Gjykata e Apelit e ka lënë në fuqi vendimin e shkallës së parë, me të cilin Jelena Gjukanoviq u dënua me gjashtë vjet heqje lirie për veprën penale të spiunazhit.

Vendimi dënues ishte shpallur fillimisht nga Gjykata Themelore në Prishtinë më 27 prill 2026.

Ankesa kundër këtij aktgjykimi e kishte depozituar avokati mbrojtës i Gjukanoviqit, Predrag Milkoviq, duke pretenduar shkelje thelbësore të rregullave procedurale penale, konstituim të gabuar dhe jo të plotë të gjendjes faktike, si dhe zbatim të gabuar të ligjit material.

Mbrojtja kishte kërkuar që e pandehura të lirohet nga akuza ose që çështja të kthehet për rigjykim.

Në anën tjetër, Prokuroria Speciale e Republikës së Kosovës (PSRK) kishte parashtruar po ashtu ankesë lidhur me masën e dënimit, duke kërkuar që Gjukanoviqit t’i shqiptohet një dënim më i rëndë me burgim.

Prokuroria e Apelit kishte propozuar me shkrim që aktgjykimi i Themelores të ndryshohet duke e ashpërsuar dënimin për të akuzuarën, ndërsa ankesa e mbrojtjes të hidhet poshtë si e pabazuar.

Edhe gjatë seancës së Kolegjit të Apelit të mbajtur më 25 shtator 2026, pala mbrojtëse kishte deklaruar se qëndron plotësisht pas ankesës së saj me shkrim.

Në aktgjykimin e datës 30 shtator 2026, Gjykata e Apelit konstatoi se vendimi i kontestuar nuk përmban shkelje esenciale të procedurës penale siç pretendohej nga mbrojtja.

Sipas vlerësimit të Apelit, dispozitivi i aktgjykimit përshkruan në mënyrë të plotë veprimet inkriminuese të veprës penale, ndërsa aktgjykimi është i qartë, i lexueshëm dhe arsyetimi përmban shpjegime të plota për faktet vendimtare.

Gjykata e shkallës së dytë i cilësoi si të pabazuara edhe pretendimet e mbrojtjes se kontrolli i telefonave të Gjukanoviqit ishte kryer në mënyrë të paligjshme, duke u mbështetur në një aktvendim të mëparshëm të Gjykatës së Apelit të datës 20 janar 2026.

Pretendimet për vërtetim të gabuar të gjendjes faktike u refuzuan gjithashtu, me arsyetimin se Gjykata Themelore e kishte konstatuar drejt dhe në mënyrë të plotë gjendjen faktike, të cilën e kishte arsyetuar në aktgjykimin e ankimuar.

Në vendimin e Apelit thuhet se gjykata e shkallës së parë ka dhënë arsye të qarta dhe të plota për mënyrën se si e akuzuara Jelena Djukanovic kishte kryer veprën penale, dhe se kolegji penal pajtohet me këtë përfundim si të drejtë dhe ligjor, pasi nga provat e administruara gjatë shqyrtimit gjyqësor rezulton e vërtetuar se e akuzuara kishte marrë pjesë aktive në veprimtarinë informative të shërbimit të huaj — BIA-s së Serbisë.

Sipas Apelit, u refuzuan si të pabazuara edhe pretendimet për shkelje të ligjit penal, sepse nga gjendja faktike e provuar, në veprimet e Gjukanoviqit ekzistojnë të gjitha elementet objektive dhe subjektive të veprës penale për të cilën ajo u shpall fajtore.

Lidhur me ankesën e PSRK-së për dënimin, Apeli e cilësoi si të pabazuar, duke konstatuar se dënimi i shqiptuar nga Themelorja është i drejtë, i ligjshëm dhe në përpjesëtim me rëndësinë e veprës penale.

Apeli pranoi vlerësimin e rrethanave për matjen e dënimit si të ligjshëm dhe të drejtë, duke theksuar se gjykata e shkallës së parë i ka vlerësuar në mënyrë të plotë të gjitha rrethanat që kanë ndikuar në llojin dhe lartësinë e dënimit, ndërsa pretendimet e PSRK-së se dënimi nuk është në përpjesëtim me peshën e veprës penale u gjetën të pabaza.

Bazuar në këto konstatime, Gjykata e Apelit vendosi të vërtetojë aktgjykimin e ankimuar.

Trupi gjykues që mori këtë vendim përbëhej nga Avni Mehmeti si kryetar, Vaton Durguti si gjyqtar referues dhe Albina Shabani-Rama si anëtare.

