Arlind Ahmeti dhe Agron Vllasaliu janë dënuar me nga 17 vjet burgim në rigjykimin e katërt për vrasjen e N.S., e ndodhur në qendër të Prishtinës në nëntor të vitit 2017. Në rigjykimin e tretë, Gjykata Themelore në Prishtinë u kishte shqiptuar atyre dënime me nga 16 vjet burgim.

Vendimi u bë publik të martën nga trupi gjykues i përbërë nga gjykatësi Ilir Foniqi dhe anëtarët Fatime Dermaku e Ertan Sejfulla, raporton “Betimi për Drejtësi“.

Gjykatësi Foniqi njoftoi se Ahmeti dhe Vllasaliu u gjetën fajtorë për veprën penale “Vrasje e rëndë në bashkëkryerje e kryer me dashje eventuale”, për të cilën secili u dënua me 15 vjet burgim. Për veprën “Armëmbajtje pa leje”, atyre iu shqiptuan dënime me nga 2 vjet e gjysmë burgim, ndërsa dënimi unik për secilin u caktua në 17 vjet burgim.

Masa e paraburgimit ndaj dy të akuzuarve është vazhduar.

Në seancën e shpalljes së aktgjykimit morën pjesë avokati Driton Musliu, mbrojtës i Vllasaliut, avokati Asdren Hoxha, mbrojtës i Ahmetit, si dhe e dëmtuara Shemsie Aliu-Sahiti. Dy të akuzuarit e ndoqën shpalljen nga burgu përmes video-lidhjes.

Pala e dëmtuar u udhëzua që kërkesën e saj ta realizojë në kontest të rregullt juridiko-civil.

Palët që nuk pajtohen me aktgjykimin mund të paraqesin ankesë brenda 30 ditësh nga pranimi i vendimit në formë të shkruar.

Historia gjyqësore e çështjes nisi me vendimin e Gjykatës Themelore në Prishtinë të 16 prillit 2019. Pasi e kishte rikualifikuar veprën penale, gjykata e shpalli Arlind Ahmetin fajtor për shtytje në vrasje të rëndë dhe i shqiptoi dënim unik prej 17 vjetësh burgim. Në atë kohë, Agron Vllasaliu ndodhej në arrati.

Në nëntor të vitit 2019, Gjykata e Apelit vendosi që lënda të kthehej për gjykim të ri në gjykatën e shkallës së parë, duke vlerësuar se aktgjykimi i 16 prillit 2019 ishte në kundërshtim me dispozitat ligjore.

Gjykata Themelore në Prishtinë nxori sërish aktgjykim dënues më 13 dhjetor 2022. Agron Vllasaliu dhe Arlind Ahmeti u dënuan atëherë me nga 21 vjet burgim për vrasjen e rëndë në bashkëkryerje të të ndjerit N.S., në vitin 2017 në Prishtinë.

Pas ankesave të përfaqësuesit të palëve të dëmtuara, avokatit Nexhmedin Sejdiu, mbrojtësve të Arlind Ahmetit, avokatëve Asdren Hoxha dhe Fitim Malokaj, si dhe mbrojtësit të Agron Vllasaliut, avokatit Florent Latifaj, Gjykata e Apelit më 23 mars 2023 e anuloi aktgjykimin e Gjykatës Themelore në Prishtinë. Çështja iu kthye sërish gjykatës së shkallës së parë për rigjykim.

Më 11 tetor 2024, Gjykata Themelore ua ricilësoi veprën penale në “Shkaktim të rrezikut të përgjithshëm” dhe i dënoi Ahmetin e Vllasaliun me nga 16 vjet burgim. Megjithatë, Gjykata e Apelit e ktheu përsëri rastin në rigjykim.

Në rigjykimin e tretë, më 20 tetor 2025, dy të akuzuarve iu shqiptuan sërish dënime unike me nga 16 vjet burgim. Gjykata Themelore e ricilësoi veprën nga “Vrasje e rëndë” në “Shkaktim të rrezikut të përgjithshëm” dhe për këtë vepër i dënoi me nga 12 vjet burgim. Për “Armëmbajtje pa leje”, secili mori dënim prej 4 vjetësh e 6 muajsh burgim.

Edhe ky vendim u anulua nga Gjykata e Apelit më 17 prill 2026. Duke aprovuar ankesën e Prokurorisë Themelore në Prishtinë, Apeli e riktheu çështjen në rigjykim në shkallën e parë.

