Barcelona ka hedhur hapin e parë për zgjatjen e kontratës së Raphinhas, pasi drejtori sportiv Deco u takua në mënyrë joformale me futbollistin brazilian.

Diario SPORT raporton se Deco dhe Alejandro Echevarría kanë drekuar të hënën me Raphinhan në një restorant në Castelldefels. Takimi konsiderohet nisja e kontakteve për një marrëveshje të re mes palëve.

Edhe pse kontrata aktuale e Raphinhas me Barcelonën skadon në vitin 2028 dhe klubi nuk ndodhet përballë urgjencës për të mbyllur menjëherë një marrëveshje, drejtuesit katalanas synojnë ta mbajnë atë në skuadër edhe pas kësaj date.

Raphinha, 29 vjeç, raportohet se dëshiron të vijojë karrierën në “Camp Nou” dhe mbetet plotësisht i angazhuar me Barcelonën. Gjatë drejtimit të Hansi Flickut, ai është kthyer në një prej kapitenëve të ekipit dhe në një nga zërat më të rëndësishëm në dhomën e zhveshjes.

Aktualisht, braziliani nuk përfaqësohet nga një agjent, ndaj çështjet që lidhen me të ardhmen e tij po i ndjek vetë. Kjo i ka mundësuar atij të zhvillojë komunikim të drejtpërdrejtë me drejtuesit e klubit gjatë takimit të së hënës.

Mes Raphinhas dhe Decos ekziston një lidhje e fortë, pasi ky i fundit ka qenë më parë përfaqësuesi i sulmuesit. Marrëdhënia profesionale u mbyll kur Deco u emërua drejtor sportiv i Barcelonës, por raporti i tyre personal ka mbetur i afërt.

Në drekën joformale mori pjesë edhe bashkëshortja e Raphinhas, Taia Belloli.

Barcelona vlerëson në mënyrë të veçantë progresin e Raphinhas dhe ndikimin e tij në grup. Përtej paraqitjeve në fushë, ai ka marrë një rol drejtues dhe është shndërruar në një figurë kyçe të ekipit.

Klubi çmon gjithashtu profesionalizmin e brazilianit, i cili shihet si një model për futbollistët e rinj të skuadrës.

Takimi i parë është konsideruar pozitiv nga të dyja palët. Barcelona pritet të vijojë negociatat me Raphinhan me synimin për ta mbajtur atë në klub edhe pas vitit 2028.

The post Barcelona hap negociatat për rinovimin e Raphinhas, Deco zhvillon takim me sulmuesin brazilian appeared first on Albeu.com.

Sipas sqarimeve të fundit nga drejtuesi sportiv i Barcelonës, Deco, klubi katalanas e ka trajtuar me korrektesë të plotë çështjen e transferimit të Julian Alvarezit gjatë verës, duke hedhur poshtë pretendimet e Atletico Madridit.

Deco konfirmoi gjithashtu se Barcelona kishte paraqitur një propozim financiar prej 100 milionë eurosh në fazën e hershme të merkatos verore, por nuk gjeti gatishmëri nga ana e klubit madrilen për të liruar sulmuesin argjentinas.

Ndërkohë, analisti i njohur italian i merkatores, Fabrizio Romano, sugjeron se përmes kësaj daljeje publike, Deco synon të përgënjeshtrojë narrativën e Atletico Madridit se Barcelona kishte ndikuar vazhdimisht në vendimmarrjen e Alvarezit.

Gjithashtu, Barcelona nuk ishte në dijeni që sulmuesi argjentinas do të bënte një deklaratë të tillë të hapur gjatë Kupës së Botës 2026.

Megjithatë, vlerësimi për Alvarezin mbetet jashtëzakonisht i lartë në radhët e klubit katalanas dhe burime pranë tij tregojnë se ata po konsiderojnë seriozisht ndërmarrjen e një tentative të re për ta afruar atë në merkaton e janarit.

Por tensionet e krijuara në marrëdhëniet mes dy klubeve mund të paraqesin një pengesë të rëndësishme nëse Barcelona rikthehet me një ofertë të re për futbollistin argjentinas në të ardhmen.