Ndryshe, Prokuroria Speciale e Republikës së Kosovës kishte ngritur aktakuzë kundër Jelena Gjukanoviqit më 2 shtator 2025, duke e akuzuar se nga një datë e papërcaktuar e në vazhdimësi deri në arrestimin e saj më 28 shkurt 2025, në cilësinë e zyrtares vendore të misionit të OSBE-së në Kosovë, në Zyrën Rajonale në Mitrovicë, si “Zyrtare e Programit Kombëtar në Qendrën Rajonale në Mitrovicë”, me vetëdije të plotë dhe dashje direkte kishte kryer veprime të përsëritura që përbëjnë ndihmë aktive për veprimtarinë informative të Agjencisë për Inteligjencë dhe Siguri të Republikës së Serbisë (BIA).

Sipas aktakuzës, Gjukanoviq i kishte ofruar të dhëna, dokumente dhe informacione të ndjeshme të siguruara gjatë ushtrimit të detyrës së saj zyrtare në kuadër të misionit të OSBE-së, ndihmë e realizuar përmes komunikimeve të shumta me agjentin rezident të BIA-s, Aleksandër Vllajiq, i cili tashmë ishte dënuar për spiunazh.

Aktakuza thekson se Gjukanoviq i kishte përcjellë Vllajiqit informacione të dokumentuara që lidhen drejtpërdrejt me rendin kushtetues, sigurinë institucionale dhe veprimtarinë e brendshme të institucioneve të Republikës së Kosovës, të cilat më pas u transmetuan tek zyrtarët e lartë të BIA-s, përfshirë përgjegjësin e BIA-s për rajonin e Novi Pazarit në Serbi dhe BIA-n në Beograd.

Gjithashtu sipas aktakuzës, e pandehura, duke shfrytëzuar pozitën e saj në OSBE dhe udhëzimet e marra nga Vllajiq dhe zyrtarët e BIA-s, gjatë takimeve zyrtare dhe përpilimit të raporteve të OSBE-së për situatën politike dhe të sigurisë në Kosovë, kishte kontribuar në krijimin e një narrative armiqësore ndaj institucioneve të sigurisë, shtetësisë dhe integritetit të Republikës së Kosovës.

Me këto veprime të qëllimshme, e akuzuara kishte cenuar rëndë rendin kushtetues dhe sigurinë kombëtare, duke vënë në rrezik serioz jetën dhe sigurinë personale të zyrtarëve shtetërorë, qytetarëve të vendit dhe personelit ndërkombëtar të Misionit të OSBE-së në Kosovë.

Jelena Gjukanoviq akuzohej për kryerjen e veprës penale “Spiunazhi” nga neni 124, paragrafi 3 lidhur me nenin 77 të Kodit Penal të Republikës së Kosovës.

Organizata për Siguri dhe Bashkëpunim në Evropë (OSBE) është një organizatë ndërkombëtare që merret me sigurinë, demokracinë dhe të drejtat e njeriut, e cila përmes misionit të saj ka prezencë zyrtare dhe seli edhe në Kosovë.

The post Konfirmohet dënimi prej 6 vitesh burg për Jelena Gjukanoviqin për spiunazh në favor të BIA-s serbe appeared first on Albeu.com.

Gjykata e Prishtinës e ka shpallur fajtor Arbër Havollin për vrasjen e B. S., e ndodhur në Llapashticë të Epërme të Podujevës në shtator të vitit 2025.

Havolli është dënuar me gjithsej 20 vite burgim, si dënim unik, pasi gjatë shqyrtimit gjyqësor e kishte pranuar fajësinë për veprën penale.

Për akuzën e vrasjes, shkalla e parë i ka shqiptuar 19 vite burgim, ndërsa për veprën e armëmbajtjes dënimi është caktuar në 2 vite burgim.

Gjatë seancës fillestare, Havolli kishte shprehur pendesë për ngjarjen dhe kishte kërkuar falje nga familja. “Më vjen keq për rastin që ka ndodhë, nuk kam dashtë me ndodhë kjo, i kërkoj familjes falje. Për veprën e parë nuk e pranoj fajësinë, për armëmbajtje pa leje e pranoj fajësinë”, kishte deklaruar i pandehuri Arbër Havolli më 13.05.2026.

The post Arbër Havolli dënohet me 20 vite burgim për vrasjen në Podujevë appeared first on Albeu.com.

