Siç e pati mësuar ekskluzivisht Report Tv muaj më parë, Alibeaj punoi që pasi Apeli i dha vulën Sali Berishës për të mbledhur 3 mijë firmat e nevojshme. Në dokument, të cilin Report Tv e ka lexuar, detajohen parimet mbi të cilin “anti-berishistët” të shkëputur me kohë prej Sali Berishës e së fundmi edhe nga Lulzim Basha, hodhën hapat për krijimin e partisë së re.

Partia, sipas statutit, parashikohet të funksionojë mbi një ndarje pushtetesh brenda organizmit politik. Njëjtë si shteti, edhe ndërtimi i partisë është bazuar mbi “ndarjen e pushtetit politik, atij administrativ dhe atij gjyqësor, të cilët ndihmojnë dhe kontrollojnë njëri-tjetrin, duke balancuar të gjithë funksionimin e brendshëm të saj.”

Risi është edhe krijimi i një entiteti garantues për ruajtjen e vijës politike dhe ideologjike të partisë. Ky entitet do të ketë kompetencat e thirrjes dhe ushtrimit të demokracisë së drejtpërdrejtë sa herë që do të vihen re deformime të parimeve mbi të cilat është krijuar dhe ndërtuar partia.

Edhe kryetari, njëjtë si në PD do të zgjidhet përmes votës së anëtarësisë.

“Në hartimin e statutit kemi pasur qëllimin të parashikojmë demokracinë e drejtpërdrejtë (atë që rrjedh drejt e nga anëtari i më i thjeshtë i partisë) si elementi kryesor mbi të cilin bazohet ndërtimi dhe funksionimi i partisë” i tha një burim Report Tv, i cili teksa citon statutin evidentoi faktin se grupimi synon të përcjellë idenë e një partie, jo të kryetarit.

“Demokracia e drejtpërdrejtë e ushtruar në mënyrë të shpeshtë, e shoqëruar edhe me ndarjen e pushteteve brenda organizimit politik sjell në jetë një subjekt me demokraci të brendshme funksionale dhe largimin nga kulti i individit”, sqarohet në Statut.

Pjesë e kësaj partie, pritet të jenë edhe deputetja Flutura Açka, apo Arbi Aglliu, si edhe eksponentë të tjerë demokratë si Edvin Kulluri. Kjo lëvizje e tyre vjen vetëm pak muaj para mbajtjes së zgjedhjeve parlamentare 2025.

The post EMRI/ Partia e re e dalë nga PD, prezantohet nesër nga Enkelejd Alibeaj appeared first on Albeu.com.

Ai e cilëson 20 shkurtin si ditë historike për demokracinë, kjo pasi çdo demokrat do ketë dy armë të forta, bashkimin dhe të vërtetën.

Berisha: 20 shkurti do të jetë në historinë e demokracisë, një ditë e shenjtë sepse protesta e 20 shkurtit do të jetë ndryshe nga çdo protestë që Shqipëria ka pasur nga 20 shkurti i vitit 1991 gjer sot.

Kjo sepse secili prej jush, çdo protestues, do të ketë nesër me vete dy armë që nuk i ka patur më parë. Çdo demokrat, çdo opozitar, çdo shqiptar që do shkelë në Tiranë më 20 shkurt, do marshojë bashkë me këto dy forca madhore krah tij.

Protestuesit më 20 shkurt do kenë në njërin krah të vërtetën, kurse në krahun tjetër bashkimin.

Më lejoni të përshëndes në emrin tuaj mijëra e mijëra qytetarë shqiptarë, që kanë ardhur dje dhe sot në Tiranë nga të katër anët e dheut për t’u bashkuar me ju nesër, ditën e fitores.

Unë gjithashtu dua të përshëndes mijëra e mijëra shqiptarë, që sot gjatë gjithë ditës nga të katër anët e Shqipërisë, kanë ardhur në Tiranë, të gatshëm për 20 shkurtin, ditën e ngadhënjimit të demokracisë, ditën e fitores të opozitës shqiptare.

Miqtë e mi, e vërteta dhe bashkimi janë dy forca që shumëfishojnë shqiptarët që do mbushin nesër sheshet dhe rrugët e Tiranës në këtë datë historike.

E vërteta dhe bashkimi janë dy forca që do e bëjnë më të rëndë hapin e çdo demokrati më 20 shkurt.