The post Prapaskenat e transferimit të dështuar të Alvarezit zbulohen nga Fabrizio Romano pas deklaratës së Decos appeared first on Albeu.com.

Barcelona zgjodhi të transferojë Anthony Gordonin dhe jo Marcus Rashfordin, ndërsa drejtori sportiv i klubit, Deco, ka shpjeguar arsyet pas këtij vendimi që shkaktoi diskutime të shumta gjatë kësaj vere.

Rashfordi iu bashkua Barcelonës në huazim për një sezon në korrik të vitit të kaluar dhe zhvilloi një sezon pozitiv, duke realizuar 14 gola dhe 14 asistime në të gjitha garat.

Performancat e sulmuesit anglez e bindën edhe trajnerin Hansi Flick, por klubi katalunas vendosi të mos e shfrytëzonte opsionin për blerjen e tij për 30 milionë euro.

Në vend të Rashfordit, Barcelona shpenzoi 80 milionë euro për Gordonin, i cili e ka nisur në mënyrë mbresëlënëse aventurën në “Camp Nou”. Ai ka dhuruar pesë asistime në katër paraqitjet e para në La Liga.

Deco theksoi se Barcelona e vlerëson kontributin e Rashfordit, megjithatë sipas tij profili i Gordonit përputhet më mirë me kërkesat e skuadrës.

“Jemi jashtëzakonisht mirënjohës ndaj Rashfordit. Ai kontribuoi shumë sezonin e kaluar, por ideja jonë e lojës lidhet më shumë me Anthony”, deklaroi Deco.

“Stili i tij përshtatet me atë që kërkon trajneri. Ne e shohim çdo stërvitje dhe e analizojmë ekipin”, shtoi ai.

Sipas drejtorit sportiv, Barcelona kërkonte të rriste intensitetin e lojës, veçanërisht në takimet ku Raphinha nuk ishte i disponueshëm.

“Një nga aspektet ku patëm vështirësi sezonin e kaluar, pa Raphinhan, ishte se energjia e ekipit binte. Na duhej më shumë intensitet”.

“Analizuam shumë sulmues krahu. Të transferosh dikë nga Liga Premier është pothuajse e pamundur, por Flick e kishte të qartë atë që dëshironte dhe prej aty punuam për marrëveshjen”, përfundoi ai.

The post Deco sqaron vendimin e Barcelonës për transferimin e Gordonit në vend të Rashfordit appeared first on Albeu.com.

Bernardo Silva kishte shfaqur interes për t’u transferuar te Barcelona gjatë merkatos së verës, por mesfushori portugez përfundoi te rivali i madh i katalanasve, Real Madridi.

Deco, drejtori sportiv i Barcelonës, ka sqaruar përse marrëveshja nuk u realizua, pavarësisht dëshirës së futbollistit për të veshur fanellën e klubit nga “Camp Nou”.

Gjatë një interviste të fundit, Deco bëri të ditur se Silva ishte i gatshëm të kalonte te Barça, por karakteristikat e tij nuk përputheshin me profilin që klubi kërkonte për repartin e mesfushës.

“Nuk ishte pozita që po kërkonim. Na erdhi informacioni se ai dëshironte të vinte te Barça, por nuk ndodhi, sepse ne kemi parametrat tanë”.

“Ishte një çështje ekonomike dhe gjithashtu për minutat e lojës. Ai dëshironte të luante, ndërsa unë preferoj lojtarët tanë”, shtoi Deco.

Pavarësisht vendimit për të mos e afruar, Deco shprehu admirim të madh për Bernardo Silvan, të cilin e konsideroi një lojtar të jashtëzakonshëm.

Barcelona zgjodhi t’u qëndronte besnike planeve të saj sportive dhe financiare, edhe pse futbollisti portugez ishte i gatshëm të transferohej në klubin katalanas.

The post Dëshironte të bashkohej me Barçën”, Deco shpjegon pse Bernardo Silva përfundoi te Real Madridi appeared first on Albeu.com.

