Me përmbylljen e certifikimit të rezultateve nga Komisioni Qendror i Zgjedhjeve, vendi hyn në etapën vendimtare të ngritjes së institucioneve të reja. Në qendër të zhvillimeve tashmë janë konstituimi i Kuvendit, përzgjedhja e kryetarit dhe nënkryetarëve, si edhe krijimi i Qeverisë së re.

Megjithatë, ende mbetet e paqartë nëse subjektet politike do të gjejnë gjuhë të përbashkët brenda afateve ligjore, apo nëse vendi mund të rrëshqasë drejt një ngërçi institucional.

Për atë që pritet të ndodhë pas certifikimit të rezultateve zgjedhore, analisti politik Zejnulla Jakupi ka folur në një prononcim për “Bota sot”.

Ai sqaroi fillimisht se tashmë ka nisur faza kushtetuese për ngritjen e institucioneve dhe renditi procedurat kryesore që pasojnë.

“Pas certifikimit të rezultateve nga Komisioni Qendror i Zgjedhjeve (KQZ), nis faza kushtetuese për krijimin e institucioneve të reja të Kosovës. Certifikimi i rezultateve i hap rrugë Presidentes që të ndërmarrë hapat për konstituimin e Kuvendit dhe më pas për formimin e Qeverisë.

Hapat kryesorë janë: thirrja e seancës konstituive të Kuvendit – Presidentja duhet ta thërrasë mbledhjen e parë të Kuvendit brenda 30 ditëve nga certifikimi i rezultateve. Në këtë seancë deputetët bëjnë betimin dhe zgjidhen kryetari dhe nënkryetarët e Kuvendit.

Mandatimi për formimin e Qeverisë do të bëhet pas konstituimit të Kuvendit, ndërsa presidentja mandaton kandidatin për kryeministër, zakonisht nga partia ose koalicioni që ka fituar më së shumti ulëse dhe ka mundësi të sigurojë shumicën parlamentare. Kandidati duhet ta paraqesë kabinetin qeveritar dhe programin për votim në Kuvend”, deklaroi ai.

Më tej, Jakupi foli edhe për skenarin kur mungon marrëveshja politike dhe nuk arrihen votat e nevojshme për krijimin e Qeverisë.

“Për votimin e Qeverisë nevojiten të paktën 61 vota nga 120 deputetët. Çfarë ndodh nëse nuk ka marrëveshje politike?

Ligji dhe Kushtetuta parashohin procedura, por jo gjithmonë afate të shkurtra që e detyrojnë zgjidhjen politike. Në praktikë, nëse Kuvendi nuk arrin të konstituohet (p.sh. nuk zgjidhet kryetari), procesi mund të mbetet i bllokuar derisa partitë të arrijnë kompromis; nëse kandidati për kryeministër nuk siguron shumicën, mund të ndiqen procedura të tjera kushtetuese për mandatim, sipas interpretimit të Kushtetutës dhe praktikës së Gjykatës Kushtetuese të Republikës së Kosovës; nëse asnjë shumicë nuk mund të krijohet, një nga zgjidhjet përfundimtare mund të jetë shpallja e zgjedhjeve të reja, sipas procedurave kushtetuese.”

Analisti theksoi gjithashtu se ngritja e institucioneve lidhet drejtpërdrejt me sigurimin e shumicës parlamentare dhe se ligji, në vetvete, nuk e zhbllokon domosdoshmërisht procesin.

Në këtë kontekst, ai nënvizoi nevojën për një marrëveshje më të gjerë politike, duke kujtuar se për zgjedhjen e presidentit ose presidentes duhen 81 vota.

“Pra, procesi nuk zhbllokohet automatikisht nga ligji në mungesë të një marrëveshjeje politike. Mekanizmat kushtetues ofrojnë hapa proceduralë, por formimi i institucioneve në fund varet nga sigurimi i shumicës parlamentare dhe, në rast mosmarrëveshjesh, edhe nga interpretimet e Gjykatës Kushtetuese.

Duhet gjithsesi të arrihet një marrëveshje – një pajtim – që presidentja ose presidenti të zgjidhet nga shumica parlamentare me 81 vota, duke zgjedhur një kandidat ose kandidate jopolitike”, përfundoi Zejnulla Jakupi për “Bota sot”.

The post Pas certifikimit të rezultateve, cilët janë hapat e radhës? Zejnulla Jakupi shpjegon procedurat dhe mundësinë e bllokadës appeared first on Albeu.com.

Mbi një muaj pas zgjedhjeve të parakohshme parlamentare të 7 qershorit, Komisioni Qendror i Zgjedhjeve (KQZ) ka bërë certifikimin e rezultateve përfundimtare, duke e përmbyllur zyrtarisht procesin zgjedhor dhe duke i hapur rrugë ngritjes së institucioneve të reja të Kosovës.

