Sipas Kaprit, maxhoranca dhe vetë Kuvendi e kanë humbur tashmë çdo lloj besueshmërie. Ai theksoi se kryeministri Edi Rama nuk ka arritur të administrojë vendin në kushte normale për asnjë çast gjatë kësaj kohe. Në fjalën e tij, deputeti solli në vëmendje edhe episode të rënda të së shkuarës së afërt, duke përmendur atë që e cilësoi si skandalin e ish-zëvendëskryeministres Belinda Balluku, si dhe valën e pakënaqësisë që shkaktoi projekti i Zvërnecit.

Ai e pasqyroi situatën si një izolim të plotë të qeverisë, jo vetëm nga populli, por edhe nga partnerët ndërkombëtarë. “Protestat nuk reshtin. Policia bllokon rrugët dhe rrethon institucionet, thjesht për t’ju ruajtur ju nga vezët që ju hedhin. Por deri kur do të fshiheni? Kjo legjislaturë ka edhe tre vjet të tjera. Nuk keni kuptuar që kjo sallë nuk përfaqëson më askënd. Rama nuk ka ditur të qeverisë normalisht as për një ditë të vetme. Vetëm pak muaj pasi festoi mandatin e ri, shpërtheu afera Balluku dhe u detyrua të bënte disa lëvizje. Madje, për shkak të investimit në Zvërnec, ju humbi fare dhe kontrolli, e shpërtheu ajo protesta e fuqishme. Prandaj tani po e godisni protestën. Kjo qeveri nuk ka më asnjë lloj legjitimiteti dhe për më tepër është në konflikt të hapur me Bashkimin Europian. Kryeministri pretendon se ka miratuar ligjin më të mirë të të gjitha kohërave. E vetmja zgjidhje e arsyeshme që na mbetet është shpallja e zgjedhjeve të parakohshme!” – deklaroi Kapri.

The post “Policia rrethon Kuvendin, deri kur do t’i shmangeni qytetarëve?”/ Kapri: Qeveria e ka humbur besimin, Shqipëria duhet të votojë para kohe appeared first on Albeu.com.