Deputeti i Partisë Demokratike të Kosovës, Rrustem Mustafa, ka hedhur në diskutim një platformë politike që synon zhbllokimin e institucioneve të Kosovës. Ai ka bërë thirrje për arritjen e një marrëveshjeje mes Lëvizjes Vetëvendosje, PDK-së dhe komuniteteve joshumicë.

Përmes një shkrimi në Facebook, Mustafa ka deklaruar se vendi nuk ka nevojë për përshkallëzim të mëtejshëm politik, por për një dakordim që do t’i rikthente institucionet në funksion.

Propozimi i tij, i emërtuar “Koalicioni për Normalitet”, do të ishte pjesë e një “Pak­ti për Shtetin”. Sipas deputetit, kjo nismë duhet të mbështetet te tri elemente: legjitimiteti i LVV-së si forcë e parë parlamentare, roli balancues i PDK-së dhe përfaqësimi kushtetues i komuniteteve joshumicë.

Mustafa vlerëson se zgjidhja gjendet te vullneti politik i shumicës parlamentare të përbërë nga LVV, PDK dhe komunitetet joshumicë. Ai e ndan platformën në disa shtylla kryesore.

Shtylla e parë lidhet me legjitimitetin. Si partia me numrin më të madh të përfaqësuesve në Kuvend, LVV-së do t’i njihej drejtimi i institucioneve dhe përgjegjësia kryesore për udhëheqjen e Qeverisë dhe Kuvendit, në përputhje me vullnetin e qytetarëve.

Shtylla e dytë ka të bëjë me balancën institucionale dhe stabilitetin presidencial. Në këtë kuadër, PDK-ja do të merrte përsipër garantimin e kontrollit demokratik, ekuilibrit institucional dhe orientimit euroatlantik përmes një marrëveshjeje të qëndrueshme për ndarjen e përgjegjësive. Si pjesë e këtij ekuilibri, partitë pjesëmarrëse në koalicion do të angazhoheshin që Presidenca të drejtohej nga PDK-ja.

Për komunitetet joshumicë, platforma parashikon garantimin e përfaqësimit të plotë dhe ushtrimin e rolit të tyre kushtetues në institucionet e Republikës së Kosovës.

Deputeti e paraqet këtë nismë si një marrëveshje që kërkon përgjegjësi, jo heqje dorë nga legjitimiteti politik. Sipas tij, legjitimiteti i secilës palë duhet të ndërthuret me balancën e domosdoshme për krijimin e institucioneve funksionale.

Platforma përfshin edhe disa parime për orientimin strategjik dhe funksionimin e shtetit.

1. Partneriteti euroatlantik: Qeveria e Kosovës duhet të forcojë një bashkëpunim të qëndrueshëm, strategjik dhe efektiv me Shtetet e Bashkuara të Amerikës dhe NATO-n, të cilat Mustafa i cilëson si garanci për sigurinë kombëtare.

2. Vizioni kombëtar: Institucionet duhet të afrohen plotësisht me shtetin shqiptar dhe me shqiptarët në të gjithë rajonin, përmes ndërtimit të një platforme të përbashkët politike, ekonomike dhe kulturore.

3. Mbrojtja e vlerave çlirimtare: Shteti duhet të krijojë afërsi me çlirimtarët dhe të largojë çdo pengesë ligjore, propagandistike ose administrative që i mban ata larg institucioneve dhe narrativës zyrtare të shtetndërtimit.

4. Përgjegjësia shtetërore: Kryeministrit të Kosovës, sipas Mustafës, i është dhënë një mundësi historike për të ndërtuar politika kombëtare të drejta, vizionare dhe transparente, ndaj ai nuk duhet ta zhgënjejë më vendin.

Duke iu drejtuar kryetarit të LVV-së, Albin Kurti, Mustafa ka thënë se zgjidhja është në duart e tij. Ai i ka kërkuar Kurtit, si drejtues i forcës më të madhe parlamentare, ta nisë këtë proces dialogu.