Në aktakuzën e ngritur më 13 korrik 2021 thuhet se Agron Vllasaliu, më 24 nëntor 2017, në bazë të një marrëveshjeje paraprake me të pandehurin Arlind Ahmeti, e kishte privuar nga jeta N.S. dhe kishte vënë në rrezik jetën e Behar Sahitit, Lumbardh Kukajt, Freskim Farizit, R.K. dhe Mërgim Kqikut.

The post Rigjykimi i katërt për vrasjen në qendër të Prishtinës, Ahmeti dhe Vllasaliu dënohen me nga 17 vjet burg appeared first on Albeu.com.

Në përfundim të rigjykimit, Gjykata Themelore e Prishtinës ka shqiptuar një dënim prej 5 vitesh burg ndaj Avni Lajqit, i akuzuar për planifikimin e vrasjes së Musa Demajt (Loshi). Nga ana tjetër, ai është shpallur i pafajshëm për akuzën e mbajtjes së paligjshme të armës.

Vendimi u bë publik të mërkurën nga trupi gjykues i përbërë nga kryetari Vesel Ismaili dhe gjyqtarët Kujtim Krasniqi e Donikë Shala-Abdyli, njofton “Betimi për Drejtësi”.

Sipas gjyqtarit Ismaili, akuzës për armëmbajtje pa autorizim i mungonin provat e mjaftueshme për të mbështetur fajësinë e të pandehurit, prandaj ai u lirua nga kjo pikë e aktakuzës.

Gjykatësi sqaroi gjithashtu se koha që Lajqi ka qëndruar në paraburgim do t’i zbritet nga dënimi final me burgim.

Të pandehurit iu ngarkuan edhe detyrimet financiare gjyqësore: 100 euro për taksën e paushallit dhe një shumë tjetër prej 100 eurosh që do t’i drejtohet Fondit për Kompensimin e Viktimave të Krimit.

Në këtë dosje penale figuron edhe Egzon Hasangjekaj si i pandehur, por çështja ndaj tij po zhvillohet veçmas. Kjo për shkak se autoritetet arritën ta arrestonin atë vetëm në maj të vitit 2026, deri në atë moment ai ishte i paarritshëm për drejtësinë.

Në seancën e datës 14 prill 2026, prokurorja Habibe Salihu ndryshoi kualifikimin juridik të akuzës. Ajo kaloi nga “Marrëveshje për kryerjen e veprës penale” sipas nenit 35, paragrafi 1, në veprën “Përgatitja e veprës penale vrasje e rëndë”, duke iu referuar nenit 173, paragrafi 1, nënparagrafi 1.6, në lidhje me nenet e tjera përkatëse të Kodit Penal.

Çështja ka një histori të mëparshme gjyqësore. Më 25 shtator 2025, po e njëjta gjykatë e kishte gjetur fajtor Avni Lajqin, duke e dënuar me 5 vjet burg dhe 2 mijë e 500 euro gjobë për armëmbajtje pa leje. Megjithatë, më 28 janar 2026, Gjykata e Apelit e ktheu çështjen për rigjykim, pasi konstatoi shkelje thelbësore të normave të procedurës penale.

Ndërkohë, i pandehuri Brahim Berisha kishte pranuar fajësinë për akuzat që rëndonin mbi të. Në rastin e tij, prokurori hoqi dorë nga ndjekja penale për përgatitjen e veprës “Vrasje e rëndë”, duke bërë që gjykata ta refuzojë aktakuzën për këtë pikë. Përfundimisht, Berisha u dënua vetëm për armëmbajtje pa leje me një gjobë prej 500 eurosh.

Aktakuza e Prokurorisë Speciale të Republikës së Kosovës, e datës 22 janar 2025, përshkruan se Avni Lajqi dhe Brahim Berisha vepruan sipas udhëzimeve të të pandehurit Egzon Hasangjekaj. Motivi i supozuar ishte një hasmëri e lindur nga një konflikt në Amerikë gjatë vitit 2021, mes Hasangjekajt dhe të dëmtuarit Musa Demaj (Loshi), për t’u hakmarrë ndaj tij.

Sipas pretendimeve të prokurorisë, Avni Lajqi, i shtyrë nga përfitimi i 100 mijë eurove, ra dakord me Brahim Berishën që ky i fundit, për shumën e 70 mijë eurove, të ekzekutonte Musain. Berisha pranoi dhe u instruktua nga Lajqi për detajet e krimit: mënyrën, kohën dhe vendndodhjen e duhur.

