Deputetja e PDK-së, Ganimete Musliu, njoftoi se të mërkurën, gjatë seancës plenare të Kuvendit, ishte cenuar fizikisht nga një pjesëtar i policisë. Për këtë rast, ajo tha se bashkë me sekretaren e përgjithshme të PDK-së, Vlora Çitaku, e ka denoncuar policin në Inspektoratin Policor të Kosovës (IPK).

Musliu bëri të ditur se nga IPK-ja kanë kërkuar hetimin e veprimeve të zyrtarit policor. Ajo theksoi se, si anëtare e Komisionit Parlamentar për Siguri, për 15 vjet radhazi ka punuar me përkushtim që Policia e Kosovës të jetë profesionale, e depolitizuar dhe me integritet, ndaj nuk mund të qëndrojë në heshtje përballë një rasti të tillë.

Sipas saj, reagimi nuk synon vetëm mbrojtjen personale, por para së gjithash ruajtjen e institucionit të Policisë së Kosovës dhe integritetit të tij. Musliu deklaroi se duhet parandaluar çdo mundësi që Policia të vihet nën urdhrat apo ndikimin e cilësdo parti politike.

Përveç përgjegjësisë së policit, deputetja kërkoi të mësohet se kush e thirri Policinë e Kosovës në sallën ku zhvillohen seancat plenare dhe kush e autorizoi praninë dhe ndërhyrjen e saj aty. Ajo vlerësoi se ky informacion duhet t’u bëhet i njohur si Kuvendit, ashtu edhe opinionit publik.

Musliu tha se, gjatë një seance konstituive në të cilën Kuvendi ende nuk është konstituuar, rregullat procedurale përcaktojnë se Policia mund të ftohet në sallë, nëse lind nevoja, vetëm nga mandatari për drejtimin e seancës. Për këtë arsye, ajo kërkoi sqarim publik nëse, në rastin konkret, ftesa ishte bërë nga Avni Dehari.

Ajo shtroi pyetjet se kush e dha urdhrin, kush e ftoi Policinë dhe mbi cilën bazë u ndërhy në sallën e Kuvendit. Sipas Musliut, këto nuk janë çështje personale, por pyetje që lidhen me përgjegjësinë institucionale.

Deputetja theksoi se, kur Policia futet në sallën e Kuvendit dhe një deputet cenohet fizikisht, hetimi nuk duhet të kufizohet vetëm te polici që e ka kryer veprimin. Sipas saj, duhet të shqyrtohet edhe i gjithë zinxhiri i urdhrit dhe i përgjegjësisë që çoi Policinë në atë vend.

Musliu përsëriti se për 15 vjet ka punuar që Policia e Kosovës të mbetet profesionale, e pavarur dhe me integritet, prandaj nuk do të heshtë në një moment kur këto parime, sipas saj, kanë më shumë nevojë se kurrë të mbrohen. Ajo tha se Policia duhet t’i shërbejë ligjit dhe Republikës së Kosovës, jo urdhrave politikë, ndërsa u bëri thirrje të gjithë policëve dhe shërbyesve civilë në vend që t’u qëndrojnë besnikë ligjit, Kushtetutës dhe detyrës profesionale, pa iu nënshtruar asnjë diktati, presioni apo urdhri politik që dëmton pavarësinë dhe integritetin e institucioneve shtetërore.

The post Musliu e kallëzon në IPK policin për cenim fizik në sallën e Kuvendit appeared first on Albeu.com.

Sipas Salianjit, pikëpyetjet mbi procedurën e përzgjedhjes së fituesit dalin nga një dokument i EFA Ventures, një prej grupeve më të mëdha në industrinë e mbrojtjes.

Ai thotë se kjo kompani paraqiti një ofertë për 3 avionë zjarrfikës Thrush 710P, të cilët përmbushnin plotësisht kërkesat dhe qëndronin brenda buxhetit të Ministrisë së Mbrojtjes.

Megjithatë, pasi fillimisht ishte shpallur fituese, oferta u skualifikua dhe kontrata iu dha kompanisë Air Tractor SRL, me një vlerë 2.7 milionë euro më të lartë.

Ish-deputeti demokrat kërkoi që qytetarëve t’u shpjegohet përse tenderët fitohen vazhdimisht nga kompanitë që paraqesin ofertat më të shtrenjta.

