Zyrtari i Lëvizjes Vetëvendosje, Hysni Mehani, ka bërë të ditur se Gjykata e ka refuzuar padinë e ngritur ndaj tij nga ish-deputeti i PDK-së, Bekim Haxhiu.

Sipas Mehanit, padia e paraqitur nga Haxhiu dhe avokati i tij, Xhevdet Smakiqi, ka qenë e stisur dhe pa bazë, ndërsa vendimi i gjykatës ka qenë në favor të tij.

Mehani pretendon se gjatë kësaj vere është përballur me sulme fizike, procedura gjyqësore dhe kritika në media, të cilat, sipas tij, kishin për qëllim ta dëmtonin shpirtërisht dhe ta denigronin.

Në postimin e tij, ai ka përmendur emrat e Sami Lushtakut, Nuredin Lushtakut, Bekim Haxhiut, Hysni Gucatit, Berat Buzhalës dhe Lirim Mehmetit. Po ashtu, ai ka përmendur edhe persona të tjerë, mes tyre Ganjën, Blertën dhe Mergimin, si dhe të gjithë grupin parlamentar të PDK-së, deri te kryetari i kësaj partie, Bedri Hamza.

“Gjykata e ka hedhur poshtë padinë e ish-deputetit Bekim Haxhiu kundër meje”, ka shkruar Mehani, duke e cilësuar akuzën si një përpjekje për ta dënuar përmes një padie “pa takt dhe të stisur”.

Ai ka thënë se, pavarësisht situatës që e konsideron të pashpresë, ka njerëz që kanë shpëtuar edhe pasi janë goditur nga plumbi. Mehani ka shtuar se beson se, së bashku me Skënderajn, do t’ia dalë të kapërcejë atë që e quan “mendësi shpellarësh”, duke iu referuar bindjes se në Skënderaj duhet të ekzistojë vetëm një parti.

The post Gjykata rrëzon padinë e Bekim Haxhiut, Hysni Mehani përmend personat që thotë se e sulmuan appeared first on Albeu.com.

Deputeti i Partisë Demokratike të Kosovës, Arian Tahiri, kritikoi Qeverinë për mungesën e reagimit dhe kontrollit mbi sigurinë në institucionet dhe ndërmarrjet publike. Në një konferencë për media, ai tha se humbja e jetës së dy punëtorëve të KEK-ut brenda tri ditësh, pas lëndimeve të pësuara në vendin e punës, tregon nevojën për ndërhyrje të menjëhershme të institucioneve përgjegjëse.

Sipas Tahirit, pas këtyre ngjarjeve qëndrojnë familje të mbetura pa më të dashurin e tyre. Ai përmendi rastin e Arbenit Ahmetit, i cili më 20 gusht humbi jetën gjatë transportimit të kabllove 6 kV. Katër ditë më herët, më 16 gusht, Haxhi Gojnovci, teknik i xehtarisë, vdiq pranë ekskavatorit. Më 15 korrik ndërroi jetë në QKUK edhe Milazim Binaku, si pasojë e plagëve të marra më 8 korrik në Fabrikën e Pajimeve Xehtare në Palaj. Ndërsa më 27 shkurt, Migjen Sadiku vdiq në ambientet e Termocentralit “Kosova B”.

Tahiri tha se viktimat kishin dalë në punë për të siguruar të ardhurat e familjeve të tyre, por nuk u kthyen më në shtëpi. Ai nënvizoi se pas secilit prej këtyre emrave ka nëna që presin, bashkëshorte që mbeten të vetme dhe fëmijë që kërkojnë të kuptojnë pse baballarët e tyre nuk u kthyen.

Deputeti i PDK-së rikujtoi se Qeveria ka përqendruar sistemin e inspektimeve përmes krijimit të Zyrës së Inspektorit të Përgjithshëm në kuadër të Zyrës së Kryeministrit. Megjithatë, sipas tij, kur ndodhin raste tragjike, institucionet shmangin përgjegjësinë.

“Qeveria nuk mund të drejtojë dhe njëkohësisht të mbikëqyrë ndërmarrjet publike, e më pas të pretendojë se nuk mban përgjegjësi. Kur flitet për rritje të prodhimit dhe progres, zyrtarët dalin për të shprehur krenari, ndërsa përballë vdekjeve fshihen pas mjeteve dhe ambienteve të pushtetit. Meqë këto raste kanë ndodhur në një ndërmarrje publike nën kontrollin e drejtpërdrejtë të shtetit, ato përbëjnë dëshmi të dështimit institucional. Nëse shteti nuk është në gjendje të mbrojë punëtorët e vet, atëherë si mund të pretendojë se mbron jetën dhe të drejtat e punëtorëve në sektorin privat?”, deklaroi Tahiri.

