Chelsea ka gjetur gjuhën e përbashkët me Aston Villan për transferimin e Emiliano Martínezit, i cili pritet ta vijojë karrierën te klubi londinez.

Sipas Matt Law të “The Telegraph”, palët kanë rënë dakord për një shumë prej 8.7 milionë eurosh dhe lëvizja do të jetë transferim i përhershëm.

Marrëveshjen e ka bërë të ditur edhe eksperti i merkatos, Fabrizio Romano, përmes formulës së tij të njohur:

“Chelsea ka arritur marrëveshje verbale për transferimin e Emiliano Martínez, HERE WE GO!”, shkroi Romano.

Portieri argjentinas pritet të marrë menjëherë vendin e titullarit te Chelsea. Vendimi i klubit për të ndërhyrë në këtë repart erdhi pas paraqitjes së Robert Sánchezit në sfidën hapëse të sezonit të Ligës Premier kundër Fulhamit.

Për Martínez, ky transferim përfaqëson një hap të rëndësishëm në karrierë. Ai konsiderohet ndër portierët më të njohur të Ligës Premier dhe ka qenë një figurë e rëndësishme edhe te përfaqësuesja e Argjentinës, me të cilën është shpallur kampion bote.

Hapi i radhës është finalizimi zyrtar i marrëveshjes, pas të cilit Martínez do t’i bashkohet Chelseat si lojtar i përhershëm.

The post Emiliano Martínez transferohet te Chelsea, arrihet marrëveshja me Aston Villan appeared first on Albeu.com.

Pas afrimit të Marco Palestrës, Chelsea ka kthyer vëmendjen sërish nga Atalanta, këtë herë për mbrojtësin e ri italian Honest Ahanor.

Klubi londinez zyrtarizoi më 1 korrik transferimin e Palestrës, duke i paguar më shumë se 55 milionë euro. Mbrojtësi i djathtë vinte nga një sezon pozitiv te Cagliari, ku ishte aktivizuar si i huazuar nga Atalanta.

“Sky Sports” raporton se Chelsea po punon për të arritur një tjetër marrëveshje me klubin nga Bergamo përpara përfundimit të merkatos së verës.

Palët kanë rifilluar bisedimet për kalimin e qendërmbrojtësit 18-vjeçar Honest Ahanor në radhët e skuadrës angleze.

Marrëveshja duket pranë përfundimit, pasi sipas Fabrizio Romanos Chelsea është gati të plotësojë kërkesën financiare të Atalantas.

Klubi italian ka kërkuar një shumë mbi 40 milionë euro për të dhënë miratimin për largimin e mbrojtësit, kusht të cilin “Blutë” e Londrës janë të gatshëm ta përmbushin.

Ahanor e nisi formimin e tij te akademia e Genoas, ndërsa në vitin 2025 u transferua te Atalanta. Që prej asaj kohe, futbollisti 18-vjeçar ka bërë përparim të rëndësishëm dhe ka tërhequr edhe vëmendjen e Kombëtares së Italisë.

Mbrojtësi ka debutuar tashmë me përfaqësuesen Azzurre dhe deri tani numëron dy paraqitje me Kombëtaren e Italisë.

The post Chelsea synon transferimin e mbrojtësit 18-vjeçar të Atalantas për mbi 40 milionë euro appeared first on Albeu.com.

Aston Villa dhe Al Hilal kanë gjetur gjuhën e përbashkët për transferimin e sulmuesit anglez Ollie Watkins, duke i hapur rrugën një operacioni të rëndësishëm në ditët e fundit të afatit kalimtar.

Fabrizio Romano raporton se klubi anglez ka miratuar ofertën me vlerë 58.4 milionë euro, së cilës mund t’i shtohen edhe 2 milionë euro të tjera në formë bonusesh për reprezentuesin e Anglisë. Watkins pritet të niset gjatë kësaj jave për në Arabinë Saudite, ndërsa raportohet se preferenca e tij ishte kalimi pikërisht te Al Hilal.

E ardhmja e sulmuesit kishte nxitur shumë spekulime ditët e fundit. Ai nuk ishte pjesë e Aston Villas në ndeshjen hapëse kundër Brightonit, teksa interesimi i Al Hilalit për shërbimet e tij po bëhej gjithnjë e më konkret.

Në të njëjtën kohë, drejtuesit e Aston Villas kanë identifikuar te Chelsea futbollistin që pritet të plotësojë boshllëkun e lënë nga Watkins.

Klubi nga Birminghami ka bërë përparim të ndjeshëm në bisedimet për Nicolas Jackson dhe transferimi i sulmuesit senegalez tashmë ndodhet në fazën përfundimtare. Për kartonin e tij, Chelsea kërkon rreth 70 milionë euro.