Aktakuza thekson gjithashtu se Avni Lajqi kishte marrë përsipër edhe garancinë e pagesës, në rast se i pandehuri Egzon nuk do të përmbushte detyrimin financiar për vrasjen. Ata kishin siguruar edhe mjetin e krimit, një armë që e posedonte tashmë Brahim Berisha. Plani u bllokua pasi më 20 shkurt 2024, arma u sekuestrua nga Policia e Kosovës. Pasi goditja ndaj Musait dështoi, i akuzuari Egzon urgjoi që të vritej vëllai i tij, Hekurani, ose që të dy bashkë, nëse do të gjendeshin në të njëjtin vend.

Për këto veprime, të pandehurit ngarkohen në bashkëkryerje me veprën penale “Përgatitje e veprës penale vrasje e rëndë”, sipas nenit 173, si dhe për marrëveshje kriminale, referuar dispozitave të Kodit Penal të Kosovës.

Më tej, aktakuza përshkruan se më 28 mars 2024, gjatë kontrollit në banesë, Avni Lajqit iu gjet një fishek dhe armë të tjera, të mbajtura pa leje dhe në kundërshtim me ligjin për armët. Për këtë, ai akuzohet për veprën “Mbajtja në pronësi, kontroll ose posedim pa autorizim të armëve” nga neni 366, paragrafi 1 i Kodit Penal.

Po ashtu, gjatë kontrollit në shtëpinë e Brahim Berishës, u gjet një armë automatike së bashku me dy karikatorë dhe 20 fishekë, gjithashtu pa leje. Ai përballet me të njëjtën akuzë penale për armëmbajtje të kundërligjshme.

The post Rigjykimi i çështjes Lajqi përfundon me 5 vite burg për komplot vrasjeje, pafajësi për posedim arme appeared first on Albeu.com.

Gjykata e ka dënuar Eqrem Avdullahun me 4 muaj burgim për kërcënimin ndaj kryetarit të OVL-UÇK-së, Hysni Gucati.

Gucati e mirëpriti vendimin, duke u shprehur se ky rast duhet t’u shërbejë edhe të tjerëve që “të mbledhin mend”.

“Të kenë kujdes në rrjetet sociale, të mos fyejnë më, të mos shkruajnë palidhje edhe të mos ofendojnë pa fakte dhe pa argumente një njeri se s’ka nevojë”, u tha ai mediave.

Kreu i veteranëve bëri të ditur se Avdullahu nuk është personi i vetëm ndaj të cilit ka ngritur padi, pasi në gjykatë ka dërguar edhe 17 persona të tjerë.

“Shumica prej tyre janë jashtë vendit, që punojnë në Gjermani e në Zvicër. Shumica janë jashtë vendit”, theksoi Gucati para mediave.

The post Avdullahu dënohet me 4 muaj burg, Gucati: Të shërbejë si mësim për fyerjet në rrjetet sociale appeared first on Albeu.com.

Albana Vokshi, teksa akuzoi mazhorancën për mungesën e një qëndrimi të qartë kundër këtyre deklaratave, e ftoi atë të rishikojë qëndrimin dhe të miratojë rezolutën që e mban pezull prej disa vitesh, ku dënohen krimet serbe.

“Patriotizmi nuk është retorikë politike, por qëndrime dhe akte dinjitoze në mbrojtje të qytetarëve”, tha Vokshi.

Në këtë frymë opozita i propozoi Komisionit edhe daljen me një deklaratë kundër ministres serbe dhe nisjen e procedurave për dënimin ndërkombëtar të saj për shkak të evokimit të gjenocidit të Millosheviçit, propozim ky që u rrezua nga ana e mazhorances.

Deklarata e propozuar:

Komisioni për Evropën dhe Punët e Jashtme, shqyrtoi me shqetësim dhe revoltë të thellë deklaratat e bëra publikisht nga ministrja e Qeverisë së Serbisë, Snezhana Paunoviç, e cila u shpreh se, “po të ishte në vendin e Sllobodan Millosheviçit në vitin 1998, do të kishte kryer spastrim etnik në Kosovë”.

Si Komisioni përgjegjës për politikën e jashtme në Kuvend, shpreh qëndrimin e mëposhtëm dhe deklaron qëllimin e tij për të ndjekur këto drejtime veprimi:

1. Komisioni dënon në mënyrë të prerë dhe ashpërsisht këto deklarata, të cilat përbëjnë lavdërim të hapur të një prej krimeve më të rënda kundër njerëzimit, spastrimit etnik në Kosovë, dhe shpërfaqin nostalgji të neveritshme për politikat e regjimit të Millosheviçit, të dënuar nga Tribunali Ndërkombëtar Penal për ish-Jugosllavinë për krime lufte dhe krime kundër njerëzimit.