E vërteta dhe bashkimi janë dy forca që do bëjnë që zëri i protestuesve të depërtojë jo vetëm në veshët e topitur të shqiptarëve, por të depërtojë në zemrat e tyre, kudo që janë.

E vërteta dhe bashkimi do shndërrojnë rrugën e rikthimit të opozitës, rikthimit të PD në pushtet, rrugën e shpëtimit të Shqipërisë./albeu.com 

The post Berisha: Protestuesit më 20 shkurt do kenë në njërin krah të vërtetën, kurse në krahun tjetër bashkimin appeared first on Albeu.com.

Qytetarët që ju përgjigjën thirrjes së opozitës për të protestuar para Kuvendit të Shqipërisë nisën grumbullimin në orën 16:30, dhe nuk kanë munguar thirrjet kundër qeverisë, gjatë kohës që deputetët e mazhorancës flisnin në foltoren e Kuvendit.

Pas mbylljes së seancës plenare, edhe deputetët eopozitës u bashkuan në protestë, ku folën përballë qytetarëve dhe kërkuan që të gjithë sëbashku mos e ndalin revolucionin.

Gjatë protestës pati edhe përplasje mes qytetarëve dhe policisë, por gjithçka më pas kaloi qetësisht dhe pa incidente të rënda.

Pas mbylljes protestës qytetarët janë nisur drejt banesës së ish-kryeminsitrit Sali Berisha në rrugën “Mustafa Matohiti”./albeu.com

The post “O Sali o hero”, mbyllet protesta para Kuvendit, qytetarët nisen drejt shtëpisë së Berishës appeared first on Albeu.com.

Në një letër për Drejtorin e FBI-së, Christopher Wray, Kryetari Komisionit Juridik Jim Jordan, vë në dukje se zoti McGonigal luajti rol të rëndësishëm në fillimin e hetimeve për lidhjet me Rusinë të ish Presidentit Trump.

Ata theksojnë se oligarku rus, Oleg Deripaska, për të cilin zoti McGonigal, punoi pas largimit nga FBI-ja, kishte punuar me ish agjentin e shërbimeve britanike të zbulimit, Christopher Steele, dosja e diskredituar e të cilit ndaj zotit Trump, sipas letrës, luajti rol qendror në fillimin e hetimeve.

Edhe kryetari demokrat i Komisionit Juridik të Senatit Dick Durbin, i ka kërkuar me anë të një letre Prokurorit të Përgjithshëm, Merrick Garland dhe drejtorit të FBI-së, zotit Wray informacione të mëtejshëm lidhur me aktivitetet e zotit McGonigal, duke u nisur nga dy aktpaditë, ajo e Nju Jorkut, për lidhjet me oligarkun rus dhe ajo e Uashingtonit, për lidhjet me Shqipërinë.

Zoti Durbin thotë se akuzat për shkeljet e zotit McGonigal janë shqetësuese dhe ai kërkon informacion mes të tjerash mbi rolin e zotit McGonigal në hetimet për lidhjet ruse të zotit Trump dhe ndërhyrjes ruse në zgjedhjet e vitit 2016. /VOA

The post Republikanë e demokratë kërkojnë sqarime për ish-zyrtarin e FBI-së Charles McGonigal appeared first on Albeu.com.

Situata në fshatin Kuç të Shkodrës dhe në shumë vende të tjera të këtij qyteti parqitet e rëndë.

Një banor i fshatit duke folur për mediat ka thënë se për 14 minuta reshje, uji vërshoi në banesën ë tyre dhe arriti deri në një metër.

Ai po ashtu shtoi se në Shkodër ka ndarje mes demokratëve dhe Socialistëve, ndërsa shton se kryebashkiaku nuk ka shkuar t’i shohë ende.

“Dje në orën 10:00 të mëngjesit isha duke punuar në një dyqan. Në sekonda erdhi ujë…pa na njoftuar askush. Për 14 minuta kemi pasur 1 metër ujë në oborre. Askush nuk na ka njoftuar. Të gjithë shokët e fshatit Kuç kemi vijuar për të shpëtuar gjërat. Kërkojmë ndihmë. E tillë përmbytje, ishte dhe në 2010-2011. Në Shkodër ndahen, demokratë dhe socialistë. Por unë kërkoj ndihmë. Kjo rrugë është e vështirë që të bëhet. Kryetari i Bashkisë nuk i është afruar fare zonës sonë. Ne duam ndihmë”, tha banori./albeu.com

The post “Shkodra e ndarë në demokratë e socialistë”, banori: Për 14 minuta, 1 metër ujë në banesë appeared first on Albeu.com.