Jackson mësohet se e ka miratuar mundësinë e kësaj lëvizjeje dhe ka zhvilluar bisedime me trajnerin Unai Emery. Tekniku e njeh mirë atë që nga periudha kur sulmuesi aktivizohej te Villarreal.

Nëse të dyja operacionet mbyllen sipas parashikimeve, Aston Villa do të ndahet me Watkinsin dhe do ta zëvendësojë me Nicolas Jackson, në atë që pritet të jetë një nga rokadat më tërheqëse të ditëve të fundit të afatit kalimtar.

The post Ndryshime të mëdha në sulm, Watkins drejt Al Hilalit dhe Jackson pranë Aston Villas appeared first on Albeu.com.

Emiliano Martinez pritet të largohet nga Aston Villa gjatë kësaj vere, ndërsa klubi anglez ka afruar tashmë Zion Suzukin si zëvendësues të tij. Pas mosrealizimit të kalimit te Juventusi, portieri argjentinas është bërë objektivi i radhës i Chelseat.

Fabrizio Romano raporton se londinezët kanë nisur kontaktet me përfaqësuesit e Martinezit dhe se gardiani ka dhënë miratimin e tij për një transferim te Blutë.

Marrëveshja me Aston Villan mund të arrihet pa pengesa të mëdha, pasi klubi është pajtuar me largimin e portierit, i cili ka kontratë me të deri në vitin 2029 në Villa Park.

Interesimi i Chelseat lidhet edhe me problemet që skuadra ka shfaqur prej vitesh në këtë pozicion. Robert Sanchez shihet si pika më e dobët e formacionit aktual, ndërsa edhe portierët që e kanë paraprirë nuk kanë bindur. Në fakt, vështirësitë e klubit në portë datojnë që nga largimi i Thibaut Courtois.

Martinez vlerësohet si një ndër portierët më të mirë në botë gjatë viteve të fundit. Megjithatë, për Chelsean mbetet shqetësuese gjendja e tij fizike, pasi ‘Dibu’ po pret të rikthehet nga një dëmtim në gisht.

Portieri argjentinas ishte përmendur më herët si përforcim i mundshëm i Juventusit, por Zonja e Vjetër e ndërpreu interesimin për shkak të pikërisht këtij dëmtimi.

The post Chelsea hap negociatat për Emiliano Martinez pas dështimit të transferimit te Juventusi appeared first on Albeu.com.

Chelsea synon të bëjë një lëvizje të fuqishme për Alex Scottin, pasi klubi londinez po përgatit një ofertë që nis nga më shumë se 80 milionë funte, pa përfshirë bonuset. Nëse këto të fundit aktivizohen, vlera e përgjithshme e transferimit të mesfushorit të Bournemouth mund të arrijë në 90 milionë funte, ose rreth 105 milionë euro.

Scott është përzgjedhja e fundit e trajnerit Xabi Alonso, ndërsa drejtuesit e Chelseat pritet të nisin bisedimet me Bournemouth sapo të zyrtarizohet shitja e Enzo Fernandezit te Manchester City, përpara mbylljes së afatit kalimtar të martën e ardhshme.

Bournemouth ka refuzuar deri tani ofertat e bëra për 23-vjeçarin dhe e ka konsideruar atë të pashitshëm, veçanërisht pas paraqitjeve të tij të konsoliduara në Ligën Premier dhe ftesës së fundit për të stërvitur me kombëtaren e Anglisë në Florida. Megjithatë, Chelsea beson se një propozim në vlerën e rreth 100 milionë eurove mund ta bindë klubin anglez të ndryshojë qëndrim.

Liverpooli kishte shfaqur interes për Scottin, por në fund nuk paraqiti ofertë zyrtare. Arsyeja ishte mungesa e fondeve të mjaftueshme për përforcimin e mesfushës, pasi klubi i dha përparësi pozicioneve të tjera. Kjo i ka krijuar Chelseat mundësinë që të negociojë drejtpërdrejt me përfaqësuesit e lojtarit për kushtet personale të kontratës.

Realizimi i transferimit të Scottit lidhet me të ardhmen e Fernandezit. Mesfushori argjentinas po negocion kalimin te Manchester City për një shumë që besohet të jetë afërsisht 140 milionë euro. Ndonëse afati jozyrtar i vendosur nga drejtuesit e Chelseat për autorizimin e largimit të tij përfundoi dy javë më parë, klubet vazhdojnë diskutimet për ta mbyllur marrëveshjen.