2. Komisioni rikujton dhe dënon vendosmërisht krimet e kryera nga regjimi i Millosheviçit dhe forcat paramilitare serbe kundër popullsisë civile shqiptare të Kosovës gjatë viteve 1998–1999, masakrat, dëbimet masive të mbi 800 mijë shqiptarëve, dhunimet sistematike, djegien e fshatrave, krime të dokumentuara nga Tribunali i Hagës dhe të regjistruara përgjithmonë nga historia dhe drejtësia ndërkombëtare si pjesë e një fushate kriminale spastrimi etnik ndaj popullit shqiptar.

3. Komisioni përkulet me nderimin më të thellë përpara kujtimit të martirëve dhe dëshmorëve të Kosovës, civilë, gra, fëmijë e pleq, si dhe luftëtarë të rënë në mbrojtje të lirisë e mbijetesës së kombit, dhe shpreh mirënjohje ndaj heronjve të gjallë, ish-luftëtarëve, të mbijetuarve dhe familjeve të viktimave, që me sakrificën e tyre kanë ruajtur të vërtetën historike dhe kanë kontribuar pakthyeshmërisht në ndërtimin e Republikës së Kosovës si shtet i lirë e sovran.

4. Komisioni vlerëson se çdo deklaratë që lavdëron, minimizon apo relativizon këto krime përbën fyerje të rëndë ndaj kujtimit të viktimave dhe nxitje të rrezikshme ringjallëse të ideologjive gjenocidale në rajon, dhe shpreh solidaritet të plotë me Republikën e Kosovës, duke përshëndetur vendimin e autoriteteve kosovare për të shpallur ministren Paunoviç persona non grata, si dhe qëndrimet e ShBA, Mbretërisë së Bashkuar dhe Bashkimit Evropian ndaj deklaratës së saj.

4/1 Komisioni vlerëson se deklarata e ministres Paunoviç minojnë frymën e bashkëpunimit dhe të mirëkuptimit ndërmjet popujve të rajonit, duke rihapur plagë historike dhe duke dëmtuar besimin e ndërtuar përmes proceseve të dialogut rajonal.

4/2 Gjithashtu kjo retorike minon rrugën e integrimit evropian të Serbisë, pasi bie ndesh me vlerat themelore mbi të cilat ngrihet Bashkimi Evropian dhe me kriteret politike të kërkuara për vendet kandidate, përfshirë respektimin e të drejtave të njeriut dhe të kaluarës historike

4/3 Komisioni i kërkon Kuvendit miratimin e projektrezolutës së propozuar nga Partia Demokratike për dënimin e gjenocidit serb në Kosovë, si shprehje e unitetit përtej ndarjeve politike në mbrojtje të kujtesës kombëtare.

5. Komisioni i kërkon Ministrisë për Evropën dhe Punët e Jashtme të shpallë ministren Snezhana Paunoviç persona non grata, duke i ndaluar hyrjen dhe tranzitimin në territorin shqiptar.

6. Komisioni nxit qeverinë shqiptare për të eksploruar rrugët ligjore ndaj Ministres Paunoviç, dhe referimin e saj për nxitje publike të spastrimit etnik/gjenocidit, parashikuar në nenin III, pika c, të Konventës së OKB-së për Parandalimin dhe Ndëshkimin e Krimit të Gjenocidit (1948).

7. Komisioni i bën thirrje Qeverisë së Serbisë të distancohet publikisht dhe pa mëdyshje nga këto deklarata, të marrë masa të menjëhershme institucionale ndaj çdo zyrtari që promovon ideologji të tilla, dhe të përballet sinqerisht me të kaluarën, si kusht themelor për besueshmërinë e proceseve të normalizimit rajonal dhe integrimit evropian.

8.Komisioni për Punët e Jashtme rithekson se e vërteta historike dhe kujtesa e viktimave janë të panegociueshme, se nderimi ndaj martirëve e heronjve të Kosovës mbetet detyrim moral e kombëtar i përhershëm për gjithë shqiptarët, dhe se paqja rajonale mund të ndërtohet vetëm mbi ndarjen e vërtetë e të pakthyeshme nga politikat konfliktuale e gjenocidale të së kaluarës.

9. Komisioni deklaron gatishmërinë e tij në mbrojtje të parimeve të fqinjësisë së mirë, dialogut konstruktiv dhe reciprocitetit mbi të cilat bazohet paqja, stabiliteti dhe bashkëjetesa në Ballkanin Perëndimor.