Drejtuesi sportiv i Barcelonës, Deco, ka ndarë informacione rreth përpjekjes së klubit për të siguruar shërbimet e Julian Alvarez nga Atletico Madridi gjatë merkatos së fundit verore.

Portugezi konfirmoi se katalanasit kishin paraqitur një propozim financiar që arrinte shifrën e 100 milionë eurove për sulmuesin kampion bote.

“Ka çështje që nuk mund t’i diskutojmë hapur, por ne i kemi respektuar të gjitha procedurat,” tha Deco gjatë prononcimit të tij.

Ai shtoi më tej se oferta konkrete parashikonte pagesën e kësaj shume të ndarë në tri vite këste, por pala tjetër nuk u përgjigj fare.

Sipas tij, klubi madrilen e kishte bërë të qartë që në fillim se nuk kishte ndërmend të lejonte largimin e lojtarit argjentinas.

Deco iu referua edhe trajnerit Jan, duke thënë se ai vetë e ka sqaruar se ka zhvilluar disa bisedime me ta dhe se përgjigjia ishte e prerë: lojtari nuk shitet.

Ai hodhi poshtë akuzat se Barcelona e nxiti Alvarezin të kërkonte transferimin, duke theksuar se nuk i kanë sugjeruar asnjëherë futbollistit të deklaronte gjatë Kupës së Botës se donte të largohej.

Duke komentuar deklaratat e Miguel Angel Gil Marinit, Deco u tregua i përmbajtur duke thënë se mund të flasë vetëm në bazë të eksperiencës së tij personale.

Ai solli në kujtesë verën e vitit 2003, kur ishte pjesë e Portos dhe Barcelona u përpoq ta transferonte atë, duke tërhequr një paralele mes dy situatave.

Në fund, ai këmbënguli se klubi blaugrana kishte treguar korrektesë dhe respekt maksimal gjatë gjithë procesit të bisedimeve.

“Synimi ynë ishte të merrnim Julianin, por ata nuk donin ta linin të lirë. Kjo nuk është një çështje e madhe, por askush nuk mund të pretendojë se ne nuk sillemi me respekt,” përmbylli ai deklaratën e tij.

The post Deco zbulon detajet e ofertës së Barcelonës për Julian Alvarez dhe qëndrimin e Atleticos appeared first on Albeu.com.

Drejtori sportiv i Barcelonës, Deco, ka rrëfyer detajet e negociatave që i paraprinë transferimit të Rodrit nga Manchester City gjatë verës.

Ekipi katalunas fitoi garën ndaj Real Madridit për 30-vjeçarin, transferimi i të cilit i kushtoi klubit rreth 75 milionë euro, së bashku me bonuset.

Sipas Decos, fillimisht Barcelona nuk e konsideronte të mundur këtë lëvizje, pasi besohej se mesfushori nuk do të largohej nga Manchester City.

“Disa muaj më herët, nuk po mendonim për transferimin e tij, sepse mendonim se Rodri nuk do ta braktiste Cityn”, deklaroi Deco.

Ai shpjegoi se lojtari kishte ende një vit kontratë dhe se në Barcelonë prisnin që marrëveshja e tij të rinovohej. Megjithatë, pasi morën vesh se Rodri mund të largohej, Deco kontaktoi Hugo Vianën për të verifikuar informacionin.

“Hugo më tha se Rodri kishte marrë një ofertë për rinovim, por nëse do të vinte një propozim tjetër, Manchester City nuk do të mund ta mbante”, tregoi drejtori sportiv i Barcelonës.

Pas kësaj, Barcelona ia paraqiti mundësinë trajnerit, i cili dha miratimin, ndërsa më pas klubi nisi kontaktet me agjentin e futbollistit. I pyetur për interesimin e Real Madridit, Deco u shpreh se për këtë çështje do të duhej të bisedohej me vetë agjentin e Rodrit.

The post Deco tregon si Barcelona arriti marrëveshjen për Rodrin appeared first on Albeu.com.

Barcelona ka zgjedhur të mos ndërhyjë më në merkato vetëm pak ditë përpara përfundimit të afatit kalimtar, një qëndrim që ka shkaktuar reagime të forta dhe që mund të ndikojë në objektivin e klubit për të fituar titullin e gjashtë të shumëpritur të Ligës së Kampionëve.

