthy fitoi 188 vota në grupin e ligjvënësve republikanë në muajin nëntor, dhe që nga ajo kohë ka siguruar më shumë mbështetje për përpjekjen e tij për të arritur shumicën prej 218 votash për t’u bërë kryetar, siç u tregua edhe me rezultatin prej 203 votash që mori në favor të tij gjatë dy raundeve të së martës.

Por, një grup më i djathtë në radhët e ligjvënësve republikanë kundërshton kandidaturën e zotit McCarthy për kryetar, pasi thonë se ai nuk i është përkushtuar sa ç’duhet kauzës konservatore dhe pasi përfaqëson atë që e konsiderojnë si drejtim të dështuar republikan, me një president demokrat në Shtëpinë e Bardhë që nxit miratimin e politikave progresiste sociale dhe planeve për shpenzime buxhetore që kundërshtohen nga shumica e republikanëve.

Përzgjedhja e kryetarit të Dhomës së Përfaqësuesve ndodh përpara se ligjvënësit të kenë bërë betimin për mandatin e tyre dyvjeçar. Gjatë procesit, ligjvënësit thërrasin nga salla ku janë mbledhur për plenaren, emrin e preferuar për kryetar të Dhomës së Përfaqësuesve. E njëjta pamje pritet të paraqitet edhe gjatë raundit të katërt të votimit, madje ndoshta edhe më pas.

Zoti McCarthy ofroi që të ndryshojë rregullat qeverisëse të Dhomës së Përfaqësuesve, si p.sh. lejimin e një votimi të befasishëm për të shpallur vakant postin e kryetarit dhe përzgjedhjen kështu të një personi tjetër, në rast se nuk kishte dakortësi për qëndrimet e tij politike apo për mënyrën se si grupi i ligjvënësve të partisë së tij do të bënte hetimet e premtuara ndaj Presidentit Biden dhe administratës së tij.

Por, ndërsa vazhdonte procesi i gjatë i thirrjes së emrave të ligjvënësve për të votuar, u bë e qartë se zoti McCarthy nuk kishte votat e mjaftueshme për të fituar shumicën.

Kushdo qoftë ligjvënësi që republikanët do të zgjedhin për kryetar, qoftë zotin McCarthy apo dikë tjetër, ai do të zëvendësojë Kryetaren demokrate në largim, Nancy Pelosi, e cila vazhdon të jetë ligjvënëse dhe votoi në favor të zotit Jeffries./voa

The post Dhoma e Përfaqësuesve në SHBA në kaos pasi Kevin McCarthy nuk zgjidhet kryetar appeared first on Albeu.com.

Jeffries ka bërë histori edhe më parë, kur ai u bë anëtari më i ri që shërbeu në udhëheqje si kryetar i grupit demokratik në vitin 2019.

Përfaqësuesja e Masaçusets, Katherine Clark, aktualisht e mbrojtura e Pelosit si asistente kryetare, u zgjodh për të zëvendësuar deputetin Steny Hoyer si demokratin e dytë më të lartë të Dhomës së Përfaqësuesve. Ajo do të shërbejë si kamxhik i pakicës në mandatin e ardhshëm të kongresit.

Përfaqësuesi i Kalifornisë Pete Aguilar, i cili aktualisht shërben si nënkryetar i grupit parlamentar, do të bëhet demokrati numër 3 i Dhomës së Përfaqësuesve, një renditje që aktualisht mbahet nga Jim Clyburn./albeu.com

The post Pelosit dha dorëheqjen, kush do të përfaqësojë demokratët në dhomën e Kongresit appeared first on Albeu.com.