The post “Do të spastroja etnikisht Kosovën”/ Opozita propozon dënimin e thirrjeve të ministres serbe, socialistët në Komisionin e Jashtëm votojnë kundër appeared first on Albeu.com.

Pohimi i ish-deputetit të PDK-së, Nait Hasani, se “ka me u kallë Kosova” nëse Gjykata Speciale dënon ish-udhëheqësit e UÇK-së, ka shkaktuar reagime në opinionin publik.

Gazetari Nefail Maliqi e ka kundërshtuar me tone të ashpra këtë ide, duke ngritur pyetjen se përse Kosova duhet të pësojë për shkak të proceseve politike apo gjyqësore dhe vendimeve që lidhen me to, përcjell “Bota sot”.

Në reagimin e tij, Maliqi pyet pse duhet të digjet Kosova, kur Serbia e kishte djegur atë në vitin 1999. Ai rikujton se UÇK-ja e kishte shuar flakën serbe dhe se kishte çliruar vendin.

Ai shprehet kundër një veprimi të tillë edhe në rast se, siç e quan ai “flakëhedhës”, Naiti kërkon të digjet Edi Rama, për të cilin thotë se i kishte dërguar në Hagë krerët e UÇK-së.

Maliqi deklaron se nuk pajtohet as me idenë e djegies së 82 deputetëve që ngritën dorën për krijimin e Gjykatës Speciale.

Ai pyet gjithashtu përse nuk kërkohet të digjen Serbia, UDB-ja apo vetë Gjykata Speciale.

Sipas Maliqit, Kosova nuk duhet të digjet, pasi Serbia e kishte djegur në vitin 1999 dhe edhe më herët, për dhjetëra vjet.

The post Maliqi kundër Nait Hasanit: Pse të digjet Kosova për Specialen? appeared first on Albeu.com.

Ambasada britanike ka shprehur dënim të prerë për deklaratat e ministres serbe Snezana Paunovic, duke veçuar referencat e saj ndaj spastrimit etnik në Kosovë, të cilat i ka cilësuar si “krejtësisht të papranueshme” dhe të papërshtatshme për kohën e sotme.

Sipas njoftimit, në një moment kur shtetet e Ballkanit Perëndimor synojnë të ndërtojnë një të ardhme paqësore, të qëndrueshme dhe me bashkëjetesë mes etnive, pohime të tilla kërcënojnë të risjellin përçarjet historike dhe të ushqejnë tensione.

“Udhëheqësit politikë me përgjegjësi duhet ta hedhin poshtë një retorikë të tillë në mënyrë të qartë dhe pa mëdyshje,” theksohet në deklaratë.

Njëkohësisht, ambasada britanike ka evidentuar se presidenti serb Aleksandar Vuçiq është distancuar nga komentet e ministres Paunovic.

The post Britania e Madhe dënon ashpër deklaratat e ministres serbe appeared first on Albeu.com.

Gjykata Themelore në Prishtinë e ka shpallur fajtor Skender Krasniqin dhe i ka shqiptuar dënim unik prej 24 vjetësh burgim lidhur me vrasjen e F.Z. Trupi gjykues e rikualifikoi veprën nga “Vrasje e rëndë” në “Vrasje”.

Vendimi u bë publik të mërkurën nga trupi gjykues i përbërë nga gjyqtari kryetar Gent Beka, si dhe anëtarët Gazmend Bahtiri e Sulltane Hoti.

Për veprën penale “Vrasje”, Krasniqi u dënua me 22 vjet burgim, pasi vepra u rikualifikua nga “Vrasja e rëndë”. Ndërsa, për armëmbajtje pa leje, atij iu shqiptua dënim prej 2 vjetësh e 6 muajsh burgim. Në përfundim, gjykata caktoi dënimin unik prej 24 vjetësh burgim.

Palët që nuk pajtohen me këtë aktgjykim mund të paraqesin ankesë pasi ta pranojnë vendimin në formë të shkruar.

Në shpalljen e aktgjykimit morën pjesë prokurori Menduhi Kastrati, pala e dëmtuar dhe mbrojtësi i Krasniqit, avokati Ilir Ramaj. I akuzuari nuk ishte i pranishëm.

Krasniqi ishte deklaruar i pafajshëm në seancën fillestare të mbajtur më 15 korrik 2025.