Drejtori sportiv Deco dhe trajneri Hansi Flick kanë vendosur bashkërisht të mos afrojnë një qendërsulmues të ri. Negociatat për Julian Alvarez dhe Lautaro Martinez dështuan, ndërsa largimet e Robert Lewandowski dhe Ferran Torres rrezikojnë ta lënë skuadrën gjatë gjithë sezonit pa një numër tipik ‘9’.

Ky vendim erdhi pasi Interi nuk pranoi transferimin e Martinezit dhe Barcelona nuk pati mundësi financiare për të përmbushur kërkesat për Alvarez përpara datës 1 shtator. Pavarësisht kësaj, Deco dhe Flick kanë përjashtuar kategorikisht afrimin e alternativave të dyta, duke pranuar mundësinë që Raphinha ose Fermin Lopez të përdoren si ‘9’ fals përkrah Lamine Yamal, Anthony Gordon dhe Karim Adeyemi.

Qëndrimi i drejtuesve ka alarmuar tifozët katalanas, të cilët e shohin si të papërgjegjshëm ndërtimin e sezonit pa një sulmues të specializuar për të shënuar. Kritikat janë përqendruar te mënyra se si klubi ka menaxhuar largimet në repartin ofensiv dhe te fakti që investimet e verës nuk kanë mbuluar atë që konsiderohet pozicioni më i rëndësishëm në fushë.

Problemet nuk kufizohen vetëm te sulmi. Barcelona ka konfirmuar gjithashtu se nuk do të transferojë një qendërmbrojtës të nivelit të lartë për të përforcuar repartin difensiv. Bordi nuk ka mundur të sigurojë një mbrojtës me përvojë që do të plotësonte Pau Cubarsin, duke e lënë prapavijën pa lojtarin me këmbë të majtë ose me profil të theksuar mbrojtës, të kërkuar nga stafi teknik për sfidat me presion të lartë.

Edhe pse mesfusha është forcuar me afrimin e Rodrit nga Manchester City, mungesa e një pranie të qëndrueshme në të dyja zonat e penalltisë ka shtuar dyshimet për mundësinë e Barcelonës për të rivalizuar në Ligën e Kampionëve me ekipe si Paris Saint-Germain, Bayern Munich dhe Arsenal. Vendimi i Decos dhe Flick e ka vendosur skuadrën në një situatë të rrezikshme përpara nisjes së fazës më vendimtare të sezonit.

Brenda 24 orëve të ardhshme, bordi i Barcelonës pritet të zhvillojë një takim krize. Gjatë tij, Deco dhe presidenti Joan Laporta do të shqyrtojnë presionin e medias dhe pakënaqësinë e anëtarëve të klubit, përpara se të vendosin nëse do ta ruajnë strategjinë aktuale apo do të ndërmarrin një përpjekje të dëshpëruar në minutat e fundit të merkatos.

The post Deco dhe Flick marrin një vendim që ka ndarë opinionin appeared first on Albeu.com.

Barcelona vijon të jetë aktive në merkato dhe, nëse nuk arrin të mbyllë marrëveshjen për Lautaro Martinezin para përfundimit të afatit kalimtar, klubi katalanas po shqyrton mundësinë e transferimit të njërit prej dy sulmuesve të tjerë të njohur.

Situata e Lautaros është vështirësuar për shkak të pozicionit të Interit. Më 22 gusht, presidenti i klubit italian, Giuseppe Marotta, bëri të ditur se Interi nuk planifikon të ndahet nga kapiteni 29-vjeçar, i cili ka realizuar 175 gola në 376 paraqitje që prej transferimit të tij te zikaltrit në vitin 2018.

Pavarësisht kësaj, drejtuesit e Barcelonës po punojnë për alternativa. Jose Alvarez, nga El Chiringuito, ka bërë të ditur se Deco ka përfshirë në listën e ngushtë të klubit dy emra për ditët e fundit të gushtit.