Gjykata Themelore në Prizren, Departamenti për të Mitur, ka shpallur fajtor të miturin A.O. dhe e ka dënuar me nëntë vjet burgim për dy vepra penale, ndër të cilat edhe vrasjen e rëndë.

Ngjarja për të cilën është dhënë dënimi ka ndodhur më 14 qershor 2026 në fshatin Kobaj të Komunës së Prizrenit. Sipas aktgjykimit, A.O., në bashkëkryerje me vëllain e tij, Sh.O., ka sulmuar me thikë dy persona.

Gjatë përleshjes, i mituri e ka goditur një herë në gjoks viktimën A.O. Për shkak të plagëve të rënda, ajo është dërguar në spital pa shenja jete, ku edhe është konstatuar vdekja.

Personi tjetër i sulmuar, I.O., ka pësuar lëndime të lehta trupore.

Trupi gjykues ka gjetur se A.O. ka kryer veprën penale “vrasja e rëndë”, të përcaktuar në nenin 173, paragrafi 1, nënparagrafi 1.5, lidhur me nenin 31 të Kodit Penal të Republikës së Kosovës, si dhe veprën “mbajtja në pronësi, kontroll ose posedim të paautorizuar të armëve”, nga neni 366, paragrafi 1.

Dënimit prej nëntë vjetësh do t’i zbritet edhe periudha që i mituri ka kaluar në paraburgim. Po ashtu, masa e paraburgimit ndaj tij është vazhduar deri në plotfuqishmërinë e aktgjykimit.

Në seancën e mbajtur më 18 shtator, A.O. ka deklaruar se e pranon përgjegjësinë dhe fajësinë për veprat që i janë atribuuar.

Gjykata ka vlerësuar se ai e ka kuptuar natyrën dhe pasojat e pranimit të përgjegjësisë, ndërsa deklarimi është bërë pas konsultimit të mjaftueshëm me mbrojtësin.

Aktgjykimi i plotë, i shkruar dhe i arsyetuar, do t’u dorëzohet palëve. Secila palë që nuk është e kënaqur me vendimin mund të paraqesë ankesë në Gjykatën e Apelit.

Sipas Gjykatës Themelore në Prizren, lënda ndaj dy të dyshuarve të tjerë, Sh.O. dhe A.O., vazhdon të jetë në fazën e procedurës paraprake/hetimore pranë Departamentit të Krimeve të Rënda.

The post Rasti i Kobajt, i mituri dënohet me 9 vjet burgim për vrasje të rëndë appeared first on Albeu.com.

Altin Krasniqi deklaroi se babai i tij, Jakup Krasniqi, është 76 vjeç dhe mund të mos jetë më gjallë në kohën kur përfundon dënimi 25-vjeçar i shqiptuar nga Gjykata Speciale në Hagë.

Ai tha se përkrahja e treguar nga qytetarët gjatë protestës përbën një motivim të madh. Sipas tij, populli tashmë i ka konsideruar të pafajshëm ish-drejtuesit e UÇK-së, të cilët kanë qenë pjesë e luftës së drejtë të Ushtrisë Çlirimtare të Kosovës.

Krasniqi e përshkroi si tepër të vështirë çastin kur u dha vendimi. Ai tregoi se e ka vizituar të atin dhe se Jakup Krasniqi vazhdon të ketë vullnet të fortë, ndërsa shprehu krenarinë për të dhe tha se kjo forcë e ka inkurajuar edhe atë.

“Jemi krenarë për secilin prej tyre. Një dënim prej 25 vjetësh është shumë i rëndë. Babai është 76 vjeç dhe, kur të përfundojë dënimi, mund të mos jetë gjallë. Krenohemi me të, sepse kemi jetuar 20 vjet në liri, të cilat mund të mos i kishim pa luftën e UÇK-së”, u shpreh Altin Krasniqi për EuroNews.

The post Altin Krasniqi: Dënimi me 25 vjet është shumë i rëndë, babai mund të mos jetë gjallë kur ta përfundojë appeared first on Albeu.com.

Pas përfundimit të shqyrtimit gjyqësor, Gjykata Themelore në Mitrovicë shpalli sot aktgjykimin ndaj M.A., duke e gjetur fajtor për veprën penale “Rastet e rënda të vjedhjes grabitqare apo grabitjes”.

Sipas vendimit, ai u dënua me tetë (8) vjet burgim për veprën e paraparë në nenin 138, paragrafi 1, të Ligjit Penal të Krahinës Socialiste Autonome të Kosovës (LPK).