Ai pyeti gjithashtu se ku ndodhen aktualisht avionët dhe nëse janë gati të përdoren për të ndihmuar gjatë situatave kritike.

Salianji kërkoi transparencë të plotë nga Ministria e Mbrojtjes dhe publikimin e çdo dokumenti që lidhet me këtë procedurë.

Ai ngriti pikëpyetje edhe për kompaninë fituese dhe problemet e saj me ligjin në vende të tjera të Bashkimit Europian.

Sipas tij, Shqipëria po trajtohet nga Rama si pronë personale, ku jepen favore me vlerë miliona euro, ndërkohë që qytetarët përballen çdo ditë me pasojat.

Salianji theksoi se, kur preket siguria kombëtare dhe vihet në rrezik mbrojtja efektive e jetës, pronës dhe pyjeve të Shqipërisë nga zjarret, procesi duhet të jetë tërësisht transparent dhe i kontrollueshëm.

Ai deklaroi se Ministria e Mbrojtjes ka detyrimin të vërë në dispozicion të publikut të gjithë dokumentacionin e tenderit dhe t’u japë shqiptarëve përgjigje të plota.

Në të njëjtën kohë, i bëri thirrje Prokurorisë së Posaçme, SPAK, të hetojë procedurën, të cilën e cilësoi si një proces që ngre dyshime për aferë korruptive.

Në reagimin e tij të plotë, Salianji deklaroi se qeveria e Edi Ramës nuk po heq dorë nga korrupsioni dhe abuzimi me fondet publike. Ai përsëriti se Ministria e Mbrojtjes shpalli fituese një kompani me ofertë 2.7 milionë euro më të lartë, ndërsa avionët vijojnë të mungojnë.

The post Salianji denoncon tenderin për avionët zjarrfikës: U zgjodh oferta 2.7 milionë euro më e shtrenjtë, SPAK të nisë hetimet appeared first on Albeu.com.

Stafa deklaron se, sapo përfundoi filmimet dhe u nis drejt Elbasanit, u ndoq nga një automjet me targë AB489YZ. Sipas rrëfimit të tij, makina i bllokoi rrugën dhe e detyroi të ndalonte.

Gazetari tregoi se regjistroi për 20 sekonda një eskavator që po nxirrte inerte nga lumi Shkumbin. Pasi hipi në makinë dhe doli në rrugë për të udhëtuar drejt Elbasanit, një fuoristradë e zezë iu vendos pas në mënyrë të dhunshme dhe i sinjalizoi me drita që të ndalonte. Ai vijoi lëvizjen, ndërsa automjeti iu afrua shumë nga krahu i majtë dhe më pas i doli përpara, duke i prerë rrugën. Stafa tha se u tërhoq disa metra mbrapsht me makinën e tij, e kaloi fuoristradën nga ana e djathtë dhe vazhdoi rrugën. Sipas tij, ndjekja zgjati rreth 1 km.

Në kallëzimin e paraqitur në Policinë e Elbasanit, Stafa ka kërkuar zbardhjen e plotë të ngjarjes, identifikimin e personave që gjendeshin në automjet dhe mbledhjen e administrimin e çdo prove. Ai u ka bërë thirrje gjithashtu institucioneve përgjegjëse që të kontrollojnë nëse aktiviteti i filmuar në lumin Shkumbin zhvillohej në përputhje me ligjin.

Gazetari theksoi se veprime të tilla, të cilat i cilësoi të ngjashme me akte mafioze, nuk do ta frikësojnë. Stafa u shpreh se do ta vazhdojë me përkushtim punën e tij, pa pasur frikë nga askush, si dhe do të verifikojë e publikojë në media çdo denoncim që merr nga qytetarët. Ai përfundoi duke deklaruar se kërcënime të tilla “alla mafioze” nuk e trembin.

The post Dokumentoi marrjen e inerteve nga Shkumbini, gazetari Osman Stafa kallëzon ndjekjen dhe bllokimin e rrugës appeared first on Albeu.com.

Gjatë një deklarate për mediat nga zyra e selisë blu, zëdhënësja e Antikorrupsioni, Genta Vangjeli, tha se Kryebashkiaku Tavo i ka dorëzuar 7308 prona një kompanie private.

