Në një postim në platformat sociale, Këlliçi e përshkroi situatën si “skandaloze”, duke theksuar se në të njëjtën ditë që një ministre e qeverisë së Beogradit shprehu pohime të rënda për luftën në Kosovë, Rama u paraqit në Euronews Serbia dhe vlerësoi pozitivisht Vuçiçin si dhe nismën “Ballkani i Hapur”.

Sipas Këlliçit, zyrtarja serbe deklaroi se po të ndodhej ajo në vend të Millosheviçit, do ta kishte çuar deri në fund pastrimin etnik në Kosovë. Por, në vend që ta dënonte këtë qëndrim, kryeministri shqiptar zgjodhi të fliste me simpati për presidentin serb dhe të mbronte idenë e bashkëpunimit rajonal.

“Edi Rama nuk e dënoi deklaratën e zyrtares së lartë, nuk shprehu asnjë indinjatë, por u shpreh se ideja e Ballkanit të Hapur ishte fantastike”, shkroi deputeti demokrat. Ai shtoi se Rama e lidhi mbështetjen për këtë nismë me figurën e tij dhe të Vuçiçit, duke u asociuar haptazi me autokratin serb.

Këlliçi cilësoi të papranueshëm dhe skandaloz këtë qëndrim, të cilin e konsideroi si një model të përsëritur gjatë 13 viteve të qeverisjes së Ramës. “Në shesh duhet të rrëzojmë sunduesin e Tiranës dhe binjakun e autokratit të Beogradit. Është imperativ kombëtar”, përfundoi reagimi i tij, duke e ngritur çështjen në nivelin e një misioni qytetar.

The post Këlliçi shpërthen kundër Ramës pas deklaratave të ministres serbe: Skandal, thirrje për rrëzim nga sheshi appeared first on Albeu.com.