Zgjedhjet e mesit të mandatit i dhanë mundësi demokratëve të ruajnë shumicën në Senat, ndërsa republikanëve të rifitojnë kontrollin e Kongresit, teksa ra në sy humbja e kandidatëve të mbështetur nga Donald Trump.

Një lajm i mirë për Ukrainën, që do të vazhdojë të ketë mbështetje nga SHBA-ja, dhe për multilateralizmin që nuk do të ri-hyjë në krizën e viteve të presidencës Trump. Por si do të ndikojë Kongresi i ardhshëm në politikën e SHBA-së për Ukrainën, Kinën, ekonominë dhe shumë tema të tjera të nxehta? Kjo është pyetja që think-tanku “Atlantic Council” është përpjekur t’i japë përgjigje, duke publikuar një përmbledhje me opinione nga një sërë ekspertësh mbi çështje të ndryshme.

Ukrainë

Në analizën e tij John Herbst, ish-ambasador i SHBA-së në Ukrainë, thekson se ndryshe nga sa pritej nuk pati një “dallgë të kuqe”, pra një fitore të thellë të republikanëve, dhe kjo ka zbehur dyshimet se kandidatët më populistë mund ta nxisnin Uashingtonin të reduktonte mbështetjen ndaj Kievit.

Dhe ky zhvillim duhet t’i qetësojë jo pak ukrainasit, ekzistenca e të cilëve në thelb varet nga ndihma amerikane. Nga ana tjetër Vendet e Evropës Lindore si Rumania, Polonia dhe vendet baltike, mund ta llogarisin ruajtjen e statusit të tyre si pararoja e krahut lindor të NATO-s. Ndërkaq, vendet e Evropës Perëndimore mund të vazhdojnë të shpenzojnë pak për mbrojtjen duke përfituar nga “ombrella” mbrojtëse e SHBA-së.

Multilateralizmi dhe demokracia

Cristopher Skaluba, ish-drejtor kryesor për politikën evropiane dhe të NATO-s në Pentagon, tregon se si rezultatet e këtyre e zgjedhjeve ofrojnë njëfarë ngushëllimi edhe për ata që kishin frikë për “shëndetin” e NATO-s dhe të multilateralizmit në përgjithësi.

Vitet e presidencës së Donald Trump kujtohen në Bruksel si një makth, si për politikat e sigurisë, po ashtu edhe për ato tregtare dhe diplomatike. Aq sa disa zyrtarë evropianë shkuan në Uashington pak para zgjedhjeve, duke kërkuar këshilla se si të menaxhonin një rikthim të mundshëm të atyre dinamikave.

Për më tepër, rezultatet e zgjedhjeve të mesit të mandatit tregojnë mungesën e joshjes së  Moskës përkundrejt popullatës amerikane, pavarësisht alarmeve parazgjedhore. Po ashtu, ka një psherëtimë lehtësimi për rezultatet e dobëta në zgjedhje të mohuesve të integritetit të tyre, një shenjë kjo e shëndetit të mirë të demokracisë amerikane.

Rivendosja e marrëdhënieve me Evropën ka qenë një shtyllë kryesore e 2 viteve të para të administratës Biden, e përfshirë në programin e politikës së jashtme për ringjalljen e multi-lateralizmit. Rachel Rizzo, anëtare e lartë e Qendrës Evropiane, nënvizon se Gjermania ka shtuar shpenzimet e saj për mbrojtjen, sistemi energjetik evropian e ka reduktuar ndjeshëm varësinë e tij ndaj Rusisë, ndërsa Polonia ka marrë nga SHBA-ja premtimin për të vendosur përgjithmonë në këtë vend një numër trupash amerikane.