Ai akuzohej për vrasjen e F.Z., e ndodhur në gusht të vitit 2024 në Zllakuqan të Lipjanit, pas një mosmarrëveshjeje mes fëmijëve, raporton “Betimi për Drejtësi”.

Sipas aktakuzës së Prokurorisë Themelore në Prishtinë, të ngritur më 30 qershor 2025, Skender Krasniqi ngarkohej se më 7 gusht 2024, në fshatin Zllakuqan të Lipjanit, kishte vepruar pas një mosmarrëveshjeje të ndodhur po atë ditë ndërmjet djalit të tij, të miturit T.K., dhe të miturit A.Z., djalit të dëshmitarit B.Z. Ky i fundit është nip i F.Z., tashmë të ndjerë.

Mosmarrëveshja lidhej me komunikimet e të miturve në rrjetin social Tik Tok. Sipas aktakuzës, T.K. i kishte shkaktuar lëndime të rënda trupore A.Z. me thikë. Kur F.Z. ishte kthyer nga puna dhe kishte kuptuar për ngjarjen, ai ishte nisur së bashku me dëshmitarin I.Z. drejt shtëpisë së Skender Krasniqit, për të mësuar dhe sqaruar çfarë kishte ndodhur.

Aktakuza pretendon se dëshmitari I.Z. kishte biseduar me dëshmitaren N.K., e cila i kishte kërkuar të largohej, duke i thënë se nuk e dinte çfarë kishte ndodhur. Më pas, i akuzuari kishte dalë nga shtëpia dhe ishte drejtuar te porta e oborrit, ku ndodheshin F.Z. dhe dëshmitarët I.Z. e F.K. Aty ishte afruar edhe dëshmitari B.K.

Pasi kishte përfunduar biseda, F.Z. dhe I.Z. ishin larguar nga porta e shtëpisë së Krasniqit në drejtim të rrugës së fshatit. Sipas aktakuzës, ata kishin parë të miturin T.K. duke dalë nga pjesa e sipërme e oborrit. Të mllefosur, F.Z. dhe I.Z. ishin nisur në drejtim të tij dhe kishin hyrë në oborrin e të pandehurit, ku kishte nisur një fjalosje me bërtima. T.K. kishte në dorë një thikë, të cilën i ishte kërkuar ta lëshonte.

Në një moment, sipas aktakuzës, kishin ndërhyrë dëshmitarët N.K. dhe B.K., ndërsa palët kishin filluar të ndaheshin. I.Z. ishte nisur drejt rrugës dhe pas tij kishte shkuar edhe F.Z. Në ato rrethana, pretendohet se Skender Krasniqi e kishte marrë thikën nga i mituri T.K. dhe, me qëllim të privimit nga jeta të F.Z., e kishte goditur atë dy herë radhazi, duke i shkaktuar lëndime vdekjeprurëse.

F.Z. ishte dërguar rreth orës 13:02 pa shenja jete në QMF-në e fshatit Magurë të Komunës së Lipjanit, ku ishte konstatuar vdekja e tij.

Për këtë rast, Krasniqi ngarkohej fillimisht me veprën penale “Vrasja e rëndë”, nga neni 173, paragrafi 1, pika 1.4 të Kodit Penal të Republikës së Kosovës.

Në pikën e dytë të aktakuzës, Skender Krasniqi akuzohej edhe për posedim të paautorizuar të një thike, në kundërshtim me ligjin e zbatueshëm për armët. Sipas prokurorisë, kjo ishte thika e përdorur për shkaktimin e lëndimeve vdekjeprurëse ndaj F.Z. Gjithashtu, gjatë kontrollit në shtëpinë dhe oborrin e të pandehurit ishin gjetur dhe sekuestruar edhe tri thika të tjera.

Për këtë pikë, ai akuzohej për veprën penale “Mbajtja në pronësi, kontroll, ose posedim të paautorizuar të armëve”, sipas nenit 366, paragrafi 2 lidhur me paragrafin 1.1 të Kodit Penal të Republikës së Kosovës.

The post Skender Krasniqi dënohet me 24 vjet burg për rastin e vrasjes në Zllakuqan appeared first on Albeu.com.

Gjykata Themelore në Prishtinë e ka gjetur fajtor ish-shefin e prokurimit në KEK, Ymer Dragushën, për katër vepra penale të keqpërdorimit të pozitës apo autoritetit zyrtar në bashkëkryerje, duke i shqiptuar një dënim unik prej dy vjetësh burgim.

Sipas aktgjykimit të shpallur sot, për pikën e parë të aktakuzës Dragusha është dënuar me një vit burgim, ndërsa për tri pikat e tjera me nga tetë muaj burgim për secilën.