Ndërkohë, Chelsea vijon të diskutojë me Aston Villan për transferimin e sulmuesit Nicolas Jackson. Shitja e Fernandezit dhe e Jacksonit do t’i sigurojë klubit londinez fondet e nevojshme për të përballuar çmimin e kërkuar nga Bournemouth për Scottin.

Brenda 24 orëve të ardhshme, përfaqësuesit e Chelseat do të takohen me drejtuesit e Manchester Cityt për të përcaktuar strukturën e pagesës për Fernandezit. Menjëherë pasi të finalizohet marrëveshja për argjentinasin, londinezët planifikojnë t’ia dërgojnë Bournemouthit ofertën zyrtare prej 105 milionë eurosh, me synimin që vizitat mjekësore të Scottit të zhvillohen para fundjavës.

The post Chelsea përgatit ofertën prej 105 milionë eurosh për zëvendësuesin e Enzo Fernandezit appeared first on Albeu.com.

Chelsea po analizon mundësinë për të afruar Marcus Rashfordin para përfundimit të afatit kalimtar, pasi londinezët kërkojnë ende të përforcojnë repartin ofensiv.

Klubi anglez dëshiron të shtojë në skuadër një tjetër lojtar të aftë të mbulojë disa role në sulm dhe Rashfordi konsiderohet një prej alternativave të mundshme.

Fleksibiliteti i tij për të luajtur në pozicione të ndryshme të vijës së parë mund ta bëjë reprezentuesin anglez një zgjedhje interesante për Chelsean, që po shqyrton opsionet në ditët e fundit të merkatos së verës.

E ardhmja e Rashfordit vazhdon të jetë e paqartë, ndërsa Chelsea mund të tentojë transferimin e tij nëse palët arrijnë një marrëveshje për kushtet e duhura.

Skuadra nga Londra pritet të ndjekë nga afër zhvillimet dhe të kërkojë përforcime cilësore në sulm përpara mbylljes së afatit kalimtar.

Vlera e tij në treg llogaritet aktualisht në 40 milionë euro, megjithatë transferimi përfundimtar mund të realizohet edhe për një shumë prej 30 milionë eurosh.

The post Chelsea vlerëson transferimin e Marcus Rashfordit nga Manchester United appeared first on Albeu.com.

Java hapëse e sezonit të ri në Ligën Premier tashmë ka përfunduar, por klubet angleze kanë ende disa ditë për të korrigjuar mangësitë dhe për të finalizuar lëvizjet e fundit në merkato.

Paraqitjet dhe rezultatet e para kanë ndihmuar trajnerët dhe drejtuesit të përcaktojnë më qartë se cilat pozicione kërkojnë përforcim, cilët lojtarë mund të largohen dhe ku ekzistojnë boshllëqet më të mëdha.

Afati kalimtar përfundon të martën, më 1 shtator, në orën 23:00 sipas kohës britanike. Përpara kësaj date, BBC Sport ka shqyrtuar nevojat e të gjitha skuadrave të Ligës Premier, duke marrë parasysh edhe kërkesat e tifozëve.

Arsenalit i mungon ende një sulmues

Arsenali ka ndërhyrë në disa reparte gjatë verës. Bruno Guimaraes është afruar për mesfushën, Christos Tzolis për krahun, ndërsa Ezri Konsa ka përforcuar mbrojtjen.

Megjithatë, objektivi kryesor i mbetur është reparti ofensiv. Klubi londinez vazhdon ta ndjekë prej kohësh Julian Alvarez dhe do të tentojë të ndërhyjë nëse krijohen kushtet për një marrëveshje, edhe pse transferimi paraqet vështirësi.

Për tifozët, Alvarez do të ishte zgjidhja ideale për shkak të përvojës në Ligën Premier dhe trofeve që ka fituar me Argjentinën dhe Manchester Cityn.

Aston Villa kërkon zëvendësues për Watkins

Largimi i disa futbollistëve të rëndësishëm gjatë verës ka lënë Aston Villën me disa vende për t’u plotësuar.

E ardhmja e Ollie Watkins është ende e pasigurt, pasi Al-Hilal ka shfaqur interes për sulmuesin. Për këtë arsye, klubi po shqyrton alternativa dhe Nicolas Jackson është një nga emrat që lidhet me Villën.

Skuadra ka nevojë edhe për një anësor dhe një qendërmbrojtës, sidomos pas kalimit të Ezri Konsas te Arsenali. Bisedimet kanë nisur për Joel Ordonez të Club Brugge, ndërsa ofertat e mëparshme për Taylor Harwood-Bellis janë refuzuar.

Tifozët e shohin sulmuesin si përparësinë kryesore, megjithëse do të mirëprisnin edhe një tjetër mbrojtës qendror.