Dënimi do të ekzekutohet pasi aktgjykimi të marrë formën e prerë.

The post M.A. dënohet me 8 vjet burgim nga Gjykata Themelore në Mitrovicë appeared first on Albeu.com.

Gjykimi ndaj Hashim Thaçit, Kadri Veselit, Rexhep Selimit dhe Jakup Krasniqit nuk është mbyllur me aktgjykimin e shpallur më 16 shtator. Ndonëse shkalla e parë u shqiptoi së bashku 81 vjet burgim katër ish-krerëve të Ushtrisë Çlirimtare të Kosovës, çështja tani pritet të vazhdojë në Gjykatën e Apelit.

Vendimi parashikon nga 25 vjet burgim për Thaçin dhe Krasniqin, 18 vjet për Veselin dhe 13 vjet për Selimin. Mbrojtjet pritet ta kundërshtojnë aktgjykimin dhe të kërkojnë ndryshimin e tij në fazën e ardhshme të procedurës.

Trupi gjykues i shpalli të katër përgjegjës për krime lufte të lidhura me ndalimin arbitrar, trajtimin mizor, torturën dhe vrasjen. Në të njëjtën kohë, ata u shpallën të pafajshëm për akuzat për krime kundër njerëzimit, pasi Prokuroria nuk arriti të dëshmonte përtej dyshimit të arsyeshëm se kishte ekzistuar një sulm i gjerë ose sistematik kundër popullsisë civile.

A është i mundur rrëzimi i plotë i aktgjykimit?

Një nga kërkesat e mundshme të mbrojtjes është shpallja e pafajësisë së plotë. Megjithatë, arritja e një rezultati të tillë do të ishte dukshëm më e vështirë sesa ulja e dënimeve ose ndryshimi i gjetjeve të veçanta të shkallës së parë.

Kjo lidhet me faktin se vendimi nuk është mbështetur në një episod të vetëm apo vetëm në një akuzë. Paneli ka nxjerrë përfundime për përgjegjësinë penale të secilit prej katër të akuzuarve në raport me qindra viktima dhe disa lloje krimesh lufte.

Sipas Gjykatës, të akuzuarit mbajnë përgjegjësi për ndalimin arbitrar të 385 personave, trajtimin mizor të 49 personave, torturimin e 303 personave dhe vrasjen e 96 personave. Për shkak të shtrirjes së këtyre gjetjeve, përmbysja në tërësi e aktgjykimit bëhet shumë më e ndërlikuar.

Që të arrihej një vendim i plotë pafajësie, Paneli i Apelit do të duhej të rrëzonte në thelb konstatimet mbi fajësinë të bëra nga shkalla e parë. Megjithatë, vështirësia e këtij skenari nuk do të thotë se aktgjykimi nuk mund të pësojë ndryshime.

Praktika e deritanishme e Dhomave të Specializuara dëshmon se Apeli ka ndërhyrë në vendime të shkallës së parë, duke hedhur poshtë gjetje të caktuara dhe duke zvogëluar masën e dënimeve.

Rasti Mustafa: Nga 26 vjet në 15 vjet burgim

Një nga rastet më të rëndësishme që ilustron mundësinë e ndryshimit të një vendimi është ai i Salih Mustafës. Në dhjetor 2022, ai u dënua me 26 vjet burgim për krimet e luftës për të cilat ishte shpallur fajtor.

Një vit më vonë, në dhjetor 2023, Gjykata e Apelit ia uli dënimin në 22 vjet. Më pas, në korrik 2024, Gjykata Supreme e riktheu çështjen për rishqyrtim në pjesën që kishte të bënte me dënimin.

Në shtator të po atij viti, Apeli caktoi një masë të re prej 15 vjetësh burgim. Kështu, dënimi fillestar prej 26 vjetësh u reduktua përfundimisht në 15 vjet.

Ky precedent nuk do të thotë se i njëjti përfundim do të përsëritet edhe për Thaçin, Veselin, Selimin dhe Krasniqin. Ai megjithatë tregon se në procedurën e Apelit mund të ketë ndryshime të konsiderueshme në kohëzgjatjen e dënimit.

Rasti Shala: Ndryshim gjetjesh dhe ulje dënimi

Edhe procedura ndaj Pjetër Shalës paraqet një shembull domethënës. Shala ishte dënuar fillimisht me 18 vjet burgim, ndërsa në korrik 2025 Apeli ia uli masën në 13 vjet.

