Gjenerata aktuale e Chevrolet Silverado 1500 po përgatitet të largohet nga tregu përmes një edicioni të veçantë, i cili do të jetë jashtëzakonisht i rrallë. Callaway Cars dhe Waldoch Crafts kanë planifikuar prodhimin e vetëm 100 ekzemplarëve të Silverado 1500 RST Launch Edition 2026.

Nën kofano, motori V8 me kapacitet 6.2 litra është kombinuar me paketën supercharged SC602 të Callaway. Falë kësaj ndërhyrjeje, fuqia arrin në 602 kuaj fuqi, ndërsa çift-rrotullimi në 560 lb-ft, transmeton Telegrafi.

Modifikimet nuk kufizohen vetëm te njësia motorike. Waldoch e ka pajisur modelin me sistem sportiv të ulët të pezullimit, disqe aliazh 22-inç dhe pjesë të personalizuara të karrocerisë, të cilat i japin Silverado-s një paraqitje dukshëm më agresive.

Secili automjet do të mbajë një numër unik, të shënuar në pllakat identifikuese të vendosura në kabinë dhe në hapësirën e motorit. Klientët do të kenë mundësi të zgjedhin ndërmjet katër ngjyrave.

Përveç garancisë standarde të General Motors, Callaway dhe Waldoch do të ofrojnë edhe mbulim shtesë për 3 vjet ose 36,000 milje.

Prodhimi parashikohet të nisë më vonë gjatë vitit 2026, ndërsa çmimi fillestar pritet të jetë rreth 90 mijë dollarë.

Me serinë e kufizuar në vetëm 100 njësi, ky Silverado përfaqëson më shumë sesa një pickup me fuqi të shtuar. Ai synon të jetë një model koleksionistësh dhe një përshëndetje e fundit për gjeneratën aktuale, përpara prezantimit nga Chevrolet të Silverado-s së ridizajnuar për vitin 2027. /Telegrafi/

The post Silverado 2026 vjen me 602 kuaj fuqi në një seri të kufizuar prej vetëm 100 njësish appeared first on Albeu.com.