Një prej tyre është Viktor Gyokeres, i cili shihet si opsioni me më shumë përvojë. Sulmuesi suedez iu bashkua Arsenalit nga Sporting Lisbon në korrik 2025 dhe në sezonin e tij të parë në Angli shënoi 18 gola në të gjitha kompeticionet, sipas statistikave të publikuara nga klubi londinez.

Vetëm në Ligën Premier, Gyokeres realizoi 14 gola në 36 paraqitje gjatë sezonit 2025/26. Arsenali fitoi gjithashtu kampionatin anglez, ndaj çdo bisedë për largimin e tij do të zhvillohej me një klub që e afroi vetëm një vit më parë dhe i ofroi një kontratë afatgjatë.

Emri tjetër në listën e Barcelonës është Nicolo Tresoldi, sulmues gjerman që luan për Club Brugge. Futbollisti 22-vjeçar është i lidhur me klubin belg deri në qershor 2029 dhe vlerësohet në treg rreth 25 milionë euro. Megjithatë, Club Brugge mund të kërkojë një shumë prej 45 deri në 50 milionë euro për ta lënë të largohet.

Tresoldi e mbylli sezonin e kaluar me 19 gola në kampionatin belg, ndërsa edicionin 2026/27 e ka nisur me katër gola në katër ndeshjet e para zyrtare. Forma dhe zhvillimi i tij kanë tërhequr edhe interesimin e Atletico Madridit, çka do t’i sillte Barcelonës konkurrencë në rast se vendos të bëjë një ofertë për të.

Dy alternativat paraqesin profile të ndryshme. Gyokeres do të vinte me eksperiencën e fituar në Angli dhe Portugali, ndërsa Tresoldi do t’i jepte Barcelonës mundësinë për të investuar te një sulmues 22-vjeçar, me potencial zhvillimi dhe me një shpenzim fillestar më të ulët.

Në ditët e fundit të merkatos, Barcelona duhet të marrë vendimin nëse do të vazhdojë përpjekjet për Lautaro Martinezin apo do të zgjedhë njërin prej Gyokeres dhe Tresoldi si alternativë.

The post Deco përcakton dy alternativat e Barcelonës në sulm appeared first on Albeu.com.

Leon Goretzka ka shprehur gjatë orëve të fundit dëshirën për të kaluar te Barcelona, duke u mbështetur te raporti i veçantë që ka me ish-trajnerin e tij, Hansi Flick. Ylli gjerman po kërkon të përcaktojë skuadrën e ardhshme pas skadimit të kontratës me Bayern Munichun.

Në emisionin “La Pizarra de Quintana”, gazetari i besueshëm Matteo Moretto bëri të ditur se përfaqësuesit e afërt të mesfushorit kanë komunikuar drejtpërdrejt me drejtuesit e klubit katalanas.

Njerëzit e Goretzkës kanë treguar gatishmëri të plotë që ai të bëhet pjesë e projektit të Barcelonës. Kjo mundësi është paraqitur veçanërisht pas dëmtimit të Frenkie de Jongut, i cili ka këputur ligamentin kolateral medial në gjurin e djathtë.

Goretzka e sheh Hansi Flickun si avantazhin kryesor për realizimin e këtij transferimi. Gjatë periudhës 2019-2021 te Bayerni, mesfushori ishte një prej lojtarëve kryesorë të skuadrës së drejtuar nga trajneri gjerman, duke regjistruar 64 paraqitje, 15 gola dhe 18 asistime. Ai luajti rol të rëndësishëm në ekipin që dominoi futbollin evropian.

Kjo nuk është hera e parë në muajt e fundit që mesfushori gjerman ia ofron shërbimet Barcelonës. Pas një periudhe të gjatë me Bayern Munichun, ai synon të nisë një aventurë të re. Sezonin e kaluar, Goretzka luajti në 48 ndeshje dhe qëndroi në fushë për 2.349 minuta.

Në këtë periudhë, ai kontribuoi që Bayerni të fitonte të gjithë trofetë vendorë, ndërsa skuadra arriti gjithashtu deri në gjysmëfinalen e Ligës së Kampionëve.