Ky certifikim erdhi pasi përfunduan të gjitha procedurat e parapara me ligj, përfshirë trajtimin e ankesave dhe verifikimin e votave, çka i jep legjitimitet përbërjes së re të Kuvendit dhe ndarjes së mandateve parlamentare.

Zgjedhjet e 7 qershorit ishin hera e tretë që Kosova organizoi zgjedhje parlamentare brenda më pak se një viti e gjysmë, duke reflektuar paqëndrueshmërinë politike që e ka shoqëruar vendin gjatë kësaj periudhe.

Sipas rezultateve të certifikuara, Lëvizja Vetëvendosje (LVV) ka dalë sërish subjekti më i madh politik me 53 mandate, por pa arritur numrat e mjaftueshëm për ta formuar e vetme Qeverinë. Partia Demokratike e Kosovës (PDK) ka marrë 22 ulëse, Lidhja Demokratike e Kosovës (LDK) 18, ndërsa Aleanca për Ardhmërinë e Kosovës (AAK) shtatë mandate.

Megjithëse me certifikimin mbyllet procesi zgjedhor, ai në të njëjtën kohë shënon nisjen e një etape të re politike, nga e cila pritet të varet orientimi i vendit në vitet e ardhshme. Tani fokusi është te procedurat kushtetuese për konstituimin e Kuvendit, zgjedhjen e kryetarit dhe nënkryetarëve, dhënien e mandatit për formimin e Qeverisë dhe mundësinë e sigurimit të një shumice funksionale parlamentare.

Në rrethanat kur asnjë parti nuk i ka e vetme votat e nevojshme për qeverisje, bisedimet ndërmjet subjekteve politike pritet të jenë kyçe. Në rast se ato nuk japin rezultat, vendi mund të hyjë sërish në një bllokadë institucionale, duke ngritur dilema për mënyrën kushtetuese të tejkalimit të krizës dhe afatet për ngritjen e institucioneve të reja.

Burjani: Afatet kushtetuese duhet të respektohen në mënyrë strikte

Lidhur me këtë zhvillim, ish-anëtari i Komisionit Qendror të Zgjedhjeve, Blerim Burjani, ka folur në një bashkëbisedim për “Bota sot”.

Ai theksoi se pas certifikimit të rezultateve, i gjithë procesi i mëtejmë duhet të ecë në përputhje të plotë me Kushtetutën e Kosovës.

Sipas Burjanit, fillimisht duhet të bëhet konstituimi i Kuvendit, pastaj zgjedhja e Qeverisë dhe më pas edhe ajo e presidentit të vendit.

“Tashmë duhet të ndiqet Kushtetuta e Kosovës. Fillimisht duhet të konstituohet Kuvendi, të zgjidhen nënkryetarët, të formohen grupet parlamentare dhe, brenda afatit prej 25 ditësh, të propozohet kryeministri. Më pas duhet të zgjidhet edhe presidenti, brenda afateve të përcaktuara me Kushtetutë”.

Ai vuri në dukje se afatet e përcaktuara me Kushtetutë duhet të zbatohen pa devijime dhe se Kuvendi duhet të konstituohet sa më shpejt.

“Këto janë afate kushtetuese dhe duhet të respektohen në mënyrë strikte. Pas certifikimit të rezultateve të zgjedhjeve nuk ka afat të caktuar për pritje; Kuvendi duhet të konstituohet sa më parë”, përfundoi Blerim Burjani për “Bota sot”.

Halilaj: Certifikimi i rezultateve nga Komisioni Qendror i Zgjedhjeve shënon përfundimin e procesit zgjedhor

Për formimin e institucioneve të reja ka folur për “Bota sot” edhe avokati Gazmend Halilaj.

Ai deklaroi se me këtë zhvillim ka nisur faza kushtetuese për ngritjen e institucioneve të reja dhe sqaroi hapat që duhet të ndiqen më tej.

“Certifikimi i rezultateve nga Komisioni Qendror i Zgjedhjeve shënon përfundimin e procesit zgjedhor dhe hap fazën kushtetuese të formimit të institucioneve të reja. Hapi i parë është konstituimi i Kuvendit, ku deputetët bëjnë betimin dhe zgjidhen kryetari dhe nënkryetarët e Kuvendit. Vetëm pas konstituimit të Kuvendit mund të fillojë procedura për formimin e Qeverisë”.

Megjithatë, Halilaj theksoi se mungesa e marrëveshjes dhe e vullnetit politik mund ta çojë vendin drejt një bllokade të re.

