Dani Osvaldo, ish-futbollist i Juventusit, Southamptonit dhe Kombëtares së Italisë, ndodhet në terapi intensive në Argjentinë, pasi është diagnostikuar me një problem serioz në mushkëri.

40-vjeçari, i cili e ka mbyllur karrierën futbollistike, u dërgua me urgjencë në spital të enjten në mbrëmje. Ai kishte kaluar disa ditë me dhimbje të forta në gjoks, ndërsa ekzaminimet mjekësore zbuluan një derdhje pleurale në anën e djathtë.

Për shkak të përkeqësimit të gjendjes, Osvaldo u transportua në Spitalin Komunal Llavallol, në Lomas de Zamora. Raportohet se në mushkëri ishin grumbulluar lëngje dhe qelb, çka kërkoi një ndërhyrje të menjëhershme mjekësore.

Pas ndërhyrjes, stafi mjekësor e vendosi në repartin e kujdesit intensiv. Ish-sulmuesi vijon të jetë në gjendje serioze dhe po mbahet nën vëzhgim të pandërprerë.

Lajmi për situatën e tij shëndetësore u bë i ditur nga gazetari Pepe Ochoa gjatë programit televiziv argjentinas “LAM”, të moderuar nga Angel de Brito.

“Ai ishte në gjendje shumë të keqe. Kishte disa ditë që ndihej shumë keq; kishte qelb dhe lëngje në mushkëri. I hoqën dy centimetra nga secila mushkëri. Diagnoza është derdhje pleurale në anën e djathtë”, deklaroi Ochoa.

Gjatë emisionit u bë e ditur gjithashtu se ish-lojtari i Boca Juniors po kalonte një krizë të rëndë personale, e shoqëruar me probleme të mëdha financiare dhe pa sigurim privat shëndetësor përpara shtrimit urgjent në spital.

The post Dani Osvaldo shtrohet në terapi intensive pas një komplikacioni të rëndë pulmonar appeared first on Albeu.com.