Christophe Dugarry ka reaguar ashpër ndaj Kylian Mbappes pas deklaratave të sulmuesit për Topin e Artë. Ish-futbollisti i kombëtares franceze, kampion bote në vitin 1998, mendon se përqendrimi i lojtarit të Real Madridit te vlerësimet individuale po e dëmton imazhin e tij si lider, si në klub ashtu edhe te përfaqësuesja franceze.

Kritikat e Dugarryt erdhën pasi Mbappe shprehu publikisht bindjen se këtë vit ndodhet në një pozicion të favorshëm për të fituar Topin e Artë. Sipas ish-sulmuesit francez, një deklaratë dhe lobim i tillë nuk i kanë hije një futbollisti të nivelit të tij, sidomos kur bëhet fjalë për kapitenin e kombëtares.

“E konsideroj fëmijërore dhe patetike të kërkoj publikisht një çmim individual në këtë mënyrë. Nuk ka asgjë të mirë në kërkimin e tij, veçanërisht si kapiten i ekipit tënd kombëtar”, ka thënë fillimisht Dugarry.

Mbappe, ndërkohë, e lidhi mundësinë e fitimit të trofeut individual me klubin ku aktivizohet. 27-vjeçari deklaroi se prania te Real Madridi, të cilin e cilësoi si klubin më të mirë në botë, e vendos automatikisht në vëmendjen e votuesve.

“Mendoj se kur luan për Real Madridin, klubin më të mirë në botë, njerëzit të shoqërojnë automatikisht me këtë çmim. Ndoshta ky është një vit i mirë për të, por njerëzit mund të votojnë sipas asaj që mendojnë”, deklaroi Mbappe.

Pavarësisht paraqitjeve të tij të spikatura dhe 42 golave në 44 ndeshje me Real Madridin gjatë sezonit të kaluar, sulmuesi vazhdon të kritikohet për faktin se nuk arriti të fitojë Ligën e Kampionëve. Për Dugarryn, kjo situatë tregon një problem më të gjerë në futbollin modern, ku suksesi individual shpesh vendoset mbi rezultatet e skuadrës.

Dugarry e mbylli qëndrimin e tij duke vënë në dukje dobësimin e frymës kolektive në futboll. “Futbolli po bëhet gjithnjë e më individualist dhe kjo shpesh më bën të vuaj. Në vend që të flasësh për veten dhe çmimet individuale, duhet të flasësh për ekipin, për suksesin kolektiv dhe trofetë që nuk i fitove, të cilët doje t’i fitoje së bashku”, tha ai.

The post Dugarry sulmon Mbappen: Kërkesa publike për Topin e Artë është “fëmijërore dhe patetike appeared first on Albeu.com.