Nën drejtimin e Vangjel Tavos, Bashkia Himarë, ka shpallur fituese kompaninë ‘EC PRO PARTNERS’ shpk për një tender me vlerë mbi 500 mijë euro, me objekt: ‘menaxhimin e pronave’ në disa fshatra të Himarës.

Vangjeli deklaroi se dokumentet tregojnë se kompania private do të kryejë regjistrimin fillestar sistematik të pasurive, dhe të tjera e gjithashtu krijimin e bazës së të dhënave për rreth 7308 prona në Çorraj (944 prona), Fterrë (528), Gjilekë (962), Kallarat (750), Pilur (391) dhe Himarë (3733).

Sipas saj, kjo kompani private do të ketë një rol dominues në procesin që përcakton se kush është pronar dhe kush jo në një nga zonat më të lakmuara të Shqipërisë.

Ajo theksoi se dhe vetë Bashkia Himarë pranon në dokumentacionin e tenderit se ekzistojnë probleme të mëdha me kartelat, hartat kadastrale apo regjistrimet e pronave pasi shumë familje rezultojnë me prona të regjistruara në zona të ndryshme kadastrale dhe se administrata nuk ka kapacitetet e nevojshme për të zgjidhur këto problematika.

Në fund, ajo tha se Himara nuk është pronë e Vangjel Tavos apo Edi Ramës, po është është shtëpia e himarjoteve dhe pronat e tyre nuk mund të vendosen në shërbim të interesave të pushtetit dhe të klientëve të tij.

Deklarata e Genta Vangjeli:

Ajo që po ndodh sot në Himarë nuk është thjesht një procedurë administrative por një operacion i mirëorganizuar që rrezikon të vendosë në duart e interesave private fatin e mijëra pronave të banorëve të zonës.

Nën drejtimin e Vangjel Tavos, Bashkia Himarë ka shpallur fituese kompaninë ‘EC PRO PARTNERS’ shpk për një tender me vlerë mbi 500 mijë euro, me objekt: ‘menaxhimin e pronave’ në disa fshatra të Himarës.

Dokumentet tregojnë se kompania private do të kryejë regjistrimin fillestar sistematik të pasurive, dhe të tjera e gjithashtu krijimin e bazës së të dhënave për rreth 7308 prona në Çorraj (944 prona), Fterrë (528), Gjilekë (962), Kallarat (750), Pilur (391) dhe Himarë (3733).

Me pak fjalë, një kompani private do të ketë një rol dominues në procesin që përcakton se kush është pronar dhe kush jo në një nga zonat më të lakmuara të Shqipërisë.

Kompania fituese ka qenë më herët partnere në projekte miliona eurosh me ‘Gjikuria’ shpk, një emër i njohur për interesat e tij të mëdha ndërtimore dhe pronësore në bregdetin e jugut.

Kjo ngre dyshime serioze për një skemë që mund të përdoret për të favorizuar klientët e pushtetit në kurriz të pronarëve të ligjshëm.

Vetë Bashkia Himarë pranon në dokumentacionin e tenderit se ekzistojnë probleme të mëdha me kartelat, hartat kadastrale apo regjistrimet e pronave pasi shumë familje rezultojnë me prona të regjistruara në zona të ndryshme kadastrale dhe se administrata nuk ka kapacitetet e nevojshme për të zgjidhur këto problematika.

Por në vend që shteti të forcojë institucionet përgjegjëse dhe të garantojë mbrojtjen e pronës private, ja dorëzon këtë proces një kompanie private.

Kjo nuk është zgjidhje, kjo është një recetë e rrezikshme për manipulim. Në Himarë, ku prej vitesh zhvillohet një betejë për pronat dhe ku banorët kanë denoncuar vazhdimisht tentativa për tjetërsim, grabitje dhe përvetësim të tokave, një vendim i tillë nuk mund të konsiderohet rastësi.

Pyetja është e thjeshtë:

Kush do të përfitojë nga ky proces? Banorët e Himarës apo oligarkët dhe klientët e pushtetit deri tek vetë Edi Rama?