Bournemouth dëshiron të ruajë lojtarët kryesorë

Bournemouth e ka një situatë më të qetë në ditët e fundit të merkatos dhe synimi kryesor është të mos humbasë më nga futbollistët më të rëndësishëm.

Eli Junior Kroupi dhe Alex Scott janë dy lojtarët që klubi po përpiqet t’i mbajë, pasi për ta kanë shfaqur interes skuadra më të mëdha.

Ndërkohë, Bournemouth është pranë marrëveshjes për Michele Di Gregorio, portierin e Juventusit. Nëse transferimi përfundon, klubi mund ta konsiderojë punën në merkato pothuajse të mbyllur.

Brentfordi nuk është nën presion

Brentfordi mund të vlerësojë se ka zhvilluar një merkato të suksesshme dhe nuk ka arsye për lëvizje të nxituara në ditët e fundit.

Klubi ka shqyrtuar mundësinë e marrjes së El Hadji Malick Diouf nga West Ham, por afrimi i mbrojtësit të majtë nuk shihet si domosdoshmëri.

Reparti ofensiv tashmë ka një alternativë me përvojë, Callum Wilson. Megjithatë, tifozët do të donin një tjetër sulmues krahu, veçanërisht në të majtë, ku është përmendur edhe Mykhailo Mudryk.

Brightonit mund t’i duhet të zëvendësojë dy lojtarë

Brighton mund të humbasë dy futbollistë me peshë. Yankuba Minteh pritet të bashkohet me Liverpoolin, ndërsa Carlos Baleba është pranë kalimit te Manchester United.

Nëse këto largime realizohen, klubi do të ketë nevojë për një mesfushor defensiv fizik dhe për një anësor që mund të luajë në nivelet më të larta.

Pjesëmarrja në Evropë dhe kalendari i ngjeshur kanë bërë që tifozët të kërkojnë një skuadër më të gjerë, në mënyrë që Brighton të jetë konkurrues në të gjitha frontet.

Chelsea duhet të përqendrohet te largimet

Situata e Chelseat është e veçantë. Tifozët mund të kërkojnë një sulmues tjetër të klasit të lartë ose një portier të ri, veçanërisht për shkak të pasigurisë që rrethon Robert Sanchez. Megjithatë, trajneri Xabi Alonso mendon se skuadra është në pjesën më të madhe e kompletuar.

Prioriteti kryesor në Stamford Bridge është reduktimi i organikës. Chelsea numëron rreth 39 futbollistë dhe synon ta ulë këtë shifër në rreth 25 lojtarë.

Sipas tifozëve, nëse do të ketë një afrim të ri, ai duhet të jetë një portier.

Coventry synon Mudryk

Coventry City është ndër klubet që po garojnë për Mykhailo Mudryk. Futbollisti ukrainas po kërkon të rikthejë karrierën në rrugën e duhur pas pezullimit 20-mujor, të shkaktuar nga testi pozitiv për meldonium.

Frank Lampard mund të kërkojë edhe më shumë alternativa në prapavijë, ndërsa disa lojtarë periferikë mund të largohen përkohësisht në formë huazimi.

Pavarësisht kësaj, tifozët mendojnë se skuadra ka bërë mjaftueshëm për të luftuar për mbijetesën në Ligën Premier.

Crystal Palace ka nevojë për thellësi në mbrojtje

Crystal Palace ka përjetuar një verë me ndryshime të shumta. Mes tyre janë largimi i Maxence Lacroix dhe emërimi i Pierre Sage si trajner.

Angazhimi në Ligën e Evropës e bën të domosdoshëm zgjerimin e organikës. Pierre Sage kërkon një qendërmbrojtës me eksperiencë, ndërsa dëmtimi i Chadi Riad në ndeshjen hapëse e ka shtuar urgjencën për këtë përforcim.

Tifozët kërkojnë gjithashtu një mesfushor qendre për ta bërë ekipin më të plotë.

Evertoni duhet të zgjidhë çështjen e krahut të djathtë

Pozicioni i mbrojtësit të djathtë vazhdon të jetë një problem i Evertonit prej më shumë se një viti. Edhe pse klubi e njeh këtë dobësi, ende nuk është arritur marrëveshje për objektivin kryesor.

David Moyes mund të kërkojë edhe një sulmues tjetër, pasi e ardhmja e Beto dhe Thierno Barry nuk është e përcaktuar.

Liam Delap i Chelseat është një prej emrave që është lidhur me Evertonin.

Fulham po kërkon ekuilibrin e duhur

Alvaro Arbeloa është i kënaqur me punën e bërë nga Fulhami gjatë merkatos, por klubi mund të ndërmarrë edhe disa hapa për ta balancuar më mirë ekipin.