Natyrisht, do të jetë e nevojshme të shihet se çfarë efekti do të kenë akuzat e evropianëve për proteksionizëm ndaj Aktit të Reduktimit të Inflacionit. Apo se çfarë do të ndodhë nëse Ukraina do të pësojë disfata ushtarake në të ardhmen, ku Kongresi mund ta drejtonte gishtin e akuzës ndaj vendeve evropiane se nuk kishin bërë mjaftueshëm. Në këtë kuptim, për të mbajtur marrëdhënie të shkëlqyera, Rizzo thotë se do të jetë e rëndësishme që Evropa të vazhdojë të interesohet për çështjet strategjike në mënyrë që të luajë një rol më largpamës si një fuqi globale.

Kina

Sipas Kit Conklin, ish-zyrtar i sigurisë kombëtare të SHBA-së, republikanët ka të ngjarë ta përdorin shumicën në Kongres, dhe sidomos Komitetin e Punëve të Jashtme, për të sulmuar Shtëpinë e Bardhë për politikat e ndjekura ndaj Kinës në lidhje me teknologjinë.

Conklin vëren se në vitin 2021, Byroja e Industrisë dhe Sigurisë (BIS) miratoi eksportin e teknologjisë që supozohej të ishte pjesë e listës së zezë me vlerë 61 miliardë dollarë. Një element që ndoshta do të përdoret si një levë kundër Biden.

Në përgjithësi, theksi do të vihet tek konkurrenca teknologjike, qëndrueshmërinë e zinxhirëve të furnizimit në SHBA dhe efektiviteti i përgjithshëm i strategjisë presidenciale të kontrollit të eksporteve. Kongresi me shumicën e re mund të sjellë ndryshime të rëndësishme, duke filluar nga propozimet aktuale që përfshijnë forcimin burokratik të BIS-it, lidhjen e tij direkte me byronë ose krijimin e një dege të re të inteligjencës brenda sistemit.

Në përgjithësi, Dhoma e Përfaqësuesve e udhëhequr nga republikanët do ta shohë si një përparësi kryesore konkurrencën teknologjike SHBA-Kinë. Prandaj, duhet të presim miratimin e ligjeve të reja që do të kenë një ndikim të rëndësishëm në sigurinë e kërkimit, tregtinë dhe qëndrueshmërinë e zinxhirëve të furnizimit.

Irani

Barbara Slavin, drejtore e Nismës për të Ardhmen e Iranit, beson se Kongresi i SHBA-së nuk do të jetë në gjendje të bllokojë një marrëveshje mbi programin bërthamor të Iranit, nëse kjo e fundit do të arrihet ndonjëherë. Për më tepër, administrata aktuale është tashmë shumë aktive në mbështetjen e protestuesve iranianë dhe në kundërshtimin e furnizimeve që Irani po i bën Rusisë me dronë dhe raketa për luftën në Ukrainë.

Mund të pritet që republikanët e Dhomës së Përfaqësuesve të përdorin një retorikë edhe më agresive, duke i bërë jehonë “skifterit” Benjamin Netanyahu, kryeministri i sapozgjedhur i Izraelit. Për Netanyahun, Irani mbetet një mbulesë e dobishme dhe një mënyrë për të larguar vëmendjen nga tensionet izraelito-palestineze, dhe nga kritikat e SHBA-së për trajtimin e qeverisë ndaj palestinezëve dhe arabëve izraelitë.

/albeu.com

The post A do ta ndryshojë Kongresi i ri, me shumicë republikane politikën e jashtme të SHBA-së? appeared first on Albeu.com.

Biden – i cili kishte vlerësime të ulëta përpara zgjedhjeve të së martës, pjesërisht për shkak të zhgënjimit të publikut mbi inflacionin – tha se rezultati i së shtunës vonë e bën atë që të presë me padurim pjesën e mbetur të mandatit të tij.

Udhëheqësi i shumicës në Senat, Chuck Schumer e përshkroi rezultatin si një “fitore dhe shfajësim” për demokratët dhe axhendën e tyre. Ai akuzoi Partinë Republikane për nxitje të frikës dhe ndarjes gjatë fushatës.

Megjithatë, Republikanët, mbetën pranë marrjes së kontrollit të Dhomës së Përfaqësuesve, ndonëse numërimi i votave po vazhdon.

Mund të duhen disa ditë përpara se të mësohet rezultat i qartë i garës në Dhomën e Përfaqësuesve për të përcaktuar se cila parti do të kontrollojë dhomën me 435 vende. Të shtunën vonë, republikanët kishin fituar 211 vende, nga 218 që janë të nevojshme për të fituar shumicën, ndërsa demokratët kishin 205.

