Për më shumë se dy javë veriu ka mbetur i bllokuar nga barrikadat ndërkohë vetëm sot është liruar për qarkullim rruga që çon në pikën kufitare në Merdare, ndërkohë është paralajmëruar heqje e barrikadave edhe në veri të Republikës së Kosovës.

Këto veprime kanë ardhur pasi Dejan Pantiqit i është ndryshuar masa e paraburgimit me arrest shtëpiak dhe pas dy komunikatave, një nga SHBA dhe BE dhe një tjetër nga KFOR-i, ku tregohej se Kosova ka dhënë garanci se s’ka listë të njerëzve të barrikadave për t’i arrestuar dhe që FSK-ja mund të shkojë në veri të Kosovës vetëm me pëlqimin paraprak të komandantit të KFOR-it, raporton Express.

Për gjithë tensionin e shkaktuar në veri të Republikës së Kosovës më të zëshëm kanë qenë deputetët e Parlamentit të Gjermanisë. Njëjtë sikur kryediplomatja gjermane, Annalena Baerbock edhe ligjvënësit gjerman kanë fajësuar Serbinë për tensionet në veri dhe për kërcënimin me ushtri ndaj Kosovës.

Deputeti Knut Abraham sot ka kërkuar nga Bashkimi Evropian që t’i bëjë më shumë presion Serbisë meqë e ka konsideruar të rrezikshëm dhe të papranueshëm kërcënimin që Vuçiq ia ka bërë Kosovës duke e vendosur ushtrinë në gjendje gatishmërie.

Ka reaguar edhe politikani tjetër gjerman, Frank Schwabe duke thënë se nëse s’ka rrugë kthimi për krizën në veri, atëherë përshkallëzimi i situatës mes Kosovës dhe Serbisë mund të kundërshtohet me integrimin më të shpejt të Kosovës në strukturat ndërkombëtare .

Deputeti tjetër Christoph Plos ka thënë se kërcënimet ushtarake të Serbisë dhe bllokimi i pikave kufitare janë veprime të papranueshme. Plos ka thënë se është e nevojshme që BE-ja të japë sinjale të qarta për Qeverinë e Serbisë.

“Kërcënimet ushtarake të Serbisë dhe bllokimi i pikave kufitare janë të papranueshme. Ne kemi nevojë për një sinjal të qartë nga BE për qeverinë serbe. Përshkallëzimi në Kosovë duhet të përfundojë menjëherë!”, ka shkruar ai.

Renata Alt, një deputete tjetër gjermane e cila merret në mënyrë aktive me Kosovën ka propozuar që të ndërpriten negociatat për anëtarësim të Serbisë në BE menjëherë dhe të ndërpriten ndihmat financiare të BE-së për Serbinë. Ajo ka akuzuar presidentin e Serbisë, Aleksander Vuçiq se po e kërcënon Ballkanin me luftë, shkruan Gazeta Express.

“Acarimi i konfliktit mes Serbisë dhe  Kosovës është një kërcënim serioz për sigurinë në Europë! Vuçiq provokon zjarr në Ballkan. Ndaloni negociatat e anëtarësimit në BE me Serbinë tani, jo më shumë euro nga Brukseli në Beograd”, ka shkruar Alt.

Edhe deputeti tjetër i Bundestagut Boris Mijatovic ka thënë se Serbia duhet të ndalojë politikën e së kaluarës.

Ndërkohë përmes një komunikate për media ka reaguar edhe deputeti gjerman, Adis Ahmetovic duke thënë se duhet sqaruar menjëherë nëse në Serbi janë vendosur pjesëtarë rus të “Wagner”.

Tani më shumë se kurrë, BE-së dhe SHBA-së i kërkohet të ndërmarrin masa të menjëhershme konkrete për të përjashtuar përshkallëzimin e mëtejshëm dhe për të siguruar paqen në Kosovë, për shembull duke rritur përsëri numrin e trupave të KFOR-it në vend, të cilat kanë dëshmuar vlerën e tyre si një spirancë e stabilitetit në rajon. Llogaritja e qartë e përpjekjes për të përsëritur një kapitull të errët në histori nuk duhet të lejohet të ketë sukses.”, ka thënë Ahmetovic./GazetaExpress/

The post Deputetët gjermanë njëzëri fajësojnë Serbinë për situatën në veri të Kosovës appeared first on Albeu.com.

Deputetët gjermanë i bëjnë thirrje qeverisë gjermane që të arrijë në BE një perspektivë “të shpejtë, të qartë, të besueshme dhe progres të prekshëm” për anëtarësimin e Shqipërisë, Bosnjë- Hercegovinës, Kosovës, Malit të Zi, Maqedonisë së Veriut dhe Serbisë ” në BE.

Deputetët opozitarë kërkojnë gjithashtu që me vendet kandidate të miratohen hapa të ndërmjetëm për t’i afruar ato edhe më ngushtë me BE-në. Konkretisht, ata sugjerjonë anëtarësimin e asociiuar pa të drejtë vote në politikat e përbashkëta të jashtme, të sigurisë dhe mbrojtjes si dhe në tregun e brendshëm të BE—së, në këmbim të reformave dhe zbatimit të kritereve të Kopenhagës dhe progresit në sundimin e ligjit.

Deputetët sugjerojnë që qeveria gjermane ta argumentojë këtë me situatën e re të sigurisë të krijuar pas agresionit rus në Ukrainë. Më tej deputetët kërkojnë edhe angazhimin e diplomacisë gjermane për anëtarësimin sa më shpejt që është e mundur të Kosovës në organizatat ndërkombëtare, dhe si hap i parë në Këshillin e Evropës.

