Sipas të dhënave nga Banka e Shqipërisë, në fund të muajit korrik vlera e këtij segmenti të depozitave zbriti në 200.4 miliardë lekë, në rënie me 4.2% krahasuar me të njëjtën periudhë të një viti më parë. Shkalla e rënies ka një tendencë në ngushtim gjatë këtij viti. Në fund të vitit 2022, rënia e depozitave me afat në Lekë kishte qenë 6.3%.

Por, ndryshimi vjetor ngelet në rënie të dukshme dhe cikli i rritjes së normave të interesit nga Banka e Shqipërisë nuk ka mjaftuar për të kthyer në rritje depozitat me afat në monedhën vendase.

Normat e interesit të depozitave filluan të rriteshin pas ndryshimit të kursit të politikës monetare të Bankës së Shqipërisë, në mars të vitit të kaluar.

Rritja u nxit sidomos nga një rritje e shpejtë e yield-eve të Bonove të Thesarit të qeverisë shqiptare, që tërhoqi një rritje të fortë të investimeve direkte të individëve dhe krijoi më shumë konkurrencë për kursimet e publikut. Por, rënia e yield-eve të bonove dhe obligacioneve që prej fillimit të këtij viti ka frenuar ndjeshëm rritjen e normave të interesit të depozitave.

Këtë vit, Banka e Shqipërisë e ka frenuar ciklin e rritjes së shpejtë të normave të interesit. Norma bazë është rritur vetëm një herë, në muajin mars dhe aktualisht ndodhet në 3%, një nga nivelet më të ulët në Europë.

Ky frenim shpjegohet më së shumti me forcimin e lekut në kursin e këmbimit valutor. Sipas statistikave të Bankës së Shqipërisë, norma mesatare e interesit për të gjitha depozitat me afat në Lekë të individëve në korrik zbriti në 1.77%, nga 1.84% që kishte qenë për muajin qershor.

Ndërkohë, llogaritë rrjedhëse dhe depozitat pa afat në Lekë vazhdojnë të rriten, duke dëshmuar se në përgjithësi aktorët ekonomikë vazhdojnë të preferojnë t’i mbajnë fondet në banka në llogari likuide dhe të gatshme për tu përdorur. Në fund të muajit korrik, llogaritë dhe depozitat pa afat në lekë ishin në rritje vjetore me 3.8%, në nivele të përafërta me fundin e vitit 2022.

Megjithatë, periudha inflacioniste ka ndikuar ndjeshëm në ngadalësimin e rritjes edhe për këtë segment të depozitave në Lekë. Në periudhën 2020-2021, llogaritë rrjedhëse dhe depozitat me afat në lekë ishin rritur me ritme dyshifrore, përkatësisht 25.9% dhe 14.5%.

Rritja e inflacionit në fillim të vitit 2022 dhe shtrëngimi i ndjeshëm i politikës monetare dhe fiskale gjatë kësaj periudhe e ka frenuar dukshëm rritjen e depozitave bankare në përgjithësi.

Ndërkohë, si rezultat i forcimit të Lekut në kursin e këmbimit, për herë të parë në korrik edhe depozitat në valutë të huaj (me vlerë të shprehur në Lekë) pësuan rënie me 1.8% me bazë vjetore./monitor

The post Depozitat me afat në lekë, në rënie për të dhjetin vit radhazi appeared first on Albeu.com.

Kursimet që ndodhën në sistemin bankar zbritën në 1.27 trilionë lekë (rreth 11 miliardë euro) në fund të muajit mars 2023, me një tkurrje prej 0.9%, ose 11.3 miliardë lekë në raport me muajin e mëparshëm.

Si depozitat në monedhën vendase ashtu dhe ato në valutë kishin tendencë rënëse.

Kursimet në lekë ishin 549 miliardë lekë, me një tkurrje prej 0.22% në krahasim me shkurtin. Rritja e interesave duket se nuk po nxit kursimet në monedhën vendase në banka, teksa konsumatorët nga njëra anë po kursejnë më pak për shkak të rritjes së çmimeve dhe nga ana tjetër po gjejnë si alternativë më interesante investimet në bonot e thesarit, që japin kthime më të larta.

Kursimet e individëve (pa afat) ishin ato që shënuan rënien më të fortë nga depozitat në lekë.

Banka e Shqipërisë ka rritur disa herë normat bazë të interesit gjatë vitit të fundit, duke e çuar aktualisht në 3%, nga 0.5% që ishte në mars të një viti më parë, para se të fillonte rritja e fortë e çmimeve.

Kjo lëvizje është ndjekur dhe nga bankat, që ofrojnë interesa më të larta për depozituesit, por që sërish nuk kanë arritur të sjellin ndonjë rritje të kursimeve në banka.

Më e thellë ishte tkurrja e depozitave në valutë, por që më së shumti reflekton dhe efektin e zhvlerësimit të euros, teksa të dhënat nga Banka e Shqipërisë raportohen në lekë. Në mars të këtij viti euro ka zbritur në 114 lekë, nga rreth 122 lekë që ishte në të njëjtën periudhë të një viti më parë.

Depozitat në valutë zbritën në 719 miliardë lekë, me rënie 10 miliardë lekë nga muaji i mëparshëm, duke ndikuar në gati 90% të reduktimit total të kursimeve të raportuara nga Banka e Shqipërisë.

Valuta vijon të mbetet monedha e preferuar për kursimtarët. Në fund të muajit mars, kursimet në monedhë të huaj (kryesisht euro) përbënin 56.7% të totalit.

The post Depozitat bien sërish në mars, forcimi i lekut “zhvlerëson” kursimet në euro appeared first on Albeu.com.