Një prej reparteve ku mund të ketë përforcime është qendra e mbrojtjes. Fulhami kishte shqyrtuar më herët transferimin e Abdelhamid Ait Boudlal nga Rennes.

Pas largimit të Harry Wilson, tifozët kërkojnë një anësor të djathtë. Pikëpyetje ka edhe për mënyrën se si Joachim Andersen do të përshtatet me sistemin e ri.

Hull City po punon për dy sulmues

Hull City ka qenë shumë aktiv gjatë verës dhe vazhdon të synojë afrimin e Mohamed Ali-Cho dhe Ilyas Ansah.

Klubi ka shfaqur interes edhe për Pablo Garcia të Real Betisit dhe Sorba Thomas të Stoke Cityt.

Në ditët që kanë mbetur mund të kërkohen edhe një portier, një mesfushor dhe një mbrojtës i djathtë.

Tifozët do të donin më shumë alternativa në krahun e majtë, si dhe një sulmues, një mesfushor qendror dhe një mesfushor ofensiv.

Ipswich kërkon të ndërhyjë sërish

Që prej rikthimit në Ligën Premier, Ipswich Town ka investuar më shumë se 150 milionë euro për 12 lojtarë.

Megjithatë, Gary O’Neil nuk e konsideron ende të përfunduar punën dhe mund të kërkojë një sulmues ose një mesfushor të ri.

Ndërkohë, futbollistë periferikë si Anis Memeti mund të largohen nga klubi.

Leedsi mund të bëjë lëvizje të kufizuara

Leeds United ka zhvilluar një merkato të fortë, ku spikat transferimi i portierit James Trafford nga Manchester City. Për këtë arsye, blerje të mëdha në javën e fundit duken më pak të mundshme.

Klubi ende interesohet për Mykhailo Mudryk në formë huazimi, por po vlerëson edhe alternativa të tjera për krahun e majtë.

Leedsi po kërkon gjithashtu zëvendësues të mundshëm për Dominic Calvert-Lewin dhe Lukas Nmecha në sulm. Michael Zetterer është lidhur me klubin në rast se Lucas Perri largohet në huazim.

Për tifozët, nevoja kryesore është një mbrojtës i majtë këmbë-majtë.

Liverpooli synon anësorë dhe një mesfushor defensiv

Liverpooli e ka vendosur krahun e sulmit në krye të listës së prioriteteve dhe pritet të afrojë të paktën një, ndoshta edhe dy anësorë para mbylljes së afatit.

Bradley Barcola, Ibrahim Mbaye dhe Yankuba Minteh janë disa nga emrat e përmendur në lidhje me kampionët.

Ndeshja ndaj Newcastle nxori në pah edhe mungesën e një mesfushori defensiv. Që nga largimi i Fabinhos, Liverpooli ka pasur vështirësi në këtë rol dhe një përforcim i ri do të ndihmonte lidhjen mes mbrojtjes dhe mesfushës.

Tifozët kërkojnë të dyja pozicionet: një anësor ofensiv dhe një futbollist që mund të marrë rolin e Fabinhos.

Manchester City pritet të jetë aktiv

Manchester City mund të jetë një prej klubeve më të angazhuara në ditët e fundit të merkatos.

Largimet e mundshme të Savinhos, Omar Marmoush dhe ndoshta Nico Gonzalez mund të krijojnë boshllëqe të rëndësishme në skuadrën e Pep Guardiolës.

City ka arritur marrëveshje me Lille për Ayyoub Bouaddi dhe me Palmeiras për anësorin Allan.

Pedro Neto vazhdon të jetë në radar, ndërsa mbeten të hapura edhe spekulimet për një transferim të mundshëm të Enzo Fernandez nga Chelsea.

Tifozët presin të paktën tre ose katër afrime, ku dy prej tyre duhet të jenë mesfushorë, pasi skuadra ka nevojë për më shumë lojtarë në dispozicion.

Manchester United kërkon një mbrojtës të majtë

Kalimi i Carlos Balebas pritet të mbyllë çështjen e përforcimeve në mesfushë për Manchester United, ndaj fokusi është zhvendosur në krahun e majtë të mbrojtjes.

Lewis Hall i Newcastle mbetet një objektiv, ndërsa klubi po shqyrton edhe mundësinë për Alejandro Balde të Barcelonës dhe Jorge Salinas të Racing Santander.

Një sulmues tjetër mund të afrohet vetëm nëse largohet një prej futbollistëve aktualë. Joshua Zirkzee shihet si kandidati kryesor për t’u larguar.

Tifozët e shohin mbrojtësin e majtë si domosdoshmëri, pasi Luke Shaw nuk mund ta përballojë i vetëm gjithë sezonin dhe ka pasiguri edhe rreth Patrick Dorgu.