Partia Demokratike kërkon transparencë të plotë për këtë proces, verifikim të menjëhershëm dhe garanci ligjore se asnjë pronë e himariotëve nuk do të bëhet objekt manipulimi në favor të interesave private. Himara nuk është pronë e Vangjel Tavos as e Edi Ramës. Himara është shtëpia e himarjoteve dhe pronat e tyre nuk mund të vendosen në shërbim të interesave të pushtetit dhe të klientëve të tij. Koha e grabitjes së pronave me vulën e institucioneve duhet të marrë fund.

The post Skandal në Himarë/ PD: Kryebashkiaku Tavo i dorëzon 7308 prona një kompanie private, dyshime për grabitje me vulë zyrtare appeared first on Albeu.com.

Vangjeli deklaroi se vëllai i ministrit Hoxha po hetohet për pastrim parash të kryer në kuadër të organizatës kriminale dhe, gjatë marrjes në pyetje, ka pranuar se ka lidhur kontratë sekrete me AKSHI-n dhe Autoritetin Kombëtar për Sigurinë Kibernetike, me vlerë rreth 60 milionë euro.

Në fund, Zëdhënësja për Antikorrupsionin në PD bëri thirrje në protestën e opozitës, e cila do të mbahet më 17 prill në oren 19:00, në Tiranë. Ajo tha se Shqipëria nuk mund të jetë peng i një regjimi që shpërblen heshtjen dhe ndëshkon të vërtetën.

Deklarata e zëdhënëses së Antikorrupsionit në PD, Genta Vangjeli:

Gjatë prezantimit të drejtuesit të ri të AKSHI-t disa javë më parë, KM Edi Rama artikuloi publikisht filozofinë e tij të qeverisjes: heshtje dhe bindje të verbër ndaj pushtetit.

Thirrja drejtuar administratës për të “mbajtur gojën e mbyllur” nuk është rastësi, por një deklaratë e hapur kundër transparencës, llogaridhënies dhe shtetit ligjor. Është shpallje publike e një modeli qeverisjeje që kërkon nënshtrim, jo shërbim ndaj qytetarëve.

Jo vetëm AKSHI, por edhe të tjera institucione vijojnë të operojnë në tendera me të njëjtët operatorë, edhe pse SPAK për disa prej tyre ka evidentuar se garojnë fiktivisht, me qëllimin e dyshuar për të krijuar idenë e garës reale, madje duke bashkëkoordinuar me njëri-tjetrin, me qëllimin final që të shpallet fituese oferta e paracaktuar.

Rasti konkret ka të bëjë me First shpk, kompaninë që del në qendër të një rrjeti të dyshuar korrupsioni dhe pastrimi parash, në pronësi, të paktën në dokumente, të vëllait të ministrit për Europën dhe Punët e Jashtme, z. Ferit Hoxha.
Dëshmia e vetë Gëzim Hoxhës përpara SPAK konfirmon atë që opozita ka denoncuar prej vitesh: një sistem të kapur të prokurimeve publike.

G. Hoxha po hetohet për pastrim parash të kryer në kuadër të organizatës kriminale dhe, gjatë marrjes në pyetje, ka pranuar se ka lidhur kontratë sekrete me AKSHI-n dhe Autoritetin Kombëtar për Sigurinë Kibernetike, me vlerë rreth 60 milionë euro, dhe se për këtë ka nënkontraktuar disa shërbime nga shoqëria EA Solution shpk, në pronësi të Ergys Agasit, aktualisht nën masën e sigurisë “arrest me burg” të paekzekutuar. Në këtë realitet, motoja e Edi Ramës duket e qartë: hesht dhe shpërblehesh. Ndoshta nuk është rastësi që deponimet e Gëzim Hoxhës mbetën me kaq…

Në të njëjtën periudhë, në shenjë mirënjohjeje, vëllai i tij, Ferit Hoxha, gradohet në detyrën e ministrit të jashtëm, ndërsa vetë ai mbetet nën masën e sigurisë së ndalimit të lëvizjes jashtë vendit. Halli është mos nën magjinë e Edi Ramës bien dy prokurorët e çështjes penale apo dhe gjyqtarët… Partia Demokratike dhe opinioni publik kërkojnë zbardhjen e plotë dhe të menjëhershme të kësaj çështjeje, pa asnjë vonesë dhe pa asnjë kompromis. Të premten, në orën 19:00, qytetarët në shesh – për demokracinë, për drejtësinë dhe për të ardhmen e vendit. Shqipëria nuk mund të jetë peng i një regjimi që shpërblen heshtjen dhe ndëshkon të vërtetën.