Ai theksoi se siguria në punë nuk mund të mbështetet vetëm te deklaratat e ngushëllimit. Sipas tij, ajo kërkon standarde të përcaktuara, inspektime të rregullta dhe të pavarura, masa parandaluese, zbatim të ligjit dhe përgjegjësi institucionale, përpara se të humbet një tjetër jetë.

Meqë, sipas tij, këto raste nuk mund të diskutohen në Kuvendin e Kosovës dhe në komisionet parlamentare, Tahiri u bëri thirrje Qeverisë së Kosovës, ministrisë përkatëse, Inspektoratit të Punës dhe Korporatës Energjetike të Kosovës që t’u ofrojnë mbështetje financiare familjeve të viktimave. Ai kërkoi gjithashtu inspektime të menjëhershme, të plota dhe të pavarura, evidentimin dhe eliminimin e rreziqeve në vendet e punës, forcimin e masave për sigurinë dhe mbrojtjen e punëtorëve, si dhe garantimin që ngjarje të tilla të mos përsëriten.

The post Arian Tahiri: Tragjeditë në KEK tregojnë dështimin e institucioneve për të mbrojtur punëtorët appeared first on Albeu.com.

Në kuadër të hetimeve për shpronësimet në fshatin Shipitullë, Prokuroria Speciale e Kosovës ka marrë në pyetje kryetarin e Obiliqit, Halil Thaçi. Ai është thirrur për të dhënë llogari në cilësinë e të pandehurit.

Arbnora Luta, zëdhënëse e këtij institucioni, bëri të ditur se Thaçi po hetohet për veprën penale “Ushtrim ndikimi”. Ajo theksoi se intervistimi i tij u zhvillua gjatë procedurave hetimore që po ndiqen nga Prokuroria Speciale për këtë çështje.

Megjithatë, vetë Halil Thaçi kishte një version tjetër të ngjarjes. Menjëherë pasi doli nga ambientet e Prokurorisë Speciale, ai u shpreh për mediat se ishte pyetur thjesht si dëshmitar në lidhje me këtë proces.

The post Prokuroria Speciale konfirmon: Halil Thaçi u mor në pyetje si i pandehur për rastin e shpronësimeve në Shipitullë appeared first on Albeu.com.

Nga vendimi i Gjykatës rezulton se e dyshuara u ka thënë hetuesve policorë se, para ngjarjes, kishte marrë kërcënime nga tashmë i ndjeri përmes rrjetit social Snapchat. Sipas deklarimit të saj, ai i kishte shkruar, mes të tjerash, “më prit se tani do të vij të vras ty edhe familjen tënde”, ndërsa kur kishte mbërritur në banesë, e kishte rrahur.

Sipas vendimit të siguruar nga “Betimi për Drejtësi”, mbrojtësi i Roshajt, avokati i caktuar sipas detyrës zyrtare Genc Kadriu, gjatë seancës dëgjimore ka paraqitur hollësi nga deklarata e klientes së tij dhe ka shpjeguar rrjedhën e rastit.

Në dëshminë e dhënë para hetuesve, Roshaj ka thënë gjithashtu se pak para mesazhit me përmbajtjen e kërcënimit, viktima i kishte dërguar edhe një tjetër mesazh me fjalën “qele”.

Në vendim përshkruhet se, në ato çaste, e pandehura kishte parë nga vrima vëzhguese e derës se përballë banesës së saj po qëndronte F.H. Aty theksohet se kjo e kishte futur në gjendje të rëndë shoku, pasi nuk e kishte menduar se ai do të shkonte vërtet te banesa e saj, duke qenë se, sipas saj, edhe në 3-4 raste të tjera e kishte kërcënuar njësoj, por nuk ishte paraqitur asnjëherë.

Vendimi më tej thotë se, pasi F.H. kishte hyrë në banesë, ai e kishte kapur të dëmtuarën për flokësh dhe kishte nisur ta godiste në kokë. Po ashtu, theksohet se e pandehura kishte qenë vazhdimisht nën sulm dhe, në një moment, kishte marrë një shishe qelqi me synim që ta trembte viktimën që të ndalte sulmin. Gjatë kësaj përleshjeje fizike, vetë e pandehura kishte pësuar lëndime trupore.