Gjatë shpalljes së vendimit u tha: “Gjykata, duke u bazuar në nenin 76 të Kodit Penal, të pandehurit i shqipton dënim unik me burgim në kohëzgjatje prej 2 (dy) viteve, i cili dënim do të ekzekutohet në afat prej 15 ditëve nga dita e plotfuqishmërisë së këtij aktgjykimi”.

Po ashtu, me aktgjykim është obliguar që të mbulojë edhe shpenzimet e procedurës penale, konkretisht 100 euro në emër të paushallit gjyqësor dhe 100 euro për fondin e kompensimit të viktimave të krimit.

Gjykata gjithashtu e ka udhëzuar Avokaturën Shtetërore që kërkesën pasurore juridike ta ndjekë në procedurë të rregullt civile.

Dragusha kishte lidhur marrëveshje për pranimin e fajësisë me Prokurorinë Speciale, marrëveshje të cilën Gjykata e kishte miratuar në seancën e 7 shkurtit 2025.

The post Ymer Dragusha dënohet me 2 vjet burg për keqpërdorim të pozitës zyrtare në rastin e KEK-ut appeared first on Albeu.com.

Gjykata e Apelit ka vendosur ta ulë nga 2 në 1 vit burgim dënimin ndaj Dejan Pantiqit për akuzën që lidhet me sulmin terrorist kundër zyrave të Komisionit Komunal Zgjedhor në Mitrovicën e Veriut, në dhjetor të vitit 2022. Pjesa tjetër e aktgjykimit të Gjykatës Themelore në Prishtinë është vërtetuar, përfshirë dënimet prej nga 5 vjet burgim për Milun Milenkoviq dhe Aleksandër Vllajiq, si dhe lirimin nga akuza të Miomir Vakiqit.

Më 28 korrik 2025, Gjykata Themelore në Prishtinë kishte nxjerrë aktgjykim dënues ndaj Dejan Pantiqit, Milun Milenkoviqit dhe Aleksander Vlajiqit. Me atë vendim, Pantiq ishte dënuar me 2 vjet burgim, ndërsa Milenkoviq dhe Vllajiq me nga 5 vjet secili, kurse Miomir Vakiq ishte liruar nga akuza, raporton “Betimi për Drejtësi“.

Lidhur me këtë rast, Gjykata e Apelit kishte mbajtur seancë më 28 prill 2026 për t’i dëgjuar pretendimet ankimore të palëve.

Vendimi i shkallës së dytë është marrë nga trupi gjykues i përbërë nga Ferit Osmani si kryetar i kolegjit, si dhe Albina Shabani-Rama dhe Avni Mehmeti si anëtarë.

Ndërkaq, kujtojmë se më 5 qershor 2026, Vllajiq ishte shpallur fajtor nga Gjykata Themelore në Prishtinë edhe për veprën penale të spiunazhit dhe ishte dënuar me 5 vjet burgim, pasi kishte pranuar se kishte qenë agjent i BIA-s.

Sa i përket të akuzuarit Milun Milenkoviq, Apeli ka vlerësuar ankesën e mbrojtjes së tij dhe ka konstatuar se dispozitivi i vendimit nuk ka nevojë të përmbajë në mënyrë të shprehur formën e fajësisë, për sa kohë që aty jepet një përshkrim i qartë i veprës penale, bashkë me të gjitha faktet dhe rrethanat përkatëse.

Sipas Apelit, në këtë rast forma e fajësisë nuk përcaktohet vetëm formalisht përmes termave si “dashje e drejtpërdrejtë” ose “dashje eventuale”, por del nga përshkrimi faktik i veprimeve të të akuzuarit, mënyra se si ato janë kryer, sjellja e tij para, gjatë dhe pas veprës, si edhe nga tërësia e provave të shqyrtuara gjatë procesit gjyqësor.

Gjykata e Apelit ka vlerësuar gjithashtu se provat e administruara në gjykimin e shkallës së parë nuk janë të ndara nga njëra-tjetra, por formojnë një zinxhir provues të pandërprerë.

Nga ndërlidhja e këtyre provave, sipas Apelit, rezulton se Milun Milenkoviq ka qenë i pranishëm në të gjitha momentet kyçe të ngjarjes: gjatë fazës së grumbullimit të grupit, në çastin e eskalimit pranë automjetit të emergjencës, si dhe më pas në lëvizjen e koordinuar drejt objektit që u sulmua.