“Populli amerikan hodhi poshtë drejtimin antidemokratik, autoritar, të keq dhe përçarës që republikanët e MAGA donin të sillin për vendin tonë,” tha Schumer pasi fitorja e rizgjedhjes së senatorit Catherine Cortez Masto në Nevada vulosi kontrollin e Dhomës për demokratët e Biden.

Demokratët mund të kontrollojnë Senatin, siç kanë bërë për dy vitet e fundit, me 50 nga 100 vendet e tij, ndërsa është kokë më kokë fitorja për Zëvendëspresidenten Kamala Harris.

Nëse senatori demokrat Raphael Warnock do të fitojë balotazhin e 6 dhjetorit në Georgia kundër kundërshtarit republikan Herschel Walker, shumica e demokratëve 51-49 do t’u jepte atyre një avantazh shtesë në miratimin e disa projektligjeve që janë në gjendje të avancojnë me një shumicë të thjeshtë, nga 60 që nevojiten për shumicën e legjislacionit.

“Jemi duke u fokusuar tani në Georgia. Ne ndihemi mirë me rezultatet e deritanishme,” tha Biden të dielën në Kamboxhia përpara një samiti të Azisë Lindore. “Jam jashtëzakonisht i kënaqur nga pjesëmarrja.”/Monitor

The post Demokratët mbajnë kontrollin e Senatit të SHBA, shuajnë shpresat e “valës së kuqe” republikane appeared first on Albeu.com.

Fati i Senatit varet nga rezultati në disa gara të ngushta. Republikanët kanë fituar 49 nga 100 vende që ka Senati ndërsa demokratët 48. Aktualisht pritet rezultati për Nevadën dhe Arizonën ndërsa Xhorxhia ka kaluar në balotazh, i cili do të mbahet më 6 dhjetor. Secila parti mund të marrë kontrollin e Senatit nëse i fiton të dyja garat, atë në Nevada dhe në Arizona.

Por ekziston një mundësi e madhe, që për herë të dytë në dy vjet, kontrolli i Senatit të varet nga rezultati i balotazhit në Xhorxhia. Në garë është senatori demokrat në detyrë Raphael Warnock i cili sfidohet nga republikani Herschel Walker.

Sipas ligjit të këtij shteti një kandidat shpallet fitues kur merr të paktën 50 % të votave, gjë që nuk ndodhi në raundin e parë.

Kontrolli i Kongresit do të jetë përcaktues edhe për fatin e axhendës së Presidentit Biden për dy vitet e ardhshme. Një shumicë republikane mund t’ia vështirësonte përmbushjen e shumë prej prioriteteve të tij.

Zgjedhjet e këtij viti për Kongresin i tejkaluan prishmëritë historike për një parti që drejton Shtëpinë e Bardhë. Partia në pushtet pothuajse gjithmonë pëson humbje në zgjedhjet që përkojnë me mesin e mandit të presidentit, por edhe nëse republikanët fitojnë Dhomën, humbja e demokratëve nuk do të jetë aq e madhe sa mendohet para zgjedhjeve, ose siç ndodhi më, ose 2018 në 2010.

Një shumicë e vogël në Dhomën e Përfaqësuesve do të përbënte një sfidë të madhe për republikanët dhe kryesisht kreun aktual të republikanëve në këtë dhomë Kevin McCarthy. Ky i fundi pritet të marrë pozicionin që mban aktualisht Nancy Pelosi, duke u bërë kryetar i Dhomës së Përfaqësuesve. Me një shumicë të brishtë në këtë dhomë zoti McCarthy do të kishte pak hapësirë për gabime për të çuar përpara axhendën republikane./VOA

The post Republikanët edhe më pranë fitores së Dhomës së Përfaqësuesve: Xhorxhia mund të vendosë mbi fatin e Senatit appeared first on Albeu.com.

Disa e kishin parashikuar këtë që ndodhi, përkundër të gjitha gjasave dhe parashikimeve të shumicës së analistëve. Demokratët ruajtën shumicën e ngushtë në Senat, ndërsa zgjedhjet për Kongresin nuk regjistruar “dallgën e kuqe” siç shpresonte Donald Trump dhe republikanët.