Sipas vendimit, gjatë gjithë kohës tani i ndjeri e kishte pasur armën në dorë. Në një moment të përleshjes, e pandehura kishte arritur t’ia merrte armën, edhe për shkak se në një dhomë tjetër të banesës ndodheshin prindërit e saj, në mënyrë që të mos ndodhte ndonjë e keqe. Në çastin kur arma kishte kaluar në dorën e saj, thuhet se viktima ishte kthyer me shpinë nga tavolina dhe pikërisht atëherë arma ishte shkrepur, me pasojë vrasjen e F.H.

Mbi këto rrethana, avokati Kadriu e ka kundërshtuar kërkesën e Prokurorisë për paraburgim, duke deklaruar se, sipas bindjes së tij, e pandehura kishte vepruar në mbrojtje të nevojshme dhe se nuk kishte pasur qëllim ta privonte me dashje nga jeta tani të ndjerin.

Në seancën dëgjimore, Kadriu ka shtuar gjithashtu se, sipas vlerësimit të mbrojtjes, nuk ekzistojnë kushte për ndikim te dëshmitarët apo për arratisje. Ai e ka arsyetuar këtë me faktin se e pandehura ka bashkëpunuar me organet e hetuesisë dhe, duke pasur parasysh edhe gjendjen e saj emocionale pas ngjarjes, ka propozuar që Gjykata të caktojë ndonjë masë alternative.

Vetë Roshaj e ka mbështetur qëndrimin e avokatit Kadriu, duke deklaruar se i qëndron pranë asaj që ka thënë në Polici, ndërsa para gjykatës ka theksuar se, për shkak të gjendjes emocionale, nuk është në gjendje të deklarohet.

Në vendim thuhet edhe se prokurori i shtetit, Veton Shabani, ka kërkuar caktimin e paraburgimit, duke vlerësuar se kushtet për këtë masë janë përmbushur. Ai ka përmendur rrezikun e ikjes, me arsyetimin se e dyshuara jeton dhe vepron në Francë, ndërsa në Kosovë kishte ardhur për qëndrim të përkohshëm, si dhe faktin që rasti ndodhet në fazën fillestare të hetimeve.

Në fund, gjyqtari i procedurës paraprake Ilir Bytyqi ka vlerësuar se ekzistojnë bazat për caktimin e paraburgimit, duke konstatuar se masat më të buta nuk janë të mjaftueshme për zhvillimin e rregullt të procedurës penale.

The post Arjeta Roshaj në paraburgim 30 ditë, zbardhet deklarata e saj për vrasjen e 32-vjeçarit në Ferizaj appeared first on Albeu.com.

Në seancën e sotme, para trupit gjykues po dëshmon Naim Elshani.

Sipas aktakuzës së Prokurorisë Speciale të Republikës së Kosovës, të ngritur më 15 shtator 2023, Ekrem Bajroviq ngarkohet me akuza se gjatë viteve 1998-1999 ka kryer krime lufte kundër popullsisë civile në Komunën e Istogut dhe në fshatrat përreth.

Në aktakuzë thuhet se Bajroviq, në cilësinë e pjesëtarit të forcave policore dhe ushtarake serbe, si individualisht ashtu edhe në bashkëkryerje me persona të tjerë, ka marrë pjesë dhe ka kontribuar në zbatimin e masave represive, përfshirë vrasjen, bastisjen, rrahjen, maltretimin, arrestimin, torturën, trajtimin mizor dhe çnjerëzor, mbajtjen në kushte skllavërie, dëbimin dhe deportimin e popullsisë civile, si dhe plaçkitjen, djegien dhe shkatërrimin e shtëpive të civilëve të nacionalitetit shqiptar.

Ndërkaq, Gjykata Themelore në Prishtinë, më 19 korrik 2024, e kishte dënuar të akuzuarin Ekrem Bajroviq me 12 vjet burgim për krime lufte të kryera gjatë viteve 1998-1999 në Komunën e Istogut dhe fshatrat përreth.

Megjithatë, çështja është kthyer në rigjykim nga Gjykata Supreme, e cila me vendimin e përpiluar më 4 dhjetor 2025, ka aprovuar kërkesën për mbrojtje të ligjshmërisë të paraqitur nga mbrojtja e Bajroviqit, përkatësisht avokatët Ljubomir Pantoviq dhe Milosh Deleviq.

The post Vazhdon seanca për krime lufte ndaj Ekrem Bajroviçit, dëshminë e jep Naim Elshani appeared first on Albeu.com.