Newcastle kërkon eksperiencë në mesfushë

Newcastle United ka investuar te lojtarët e rinj dhe ata treguan në debutimin kundër Liverpoolit se mund t’i bëjnë ballë presionit.

Megjithatë, largimet e Bruno Guimaraes dhe Sandro Tonalit kanë krijuar nevojën për një mesfushor me përvojë në Ligën Premier.

Klubi po avancon në negociatat për Nico Gonzalez të Manchester Cityt.

Një sulmues i shpejtë dhe i gjithanshëm do të ishte gjithashtu i dobishëm për të reduktuar barrën mbi William Osula dhe Yoane Wissa.

Nottingham Forest ka ende përforcime për të bërë

Nottingham Forest ka afruar vetëm tre lojtarë të rinj gjatë kësaj vere dhe puna në merkato nuk ka përfunduar.

Klubi po kërkon një sulmues dhe një mbrojtës krahu, ndërsa po zhvillon bisedime për Liam Delap të Chelseat.

Një tjetër objektiv është Dodo, mbrojtësi i djathtë i Fiorentinës.

Oliver Glasner nuk e sheh mesfushën si përparësi, edhe pse Elliot Anderson është larguar drejt Manchester Cityt.

Sunderland ka nevojë për alternativa në sulm

Pas afrimeve të Dayann Methalie nga Toulouse dhe Jules Ahoka nga Antwerp, pozicioni më i dukshëm që kërkon përforcim te Sunderland është krahu i djathtë.

Geny Catamo i Sportingut është emri që përmendet më shumë për këtë rol.

Largimi i Eliezer Mayenda ka lënë ekipin e parë vetëm me Brian Brobbey dhe Wilson Isidor si sulmues.

Për këtë arsye, afrimi i një qendërsulmuesi tjetër do të ishte veçanërisht i rëndësishëm.

Tottenhamit i duhet më shumë produktivitet në sulm

Tottenham Hotspur ka investuar ndjeshëm gjatë verës, por disfata ndaj Brentfordit në javën e parë zbuloi një shqetësim të rëndësishëm.

Nëse Dominic Solanke nuk arrin të jetë rregullisht pika kryesore e sulmit, Roberto De Zerbi duhet të gjejë një alternativë.

Richarlison e nisi si titullar ndeshjen hapëse, ndërsa Spurs po ecin përpara në bisedimet për Omar Marmoush të Manchester Cityt.

Sipas tifozëve, skuadra ka nevojë për një sulmues dhe një anësor të nivelit të lartë, të cilët mund t’i shndërrojnë kundërsulmet e shpejta në gola dhe raste të pastra.

Me përfundimin e afatit kalimtar vetëm pak ditë larg, klubet e Ligës Premier duhet të marrin vendime të shpejta për mangësitë e evidentuara që në javën e parë.

Arsenali kërkon një sulmues, Manchester United synon një mbrojtës të majtë, Liverpooli ka nevojë për një anësor dhe një mesfushor defensiv, ndërsa Manchester City duhet të shtojë ndjeshëm numrin e lojtarëve të gatshëm.

Ditët e fundit pritet të sjellin një seri lëvizjesh, teksa klubet do të përpiqen të mbyllin boshllëqet e mbetura përpara mbylljes së merkatos.

The post Klubet e Ligës Premier në garën e fundit për përforcime: nevojat e secilit ekip para 1 shtatorit appeared first on Albeu.com.

Manchester City po planifikon një ofertë të re për mesfushorin e Chelseat, Enzo Fernandez, me synimin që ta dorëzojë atë para përfundimit të afatit kalimtar të verës. Lajmi është raportuar nga eksperti i njohur i transferimeve, Fabrizio Romano.

Kampionët e Anglisë duket se janë gati ta rifillojnë përpjekjen për të siguruar shërbimet e futbollistit argjentinas, për të cilin kishin shfaqur interes edhe më herët.

Fernandez raportohet se nuk do ta përjashtonte një kalim te Manchester City dhe e ka lënë të hapur mundësinë e transferimit në “Etihad”.

Pavarësisht kësaj, Chelsea nuk pritet ta nxjerrë në shitje 24-vjeçarin pa kushte.

Klubi londinez ka sinjalizuar se do ta shqyrtonte largimin e tij vetëm në rast se në tavolinë mbërrin një ofertë në përputhje me vlerësimin e klubit dhe që do t’u krijonte mundësi “bluve” të investonin në përforcime të tjera.

Për këtë arsye, Manchester City do të duhet të ofrojë një shumë të konsiderueshme nëse dëshiron ta bindë Chelsean të hyjë në negociata, ndërsa afati kohor po ngushtohet për shkak të afrimit të ditës së fundit të merkatos.