Megjithatë, sipas asaj që që shtë bërë tashmë traditë në zgjedhjet e mesit të mandatit, partia e presidentit aktual Joe Biden duhet të ishte fundosur në këtë proces, duke pasur parasysh se sipas disa Exit Poll (Edison Research) rreth 7 nga 10 votues u shprehën të pakënaqur me situatën në vend. Dhe rreth 1 në 3 prej tyre kishin përmendur më pas inflacionin si çështjen më të rëndësishme që do të diktonte votën e tyre.

Mangësitë në programin e Partisë Republikane

Pas rezultateve specifike dhe ndonjë surprize në shtetet e lëkundura, republikanët duket se kanë bërë një gabim në krahasim me demokratët: nuk i kushtuan vëmendje detajeve. Herën e fundit që ata patën kontrollin e presidencës, Kongresit dhe Senatit, kur Trump u zgjodh president në vitin 2016, ata dështuan keq nën premtimin e tyre për shfuqizimin e Aktit të Kujdesit Shëndetësor të Përballueshëm.

U përçanë dhe u ndikuan nga sjellja radikale e Trump. Në vitin 2018 ata humbën kontrollin e Kongresit dhe në vitin 2020 të Senatit. Republikanët u përpoqën të përfitonin nga ndjenjat kombëtare, duke identifikuar fushat specifike: inflacionin e lartë, kriminalitetin e shtuar (duke e lidhur vazhdimisht me emigracionin) dhe qeverisjen e keqe të Biden.

Kandidatët republikanë kanë deklaruar gjatë fushatës së mund të ulin koston e jetesës, të mbyllin kufijtë (veçanërisht atë jugorë), por nuk kanë ofruar asnjë platformë të detajuar se si do ta arrijnë këtë. Sepse zgjedhjet e mesit të mandatit janë të rëndësishme, por jo si zgjedhjet presidenciale.

Anomalitë e këtij viti

Vetë ky vit ishte anormal. Stanjacioni politik e ka kapluar SHBA-në, tashmë të prekur nga post-pandemia. Nga ana tjetër 3-mujori i dytë, ndryshoi humorin e amerikanëve dhe prishi ekuilibrat: pavarësisht se politika e jashtme nuk ndikon shumë në sjelljen e elektoratit amerikan, narrativa e konfliktit në Ukrainë ishte e ndërthurur me çështje ideologjike dhe pragmatike, me të cilat votuesit e gjetën veten.

Në qershor, Gjykata e Lartë rrëzoi vendimin “Roe vs Wade” duke rihapur një debat të gjatë. Vendimi shkaktoi një ndryshim të menjëhershëm në llogaritjet zgjedhore, pasi shumë gra dhe disa burra reaguar me zemërim dhe vendosmëri duke i përdorur kutitë e votimit për të shprehur shqetësimin e tyre.

Nëse këta janë faktorë që mund të kenë motivuar demokratët (dhe një shenjë e kishte dhënë votimi i hershëm), tek republikanët u vu re njëfarë shkëputjeje nga metodat e Trumpizmit, gjë që ka sjellë neveri ndaj ish-presidentit nga shumë kandidatë republikanë.

Trump dhe demokracia u konsideruan në mënyrë të ngjashme si “zona problematike” gjatë fushatës zgjedhore muajt e verës, për shkak të dëgjesave publike të komitetit hetimor të Kongresit që hetoi sulmin mbi Capitol Hill në fillim të vitit 2021.

Kështu, rryma subversive e vitit 2016 duket të paktën të jetë ndalur. (Nuk është rastësi që e vetmja “dallgë e kuqe” e vërtetë është ajo e republikanit Ron DeSantis në Florida), pavarësisht se Trump vazhdon të keni një ndjekje të konsiderueshme nga besnikët e tij.

Amerika mbetet e ndarë

“Split America”. Është ky refreni që shoqëron analizat mbi Shtetet e Bashkuara që prej zgjedhjeve presidenciale të vitit 2016 e në vazhdim. Rezultati i zgjedhjeve të së martës, përbën një tjetër konfirmim: polarizimi po fiton. Në Senat, gara ishte shumë e ngushtë. Ashtu si në zgjedhjet e 2020-ës, Xhorxhia luajti një rol vendimtar. Kandidati republikan, ish-kampioni i futbollit Herschel Walker, nuk arriti të mposhtë demokratin Raphael Warnock.