Megjithëse Goretzka mund të transferohet si lojtar i lirë, pozicioni i Barcelonës është i prerë. Drejtori sportiv Deco nuk po e shqyrton aktualisht afrimin e tij dhe nuk ka ndërmend ta përforcojë repartin e mesfushës.

The post Goretzka i ofrohet Barcelonës, Deco merr një vendim të papritur appeared first on Albeu.com.

Vendimi i FIFA-s për ta pezulluar me kusht ndëshkimin e sulmuesit amerikan Folarin Balogun, pas kartonit të kuq që mori në fazën e 1/16 së finales së Kupës së Botës 2026 kundër Bosnje dhe Hercegovinës, ka ndezur polemika të forta në botën e futbollit.

Si pasojë e këtij vendimi, Balogun pritet të jetë i gatshëm për ndeshjen çerekfinale me Belgjikën, ndërsa reagimet kanë qenë të shumta dhe të ashpra.

Rudi Garcia, trajneri i Belgjikës, e cilësoi këtë zhvillim si një “shaka të 1 Prillit”, ndërsa në rrjetet sociale kanë qarkulluar edhe aludime se ndryshimi i vendimit mund të jetë ndikuar nga ndërhyrje në nivele të larta politike.

Megjithatë, historia e Kupës së Botës tregon se FIFA, në shumë raste të tjera, nuk ka bërë asnjë lëshim edhe kur në qendër kanë qenë yjet më të mëdhenj të futbollit.

Më poshtë janë 11 futbollistë të njohur që, pavarësisht përpjekjeve dhe apelimeve të federatave të tyre, u detyruan të mungonin në ndeshje vendimtare.

Leonardo (Brazili) – Botërori 1994

Braziliani u ndëshkua me karton të kuq në ndeshjen e 1/16 së finales kundër SHBA-së, pasi goditi me bërryl Tab Ramos dhe i shkaktoi frakturë në mollëz.

Federata braziliane mbrojti idenë se Leonardo thjesht po përpiqej të shkëputej nga kapja e kundërshtarit, por FIFA jo vetëm që e la në fuqi kartonin, por e dënoi edhe me katër ndeshje pezullim.

Për pasojë, ai mungoi në çerekfinale, në gjysmëfinale dhe në finalen e atij turneu.

Alessandro Costacurta (Italia) – Botërori 1994

Mbrojtësi i Italisë u ndëshkua me kartonin e dytë të verdhë në gjysmëfinalen ndaj Bullgarisë, pasi ndërhyri me faull ndaj Hristo Stoichkov.

Italianët kërkuan rishqyrtim të rastit, por FIFA nuk pranoi as ta marrë në konsideratë. Kështu, Costacurta e humbi finalen kundër Brazilit, ku Italia u mund pas penalltive.

Patrick Kluivert (Holanda) – Botërori 1998

Sulmuesi i Holandës u përjashtua me të kuq në takimin hapës përballë Belgjikës, pasi goditi me bërryl Lorenzo Staelens.

Federata holandeze argumentoi se futbollisti ishte provokuar rëndë, por FIFA vendosi ta pezullojë për tre ndeshje. Kluivert u kthye vetëm në çerekfinale, ku gjeti rrugën e rrjetës kundër Argjentinës.

Zinedine Zidane (Franca) – Botërori 1998

Francezi u ndëshkua pasi shkeli me dashje mbi Said Al-Owairan gjatë fazës së grupeve.

FIFA e la jashtë për dy ndeshje, çka bëri që Zidane të mungonte ndaj Danimarkës dhe Paraguait. Ai u rikthye në çerekfinale dhe më vonë realizoi dy herë në finalen me Brazilin.

Laurent Blanc (Franca) – Botërori 1998

Ky mbetet një nga kartonët e kuq më polemikë në historinë e Botërorëve. Blanc u përjashtua në gjysmëfinalen me Kroacinë pas një kontakti të lehtë me Slaven Bilic, i cili simuloi rëndë.

Edhe pse Franca protestoi dhe pamjet televizive ngritën dyshime të forta, FIFA nuk ndryshoi vendim dhe Blanc mbeti jashtë finales kundër Brazilit.