Mesfushori argjentinas ka pasur një rol të rëndësishëm te Chelsea dhe në sezonin e kaluar regjistroi edicionin e tij më të mirë në aspektin e kontributit në sulm.

Gjatë 36 ndeshjeve në Ligën Premier, Fernandez shënoi 10 gola dhe dha 4 asistime. Këto statistika treguan se ai mund të ndikojë si në ndërtimin e aksioneve, ashtu edhe në fazën ofensive.

Tani mbetet për t’u parë nëse propozimi i ri i Manchester Cityt do të jetë i mjaftueshëm për ta bindur Chelsean të ndryshojë qëndrim.

Një marrëveshje mes dy klubeve do ta kthente transferimin e Fernandezit në një prej lëvizjeve më të mëdha të ditëve të fundit të afatit kalimtar në Ligën Premier.

The post Manchester City përgatit ofertën zyrtare për Enzo Fernandezin e Chelseat appeared first on Albeu.com.

Chelsea e nisi sezonin e ri të Ligës Premier me një sukses emocionues 3-2 në transfertë ndaj Fulhamit, duke treguar se mund të përfshihet në garën për trofeun. Megjithatë, për të qëndruar në luftë deri në fund, skuadra londineze duhet të adresojë një dobësi të rëndësishme: paraqitjet në portë.

Debutimi i Xabi Alonsos në stolin e Chelseat zbuloi një ekip me potencial të madh në fazën sulmuese. Cole Palmer, Morgan Rogers dhe Joao Pedro shënuan të tre, duke qenë vendimtarë në fitoren e skuadrës së tyre në derbin londinez.

Një treshe që premton shumë

Chelsea e gjeti golin që në 31 sekondat e para të takimit. Joao Pedro përfitoi nga një aksion i kombinuar me Palmerin dhe shënoi, duke regjistruar golin më të shpejtë të klubit në Ligën Premier që nga tetori i vitit 2016.

Fulham reagoi dhe barazoi përmes Josh King, por Morgan Rogers riktheu avantazhin e Chelseat para mbylljes së pjesës së parë. Për të ishte debutimi i parë në kampionat me fanellën e klubit.

Pas pushimit, Cole Palmer vulosi golin e tretë të londinezëve dhe kompletoi një paraqitje të nivelit të lartë.

Palmer ishte ndër protagonistët kryesorë të sfidës dhe la përshtypjen se po rikthehet te forma që e shndërroi në një prej yjeve të Chelseat gjatë sezonit të tij të parë në Stamford Bridge.

Pas një periudhe të komplikuar, e ndikuar edhe nga dëmtimet, anglezi duket përsëri i motivuar. Atij i duhen vetëm dy gola për të arritur kuotën e 50 golave në Ligën Premier.

Edhe Rogers u shfaq në mënyrë të jashtëzakonshme në debutimin e tij. Ai u bë lojtari i parë i Chelseat që shënon në ndeshjen e debutimit në Ligën Premier që nga Christopher Nkunku në vitin 2023. Për më tepër, krijoi pesë mundësi shënimi, një rekord për një lojtar të Chelseat në debutimin e tij në kampionat që nga sezoni 2003/04, kur nisën të regjistrohen këto statistika.

Joao Pedro, ndërkohë, vazhdon të konfirmojë rëndësinë e tij në repartin ofensiv. Braziliani kishte realizuar tetë gola në shtatë ndeshje gjatë fazës përgatitore dhe e vazhdoi formën pozitive edhe në javën e parë të kampionatit.

Porta, pika më shqetësuese

Ndërsa sulmi i Chelseat duket kërcënues, paraqitja e portierit Robert Sanchez ngriti shqetësime të mëdha.

Gardiani spanjoll pati një mbrëmje të dobët dhe bëri dy gabime që ndikuan drejtpërdrejt në golat e shënuar nga Fulhami.

Te goli i parë, Josh King goditi pa shumë forcë, por Sanchez nuk arriti ta ndalonte topin. Sipas të dhënave për golat e pritur në kuadrat (xGoT), goditja kishte vlerën vetëm 0.05, çka tregon se pritej të pritej nga portieri i Chelseat.

Gabimi i dytë ndodhi pas një goditjeje të Timothy Castagne. Sanchez nuk e kontrolloi siç duhet topin dhe e largoi atë në një zonë të rrezikshme, ku Gonzalo Garcia shënoi me kokë.

Përveç këtyre episodeve, Sanchez shfaqi edhe pasiguri të tjera gjatë takimit.