Veç të tjerash, deputetët kërkojnë refuzim të vendosur të ndryshimit të kufijve në vendet e Ballkanit Perëndimor, perspektivën e anëtarësimit të tyre në NATO, rritjen e luftës kundër korrupsionit, vazhdimin e “Procesit të Berlinit” për bashkëpunimin dhe zhvillimin rajonal dhe reforma brenda BE-së që sigurojnë kapacitetin e tij absorbues në të ardhme.

“Agresioni rus kundër Ukrainës ka nxjerrë në pah cënueshmërinë e kufijve në zemër të Evropës”, argumentojnë deputetë në kërkesën e tyre si edhe faktin që konfliktet e ngrira mund të përshkallëzohen dhe përhapen shpejt.

“Konflikte të tilla rrezikojnë stabilitetin dhe interesat e paqes të BE-së”.

Pavarësisht progresit të madh në dekadat e fundit, Ballkani Perëndimor mbetet një rajon i paqendrueshëm, me krim të organizuar, korrupsion dhe gjyqësor të dobët.

Në kërkesën e tyre deputetët vënë në dukje edhe ekzistencën e problemeve ndëretnike dhe ndërfetare.

“Është në interesin e vetë BE-së që gjashtë shtetet e Ballkanit Perëndimor – Shqipëria, Bosnja dhe Hercegovina, Kosova, Mali i Zi, Maqedonia e Veriut dhe Serbia – të cilat nuk janë ende anëtare të BE-së, por janë të rrethuara drejtpërdrejt vetëm nga shtetet anëtare të BE-së, të arrijnë stabilitet afatgjatë, sundim ligji, zgjidhje paqësore të mosmarrëveshjeve, struktura solide demokratike dhe prosperitet ekonomik”, thuhet Në këtë mënyrë, synimi duhet të mbetet që në të ardhmen të kemi Shqipërinë, Bosnjën dhe Hercegovinën, Kosovën, Malin e Zi, Maqedoninë e Veriut dhe Serbinë, shkruajnë deputetët.

Mocioni me titull, “Ripërtëritja e perspektivës së BE-së për vendet e Ballkanit Perëndimor me politikë të përkushtuar”, pas një debati 40-minutësh, pritet të kalojë për konsultim te komisionet përgjegjëse të punëve të jashtme. /dw/

The post Deputetët gjermanë mocion në Bundestag: Këto 5 shtete të njohin Kosovën appeared first on Albeu.com.

Pas deputetit të opozitës gjermane, Michael Brand, CDU, edhe poltiikanët e pozitës socialdemokrate, Frank Schwabe dhe Adis Ahmetović, kanë shprehur në një deklaratë të përbashkët për media, publikuar të premten, më 13.05. mbështetjen e tyre për aplikimin e Kosovës për anëtarësim në Këshillin e Evropës:

“Ne mirëpresim dhe mbështesim aplikimin e Kosovës për anëtarësim në Këshillin e Evropës. Kosova, si i gjithë rajoni i Ballkanit Perëndimor, është pjesë integrale e Evropës dhe e familjes evropiane. Kjo duhet theksuar shprehimisht, veçanërisht duke pasur parasysh luftën në Ukrainë”, kanë shkruar dy deputetët.

Schwabe është kryetar i  delegacionit parlamentar të Gjermanisë në Këshillin e Evropës, ndërsa Ahmetoviç raportues kryesor për Ballkanin Perëndimor në Komisionin e Punëve të Jashtme për grupin parlamentar të socialdemokratëve në Parlamentin Gjerman.

Ata janë shprehur besimplotë se Kosova do t’i arrijë dy të tretat e nevojshme për anëtarësim në Këshillin e Evropës dhe kanë theksuar përkushtimin e  tyre në kuadër të BE-së për normalizimin e marrëdhënieve ndërmjet Kosovës dhe Serbisë dhe për liberalizimin e vizave për shtetasit e Kosovës.

Dy deputetët e shohin anëtarësim e Kosovës në Këshillin e Evropës edhe “si një shans për të bërë progres në këto dy çështje”.

Dy politikanët socialdemokratë, parti, së cilës i përket edhe kancelari Olaf Scholz, përforcojnë kësisoj edhe njëherë me këtë deklaratë përkushtimin e Gjermanisë për Ballkanin Perëndimor. Qeveria aktuale, e përbërë nga socialdemokratët (SPD), Të Gjelbrit, dhe liberalët (FDP)  e ka shpallur Ballkanin e Perëndimor prioritet qysh në marrëveshjen e koalicionit qeveritar.

Më parë edhe deputeti i CDU-së, Michael Brand, kishte kërkuar nga qeveria gjermane që të ndërmarrë hapa konkrete për të mbështetur Kosovën në rrugëtimin e saj në Këshillin e Evropës.

“Tani është e rëndësishme që qeveria federale jo vetëm të bisedojë, por edhe të veprojë në mënyrë aktive. Kancelari Federal dhe Ministrja e  Jashtme i kanë siguruar personalisht lidershipit kosovar mbështetjen e tyre. Kjo tani duhet të reflektohet në veprime konkrete”, kishte shkruar Brand në deklaratën e tij për media, të së enjtes, më 12.05.,  menjëherë pasi Kosova dorëzoi aplikimin në Strasburg. /dw

The post Deputetët gjermanë nga partia e Scholz: E mbështesim Kosovën në rrugën drejt Këshillit të Evropës appeared first on Albeu.com.