Ronaldinho (Brazili) – Botërori 2002

Në çerekfinalen e famshme me Anglinë, Ronaldinho dha asist, shënoi një gol spektakolar nga goditja e lirë dhe më pas mori karton të kuq pas një ndërhyrjeje ndaj Danny Mills.

Brazili kërkoi heqjen e pezullimit me argumentin se ndërhyrja nuk kishte qenë e qëllimshme, por FIFA mbajti të njëjtin qëndrim. Ronaldinho mungoi në gjysmëfinalen kundër Turqisë.

Michael Ballack (Gjermania) – Botërori 2002

Mesfushori gjerman u ndëshkua me karton të verdhë në gjysmëfinalen përballë Koresë së Jugut pas një faulli taktik, duke plotësuar limitin e kartonëve.

Ndonëse më pas shënoi golin e suksesit, Ballack nuk luajti në finalen me Brazilin.

Rasti i tij ndikoi më vonë që FIFA të ndryshonte rregulloren dhe t’i fshinte kartonët pas çerekfinaleve.

Deco (Portugalia) – Botërori 2006

Në sfidën famëkeqe Portugali-Holandë, të njohur si “Beteja e Nurembergut”, Deco u përjashtua pas kartonit të dytë të verdhë për vonesë loje.

Federata portugeze pretendoi se arbitri e kishte humbur kontrollin e ndeshjes, por FIFA e hodhi poshtë apelimin. Deco mungoi në çerekfinalen kundër Anglisë.

Luis Suarez (Uruguai) – Botërori 2010

Në çerekfinalen ndaj Ganës, Suarez ndali topin me dorë mbi vijën fatale në minutën e 120-të.

Ai u përjashtua dhe nuk luajti në gjysmëfinalen përballë Holandës. FIFA nuk e fali pezullimin dhe madje mori në shqyrtim edhe mundësinë e një dënimi më të rëndë.

Thiago Silva (Brazili) – Botërori 2014

Kapiteni i Brazilit mori kartonin e dytë të verdhë në turne pas një pengimi të panevojshëm ndaj portierit David Ospina.

Federata Braziliane kërkoi anulimin e ndëshkimit, duke theksuar se kontakti ishte minimal, por FIFA e refuzoi kërkesën. Thiago Silva mungoi në gjysmëfinalen historike me Gjermaninë, ku Brazili u mund 7-1.

Jerome Boateng (Gjermania) – Botërori 2018

Boateng u përjashtua me kartonin e dytë të verdhë në fitoren dramatike ndaj Suedisë.

Gjermania apeloi duke argumentuar se kartoni i dytë ishte i ashpër, por FIFA nuk e ndryshoi vendimin. Pa Boateng, kampionët në fuqi u eliminuan pas humbjes 2-0 ndaj Koresë së Jugut.

Rasti i Garrinchës, përjashtimi historik

Përpara Balogun, historia kishte regjistruar vetëm një precedent të ngjashëm.

Në Botërorin e vitit 1962, Garrincha u përjashtua në gjysmëfinalen kundër Kilit. Në atë kohë, kartonët e kuq nuk përdoreshin fizikisht dhe pezullimet përcaktoheshin nga komisioni disiplinor.

Brazili ndërmori një fushatë të madhe për ta shpëtuar yllin e vet. Politikanë, tifozë kilianë dhe figura të tjera kërkuan faljen e tij, ndërsa raporti vendimtar i gjyqtarit anësor nuk mbërriti asnjëherë në komision.

Për shkak të mungesës së provave të plota, FIFA vendosi ta lejonte Garrinchën të luante në finale.

Për më shumë se gjashtë dekada, ky mbeti i vetmi rast kur një karton i kuq u fal para një finaleje të Kupës së Botës.

Vendimi më i fundit për Folarin Balogun e ka rikthyer sërish në qendër të vëmendjes këtë precedent historik dhe ka hapur debat të gjerë mbi mënyrën se si FIFA i zbaton rregullat disiplinore në turneun më të madh të futbollit.

The post Nga Zidane te Suarez, 11 emra të mëdhenj që munguan në duele vendimtare, në të kundërt të Balogun appeared first on Albeu.com.