Avdullah Hoti, deputet i zgjedhur nga LDK-ja, ka reaguar ndaj situatës politike dhe paralizimit të institucioneve të Kosovës. Ai ka theksuar se ligjvënësit e rinj po marrin paga, megjithëse nuk po e kryejnë detyrën për të cilën janë votuar.

Sipas Hotit, në përfundim të muajit gusht, të 120 deputetët e betuar të Kuvendit të Kosovës pritet të paguhen, edhe pse deri më tani nuk kanë bërë “absolutisht asgjë”.

Në një postim në Facebook, Hoti ka deklaruar se rezultati i zgjedhjeve të qershorit nuk lë paqartësi: partia e renditur e para, me mbështetjen e një pjese të deputetëve të komuniteteve joshumicë, i ka mundësitë ta konstituojë Kuvendin dhe ta krijojë Qeverinë.

Ai ka vlerësuar se, pasi institucionet të bëheshin funksionale, partitë politike do të mund t’i nisnin negociatat për zgjedhjen e presidentit, duke respektuar afatin kushtetues prej 60 ditësh.

Hoti ka thënë se javët e gushtit dhe muaji shtator mund të përdoreshin për çështje konkrete dhe urgjente. Mes tyre, ai ka renditur rishikimin e buxhetit për këtë vit, i cili, sipas tij, është dëmtuar dhe është shndërruar në katrahurë nga vendimet arbitrare të Qeverisë në detyrë; ratifikimin e marrëveshjeve ndërkombëtare për të shmangur humbjen e fondeve, veçanërisht atyre të BE-së nga plani i rritjes për Ballkanin Perëndimor; si dhe ushtrimin e mbikëqyrjes parlamentare ndaj Qeverisë nga opozita. Në këtë kuadër, ai ka kërkuar shqyrtim urgjent të raporteve të Auditorit të Përgjithshëm, duke theksuar se ato nuk janë trajtuar as për vitin 2024.

Përgjegjësinë për pengimin e funksionimit institucional, Hoti ia ka atribuuar Lëvizjes Vetëvendosje, Kurtit dhe të gjithë atyre që, në çfarëdo mënyre, po ndihmojnë në vazhdimin e bllokadës së dy institucioneve të larta të shtetit.

The post Hoti kritikon ngërçin institucional: 120 deputetët paguhen pa bërë asnjë punë appeared first on Albeu.com.

Para mbledhjes së grupit parlamentar të LDK-së, deputeti i zgjedhur Anton Quni deklaroi se kjo parti tregohet e përmbajtur ndaj situatave që mund të çojnë në incidente.

Quni tha se kryetari pritet t’i informojë për gjendjen aktuale, ndërsa gjatë takimit do të shkëmbehen mendime dhe vlerësime, si dhe do të paraqiten këshilla, ide e propozime. Sipas tij, pjesëmarrësit do ta dëgjojnë me vëmendje njëri-tjetrin.

Duke folur për pjesëmarrjen në Kuvend, ai theksoi se Lidhja Demokratike e Kosovës shmang situatat ku mund të krijohen incidente apo probleme të tjera. Quni bëri thirrje për qetësi dhe që, përmes arsyeshmërisë, racionalitetit dhe dëgjimit të ndërsjellë, të gjendet zgjidhje për të gjitha problemet.

I pyetur nëse kohët e fundit ishte takuar me kryeministrin në detyrë, Albin Kurti, Quni iu referua deklarimit të kryetarit të LDK-së, Lumir Abdixhiku, për këtë çështje.

Ai tha se Abdixhiku tashmë ka folur për bisedën e fundit me Kurtin, e cila nuk ka sjellë ndonjë përfundim pozitiv. Sipas Qunit, nuk po shihen shenja se mund të konkretizohet ndonjë marrëveshje, ndaj LDK-ja do t’i shqyrtojë hapat e mëtejmë.

Sa i përket thirrjes së seancës konstituive dhe bashkëpunimit me partitë e tjera opozitare, Quni vlerësoi se institucionet duhet të krijohen sa më shpejt.

Ai konfirmoi se seanca konstituive do të duhej të mbahej sa më parë, duke shtuar se LDK-ja është e interesuar të bashkëpunojë me të gjithë spektrin politik, në mënyrë që institucionet e Republikës së Kosovës të zyrtarizohen dhe të ngrihen pa vonesa.

The post Quni: LDK-ja shmang përfshirjen në rrethana që mund të shkaktojnë incidente appeared first on Albeu.com.