Diferencën e bëri Gjenerata Z

Gjatë javëve të fundit, shqetësimet mbi gjendjen e ekonomisë amerikane dhe sondazhet që sugjeronin se një numër gati rekord amerikanësh besonin se vendi i tyre po ecën në “drejtimin e gabuar”, paralajmëruan një mbrëmje zgjedhore magjike për republikanët. Megjithatë, duket se strategjia e demokratëve – të fokusuar tek demokracia në fletëvotim – arriti të nxiste pjesëmarrjen e votuesve të rinj dhe të mobilizonte bazën e tyre të mbështetësve. Dhe ishin të rinjtë e Gjeneratës Z dhe ata të Mijëvjeçarit, që e penguan “dallgën e kuqe” republikane.

Kjo duket se del edhe nga një Exit Poll i publikuar nga CNN, që tregon se votuesit midis 18- 29 vjeç që votuan për demokratët ishin 28 për qind më shumë se në zgjedhjet e fundit. Ata u motivuan nga disa çështje, siç është e drejta e abortit.

Ndërsa republikanët gëzonin mbështetjen e atyre që janë mbi 65 vjeç (plus 13 për qind më shumë) dhe votuesit midis 45-64 vjeç (plus 11 për qind). “Unë di të them se: Po të mos ishte për amerikanët nën të 30-at, sonte do të kishim me siguri një “dallgë të kuqe”- tha analisti dhe eksperti amerikan i sondazheve John Della Volpe.

Nëse Wall Street kishte vënë bast për fitoren e republikanëve, duke përsëritur se sa bota e financës preferon qeverinë e ndarë – atë që nuk dëmton kompanitë e mëdha – regjisori i njohur Michael Moore kishte parashikuar një “cunami blu” të demokratëve.

Fituesi i Çmimit Oscar, i cili ishte ndër të paktët që parashikoi fitoren e Donald Trump në vitin 2016, ka mbajtur një ditar në internet me titull “E vërteta e cunamit të zgjedhjeve të mesit të mandatit”, për të hedhur poshtë parashikimin e republikanëve. Sipas Moore, demokratët u ndihmuan shumë nga një pjesëmarrje masive e të rinjve dhe grave. Nuk ishte një cunami, por vetëm një rezultat relativisht i mirë.

/albeu.com

The post Pse dështuan republikanët të arrinin fitoren e thellë që prisnin appeared first on Albeu.com.

Partia Demokratike në SHBA i ka humbur në përgjithësi zgjedhjet e mesit të mandatit, por nuk është dërrmuar plotësisht. Siç pritej, Joe Biden del i mavijosur nga zgjedhjet e së martës. Tashmë do të duhet të negociojë me opozitën në Kongres, që ka rifituar shumicën.

Por presidenti aktual nuk u “poshtërua” siç kishte shpresuar Donald Trump. Pasoja më logjike politike, është se tani Biden do të jetë në gjendje të vazhdojë me strategjinë e tij me dy nivele.

Nga njëra anë, ai duhet të kërkojë me më shumë bindje një marrëveshje me segmentin e moderuar të republikanëve për prioritetet madhore të vendit: inflacioni, energjia, ndryshimet klimatike, dhe ndihma për Ukrainën.

Nga ana tjetër, ka mundësi që të rishpallë kandidimin e tij në zgjedhjet e vitit 2024, duke ua mbyllur gojën pretendentëve të tjerë nga radhët e demokratëve. Paradoksalisht, panorama mund të jetë akoma më konfuze në kampin e fituesve.

Duke parë hartën e qarqeve, duket se kandidatët Trumpianë nuk kanë marrë aq vota sa parashikohej. Në fakt, sidomos në zgjedhjet për Kongres, shumë nga kandidatët ekstremistë janë mundur në shtetet e lëkundura, si Ohajo dhe Pensilvania.

Por mund të imagjinojmë se kjo nuk do t`i ndryshojë planet e Donald Trump. Më 15 nëntor ai do të shpallë kandidaturën e tij për Shtëpinë e Bardhë. E treta në radhë. Ky lajm merret tashmë si i mirëqenë në Uashington.