Në këtë rast, ndërhyrja e shkallës së dytë nuk u kufizua vetëm te numri i viteve të burgimit. Paneli i Apelit hodhi poshtë disa konstatime të veçanta që lidheshin me individë të caktuar, mes tyre edhe gjetje për torturë dhe ndalim arbitrar.

Apeli vlerësoi se, për disa prej këtyre gjetjeve, nuk kishte prova të mjaftueshme që të ishin testuar përmes dëshmive në gjykatë. Pavarësisht kësaj, fajësitë për veprat kryesore mbetën në fuqi.

Shembulli i Shalës tregon se Paneli i Apelit mund të ndryshojë pjesë individuale të një aktgjykimi pa qenë e nevojshme ta rrëzojë vendimin në tërësi.

Faza e re e betejës juridike për katërshen e UÇK-së

Pikërisht në këto çështje pritet të fokusohet përballja e ardhshme ligjore e mbrojtjes së Thaçit, Veselit, Selimit dhe Krasniqit. Ekipet mbrojtëse mund t’i kërkojnë Apelit hedhjen poshtë të gjetjeve mbi fajësinë, ndryshimin e pjesëve të aktgjykimit ose, si alternativë, zvogëlimin e dënimeve.

Shpallja e plotë e pafajësisë mund të mbetet një prej synimeve të mbrojtjes. Por pesha e akuzave, numri i madh i konstatimeve dhe vëllimi i provave të shqyrtuara gjatë gjykimit të shkallës së parë e bëjnë një rrëzim tërësor të vendimit shumë më të vështirë sesa korrigjimin e pjesëve të veçanta ose uljen e viteve të burgimit.

Vetë procesi ka pasur një përmasë jashtëzakonisht të madhe. Në çështjen Thaçi dhe të tjerët, Gjykata ka administruar mijëra prova, ka dëgjuar një numër të lartë dëshmitarësh dhe ka zhvilluar procedura që kanë vazhduar për vite.

Për këtë arsye, ankimi nuk pritet të përmblidhet vetëm në një kërkesë për më pak vite burg. Mbrojtjet mund të kundërshtojnë mënyrën e interpretimit të provave, përcaktimin e përgjegjësisë individuale për secilin nga katër të akuzuarit dhe konstatimet konkrete për veprat penale për të cilat ata u shpallën fajtorë.

Pas 81 viteve të shqiptuara, vendimi kalon në duart e Apelit

Rastet e trajtuara më herët tregojnë se aktgjykimi i shkallës së parë në Hagë nuk përbën domosdoshmërisht përfundimin e procesit. Te Mustafa, dënimi ndryshoi nga 26 vjet në 22 vjet dhe më pas në 15 vjet. Te Shala, masa prej 18 vjetësh u ul në 13 vjet.

Në çështjen e Shalës, përveç uljes së dënimit, Apeli rrëzoi edhe disa gjetje konkrete, ndonëse konfirmoi fajësitë kryesore.

Pas totalit prej 81 vjetësh burgim të vendosur nga shkalla e parë për Thaçin, Veselin, Selimin dhe Krasniqin, mbrojtjet tani do të kenë mundësinë të kërkojnë që ky rezultat të ndryshohet.

Arritja e një pafajësie të plotë paraqitet si rrugë e vështirë, sidomos përballë numrit të madh të gjetjeve dhe akuzave të rënda të shqyrtuara në gjykimin e parë. Sidoqoftë, ulja e dënimeve, ndryshimi i konstatimeve konkrete ose rrëzimi i pjesëve të aktgjykimit janë ende skenarë që do të vlerësohen nga Paneli i Apelit.

Për katër ish-krerët e UÇK-së, procesi juridik në Hagë tashmë ka kaluar në një etapë të re.

The post Pas 81 viteve burg në shkallën e parë, vendimi për katërshen kalon në betejën e Apelit appeared first on Albeu.com.

Shqipe Mehmeti-Selimi ka reaguar për herë të parë pasi bashkëshorti i saj, ish-kreu i UÇK-së Rexhep Selimi, u dënua me 13 vjet burgim nga Dhomat e Specializuara të Kosovës në Hagë.

Reagimi i saj erdhi një ditë pas shpalljes së aktgjykimit, përmes një fotografie të publikuar në Facebook.

Në imazh shfaqen djali dhe vajza e saj duke mbajtur së bashku flamurin e Ushtrisë Çlirimtare të Kosovës.

Fotografinë Mehmeti-Selimi e shoqëroi me një mesazh të shkurtër: “Nën hijen e këtij flamuri, gjithmonë krenarë, gjithmonë të fortë!”