Sipas tij, në situata të tilla, rruga e vetme mbetet dialogu politik dhe zbatimi i rendit kushtetues.

“Kushtetuta dhe legjislacioni parashohin afate dhe procedura të caktuara, por ato nuk mund të zëvendësojnë vullnetin politik. Nëse partitë nuk arrijnë marrëveshje për krijimin e shumicës parlamentare, procesi mund të zvarritet dhe të krijojë bllokadë institucionale. Zgjidhja në raste të tilla mbetet dialogu politik, respektimi i rendit kushtetues dhe, nëse lindin kontestime mbi interpretimin e dispozitave kushtetuese, roli i institucioneve kompetente për të dhënë sqarimet përkatëse”, shtjelloi ai.

Në fund, Halilaj shtoi se përgjegjësia për funksionalizimin e institucioneve bie mbi subjektet politike, të cilat, sipas tij, e kanë për obligim të respektojnë vullnetin e qytetarëve dhe të sigurojnë formimin e institucioneve sa më shpejt që të jetë e mundur.

The post KQZ mbyll zyrtarisht procesin zgjedhor, ndërsa Kosova hyn në fazën vendimtare për krijimin e institucioneve të reja appeared first on Albeu.com.

Komisioni Qendror i Zgjedhjeve (KQZ) i ka certifikuar rezultatet e zgjedhjeve të parakohshme parlamentare, afërsisht një muaj pasi ato u mbajtën.

Zgjedhjet e 7 qershorit ishin hera e tretë që Kosova organizoi votime parlamentare në më pak se një vit e gjysmë.

Nga ky proces zgjedhor, Lëvizja Vetëvendosje (LVV) ka siguruar 53 mandate. Partia Demokratike e Kosovës (PDK) ka marrë 22 ulëse, Lidhja Demokratike e Kosovës (LDK) 18 ulëse, ndërsa Aleanca për Ardhmërinë e Kosovës (AAK) shtatë ulëse.

Pas certifikimit të rezultateve, kryeparlamentarja dhe njëkohësisht ushtruesja e detyrës së presidentit, Albulena Haxhiu, obligohet ta thërrasë seancën konstituive të Kuvendit.

Kushtetuta përcakton që kjo seancë të zhvillohet brenda 30 ditëve nga certifikimi i rezultateve.

Në seancën konstituive bëhet themelimi i Kuvendit, zgjidhen kryetari dhe nënkryetarët, e më pas hapet rruga për procedurat e krijimit të Qeverisë së re.

Pasi Kuvendi të konstituohet, Haxhiu e propozon partinë fituese të zgjedhjeve si mandatare për formimin e Qeverisë, që në këtë rast është Lëvizja Vetëvendosje.

Radio Evropa e Lirë ka kërkuar nga zyra e Haxhiut të dijë kur pritet të thirret seanca konstituive, por nuk ka marrë përgjigje.

Sipas Naim Jakajt, hulumtues në Institutin e Kosovës për Drejtësi (IKD), megjithëse ekziston afati kushtetues prej 30 ditësh nga certifikimi, seanca mund të mblidhet edhe dukshëm më herët.

“Duke qenë se rezultatet zgjedhore tashmë janë të njohura, nuk ka arsye objektive që procesi të zvarritet”, thotë ai.

Si shembull, në zgjedhjet e fundit parlamentare të mbajtura muaj më parë, deputetët e zgjedhur e konstituuan Kuvendin dhe e votuan Qeverinë e re brenda të njëjtës ditë, në një seancë të vetme më 11 shkurt.

Kjo kishte ndodhur pasi përfaqësuesit e partive parlamentare dhe kryetari i atëhershëm i Kuvendit, Dimal Basha, ishin dakorduar paraprakisht për rendin e ditës, përfshirë edhe votimin në pako të nënkryetarëve të Kuvendit.

Procesi ishte lehtësuar edhe nga fitorja bindëse e partisë së kryeministrit në detyrë, Albin Kurti, Lëvizja Vetëvendosje.

Meqë partia në pushtet duket se i ka votat për konstituimin e Kuvendit dhe për formimin e Qeverisë, nuk pritet që këto dy procese të përballen me pengesa.

Megjithatë, një tjetër çështje mund ta mbajë vendin në krizë politike dhe institucionale: zgjedhja e presidentit të ri.

Partia e Kurtit ka fituar 53 vende në Kuvendin me 120 sosh, ndërsa për Kuvendin dhe Qeverinë e re i duhen të paktën 61.

Duke marrë parasysh bashkëpunimin e deritanishëm të Kurtit me partitë e pakicave joserbe, të cilat kanë 10 vende, votat për këtë proces nuk pritet të paraqesin problem.