Në këto kushte është në dorën e udhëheqësve parlamentarë të Partisë Republikane, të vendosin se si ta menaxhojnë shumicën e mundshme në Kongres: 2 vjet sulme të pandërprera, dhe hetime parlamentare kundër Joe Biden?

Apo një legjislaturë produktive, për t’i treguar vendit se republikanët qeverisin më mirë sesa demokratët? Linja e parë është ajo e Trump; e dyta ekziston në letër, por kjo e fundit nuk ka ende një udhëheqës të njohur.

Në botën e konservatorëve, po zhvillohet prej muajsh një garë, ndonjëherë edhe shumë e ashpër, e cila të lë të kuptosh më mirë dinamikën e vitit 2016. Në atë kohë, establishmenti i Partisë Republikane u përpoq që ta frenonte ngritjen e bujshme të ish-ndërtuesit nga Nju Jorku.

Por ai nuk ishte në gjendje të gjente konsensusin mbi një kandidat të vetëm. Senatorët Marco Rubio (Florida) dhe Ted Cruz (Texas), donin të qëndronin në garë deri në fund. Trump i mposhti ata një nga një. Sot po propozohet sërish e njëjta skemë.

Udhëheqësit republikanë në Uashington, po mundohen të gjejnë një emër të përshtatshëm që mund të bllokojë rikthimin në garë në Donald Trump. Senatori kryesor i republikanëve Mitch Mcconnell, ish-zëvendëspresidenti Mike Pence dhe të tjerët, e cilësojnë Trump në mos një “puçist” siç mendojnë demokratët, një figurë edhe më toksike dhe përçarëse për vendin se sa ishte 8 apo 4 vjet më parë.

Problemi është se tani ashtu si edhe atëherë, është e vështirë të krijohet një bllok kompakt anti-Trump. Megjithatë, ka ende hapësirë politike dhe sociale për ta tentuar një manovër të tillë. Sondazhi i fundit i porositur nga NBC TV, tregon se 62 për qind e votuesve republikanë nuk identifikohen domosdoshmërisht me Trump.

Në janarin e vitit 2021, kjo përqindje ishte vetëm 46 për qind. Por pretendent është edhe udhëheqësi alternativ: guvernatori i Floridës Ron DeSantis, 44 vjeç, hiper-konservator, një kundërshtar i flaktë i abortit, i aftë në letër që të trashëgojë votat e bazës Trumpiane. DeSantis fitoi lehtësisht në Florida, duke u rikonfirmuar si guvernator.

A do të jetë ai drejtuesi i një koalicioni anti-Trump? Ish-presidenti e ka ndjerë tashmë rrezikun, duke i vënë DeSantis një nofkë nënçmuese:“Sanctimonious”, hipokrit, servil.

Megjithatë, edhe konkurrentët e tjerë të mundshëm duhet të bëjnë një hap prapa.

Lista është e gjatë: vetë Mike Pence, sërish Rubio, ish-sekretari i shtetit Mike Pompeo, ish-ambasadorja e SHBA-së në OKB Nikki Haley. Por është edhe një skenar tjetër që mund të funksionojë në favor të Trump.

Javët e ardhshme, Prokurori i Përgjithshëm, Merrick Garland, pritet të padisë ish-presidentin në lidhje me dokumentet e klasifikuara, të mbajtura ilegalisht në rezidencën e tij në Mar-a-Lago. Trump e ka bërë tashmë të ditur se do të mobilizojë mbështetësit e tij.

Ligjvënësit Trumpianë që mund të kryesojnë komitetet gjyqësore – si kongresmeni Jim Jordan dhe senatori Ron Johnson – kanë deklaruar se do të hetojnë FBI-në dhe Departamentin e Drejtësisë. Por si do të sillen republikanët e tjerë?

Ndoshta ata do t’i binden partisë për të mos u dhënë një avantazh demokratëve. Por në atë pikë, situata do të jetë më e ndërlikuar për t’ua shpjeguar votuesve se përse ish-presidenti nuk është i përshtatshëm për të qeverisur vendin. E komplikuar, por jo e pamundur, veçanërisht nëse hetimi mbi ngjarjet e 6 janarit do të përfundonte me një aktakuzë zyrtare ndaj Donald Trump.

/albeu.com

The post Tani Biden e ka më e lehtë të rikandidojë: Trump u dobësua, por partia Republikane nuk di se si ta heqë qafe appeared first on Albeu.com.