Propozimi, sipas Mustafës, e njeh legjitimitetin e LVV-së, por njëkohësisht kërkon balancë dhe garanci për shtetin. Ai ka shprehur bindjen se PDK-ja është e gatshme të marrë përsipër pjesën e saj të përgjegjësisë.

Deputeti ka përsëritur se Kosova nuk ka nevojë për trazira apo kriza të reja politike, të cilat nesër mund të përdoren si arsyetim për pranimin e një realiteti që, sipas tij, mund të ndryshohet sot.

Mustafa beson se rruga alternative është një marrëveshje politike e mbështetur në përgjegjësi dhe vullnet për ndërtimin e një shteti normal. Ai e cilëson “Koalicionin për Normalitet” jo si kompromis me të ardhmen, por si detyrim ndaj vendit.

Në përfundim, ai ka theksuar se Kosovës i duhet mundësia për të ecur përpara dhe jo një tjetër krizë, duke bërë thirrje që kjo zgjidhje politike të shndërrohet në normalitet, zhvillim dhe perspektivë evropiane.

Mesazhin e tij, Rrustem Mustafa e ka përmbledhur me kalimin “nga bllokada te institucionet” dhe “nga përplasja te përgjegjësia”.

Mustafa mban postin e deputetit të Kuvendit të Republikës së Kosovës.

The post Rrustem Mustafa propozon “Koalicionin për Normalitet” për funksionalizimin e institucioneve appeared first on Albeu.com.

Lushtaku tha se ky ka qenë sulm i koordinuar ndaj tij.

Ndërkaq, lidhur me veprimin e tij ndaj kryeministrit Kurti, Lushtaku tha se s’ka pasur për qëllim reagim të dhunshëm.

““Ne nuk e kemi pritur që një zv/kryeministër të dhunojë demokracinë, dhe të sulmojë siç keni parë gjithë mediat dhe qytetarët, prandaj unë duke i parë të gjitha këto sulme në drejtim timin dhe të kolegëve, ku fizikisht jam gjuajtur me shishe plot me ujë, nga zv.kryeministri Besnik Bislimi, e ministrja e Drejtësisë, Albulena Haxshiu erdhi për me më shtyrë e pastaj ministri i Financave, Hekuran Murati i cikli ishte me një mjet të fortë dhe sigurisht që pas atij reagimi dhe pas asaj gjuajtje unë kam reaguar. Nuk e kisha në plantë kem një reagim të dhunshëm. Veprimi im ka qenë politik dhe si i tillë kam vepruar vetëm me një gjuajte të ujit. Besoj që të gjithë kanë nevojë për freskim sidomos kjo qeveri që më së shumti po i konvenon Serbisë dhe Rusisë, sesa vet Kosovës dhe strategjisë kombëtare. Unë do të padis njerëzit e lartpërmendur dhe sigurisht që organet kompetente do të japin vendimin e tyre”, ka thënë ai.

Deputeti i PDK-së tha se nuk do të ndalet duke kërkuar të drjetat dhe demokraci.

“Është pak e rëndësishme a do të më godasin apo do të më vrasin sepse ka me qëndru i fortë në kohën më të vështirë, në kohën e okupimit serb, ka me qëndru i fortë sepse me krenari e kemi mbrojt çdo pëllëmb të tokës së Kosovë. Kemi me qëndru të fortë dhe të qëndrueshëm në çdo aksion politik dhe demokratik dhe edhe pse mundohem me na ndal fjalën e lirë dhe aktivitet demokratike ata kurrë nuk do të munden të na ndalin, sepse dëshmorët e kombit janë sakrifikuar për këtë liri”, tha ai.

Lushtaku paralajmëroi se do të bëjë kontroll mjekësor, sepse sipas tij është lënduar gjatë sulmit. /Express/

The post Lushtaku paralajmëron padi ndaj Bislimit, Muratit e Haxhiut: U lëndova gjatë sulmit në Kuvend appeared first on Albeu.com.