The post PD denoncon: Rama shpërblen ata që heshtin, vëllai i ministrit nën hetim nga SPAK për pastrim parash në aferën e AKSHI-t appeared first on Albeu.com.

Policia vendore konfirmoi se ka marrë në Komisariat denoncim nga vajza e të ndjerës, e cila pretendon mjekimin e pakujdesshëm me pasojë humbjen e jetës së nënës së saj në Urgjencë.

Kallëzimi është depozituar ndaj 2 mjekeve të Urgjencës.

“U referuan materialet në Prokurori, ku nisi procedimi penal për shtetaset E. R. dhe Xh. T., me detyrë mjeke në Urgjencën e spitalit të Elbasanit, pasi ka kallëzuar shtetasja E. T., se ka humbur jetën në këtë pavion, nëna e saj, L. Gj., 63-vjeçe”, thanë burime zyrtare.

Sipas dëshmisë së dhënë nga denoncuesja dhe verifikimeve të para, dyshohet se ngjarja ka ardhur nga pakujdesia gjatë trajtimit mjekësor.

“Punohet për sqarimin e rrethanave dhe të shkakut të saktë të humbjes së jetës”, tha policia.

Kurse hetimet për zbardhjen e ngjarjes i kaluan Prokurorisë vendore.

The post Nëna i ndërroi jetë në spital, vajza denoncon dy mjeket e Urgjencës në Elbasan, gjatë trajtimit dyshohet se… appeared first on Albeu.com.

Në një deklaratë publike, Vangjeli theksoi se projektet e prezantuara si “vepra madhore” po rezultojnë, sipas opozitës, simbol i keqmenaxhimit, mungesës së standardeve dhe i dyshimeve për abuzim me fondet publike.

“Në vend të infrastrukturës së qëndrueshme, qytetarëve po u serviren investime që dëmtohen vetëm pak muaj apo vite pas inaugurimit”, u shpreh ajo.

Deklarata e zëdhënëses së Antikorrupsionit në PD, Genta Vangjeli:

Të paktën 956 milionë euro nga taksat e shqiptarëve janë hedhur në asfalt që sot po shembet, po rrëshqet dhe po rrezikon jetën e qytetarëve.

Projektet rrugore të propaganduara si “vepra madhore” po rezultojnë simbol i keqmenaxhimit, mungesës së standardeve dhe i dyshimeve serioze për abuzim me fondet publike.

Në vend të infrastrukturës së qëndrueshme, qytetarëve po u serviren investime që dëmtohen vetëm pak muaj apo vite pas inaugurimit.

Vetëm në muajt e fundit janë raportuar shembje apo dëmtime në këto akse:

Rruga e Arbrit – Tuneli i Murrizit, inauguruar 1 vit më pare, kosto: mbi 300 milionë euro
Tuneli i Llogarasë – inauguruar 19 muaj më parë
Kosto: mbi 200 milionë euro

Tuneli i Skërficës rruga Kardhiq-Delvinë– hapur 3 vite më parë, kosto: rreth 145 milionë euro
Rruga Qukës–Qafë Plloçë – inauguruar 5 muaj më pare, kosto: rreth 260 milionë euro
Aksi Librazhd – Pogradec kosto: rreth 50 milionë euro

Aksi Maqellarë – Peshkopi (Luzni) – inauguruar 9 muaj më parë kosto: 10 milionë euro
Unaza e Burrelit – inauguruar 6 muaj më parë
Kosto: 1.2 milionë euro

Aksi Usojë – Mallakastër – inauguruar 5 muaj më parë kosto: 650 mijë euro
Aksi Kuç – Qeparo (segmenti që lidh lumin e Vlorës me Himarën) – inauguruar para 6 vitesh
Kosto: 35.4 milionë euro

Aksi Vllahinë – Poçem – çarje 2 vite pas ndërtimit , kosto: 4.7 milionë euro
Prej më shumë se 5 ditësh, qarkullimi në juglindje të vendit ka qenë i bllokuar, duke dëmtuar qytetarët dhe ekonominë lokale.

