Ish-ylli i Barcelonës, Carles Rexach, ka veçuar Raphinhën si lojtarin që do të meritonte Topin e Artë, megjithëse sulmuesi brazilian nuk figuron në mesin e pretendentëve të nominuar për këtë trofe të lakmuar personal.

Sipas Rexach, nëse çmimi do të akordohej duke u mbështetur te forma aktuale dhe nivelin e shfaqur në fushë, Raphinha do të ishte zgjedhja e duhur.

“Sikur Topi i Artë të ndahej pikërisht tani, ai do t’i përkiste Raphinhës. Sezonin e shkuar ai ngriti gati çdo trofe, ndërsa në këtë edicion ka realizuar 14 gola”, u shpreh Rexach.

Figura historike e klubit katalanas vuri në dyshim edhe transparencën e kritereve që përcaktojnë fituesin, duke nënvizuar se ato lënë vend për interpretime të shumta.

“Por duhet të jenë më të saktë me parametrat e ndarjes së këtij çmimi. Është e nevojshme të dihet saktësisht intervali kohor që vlerësohet, nëse merren parasysh titujt dhe golat e shënuar, apo nëse një gol i realizuar nga një mbrojtës peshon trefish”, shtoi ai.

Rexach nuk kurseu lëvdatat as për skuadrën e Barcelonës që drejtohet nga Hansi Flick.

Në këndvështrimin e tij, ekipi katalanas po zhvillon një lojë me një intensitet shumë më të lartë se kundërshtarët e tjerë në futbollin spanjoll.

“Për momentin, e vetmja formacion që mund t’i bëjë konkurrencë Barcelonës është Paris Saint-Germain. Të tjerat kanë pak shanse – Barcelona luan me një tjetër kadencë, vrapon dhe angazhohet maksimalisht”, theksoi Rexach.

Rexach i ka kushtuar Barcelonës 44 vite të jetës së tij, fillimisht si produkt i akademisë dhe më pas në poste të ndryshme, përfshirë rolin e trajnerit dhe atë të drejtorit teknik.

Duke reflektuar mbi karrierën e tij të gjatë në klub, ai pranoi se periudha që e ka shijuar më tepër ka qenë ajo si lojtar aktiv.

“Ndoshta kam lënë gjurmë në disa drejtime, sepse kur luan futboll ndikimi yt vjen përmes veprimeve në terren. Më vonë, si trajner, drejtor teknik apo në procesin e zbulimit të talenteve, është krejt tjetër gjë”.

“Por nga të gjitha këto përvoja, ajo që më ka mbetur më shumë në zemër është koha kur isha në fushë, atëherë jam kënaqur më shumë se kurrë”, përfundoi ai.

The post Carles Rexach shpall Raphinhën pretendent për Topin e Artë, edhe pse mungon në listën e kandidatëve appeared first on Albeu.com.