Zyrtarja e LVV-së, Arbërie Nagavci, i pati thënë REL-it ditë më parë se partia në pushtet i ka siguruar votat për formimin e Qeverisë së re dhe se do të kërkojë konsensus me partitë e tjera për zgjedhjen e presidentit.

Jakaj vlerëson se Kurti do të duhet të ulet me partitë opozitare për të arritur një marrëveshje politike, në mënyrë që vendi të ketë funksionim afatgjatë të institucioneve.

“Një parti që e vendos interesin e shtetit në plan të parë, duhet ta ketë parasysh se çdo vonesë në formimin e institucioneve prodhon kosto për vendin, qoftë në integrimin evropian, zhvillimin ekonomik, zbatimin e reformave apo në humbjen e mundësive të rëndësishme për qytetarët”, thotë Jakaj.

Për ta bërë të vlefshëm votimin për presidentin e Kosovës, nevojitet prania e 2/3 të deputetëve në Kuvendin me 120 vende.

Nëse mungon një marrëveshje politike, kjo mbetet e pamundur për secilën parti parlamentare.

Kushtetuta parashikon që presidenti të zgjidhet brenda 60 ditëve nga dita kur konstituohet Kuvendi.

Nëse kjo nuk realizohet, atëherë Kuvendi shpërndahet dhe vendi shkon në zgjedhje të reja, thotë Jakaj.

Deri më tani, partitë politike nuk kanë zhvilluar bisedime për një marrëveshje të mundshme politike lidhur me presidentin.

Kurti është deklaruar i gatshëm për bisedime me partitë e tjera, ndërsa Nagavci i tha REL-it se partia e tyre “do të bëjë gjithçka” që është në mandatin e saj për t’i siguruar votat e nevojshme për zgjedhjen e presidentit të ri.

PDK-ja ka bërë të ditur se do të ishte e hapur për bisedime me të gjitha partitë, pa e përjashtuar as LVV-në, ndërsa LDK-ja ka vendosur disa parakushte për një marrëveshje mbi krijimin e institucioneve të reja, përfshirë çështjen e gazit amerikan.

Jakaj thekson se deklarimet e deritanishme të partive “tregojnë se rruga drejt një marrëveshjeje nuk do të jetë e lehtë”.

“Kurti ka shprehur gatishmëri për dialog me partitë e tjera. Por, këtu do të duhej transparencë e plotë që të dihet se a është vullnet i vërtetë. Deklaratat publike nuk mjaftojnë. Nuk ka asnjë pengesë që partitë të nisin menjëherë diskutimet për një marrëveshje politike, sepse çdo vonesë rrit rrezikun e një krize të re institucionale dhe të përsëritjes së zgjedhjeve”, thekson Jakaj.

Nëse vendi shkon sërish në zgjedhje, atëherë ato do të ishin zgjedhjet e katërta parlamentare që nga fillimi i vitit 2025.

The post KQZ vulos rezultatin e 7 qershorit, ja cilët janë hapat e ardhshëm appeared first on Albeu.com.

Sipas njoftimit të bërë publik nga NATO thuhet se, “ata eksploruan teknikat e hapjes së dyerve, vendosën dronë për të tërhequr paketat e simuluara të kërcënimit dhe demonstruan fuqinë e makinerive të topave të ujit në neutralizimin e rreziqeve të mundshme”.

“Ky trajnim praktik jo vetëm që rrit gatishmërinë tonë, por gjithashtu përforcon rëndësinë e inovacionit dhe punës në grup në ruajtjen e sigurisë”, thuhet në njoftim.

The post NATO certifikon ekspertët shqiptarë të asgjësimit të mjeteve shpërthyese appeared first on Albeu.com.

Vaksina është e para që shkon përtej licencimit të përkohshëm dhe konsiderohet se hap rrugën për kërkesat e vaksinimit nga spitalet, kolegjet, kompanitë dhe organizatat e tjera.

Ndërsa pritet që të licencohet dhe për moshat 12-15 vjeç, industria farmaceutike po mbledh të dhëna për grupmoshat specifike.

Vendimi tjetër i rëndësishëm nga FDA është të autorizojë doza përforcuese, megjithëse disa argumentojnë se vendimi është i parakohshëm pasi, bazuar në të dhënat, vaksinat ofrojnë mbrojtje të mirë kundër sëmundjeve serioze dhe shtrimit në spital, dhe në lidhje me mutacionin Delta.

Rregullatori po shqyrton gjithashtu aplikimin për një licencë të plotë për Moderna-n, me vendimin që pritet në pak javë./albeu.com

The post Vaksina Pfizer merr miratimin e plotë për përdorim nga FDA appeared first on Albeu.com.