Pas eliminimit të Paraguait nga Kupa e Botës, përplasja ligjore mes yllit francez të futbollit Kylian Mbappe dhe senatores paraguaiane Celeste Amarilla ka hyrë në një fazë të papritur.

Shkëndija e konfliktit nisi në rrjetet sociale, ku senatorja lëshoi fyerje të rënda ndaj sulmuesit, duke sjellë më pas hapjen e një hetimi në Francë ndaj saj për nxitje të urrejtjes dhe racizmit.

Mbappe, që aktivizohet te Real Madridi, reagoi duke i cilësuar deklaratat e saj si të neveritshme dhe të papërshtatshme për funksionin që ajo mban.

Megjithatë, pala mbrojtëse e zyrtares nga Paraguai thotë se ajo nuk mund t’u nënshtrohet gjykatave evropiane dhe ka paralajmëruar tashmë një kundërpërgjigje të fortë.

Për këtë çështje, avokati i saj Guillermo Duarte dha një deklaratë zyrtare për mediat.

“Celeste nuk ka kryer asnjë vepër penale në Paraguai. Meqenëse ajo që ne e konsiderojmë shpifje ose fyerje është gjithashtu një vepër penale në Francë, ne mund të fillojmë procedurat ligjore kundër Mbappe. Ai mund të ekstradohet për t’u përgjigjur për veprimet e tij në Paraguai”, tha Duarte.

Sipas ekipit ligjor të senatores, strategjia mbështetet te fakti se vepra për të cilën autoritetet franceze e akuzojnë atë nuk dënohet në Paraguai, duke cenuar kështu parimin e domosdoshëm për ekstradimin e saj.

Nga ana tjetër, Duarte argumenton se komentet e Mbappes kanë shkaktuar dëm në Paraguai, gjë që sipas tij i jep mundësi sistemit gjyqësor atje të kërkojë vetë futbollistin.

Ndërsa publiku dhe qeveria e Paraguait kanë dënuar sjelljen e senatores së tyre, drama që mund të çojë sulmuesin francez drejt një kërkese për ekstradim po ndiqet me habi nga bota e futbollit.

The post Mbappe përballet me kërcënim për ekstradim në Paraguai pas përplasjes me senatoren appeared first on Albeu.com.

Federata Franceze e Futbollit (FFF) ka bërë të ditur zyrtarisht se do të ndjekë rrugën ligjore ndaj senatores paraguajane Celeste Amarilla, pas komenteve me përmbajtje raciste që ajo publikoi kundër Kylian Mbappe, pas ndeshjes Francë – Paraguai në Kupën e Botës 2026.

FFF reagoi me tone të ashpra ndaj gjuhës së përdorur nga Amarilla, duke e cilësuar atë si të papranueshme dhe të dënueshme.

“Komentet raciste të senatores paraguajane Celeste Amarilla ndaj Kylian Mbappes janë jashtëzakonisht të neveritshme dhe të papranueshme. Si mund të shqiptohen fjalë të tilla? Këto deklarata janë kriminale dhe të dënueshme. Ato duhet të ndiqen penalisht, këtu dhe kudo. Federata Franceze e Futbollit do të paraqesë kallëzim pranë Prokurorisë për nisjen e procedurave gjyqësore”, thuhet në reagimin zyrtar të FFF-së.

Polemika shpërtheu pasi senatorja bëri një sërë deklaratash fyese dhe raciste ndaj sulmuesit francez.

“Ky brutal nuk mësoi kurrë as të shkruajë. Në vend të qumështit të nënës, ai u ushqye me kokos dhe qeniet më të arsimuara që ka dëgjuar ndonjëherë kanë qenë shimpanzetë”, deklaroi Amarilla.

Më tej, ajo shtoi se futbollistët e përfaqësueses së Paraguait duhej ta kishin sulmuar Mbappen në përfundim të ndeshjes.

“E vetmja gjë për të cilën shumë prej nesh pendohen është se La Albirroja nuk i dha një shuplakë të fortë në fytyrë në fund të ndeshjes. Dhe unë as nuk jam tifoze e futbollit”, shtoi Amarilla.

Ndërkohë, edhe Kylian Mbappe reagoi ndaj deklaratave të senatores, duke dënuar ashpër gjuhën e saj dhe duke e cilësuar të papranueshme sjelljen e një zyrtareje publike.

The post FFF nis padi kundër senatores paraguajane Celeste Amarilla pas deklaratave raciste ndaj Kylian Mbappes appeared first on Albeu.com.

Kylian Mbappe ka dalë me një reagim publik ndaj senatores paraguajane Celeste Amarilla, pas komenteve të saj të cilat janë cilësuar si raciste pas ndeshjes Francë – Paraguai në 1/16 e finales së Kupës së Botës.

Me një deklaratë të publikuar pas takimit, sulmuesi i Francës përdori një gjuhë të fortë për të dënuar mënyrën se si ishte sulmuar, si edhe qëndrimin e mbajtur nga zyrtarja paraguajane.

“Zonja Celeste Amarilla, ju jeni një grua e neveritshme dhe e padenjë për pozitën që mbani. Ju nuk përfaqësoni Paraguajin, një vend që gjatë këtij turneu ka treguar pasion dhe nder”, thuhet në deklaratë.

Sipas Mbappe, deklaratat e saj me përmbajtje raciste jo vetëm që kanë lënduar, por edhe kanë dëmtuar imazhin e Paraguajit, duke larguar vëmendjen nga paraqitja e mirë e kombëtares paraguajane në këtë turne.

“Përmes papërgjegjshmërisë dhe racizmit tuaj të hapur, bota tashmë ka harruar rrugëtimin historik të lojtarëve tuaj, duke u përqendruar te një person i paaftë që i jep imazhin më të keq të mundshëm vendit të saj”, vijon deklarata.

Në mbyllje të reagimit të tij, Mbappe nënvizon se nuk do të pranojë në asnjë rast që gjuha e urrejtjes dhe racizmi të përhapen, qoftë në futboll, qoftë në shoqëri në përgjithësi.

“Unë nuk do t’i lejoj kurrë njerëzit si ajo të përhapin urrejtje dhe racizëm në botë”, përfundon reagimi i tij.

The post Mbappe sulmon ashpër senatoren paraguajane Celeste Amarilla pas deklaratave raciste appeared first on Albeu.com.