Kjo nuk është thjesht çështje infrastrukture.
Kjo është çështje përgjegjësie.
Kur rrugët shemben, nuk shembet vetëm asfalti — shembet besimi i qytetarëve, dëmtohet ekonomia kombëtare dhe rëndohet barra mbi taksapaguesit.
Ne kërkojmë:

Hetim të plotë për përgjegjësit teknikë dhe administrativë të këtyre projekteve.
Garanci reale sigurie për qytetarët që përdorin këto akse rrugore.
Edi Rama dhe qeveria e tij kanë pasur 13 vite kohë për t’u treguar shqiptarëve se çfarë mund të bëjnë për vendin.

Pas 13 vitesh, bilanci është i qartë: rrugë të shembura, kosto të fryra, korrupsion dhe mungesë llogaridhënieje.
Shqiptarët meritojnë rrugë të sigurta, jo projekte që rrëshqasin bashkë me dherat.
Koha e llogaridhënies nuk mund të shtyhet më.
Të shtunën, në orën 18:00, të gjithë në shesh.

The post Miliona euro të hedhura në rrugët që po shemben/ Partia Demokratike: Hetoni përgjegjësit teknikë dhe administrativë appeared first on Albeu.com.

Blushi deklaroi se në terren nuk ekziston asnjë ndërtim dhe se zona është aktualisht një livadh, në kundërshtim me projektin 3D të prezantuar nga kryeministri Edi Rama në prill të vitit të kaluar. Sipas tij, qeveria kishte njoftuar asokohe se parku ishte funksional dhe se rezidentët e parë kishin marrë edhe certifikatat përkatëse.

Sipas denoncimit, “Durana Tech Park” gëzon status të veçantë ligjor bazuar në ligjin nr. 58/2021 dhe vendime të Këshillit të Ministrave, duke u ofruar kompanive përfituese lehtësira të konsiderueshme fiskale. Blushi pretendon se dhjetëra kompani, të cilat sipas tij nuk operojnë realisht në këtë zonë, janë regjistruar si rezidente për të përfituar përjashtime nga tatimi mbi fitimin, TVSH-ja, taksat mbi pagat, sigurimet shoqërore dhe taksat e pasurisë, për periudha nga 10 deri në 15 vite.

Ai akuzoi Korporatën Shqiptare të Investimeve, e drejtuar nga Elira Kokona, si dhe Shoqatën e Kompanive të Teknologjisë së Informacionit, për përfshirje në atë që e cilësoi si një “skemë abuzimi financiar”. Në deklaratë u përmendën gjithashtu emra dhe çështje nën hetim nga SPAK, për të cilat Blushi kërkoi verifikim të lidhjeve të mundshme me këtë projekt.

Blushi e krahasoi situatën me çështjen e inceneratorëve, duke theksuar se, sipas tij, parku teknologjik ekziston vetëm në dokumente dhe prezantime digjitale, ndërsa në realitet mungon çdo investim fizik. Ai i bëri thirrje Strukturës së Posaçme kundër Korrupsionit dhe Krimit të Organizuar (SPAK) të kryejë një verifikim në terren dhe të hetojë përfitimet fiskale të akorduara.

The post Tedi Blushi denoncon projektin “Durana Tech Park”: Është vetëm një livadh ku janë regjistruar 46 kompani që nuk paguajnë taksa appeared first on Albeu.com.

Në një deklaratë për mediat, nga zëdhënësja e Antikorrupsionit në PD, Genta Vangjeli, thuhet se sipas të dhënave nga Open Procurement, disa kompani të lidhura me ish-zyrtarë dhe zyrtarë shtetërorë kanë përfituar miliona euro nga tendera për plane mbarështimi pyjor, ndërkohë që mbi 800 inxhinierë pyjesh janë të papunë dhe nuk kanë mundësi të ushtrojnë profesionin.

Bëhet fjalë për kompaninë ‘Lurimi’ shpk e ish-kreut të IKMT-së Dibër, Lutfi Miftari, i akuzuar për korrupsion dhe kompaninë ‘Diava Consulting’ shpk, me pronare znj.