Në vendimin e saj, Apeli ka theksuar se i pranon plotësisht si të drejta dhe të bazuara gjetjet e Gjykatës Themelore, duke vlerësuar se është provuar përtej dyshimit të arsyeshëm që Milenkoviq nuk ishte vetëm prezent në vendin e ngjarjes, por kishte marrë pjesë aktivisht në sulmin e organizuar ndaj zyrave të Komisionit Komunal Zgjedhor në Mitrovicën e Veriut.

Po ashtu, si të pabazuar Apeli e ka cilësuar pretendimin se fajësia e Milenkoviqit nuk mbështetet në prova materiale apo personale, duke arsyetuar se provat e lëndës krijojnë një varg logjik dhe të pandërprerë që çon në përfundimin se ai ka marrë pjesë në kryerjen e veprës terroriste.

Për të akuzuarin Alesandër Vllajiq, Apeli ka konstatuar se gjykata e shkallës së parë ka vërtetuar bindshëm praninë e tij në vendngjarje më 6 dhjetor 2022, në bashkëkryerje me të akuzuarin tjetër në këtë çështje penale, Milenkoviq, si dhe me të dyshuar të tjerë në arrati.

Sipas vendimit, shkalla e parë ka ndërtuar një gjendje faktike të qëndrueshme, të qartë dhe të mbështetur në prova që ndërlidhen mes vete, e që e plotësojnë njëra-tjetrën dhe përjashtojnë çdo dyshim të arsyeshëm se prania e Vllajiqit ka qenë pasive ose rastësore.

Nga të gjitha provat, thuhet në vendim, rezulton se Aleksandar Vllajiq ka qenë në vendin e ngjarjes, ka vëzhguar, ka fotografuar, ka komunikuar me telefon në momentin vendimtar të ardhjes së policisë dhe të zyrtarëve zgjedhorë, si dhe ka ndihmuar në mobilizimin e mëtejmë të turmës.

Për këtë arsye, Apeli ka vlerësuar se gjendja faktike është sqaruar në mënyrë të drejtë, të plotë dhe të besueshme, ndërsa pretendimet e mbrojtjes nuk arrijnë ta rrëzojnë përfundimin e gjykatës së shkallës së parë as në planin faktik, as në atë logjik e juridik.

The post Apeli e zbut në 1 vit burg dënimin për Dejan Pantiqin në rastin e sulmit ndaj zyrave të KKZ-së, lë në fuqi pjesën tjetër të aktgjykimit appeared first on Albeu.com.

Gjykata Themelore në Pejë ka dhënë aktgjykimin për çështjen e njohur si “Orenda”, e cila ka të bëjë me keqtrajtimin e një të moshuare në një shtëpi të pleqve gjatë vitit 2022.

Sipas vendimit të gjykatës, Aurona Pelaj është gjetur fajtore, pasi është provuar se ajo me dashje ka ushtruar forcë fizike ndaj viktimës. Për këtë vepër, asaj i është shqiptuar dënimi me 2 vjet e 3 muaj burgim.

Në këtë dënim do të përfshihet edhe periudha e kaluar në paraburgim, nga 2 nëntori 2022 deri më 24 nëntor 2022, ndërsa pjesa tjetër e dënimit do të vuhet pasi aktgjykimi të bëhet i formës së prerë.

Po ashtu, përveç dënimit me burg, Gjykata ka vendosur edhe masë plotësuese ndaj Aurona Pelajt, duke ia ndaluar ushtrimin e profesionit të infermieres për pesë vjet, raporton Klan Kosova.

Nga ana tjetër, Altina Rexhepi është shpallur e pafajshme. Ajo ngarkohej me akuzën se, në bashkëkryerje me Aurona Pelajn, kishte përdorur forcë ndaj viktimës duke ia mbajtur duart gjatë ngjarjes, por Gjykata vendosi ta lirojë nga akuza.

Për të pandehurën Remzie Kuqi, Gjykata ka hedhur poshtë akuzën për veprën penale “Sulmi”, pasi Prokuroria ishte tërhequr nga ndjekja penale lidhur me këtë pikë të aktakuzës.

Rasti “Orenda” pati shkaktuar reagime të forta në opinionin publik në nëntor të vitit 2022, pasi u publikuan pamje ku shihej keqtrajtimi fizik i një të moshuare nga punonjëse të shtëpisë së pleqve.

The post Gjykata në Pejë jep vendimin për rastin “Orenda”, Aurona Pelaj dënohet me 2 vjet e 3 muaj burg appeared first on Albeu.com.