Ekspertët ngrenë dyshime për Sanchez

Jamie Carragher, ish-legjenda e Liverpoolit, nuk i kurseu kritikat pas përfundimit të ndeshjes. Ai vuri në pikëpyetje shanset e Chelseat për të fituar titullin nëse Sanchez do të vazhdojë të jetë portieri i parë.

Edhe Gary Neville e përshkroi situatën në portë si një problem të madh për ekipin e drejtuar nga Xabi Alonso.

Edhe pse Chelsea ka investuar për të forcuar pothuajse të gjitha repartet gjatë afatit kalimtar, pozita e portierit vazhdon të mbetet e pasigurt. Me merkaton ende të hapur, drejtuesit mund të marrin në konsideratë transferimin e një portieri të ri.

Alonso, nga ana tjetër, u kërkoi lojtarëve që gabimet t’i shohin si pjesë të rrugëtimit dhe nënvizoi se përgjegjësia nuk i takon vetëm një individi.

“Duhet t’i pranojmë dhe të mësojmë nga gabimet. Ky do të jetë një proces”, deklaroi trajneri spanjoll.

Chelsea tashmë zotëron një forcë sulmuese që mund të përballet me skuadrat më të mira të Ligës Premier.

Palmer, Rogers dhe Joao Pedro kanë dhënë prova se mund të formojnë një prej tresheve më të rrezikshme të kampionatit.

Megjithatë, për ta kthyer spektaklin ofensiv në një pretendim të vërtetë për titullin, Chelsea duhet të sigurojë më shumë qëndrueshmëri edhe në portë.

The post Chelsea nën drejtimin e Xabi Alonsos bind në sulm, por porta mbetet pengesa për titullin appeared first on Albeu.com.

Manchester City ka shtuar përpjekjet për të siguruar shërbimet e Enzo Fernandezit nga Chelsea, ndërsa njëkohësisht ka hapur negociata për sulmuesin e Liverpoolit, Cody Gakpo, i vlerësuar 70 milionë euro. Të dy futbollistët janë pjesë e kërkesave të trajnerit Enzo Maresca.

Drejtuesit e klubit, që po planifikojnë lëvizjet nën udhëheqjen e Marescas, synojnë t’i mbyllin këto dy marrëveshje përpara përfundimit të merkatos. Në këtë mënyrë, skuadra do të kompletohej krahas afrimeve të Ayyoub Bouaddi për 95 milionë euro dhe Allan Elias për 40 milionë euro.

Sipas Fabrizio Romanos, zyrtarët e Manchester Cityt mbajnë kontakte të përditshme me Javier Pastoren, agjentin e Fernandezit, me synimin që negociatat të mbeten aktive.

Maresca po ushtron presion brenda klubit për afrimin e mesfushorit argjentinas. Nga ana tjetër, Chelsea pritet të pranojë largimin e tij vetëm nëse siguron garanci financiare që do t’i mundësonin riinvestimin për përforcimin e ekipit para mbylljes së afatit kalimtar.

Fernandez konsiderohet objektivi kryesor taktik i Cityt në mesfushë, por oferta zyrtare varet nga realizimi i largimeve të disa lojtarëve që janë ende në pritje. Bisedimet mes dy klubeve do të vendosin nëse transferimi mund të përfundojë përpara mbylljes së merkatos verore.

Ndërkohë, drejtori sportiv është informuar për kushtet e nevojshme për transferimin e Gakpos. Holandezi 27-vjeçar ka realizuar 51 gola dhe ka dhënë 23 asistime në 181 paraqitje me Liverpoolin. Pasi e zgjati kontratën në gusht 2025 deri në vitin 2030, klubi i Anfieldit besohet se e ka vendosur çmimin e tij në 70 milionë euro.

Gjatë sezonit 2025/26, sulmuesi regjistroi 18 gola dhe 7 asistime në 49 ndeshje. Ai shënoi gjithashtu 3 gola në Kupën e Botës 2026, si edhe një gol këtë të diel në barazimin ndaj Newcastle United.

Tottenham Hotspur kishte tentuar ta afronte Gakpon disa javë më parë, por Manchester City po ecën përpara në komunikimet me përfaqësuesit e lojtarit për të shqyrtuar rolin e tij të mundshëm në rotacionin ofensiv.

City pritet t’i paraqesë Chelseat një ofertë zyrtare për Fernandezin brenda 48 orëve të ardhshme. Gjatë takimit mes drejtuesve të dy klubeve, përfaqësuesit e Cityt do të synojnë të përcaktojnë kushtet e marrëveshjes, përpara se t’i drejtohen Liverpoolit me ofertën përfundimtare për Gakpon.

The post Manchester City synon Enzo Fernandez dhe Cody Gakpo në ditët e fundit të afatit appeared first on Albeu.com.