Rexhep Selimi mori dënimin me 13 vjet burgim nga trupi gjykues i Dhomave të Specializuara të Kosovës në Hagë, në kuadër të aktgjykimit të shkallës së parë.

The post Bashkëshortja e Rexhep Selimit reagon me mesazh të fortë një ditë pas dënimit appeared first on Albeu.com.

Gjykata Speciale në Hagë shpalli një ditë më parë vendimin për Jakup Krasniqin, duke e dënuar me 25 vjet heqje lirie për akuza të krimeve të luftës.

Në një intervistë për TCH, bashkëshortja e tij Sevdije Krasniqi, ndau me publikun fjalët që ish-udhëheqësi i Ushtrisë Çlirimtare të Kosovës i ka përcjellë familjes.

Ajo rrëfeu se bashkëshorti i saj i ka thënë se ndjehet i qetë, sepse nuk ka kryer asnjë prej veprave për të cilat e akuzojnë. Ai shprehu se nuk i ka shkaktuar dëm askujt dhe se nuk dëshironte të dëmtonte as veten.

Sevdije Krasniqi shtoi se mbrojtja do të apelojë vendimin, edhe pse nuk kanë shumë besim te gjykata e shkallës së parë. Ajo u bëri thirrje të gjithë shqiptarëve që të qëndrojnë të bashkuar dhe ta kundërshtojnë këtë institucion gjyqësor.

Gazetarja bëri të ditur edhe përmbajtjen e plotë të mesazhit që Jakup Krasniqi i dërgoi familjes menjëherë pasi mori dënimin nga Dhomat e Specializuara.

Në mesazhin e tij, Krasniqi deklaron se nuk ekziston asnjë njeri në botë të cilit ai t’i ketë bërë keq dhe se nuk do t’ia bëjë këtë as vetes së tij. Ai e cilësoi drejtësinë e ndërmarrë si të korruptuar dhe në shërbim të interesave serbe, duke theksuar se dënimi i tij bazohet tërësisht në gënjeshtrat e Serbisë.

The post Dënimi i Jakup Krasniqit në Hagë, flet bashkëshortja: S’ka njeri që i kam bërë keq appeared first on Albeu.com.

Dhomat e Specializuara në Hagë e dënuan Jakup Krasniqin me 25 vjet burg për krime lufte.

Vendimi u cilësua i padrejtë nga kunata e Krasniqit, e cila mes lotësh tha se familja kishte pritur ribashkimin me të. Sipas saj, as Krasniqi dhe as tre drejtuesit e tjerë të UÇK-së nuk e meritonin burgimin.

Ajo deklaroi se ata përfaqësojnë lirinë e popullit, pasi kanë luftuar për çlirimin e Kosovës. Kunata e Krasniqit shtoi se familjarët nuk e kishin parashikuar një përfundim të tillë dhe se prisnin që të dënuarit të ktheheshin për të festuar së bashku me familjet e tyre.

Duke e përshkruar Krasniqin si një njeri shumë të mirë, ajo tha se ishte tepër e emocionuar dhe e shqetësuar nga vendimi. Familja, sipas saj, kërkon drejtësi të plotë dhe lirimin e tyre në Apel, pasi konsideron se po mbahen padrejtësisht atje.

Kunata e tij theksoi se Krasniqi kishte luftuar dhe punuar për Kosovën, vetëm për lirinë e atdheut. Ajo tregoi se familjarët e ndoqën së bashku shpalljen e vendimit, të rraskapitur pas një jave pa gjumë.

“Kjo është një padrejtësi e madhe. Pse duhet të burgosen ata? Shkitë na kanë masakruar dhe vrarë, ndërsa këta janë bijtë më të mirë të vendit”, u shpreh ajo.

Në fund, kunata e Krasniqit ngriti pyetjen se ku ndodhet drejtësia, kur ai, në vend që të kthehej në shtëpi për të kaluar kohë me bashkëshorten, nipërit dhe mbesat, u dënua me 25 vjet burg.

The post Kunata e Jakup Krasniqit shpërthen në lot pas dënimit në Hagë: Prisnim të kthehej pranë familjes appeared first on Albeu.com.

Aktgjykimi i 16 shtatorit në Hagë, me të cilin Hashim Thaçi dhe Jakup Krasniqi u dënuan me nga 25 vjet burgim, Kadri Veseli me 18 vjet dhe Rexhep Selimi me 13 vjet, ka nxitur reagime të shumta në opinionin publik dhe në skenën politike.