Vjollca Diku, e cila ka mbajtur detyrën e Drejtoreshës në administratën shtetërore pranë Agjencisë Kombëtare të Zonave të Mbrojtura.

Ndërsa po ashtu sipas PD, tender ka fituar edhe ‘Deja’ shpk (Haziz Porja) dhe ‘Arabel Studio shpk’ e kjo e fundit në pronësi të znj.

Ana Nishku, akuzuar për veprën penale ‘Falsifikim i dokumenteve’, e cila ka qenë një nga të arrestuarit e SPAK për tenderin e bashkisë Bulqizë që penalizoi Lefter Allën.

Ekspertët denoncojnë se planet janë thjesht kopje të dokumenteve të vjetra pa verifikime në terren dhe pa monitorim nga institucionet përgjegjëse, tha Vangjeli.

‘PD kërkon që organet e hetimit të ndërhyjnë menjëherë për ndëshkimin e shkelësve, duke theksuar se pasuria natyrore i përket shqiptarëve dhe jo zyrtarëve të korruptuar’, tha Genta Vangjeli.

Deklarata e plotë e zëdhënëses së Antikorrupsionit në PD, Genta Vangjeli:

Nuk është hera e parë që PD ngre zërin për anomalitë që lidhen me administrimin dhe menaxhimin pyjeve, kullotave dhe zonave të mbrojtura.

Krahas anomalive ligjore të krijuara dhe denoncuara, nga të dhënat e administruara nga e tenderave vërehet krijimi i monopoleve nga subjekte preferencialë të lidhur me zyrtarë apo ish zyrtarë shtetërorë, ndërkohë që mbi 800 inxhinierë pyjesh janë pa punë, duke u privuar nga e drejta për të ushtruar profesionin e tyre qoftë dhe në mënyrë private.

Sipas Open Procurement konstatohet se procedurat e prokurimit me objekt ‘Hartimin e planeve të mbarështimit të fondit pyjor dhe kullosor për ekonominë pyjore në zona të ndryshme’, shkojnë tek një grusht operatorësh.

Kryeson subjekti ‘Lurimi’ shpk në pronësi të ish-kreut të IKMT-së Dibër, Lutfi Miftari i akuzuar për korrupsion.

Ky subjekt sipas Open Corporates ka përfituar mbi 1 milion euro (me TVSH) nga bashkitë e Prrenjas, Bulqizë, Shkodër, Cërrik, Tepelenë, Tiranë, Pogradec, Dropull, Përmet etj.

Subjekt tjetër ‘Diava Consulting’ shpk me pronare znj. Vjollca Diku e cila ka mbajtur detyrën e Drejtoreshës në administratën shtetërore pranë Agjencisë Kombëtare të Zonave të Mbrojtura.

Ky subjekt sipas Open Corporates ka përfituar mbi rreth 600 mijë euro (me tvsh) nga bashkitë Shkodër dhe Tiranë.

Subjekte të tjerë ‘Deja’ shpk (Haziz Porja) dhe ‘Arabel Studio shpk’ e kjo e fundit në pronësi të znj. Ana Nishku, akuzuar për veprën penale ‘Falsifikim i dokumenteve’, e cila ka qenë një nga të arrestuarit e SPAK për tenderin e bashkisë Bulqizë që penalizoi Lefter Allën.

Ekspertët e pyjeve, pjesë e strukturave të PD, kanë denoncuar se:

Planet thjesht kopjohen nga ish planet e vjetra të mbarështimit të cilave u ka kaluar afati i përdorimit, duke evituar matjet dhe grumbullimin e të dhënave në terren;

Është e pa mundur që një subjekt të hartojë 2-3 apo 4 plane mbarështimi në një vit.

Nëse vizitohet terreni për verifikimin e punimeve të kryera nuk gjendet asnjë shenjë ndarëse e ekonomive, ngastrave dhe n/ngastrave sipas kërkesave të manualit; (Ku të jenë materializuar në terren kufijtë me bojë të kuqe dhe tabela me numrat e ngastrave apo n/ngastrave).

Nuk gjenden sipërfaqet prove të inventarizimit të grumbujve pyjor të materializuar në terren; (Ku numri i sipërfaqeve prove për inventarizim të grumbujve pyjore, për një ekonomi pyjore varion nga 2000 – 3500 apo me shumë sipërfaqe, realizimi i të cilave kërkon kohë dhe staf profesional).

