Carlos Espi është zyrtarisht futbollisti më i ri i Real Madridit, pasi klubi madrilen arriti marrëveshje me Levanten për transferimin e sulmuesit.

Edhe pse ishte shumë pranë një kalimi në Ligën Premier, Espi vendosi ta vazhdojë karrierën te skuadra madrilene, me të cilën firmosi një kontratë pesëvjeçare.

“Los Blancos” e zyrtarizuan marrëveshjen përmes një komunikate, ndërsa për kartonin e lojtarit paguan më shumë se 25 milionë euro.

“Real Madridi dhe Levante janë pajtuar për transferimin e lojtarit Carlos Espi, i cili do të jetë i lidhur me klubin tonë për pesë sezonet e ardhshme, deri më 30 qershor 2031”, thuhet ndër të tjera në njoftimin zyrtar.

Sulmuesi spanjoll 21-vjeçar ka tërhequr vëmendje me paraqitjet e tij gjatë tre viteve të fundit te Levante. Pavarësisht moshës së re, ai regjistroi 66 ndeshje dhe realizoi 20 gola.

Jose Mourinho e konsideron Espin si pasuesin e Gonzalo Garcia, i cili pritet të transferohet te Fulhami, si dhe si një futbollist me profil të ngjashëm me atë që kishte dikur “Joselu”.

The post Zyrtare: Real Madridi fiton garën me klubet angleze dhe transferon Carlos Espin appeared first on Albeu.com.