Pjesë e debatit është bërë edhe publicistja Elida Buçpapaj. Përmes një reagimi në Facebook, ajo ka kërkuar që të ndërpriten fushatat kundër Gjykatës Speciale dhe ka bërë thirrje për respektimin e drejtësisë, pajtim dhe bashkërendim me aleatët e Kosovës.

Buçpapaj kundërshton gjithashtu kërkesat për mbylljen e Speciales, ndërsa vlerëson se rasti i katër të dënuarve duhet të trajtohet vetëm nëpërmjet mekanizmave ligjorë dhe institucionalë, përcjell “Bota sot”.

Në reagimin e saj, ajo e cilëson të turpshme publikimin e listave për të treguar se kush e ka votuar dhe kush nuk e ka mbështetur krijimin e Gjykatës Speciale.

Sipas Buçpapajt, Hashim Thaçi ka vepruar drejt, ashtu si edhe deputetët që votuan pro saj. Ajo përmend pretendimet se Thaçit i ishte krijuar bindja se drejtësia do ta anashkalonte, por thekson se drejtësia duhet të jetë e njëjtë për të gjithë.

Publicistja thotë se ka parë reagimin e Glauk Konjufcës nga Haga, qëndrimet e kryetarit de facto të PDK-së së bashku me Vlora Çitakun, si dhe ato që i quan kore populiste me maska të zeza e kore bretkosash në rrjetet sociale. Sipas saj, këto zëra pretendojnë se mbrojnë vlerat e UÇK-së dhe i bashkohen “marres” së Edvin Ramës kundër Gjykatës Speciale.

Buçpapaj e përshkruan atë si njërin nga dy autorët e nismës për shkëmbimin e territoreve, proces që, sipas saj, e përfshiu dhe e dërgoi Thaçin në Hagë.

Ajo kërkon që fushata kundër Gjykatës Speciale të marrë fund menjëherë dhe që të dëgjohen këshillat e aleates ekzistenciale, të përcjella përmes DASH-it, si dhe qëndrimet e vendeve aleate, deri te Kroacia mike.

Buçpapaj shprehet se është kritike ndaj zonjës Marta Kos, por jo në këtë rast, pasi pajtohet me deklaratën e saj se nevojitet pajtim.

Sipas saj, pajtimi dhe liria duhet të ndërtohen duke e njohur dhe vlerësuar Gjykatën Speciale.

Ajo argumenton se kjo është mënyra për t’i ndihmuar katër të gjykuarit nga Specialja. Buçpapaj thekson se kjo gjykatë i ka të gjithë kryeprokurorët amerikanë dhe kryegjykatësin amerikan, ndërsa prokurorët e gjykatësit e tjerë vijnë nga BE-ja, Anglia dhe Zvicra. Ajo shton se financimi sigurohet drejtpërdrejt nga këto vende, në mënyrë që Kosova të ketë drejtësi me standarde perëndimore dhe të funksionojë si shtet i së drejtës.

Publicistja kërkon të hiqet dorë nga ato që i quan ide të çmendura për mbylljen e Gjykatës Speciale, duke paralajmëruar se një veprim i tillë do ta dëmtonte si Katërshen, ashtu edhe Kosovën.

Ajo bën thirrje gjithashtu të mos kërkohet mbështetje nga Richard Grenell, të cilin e përshkruan si një “sharlatan amerikan antiamerikan”, pasi vlerëson se përkrahja e tij është në dëm të Katërshes dhe Kosovës.

Buçpapaj kërkon distancim edhe nga Edi Rama, duke kujtuar se ai e ka quajtur ish-kryeprokurorin e Gjykatës Speciale “sikar”, ndërsa dje e ka cilësuar Specialen “marre”.

Në reagim kërkohet që të ndalet edhe marrja peng e institucioneve të Kosovës dhe kalimi në tri palë zgjedhje, sepse, sipas saj, kjo situatë dëmton vendin dhe Katërshen.

Ajo kërkon të mos mbulohen me heshtje krimet dhe të mos u mohohet drejtësia viktimave. Buçpapaj përmend ministrin e Mbrojtjes Ahmet Krasniqi nga FARK-u, i vrarë në mes të Tiranës, si dhe viktima të tjera, mes të cilave emra të njohur, veprimtarë, komandantë, aktivistë, deputetë dhe gazetarë. Sipas saj, trajtimi i këtyre rasteve është në interes të Kosovës dhe Katërshes.