Mungojnë raporte e monitorimit në terren nga strukturat e Ministrisë Turizmit dhe Mjedisit. (Agjencia Kombëtare Pyjeve);

Shpenzimet për hartimin e këtyre planeve janë marramendëse, ato përgjithësisht janë të papërditësuara në kadastrën e fondit pyjor dhe kullosor kombëtar, (Inxhinierët që kanë marrë pjesë në këto studime).

Duke qenë se Ministrja e linjës Mirela Kumbaro (Furxhi) nuk ka reaguar për të marrë masa lidhur me këto konstatime, Partia Demokratike kërkon nga organet e hetimit të nisin menjëherë procedurat ligjore për identifikimin dhe penalizimin e shkelësve të ligjit.

Pasuria kombëtare është e shqiptarëve, nuk është as e ministrit as e drejtorëve as e zyrtarëve të kësaj qeverie të korruptuar.

The post Partia Demokratike: Tenderat për menaxhimin e pyjeve po i fitojnë ish-zyrtarët e dënuar appeared first on Albeu.com.

Në videon e publikuar në konferencën me gazetarët, kreu i PD, Sali Berisha e ka quajtur “një provë pa asnjë hije dyshimi”, tregon qartë skemën e manipulimit: një person futet në qendër votimi me një fletë të mbushur paraprakisht, e hedh në kuti dhe më pas merr fletën bosh për t’ia dorëzuar tjetrit jashtë, duke vazhduar kështu zinxhirin e mashtrimit.

I pyetur nga gazetarët nëse “Komisionerët e PD-së nuk e kanë parë”? – Berisha përgjigjet: “Kërkon një hetim, duhet hetuar”.

“Tani, siç paralajmërova, në farsën elektorale të 11 Majit u përdorën të gjitha metodat për manipulimin e zgjedhjeve, njëra prej të cilave përdoret gjerësisht nga Putini dhe Lukashenko dhe njihet me emrin e Trenit Bullgar. Me të drejtë dje, një gazetare pyeti këtu se ku është treni. Unë sot kam sjellë Trenin Bullgar para jush dhe qytetarëve shqiptarë.

Ju do shihni se si kriminelë elektoralë brenda qendrës elektorale realizojnë atë mekanizëm manipulimi që quhet Tren Bullgar, që i bën zgjedhjet tërësisht të pavlefshme, që kontrollon tërësisht vullnetin e qytetarëve. Këta janë një grup kriminal brenda qendrës së votimit, komisionerë të partisë së krimit.

Qendra e votimit është në një kafene, shikojeni… Ja fleta e votimit… Ja, merr vulën e vulos fletën e votimit. Si në filma, sikur ta kishin xhiruar.

Tani vjen me vulën e dytë këtu. E vulos. Tani po fsheh krimin. E fut në banak poshtë fletën e votimit. Me gjakftohtësi të paparë.

Është po ky… tani e nxjerr fletën e votimit, do e çojë në destinacion. Shikojeni, ia dha tjetrit jashtë qendrës. Edhe njëherë, aty po voton ai.

Pra, besoj se sikur të ishte xhiruar në një film demonstrativ. Rast si ky, duhet të falënderoj ata që e gjetën nëpërmjet videove.

Pra, kemi të bëjmë me një dëshmi flagrante të nxjerrjes së fletës së parë dhe ai që vjen me atë fletë, ai e hedh atë në kuti, ajo është e mbushur dhe fletën e vet e merr, del jashtë dhe ia jep tjetrit.

Kështu me radhë garantohet rezultati. Të gjithë detyrohen të votojnë fletën e mbushur. Nxjerr fletën bosh ai…

Nuk besoj se lë më shteg për dyshimin më të vogël përdorimi i Trenit Bullgar në këto zgjedhje si njëri nga mekanizmat e falsifikimit të rezultatit në farsën elektorale“, u shpreh Berisha.

The post Zgjedhjet e 11 majit/ Berisha publikon VIDEON e zbatimit të “trenit bullgar” në Elbasan: Qendra e votimit, një kafene appeared first on Albeu.com.