Një tjetër kërkesë e saj është ndërprerja e manipulimit dhe shpërdorimit të fjalës së lirë nga klientë të politikës, të cilët i quan mbrojtës të rremë të Katërshes, pasi paraqesin vetëm pjesë të së vërtetës dhe jo pamjen e plotë.

Buçpapaj bën thirrje të përfundojë ajo që e konsideron luftë kundër Republikës së Kosovës përmes ngërçit institucional dyvjeçar. Ajo e quan këtë situatë turp të klasës politike dhe thotë se ajo vepron kundër interesave të Kosovës e Katërshes, ndërsa i shërben Serbisë së Vuçiqit.

Sipas saj, ka mbërritur momenti për pajtim, çka përjashton çdo bllokadë ose shantazh të aktorëve politikë ndaj Republikës së Kosovës dhe, rrjedhimisht, ndaj Katërshes. Ky pajtim, thekson ajo, duhet të mbështetet mbi themelet e drejtësisë.

Buçpapaj shprehet se ndoshta gabon dhe i kërkon falje Zotit kur mendon se 24 vjet paraburgosje do të mjaftonin për secilën viktimë. Megjithatë, ajo këmbëngul se duhet të ketë përgjegjshmëri, pranim të fajit dhe kërkim ndjese, në mënyrë që Kosova të hapë një kapitull të ri, i cili do ta çlironte moralisht Katërshen.

Ajo rikujton mesazhin që James Rubin dha nga Kosova përpara dëshmisë së tij në Hagë: pas kontributit të njohur dhe misionit të përmbushur, Krahu i Luftës duhet të largohet nga skena politike. Sipas Buçpapajt, kjo kohë tashmë ka ardhur.

Publicistja vlerëson se historisë së Kosovës nuk mund t’i shtohet dhe as t’i hiqet asgjë, njësoj siç nuk mund të cenohen meritat e atyre që i kanë fituar ato apo fajet e atyre që ajo i quan çakej.

Sipas saj, mbrojtja e Republikës së Kosovës dhe e Katërshes duhet të bëhet tani duke respektuar, në të gjitha shkallët, drejtësinë me standard perëndimor të Gjykatës Speciale. Ajo kërkon angazhimin e institucioneve shtetërore dhe të diplomacisë, në koordinim me aleatët e dëshmuar të shqiptarëve, të cilët e shpëtuan Kosovën nga gjenocidi dhe spastrimi etnik i shtetit kriminal të kryekasapit të Ballkanit.

Buçpapaj thekson se ky synim nuk realizohet duke ua mbyllur gojën dëshmitarëve, duke i lënë dosjet e viktimave të mbuluara nga pluhuri apo duke kërcënuar Republikën e Kosovës me banda personash që SHBA-ja i ka futur në listën e zezë.

Ajo vlerëson se politika dhe metodologjia e deritanishme, e paraqitur si mbështetje për Katërshen, por e bazuar në konfrontim, bllokim dhe marrje peng të shtetit, e ka dëmtuar në mënyrë të skajshme Republikën e Kosovës dhe veçanërisht Katërshen.

Buçpapaj kërkon që Katërshja të mos krahasohet me Ante Gatovinën. Në vend të kësaj, ajo bën thirrje të punohet për pajtim, duke e njohur Gjykatën Speciale, në interes të Republikës së Kosovës, stabilitetit e paqes në Ballkan dhe çlirimit të Katërshes.

Ajo shtron pyetjen nëse 24 vjet janë të mjaftueshme për secilën pabesi, ndërsa nënvizon se kërkimi i ndjesës hap rrugën për falje dhe pajtim, në mënyrë që vëllavrasja të mos përsëritet më kurrë.

Në fund, Buçpapaj shkruan se çdo gazetar, gjatë punës së tij, duhet ta vendosë veten në pozitën e viktimave, të fajtorëve dhe të familjarëve të të dyja palëve. Sipas saj, gazetari duhet të ketë parasysh edhe interesin e shtetit të së drejtës, pra të të gjithë qytetarëve pa përjashtim, në mënyrë që secili ta jetojë jetën me dinjitet dhe në paqe.

Në një shënim të fundit, ajo përmend si një nga gabimet e Hashim Thaçit faktin që nuk u takua në Shkup më 5 mars 1999 me senatorin Bobe Dole, pasi nuk pati mundësi, por u takua më 7 mars 1999 me Paskal Milon në Tiranë.

The post Buçpapaj pas aktgjykimit në Hagë: Të ndërpritet përplasja me Specialen dhe të respektohet drejtësia appeared first on Albeu.com.